ပဲခူးမြို့ပေါ်ရှိစျေးများထဲတွင် ယခုဇန်နဝါရီလအတွင်း မရမ်းသီးများစတင်ပေါ်ထွက်လာပီ ဖြစ်ပါသည်။ မရမ်းပင်သည် သားစဥ်မြေးဆက်စိုက်ပျိုးထုတ်လုပ်စီးပွားဖြစ်ထွန်းစေသော အပင်တစ်မျိုးပင်ဖြစ်ပါသည်။ အချို၊ အချဥ်အရသာနှစ်မျိုးရှိပြီး မရမ်းသီးအစိမ်းအတိုင်းကို မရမ်းသီးထောင်း၊ မရမ်းသီးကြော်စသည်ဖြင့် စားသောက်ကြသကဲ့သို့ အခြောက်လှမ်း၍ မရမ်းပြား၊ မရမ်းပေါင်း၊ မရမ်းယိုများအဖြစ်လည်း စားသုံးကြပါသည်။ မွန်လူမျိုးများဟင်းချက်သည့်အခါ မရမ်းပြားကို ထည့်ချက်လေ့ရှိကြောင်း တွေ့ရတတ်သည်။ မရမ်းသီးမှည့်သည် အရောင်တဝင်းဝင်းနှင့် ရာသီပေါ်ချိန်ဆိုလျှင် အရောင်းသွက်လှပါသည်။ မရမ်းသီးကို အရသာအလိုက် အချိုမျိုးနှင့် အချဥ်မျိုးဟူ၍ နှစ်မျိုးခွဲထားပါသည်။ မန္တလေးတိုင်း၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း၊ မွန်ပြည်နယ်၊ ကရင်ပြည်နယ်၊ တနင်္သာရီတိုင်းတို့တွင် အများဆုံးစိုက်ပျိုးဖြစ်ထွန်းကြသည်။
ပဲခူးမြို့ပေါ်ရှိစျေးများထဲတွင် ယခင်ဇန်နဝါရီလ ပထမအပတ်တွင် မရမ်းသီးတစ်ပိဿာလျှင် ၂၅၀၀၀ကျပ်၊ တစ်ဆယ်သားလျှင် ၂၅၀၀ကျပ်ဖြင့်ရောင်းချလျက်ရှိပြီး ယခု ဇန်နဝါရီလ တတိယအပတ်တွင် မရမ်းသီးတစ်ပိဿာလျှင် ၁၅၀၀၀ကျပ်၊ တစ်ဆယ်သားလျှင် ၁၅၀၀ကျပ်ဖြင့် ရောင်းချလျက်ရှိကြောင်း သိရှိရပါသည်။
DOCA(ပဲခူး)