အာလူးသီးနှံသည် အာဟာရတန်ဖိုးမြင့်မားသောကြောင့် ကမ္ဘာ့နိုင်ငံအများစုတွင် အဓိက အစားအစာအဖြစ် စားသုံးလျက်ရှိသောသီးနှံဖြစ်ပါသည်။ မြန်မာ့အာလူးစိုက်ဧရိယာ၏ (၇၅)ရာခိုင်နှုန်းကျော် ကိုရှမ်းပြည်နယ်တွင် စိုက်ပျိုးပြီး စိုက်ပျိုးသူအတွက်အကျိုးအမြတ်ရှိသည့် သီးနှံဖြစ်သည့်အပြင် စားသုံးသူတို့အတွက်လည်း အာဟာရတန်ဖိုးမြင့်မားသဖြင့် မြန်မာနိုင်ငံအတွင်း စိုက်ပျိုးဖြစ်ထွန်းသောဒေသများ၌ တိုးချဲ့စိုက်ပျိုးလျက်ရှိသည်။ အာလူးသီးနှံသည် အေး၍သမရာသီဥတုကို ကြိုက်နှစ်သက်ပါသည်။ မိုးရေချိန်(၄၀-၈၀)လက်မရွာသွန်းသောဒေသများတွင် ဖြစ်ထွန်းပါသည်။ ဆည်ရေ၊ မြောင်းရေရရှိသည့်ဒေသများတွင် ဆောင်းရာသီ၌ စိုက်ပျိုးကြပါသည်။ အာလူးစိုက်ပျိုးဖြစ်ထွန်းသည့် အသင့်တော်ဆုံးအပူချိန်မှာ (၁၆-၂၇)ဒီဂရီစင်တီဂရိတ်ဖြစ်၍ (၂၈)ဒီဂရီစင်တီဂရိတ် ထက်ကျော်လွန်ပါက အပင်ကြီးထွားမှုနှေးကွေးသွားပါသည်။ အာလူးပင်၏သက်တမ်းမှာ ပုံမှန်အားဖြင့် ၃လခွဲ-၄ လအတွင်းရှိပြီး နေ့တာရှည်ပါက သက်တမ်းအနည်းငယ်ပိုရှည်၍ နေ့တာတိုပါက သက်တမ်းအနည်းငယ်တိုပါသည်။ ပဲခူးမြို့ပေါ်ရှိစျေးများတွင် ယခုဇန်နဝါရီလတတိယအပတ်တွင် အာလူးစျေးနှုန်းမှာ အကြီးတစ်ပိဿာလျှင် လက်လီစျေး(၅၈၀၀-၆၀၀၀)ခန့်ရှိပြီး၊ လက်ကား စျေးနှုန်းမှာ (၅၀၀၀)ကျပ်ခန့်ဖြင့်ရောင်းချလျက်ရှိကြောင်း သိရှိရပါသည်။
DOCA(ပဲခူး)