၂၀၂၆ အစပိုင်းတွင် တိုးတက်မှုအားကောင်းနေသည့်ဗီယက်နမ်၏  စိုက်ပျိုးမွေးမြူရေး–သစ်တော–ရေထွက်ကုန်တင်ပို့မှု

        ဗီယက်နမ်နိုင်ငံ၏ စိုက်ပျိုးမွေးမြူရေး၊ သစ်တောနှင့် ရေထွက်ကုန်တင်ပို့မှုတန်ဖိုးသည် ၂၀၂၆ ခုနှစ် ပထမနှစ်လအတွင်း ဆက်လက်တိုးတက်နေပြီး ယခင်နှစ်တူညီသည့်ကာလနှင့် နှိုင်းယှဉ်ပါက ၁၇.၁ ရာခိုင်နှုန်းမြင့်တက်ကာ အမေရိကန်ဒေါ်လာ ၁၁.၃ ဘီလီယံခန့် ရရှိခဲ့ကြောင်း စိုက်ပျိုးမွေးမြူရေးနှင့် သဘာဝပတ်ဝန်းကျင်ဝန်ကြီးဌာနက ပြောကြားခဲ့ပါသည်။ ဖေဖော်ဝါရီလ တစ်လအတွင်း တင်ပို့မှုတန်ဖိုးမှာ အမေရိကန်ဒေါ်လာ ၄.၇၁ ဘီလီယံခန့် ရှိခဲ့ပြီး ဇန်နဝါရီလနှင့် နှိုင်းယှဉ်ပါက ၂၈.၄ ရာခိုင်နှုန်း လျော့နည်းခဲ့သော်လည်း ယခင်နှစ်ဖေဖော်ဝါရီလနှင့်နှိုင်းယှဉ်ပါက ၁.၉ ရာခိုင်နှုန်း တိုးတက်ခဲ့ကြောင်း သိရပါသည်။ ဇန်နဝါရီ–ဖေဖော်ဝါရီ ကာလအတွင်း စုစုပေါင်း တင်ပို့မှုတန်ဖိုးထဲတွင် စိုက်ပျိုးမွေးမြူရေးထုတ်ကုန်များတင်ပို့မှုမှ အမေရိကန်ဒေါ်လာ ၆.၀၉ ဘီလီယံရရှိခဲ့ပြီး ၁၇.၁ ရာခိုင်နှုန်းမြင့်တက်ခဲ့ကြောင်း သိရပါသည်။ ပင်လယ်စာတင်ပို့မှုမှ အမေရိကန် ဒေါ်လာ ၁.၇၆ ဘီလီယံ ရရှိကာ ၂၃.၃ ရာခိုင်နှုန်း မြင့်တက်ခဲ့သကဲ့သို့ သစ်တောထုတ်ကုန်များ တင်ပို့မှုမှ အမေရိကန် ဒေါ်လာ ၂.၈၂ ဘီလီယံ ရရှိပြီး ၇.၄ ရာခိုင်နှုန်း မြင့်တက်ခဲ့ကြောင်း သိရပါသည်။ တိရစ္ဆာန်မွေးမြူရေးထုတ်ကုန်များတင်ပို့မှုသည် ၈၄.၃ ရာခိုင်နှုန်း မြင့်တက်ကာ အမေရိကန်ဒေါ်လာ ၁၄၀.၇ သန်း ရရှိခဲ့ကြောင်း သိရပါသည်။ ထုတ်လုပ်ရေးအတွက် အသုံးပြုသည့် input များ တင်ပို့မှုသည် ၅၁.၇ ရာခိုင်နှုန်း မြင့်တက်ခဲ့ပြီး ဆားတင်ပို့မှုသည်လည်း ယခင်နှစ်တူညီသည့်ကာလနှင့်နှိုင်းယှဉ်ပါက ၆၉ ရာခိုင်နှုန်း မြင့်တက်ခဲ့ကြောင်း သိရပါသည်။ ဗီယက်နမ်၏ စိုက်ပျိုးမွေးမြူရေး–သစ်တော–ရေထွက်ကုန် တင်ပို့မှုများအတွက် အာရှဒေသသည် အဓိကဈေးကွက်ဖြစ်နေဆဲဖြစ်ပြီး စုစုပေါင်းတင်ပို့မှုတန်ဖိုး၏ ၄၅.