ကမ္ဘောဒီးယား သီဟိုဠ်စေ့စိုက်ပျိုးထုတ်လုပ်သူများအသင်း (CAC) သည် ပြည်ပဈေးကွက် များသို့ ဖြန့်ကျက်ရန်နှင့် တရုတ်နှင့် ဂျပန်သို့ တိုးမြှင့်တင်ပို့ရန် ရည်ရွယ်၍ ဖေဖော်ဝါရီလနှင့် မတ် လတို့တွင် စီးပွားရေးလုပ်ငန်းရှင်အချင်းချင်း မိတ်ဆက်တွေ့ဆုံပွဲ (B2B) နှစ်ခုကို ကျင်းပပြုလုပ်ရန် စီစဉ်လျက်ရှိကြောင်း သိရှိရသည်။
သီဟိုဠ်စေ့အဆံနှင့် အခွံဝယ်ယူရန် စိတ်ဝင်စားသော တရုတ်ကုမ္ပဏီ ၁၀ ခုအား ပြည်တွင်း ကုန်သည်များနှင့် ချိတ်ဆက်ကာ ဖေဖော်ဝါရီတွင် မြို့တော်ဖနွမ်းပင်၌ တွေ့ဆုံပွဲတစ်ခု စီစဉ်ပေး သွားမည်ဖြစ်ပြီး အဆိုပါပွဲကို တရုတ်-ကမ္ဘောဒီးယား စီးပွားရေးမြှင့်တင်ဖော်ဆောင်မှုအသင်းနှင့် ပူးပေါင်း စီစဉ်သွားမည်ဖြစ်ကြောင်းသိရှိရသည်။
မတ်လတွင်ပြုလုပ်မည့် ဒုတိယတွေ့ဆုံပွဲတွင် CAC အဖွဲ့ဝင်များနှင့် ဂျပန်ကုမ္ပဏီများ ပါဝင် ရန် စီစဉ်ထားကြောင်း၊ ဂျပန်အပြည်ပြည်ဆိုင်ရာကုန်သွယ်မှုအဖွဲ့ (JETRO) က ဦးစီးပြုလုပ်သည့် အစီအစဉ်များသည် ကမ္ဘောဒီးယား သီဟိုဠ်စေ့များကို ဂျပန်ဈေးကွက်သို့ တိုးမြှင့်တင်ပို့နိုင်ရေး အထူးရည်ရွယ်ထားခြင်းဖြစ်ကြောင်းသိရသည်။
ကမ္ဘောဒီးယားစက်ရုံ ၄၀ နီးပါးသည် ဂျပန်ကုမ္ပဏီ၂၀ နှင့် တွေ့ဆုံခွင့်ရရှိရန် မျှော်မှန်းထား ကြောင်း၊ ယခုတွေ့ဆုံမှုသည် ၂၀၂၅ ခုနှစ် နိုဝင်ဘာလတွင် အဆင့်မြင့်ဆွေးနွေးမှုများ ပြုလုပ်ခဲ့ပြီး နောက် ပေါ်ပေါက်လာသည့် အစီအစဉ်ဖြစ်ပြီး၊ ယင်းအစီအစဉ်တွင် မတ်လ ၉ ရက်နေ့ Kampong Thom ဒေသသို့ အလည်အပတ် ပို့ဆောင်မှုအပါအဝင် ဧည်သည့်တော်များအနေဖြင့် ထုတ်လုပ်မှု စံချိန်စံညွှန်းများနှင့် ထုတ်လုပ်သည့်စက်ရုံ၊ အလုပ်ရုံများအား စစ်ဆေးခြင်းလည်းပါဝင် သွားမည် ဖြစ်ကြောင်းသိရသည်။
ကမ္ဘောဒီးယား၏ သီဟိုဠ်စေ့တင်ပို့မှုသည် ၂၀၂၅ ခုနှစ်တွင် စံချိန်တင်ဖြစ်ခဲ့ကာ သီဟိုဠ်စေ့ ကုန်ကြမ်းတန်ချိန် တစ်သန်းကျော် တင်ပို့နိုင်ခဲ့ပြီး၊ ဝင်ငွေ ဒေါ်လာ ၁.၅ ဘီလီယံရရှိခဲ့ကြောင်း သိရ သည်။ လက်ရှိတွင် ဗီယက်နမ်သို့ ၉၀ ရာခိုင်နှုန်းတင်ပို့လျက်ရှိရာ အစိုးရ၏ အမျိုးသားအဆင့် သီဟိုဠ်စေ့ တင်ပို့မှုမူဝါဒ (၂၀၂၂-၂၀၂၇) အရ ကမ္ဘာ့ဈေးကွက်သို့ တိုက်ရိုက်တင်ပို့ရန်နှင့် ပြည်တွင်း ထုတ်လုပ်မှု အဆင့်ဆင့်၏ စွမ်းရည်ကို တိုးမြှင့်ဆောင်ရွက်ရန်ရည်ရွယ်ကြောင်းသိရှိရသည်။
Source : Khmer Times, January 24, 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)