မကွေးတိုင်းဒေသကြီး၊ ပခုက္ကူခရိုင်၊ ရေစကြိုမြို့နယ်အတွင်း ချင်းတွင်းမြစ်ရေဝင်ရောက်ရာ ဒေသများတွင် မြစ်ရေကျချိန်၌ ဆောင်းသီးနှံများဖြစ်သည့် ကြက်သွန်နီ၊ မြေပဲ၊ကုလားပဲ၊ ထောပတ် ပဲ၊ ပဲဇီးကွက်၊ ပဲနီပြား စသည့်အခြားပဲမျိုးစုံသီးနှံများကို စိုက်ပျိုးကြပါသည်။ ချင်းတွင်းမြစ်၏ အနောက်ဘက်ကမ်းကျေးရွာများဖြစ်သည့် ညောင်တော၊ ရှစ်အိမ်တန်း၊ ကျွန်းဘိုပင်၊ ဇီးကျွန်း၊ ကူတုတ်နှင့် အောင်ချမ်းသာကျေးရွာများတွင် ထောပတ်ပဲများကို အများအပြားစိုက်ပျိုးကြပါသည်။ ဇီးကျွန်း ကျေးရွာနေ ထောပတ်ပဲစိုက်တောင်သူတစ်ဦးက ချင်းတွင်းမြစ်ရေကျချိန် အောက်တိုဘာ၊ နိုဝင်ဘာ လများတွင် ထောပတ်ပဲများကို စတင်စိုက်ပျိုးကြပြီး မိမိအနေဖြင့်ယခင်နှစ်က (၂) ဧကခန့် စိုက်ပျိုးခဲ့ကြောင်း၊ ထောပတ်ပဲသီးနှံ (၁) ဧက စိုက်ပျိုးကုန်ကျမှုစရိတ်အနေဖြင့် မျိုး၊ သွင်းအားစု၊ မြေပြင်ခြင်း၊ ရိတ်သိမ်းခြင်းများ အတွက် (၈)သိန်းခန့် ယခင်နှစ်က ကုန်ကျခဲ့ကြောင်း၊ အထွက် အနေဖြင့်(၂၀)တင်းခန့်ထွက်ရှိခဲ့ကြောင်း၊ (၁)တင်းလျှင် ကျပ်(၈၅၀၀၀)ဖြင့် ရောင်းချခဲ့ရသည့် အတွက် အကျိုး အမြတ် အနေဖြင့် (၉)သိန်းခန့်ရရှိခဲ့ပါသည်။
ယခုနှစ်တွင် ဇီးကျွန်းကျေးရွာအုပ်စုတစ်ခုလုံးတွင် (၅၀)ဧကခန့် စိုက်ပျိုးကြကြောင်း၊ မိမိ အနေ ဖြင့် (၃)ဧက စိုက်ပျိုးထားသည့် ထောပတ်ပဲ စိုက်ခင်းများ၏ လတ်တလောအခြေအနေအရ အသီး အပွင့်များဝေဆာ၍အထွက်နှုန်းကောင်းနိုင်ကြောင်း၊ မတ်လကုန်ခန့်တွင် ရိတ်သိမ်းရမည်ဖြစ် ကြောင်း၊ ယခုလက်ရှိအတိုင်း ပိုးမွှားအန္တရာယ်ကျရောက်မှုမရှိခြင်းနှင့် ရာသီဥတုဖောက်ပြန်မှုမရှိ ပါက(၁)ဧကလျှင် (၂၀/၂၅) တင်းခန့် ထွက်ရှိနိုင်ကြောင်း ခန့်မှန်းမိပါသည်။ ယခုနှစ် ကုန်ကျစရိတ် အနေဖြင့် မျိုး၊ သွင်းအားစု၊ မြေပြင်ခြင်း၊ရိတ်သိမ်းခြင်းများမှာ ဈေးနှုန်းများကြီးမြင့်နေသောကြောင့် (၁)ဧက ကုန်ကျ စရိတ် ကျပ်(၁၀)သိန်းခန့် ကုန်ကျကြောင်း၊ လက်ရှိအနေဖြင့် (၁)တင်းလျှင် ကျပ် (၇၅၀၀၀)ခန့်ရှိကြောင်း၊ ထောပတ်ပဲစိုက်တောင်သူများအနေဖြင့် မကြာမီ ရိတ်သိမ်းတော့မည်ဖြစ် သည့် အတွက် လက်ရှိအတိုင်းရရှိမည်ဆိုလျှင် အကျိုးအမြတ်အနေဖြင့် (၇)သိန်းခန့်ရရှိနိုင်ကြောင်း၊ အထွက်နှန်း ကောင်းပြီး ဈေးကောင်းရရှိနိုင်ရေး မျှော်လင့်လျက်ရှိကြောင်း တောင်သူတစ်ဦး၏ ပြောပြချက်အရ သိရှိရပါသည်။
DOCA(မကွေး)