၅ ရာခိုင်နှုန်းကို ပိုင်ဆိုင်ထားကြောင်း သိရပါသည်။ ထို့နောက် အမေရိကတိုက်သည် ၂၁ ရာခိုင်နှုန်းဖြင့် ဒုတိယ၊ ဥရောပသည် ၁၅.၇ ရာခိုင်နှုန်းဖြင့် တတိယနေရာတွင် ရပ်တည်နေကြောင်း သိရပါသည်။ အာဖရိကနှင့် သမုဒ္ဒရာပိုင်းဒေသများသည် ၂.၂ ရာခိုင်နှုန်းနှင့် ၁.၄ ရာခိုင်နှုန်း အသီးသီးပိုင်ဆိုင်ထားကြောင်း သိရပါသည်။ ယခင်နှစ်တူညီသည့်ကာလနှင့် နှိုင်းယှဉ်ပါက အာရှသို့ တင်ပို့မှုတန်ဖိုးမှာ ၂၇.၇ ရာခိုင်နှုန်း မြင့်တက်ခဲ့ပြီး အမေရိကတိုက်သို့ ၁၀.၄ ရာခိုင်နှုန်း၊ ဥရောပသို့ ၁၂ ရာခိုင်နှုန်း အသီးသီးမြင့်တက်ခဲ့ကြောင်း သိရပါသည်။ သမုဒ္ဒရာပိုင်းဒေသသို့ တင်ပို့မှုတန်ဖိုးမှာ ၃၂.၄ ရာခိုင်နှုန်း မြင့်တက်ခဲ့သော်လည်း အာဖရိကသို့ တင်ပို့မှုတန်ဖိုးမှာ ၁၉.၆ ရာခိုင်နှုန်း လျော့နည်းခဲ့ကြောင်း သိရပါသည်။ နိုင်ငံအလိုက်ဆိုပါက တရုတ်နိုင်ငံသည် ဗီယက်နမ်၏ အကြီးဆုံးတင်သွင်းသူ ဖြစ်နေဆဲဖြစ်ပြီး စုစုပေါင်း ပို့ကုန်တန်ဖိုး၏ ၂၂.၉ ရာခိုင်နှုန်းကို ပိုင်ဆိုင်ထားကြောင်း သိရပါသည်။ ထို့နောက် အမေရိကန်နိုင်ငံက ၁၈.၇ ရာခိုင်နှုန်း၊ ဂျပန်နိုင်ငံက ၇.၂ ရာခိုင်နှုန်းဖြင့် အသီးသီးရပ်တည်နေကြောင်း သိရပါသည်။ ဝန်ကြီးဌာန၏အဆိုအရ ယခုနှစ်အစပိုင်းတွင် ရရှိသည့် တိုးတက်မှုများသည် ဈေးကွက်ပြန်လည်ကောင်းမွန်လာနေသည့် လက္ခဏာဖြစ်ပြီး ၂၀၂၆ ခုနှစ် အတွက် ပို့ကုန်ပန်းတိုင်ဖြစ်သော အမေရိကန်ဒေါ်လာ ၇၃ မှ ၇၅ ဘီလီယံအထိရရှိရန် အခြေခံကောင်းတစ်ခုဖြစ်စေသည်ဟု သိရပါသည်။ တိုးတက်မှုကို ဆက်လက်ထိန်းသိမ်းနိုင်ရန် ဝန်ကြီးဌာနသည် ထုတ်ကုန်တန်ဖိုးမြှင့်တင်ရေး၊ တည်တံ့ခိုင်မြဲသော ဖွံ့ဖြိုးတိုးတက်မှုကို အားပေးရေးနှင့် နိုင်ငံတကာဈေးကွက်များ၏ တင်းကျပ်လာသော စံချိန်စံညွှန်းများနှင့် ကိုက်ညီစေရန် ဆောင်ရွက်မှုများကို အဓိကထား အကောင်အထည်ဖော်မည်ဟု သိရပါသည်။ ထို့အပြင် ကမ္ဘာလုံးဆိုင်ရာ နိုင်ငံရေးအခြေအနေများကြောင့် သယ်ယူပို့ဆောင်ရေး၊ ငွေပေးချေမှုနှင့် ကုန်သွယ်ရေးစီးဆင်းမှုများအပေါ် သက်ရောက်မှုရှိနိုင်သဖြင့် ကြိုတင်ခန့်မှန်းမှုစနစ်များကို အားကောင်းစေရန်နှင့် ကမ္ဘာ့ကုန်သွယ်ရေး ပြောင်းလဲမှုများကို တုံ့ပြန်နိုင်မည့် စီမံချက်များ ပြုစုသွားမည်ဖြစ်ကြောင်း သိရပါသည်။ ထုတ်လုပ်ရေးဘက်တွင်လည်း ထုတ်လုပ်မှု၊ အခြေခံလုပ်ငန်းစဉ်၊ အဆင့်မြင့်ပြုပြင် ထုတ်လုပ်မှုနှင့် ဖြန့်ဖြူးမှုများအကြား ချိတ်ဆက်မှုကို ခိုင်မာစေရန် ကြိုးပမ်းသွားမည်ဖြစ်ပြီး ထုတ်ကုန်အရည်အသွေးနှင့် ပို့ကုန်ဈေးကွက်အတွက် ပံ့ပိုးမှုတည်ငြိမ်စေရန် ကုန်ကြမ်းဇုန်များကို တိုးချဲ့သွားမည်ဟု သိရပါသည်။ ထို့ပြင် လုပ်ငန်းရှင်များကို နည်းပညာအသစ်များတွင် ရင်းနှီးမြှုပ်နှံရန်၊ post-harvest သိုလှောင်ထိန်းသိမ်းသည့်နည်းပညာများနှင့် by-product ပြန်လည် အသုံးချမှုများကို မြှင့်တင်ရန် အားပေးကူညီသွားမည်ဖြစ်ပြီး စက်ဝန်းပုံစီးပွားရေးမော်ဒယ်အတိုင်း ပစ္စည်းအသုံးချမှုကို အများဆုံးလုပ်ဆောင်ကာ အလေအလွင့်လျော့ချပြီး ထုတ်ကုန်တန်ဖိုး မြှင့်တင်နိုင်ရန် ရည်ရွယ်ထားကြောင်း သိရပါသည်။ အာဏာပိုင်များအနေဖြင့်လည်း စီမံထုတ်လုပ်ရေးနှင့် သိုလှောင်ထိန်းသိမ်းရေး စက်ရုံများတွင် အရည်အသွေးထိန်းချုပ်မှုစွမ်းရည်ကို မြှင့်တင် ကာ လုပ်ငန်းများအား နည်းပညာဆိုင်ရာ စံချိန်စံညွှန်းများနှင့် တင်သွင်းမှုလိုအပ်ချက်များကို လိုက်နာနိုင်ရန် လမ်းညွှန်ပေးမည်ဖြစ်ပြီး ဗီယက်နမ် စိုက်ပျိုးမွေးမြူရေး–သစ်တော–ရေထွက်ကုန်များ၏ အမှတ်တံဆိပ်မြှင့်တင်ရေးနှင့် ခေတ်မီ၍ တည်တံ့ခိုင်မြဲသော ထောက်ပံ့ပို့ဆောင်ရေးစနစ်များ ဖွံ့ဖြိုးတိုးတက်ရေးကိုလည်း အားပေးသွားမည်ဖြစ်ကြောင်း သိရှိရပါသည်။

Vietnam Plus                                                                            

DOCA (ရန်ကုန်)