ထိုင်းနိုင်ငံ၏ ပို့ကုန်များမြင့်တက်

          အီလက်ထရွန်နစ်ပစ္စည်းများအပေါ် ကမ္ဘာတစ်ဝန်း ဝယ်လိုအား ဆက်လက်ရှိနေမှုကြောင့် စက်မှုထုတ်ကုန်တင်ပို့မှုများ မြင့်တက်လာခဲ့ပြီး ဇန်နဝါရီလတွင် ထိုင်းနိုင်ငံ၏ ပို့ကုန်များ ၁၉ လဆက်တိုက် တိုးတက်လာခဲ့ကြောင်း ဖေဖော်ဝါရီလ ၂၃ ရက်နေ့တွင် ထုတ်ပြန်သည့် တရားဝင် အချက်အလက်များအရ သိရသည်။

         အရှေ့တောင်အာရှနိုင်ငံဖြစ်သည့် ထိုင်းနိုင်ငံ၏ စီးပွားရေးတိုးတက်မှုအတွက် အဓိက မောင်းနှင်အားဖြစ်သော ပို့ကုန်ကဏ္ဍသည် ပြီးခဲ့သည့်လတွင် ယခင်နှစ် အလားတူကာလနှင့် နှိုင်းယှဉ်ပါက ၂၄.၄ ရာခိုင်နှုန်း ခုန်တက်သွားခဲ့ပြီး အမေရိကန်ဒေါ်လာ ၃၁.၆ ဘီလီယံအထိ ရှိလာ ခဲ့ကာ ၎င်းမှာ လေးနှစ်အတွင်း အားအကောင်းဆုံး တိုးတက်မှုဖြစ်ကြောင်း စီးပွားရေးနှင့် ကူးသန်း ရောင်းဝယ်ရေး ဝန်ကြီးဌာနက ပြောကြားခဲ့သည်။

        တယ်လီဖုန်းများနှင့် ဆက်စပ်ပစ္စည်းများအပြင် ကွန်ပျူတာများ၊ ကိရိယာများနှင့် အပို ပစ္စည်းများ ရောင်းချရမှု အားကောင်းခြင်းကြောင့် စက်မှုထုတ်ကုန် တင်ပို့မှုများသည် ယခင်နှစ်က ထက် ဇန်နဝါရီလတွင် ၂၉.၈ ရာခိုင်နှုန်း အထိ မြင့်တက်ခဲ့ပြီး ၂၂ လဆက်တိုက် တိုးတက်မှုကို မှတ်တမ်း တင်နိုင်ခဲ့သည်။

        တစ်ချိန်တည်းမှာပင် အထူးသဖြင့် ဆန်နှင့် ရော်ဘာကဲ့သို့သော အဓိက ထွက်ကုန်များ သိသိသာသာ ကျဆင်းသွားသည့်အတွက် လယ်ယာထွက်ကုန် ပို့ကုန်များ ၁.၈ ရာခိုင်နှုန်း ကျဆင်း  ခဲ့ပြီး လယ်ယာအခြေခံ စက်မှုထုတ်ကုန်များမှာ ၁.၇ ရာခိုင်နှုန်း ကျဆင်းခဲ့သည်။

       ဇန်နဝါရီလအတွင်း သွင်းကုန်များမှာလည်း ယခင်နှစ်ကထက် ၂၉.၄ ရာခိုင်နှုန်း တိုးလာ ကာ ဒေါ်လာ ၃၄.၉ ဘီလီယံအထိ ရှိခဲ့သည့်အတွက် ကုန်သွယ်ရေးလိုငွေ ဒေါ်လာ ၃.၃ ဘီလီယံ ဖြစ်ပေါ်ခဲ့ကြောင်း အဆိုပါ အချက်အလက်များက ဖော်ပြထားသည်။

         ဒစ်ဂျစ်တယ် အခြေခံအဆောက်အအုံများဆီသို့ ကမ္ဘာလုံးဆိုင်ရာ အသွင်ကူးပြောင်းမှု အပြင် AI ဒေတာစင်တာများတွင် ရင်းနှီးမြှုပ်နှံမှုနှင့် ဖွံ့ဖြိုးတိုးတက်မှုများ ဆက်လက်လုပ်ဆောင်နေခြင်းတို့၏ အထောက်အပံ့ဖြင့် ထိုင်းနိုင်ငံ၏ ပို့ကုန်များသည် ၂၀၂၆ ခုနှစ်တွင် ဆက်လက်မြင့် တက်မည့် အလားအလာရှိကြောင်း ဝန်ကြီးဌာန၏ ထုတ်ပြန်ချက်တွင် ဖော်ပြထားကြောင်း သိရှိရပါသည်။

Source : Xinhua

DOCA (ရန်ကုန်)