စွမ်းအင်ကဏ္ဍနှင့် ပြည်ပတင်ပို့မှုလိုအပ်ချက် မြင့်တက်နေချိန်တွင် ပြည်တွင်းရိက္ခာဖူလုံမှုကို ကာကွယ်ရန်အတွက် ထိုင်းနိုင်ငံသည် စားအုန်းဆီအကြမ်း ပြည်ပတင်ပို့မှုကို ဧပြီလ ၇ ရက်နေ့မှစ၍ တင်းကျပ်သွားမည်ဖြစ်ကြောင်း သိရပါသည်။ အဆိုပါအစီအမံကို ကုန်စည်နှင့် ဝန်ဆောင်မှုဆိုင်ရာ ဈေးနှုန်းဗဟိုကော်မတီ၏ ၂၀၂၆ ခုနှစ် ကြေညာချက်အမှတ် (၁) အဖြစ် တော်ဝင်ဂေဇက် (Royal Gazette) တွင် ထုတ်ပြန်ခဲ့ကြောင်း သိရပါသည်။
အဆိုပါ အကြောင်းကြားစာအရ မည်သူမဆို ဧပြီလ ၇ ရက်နေ့မှစ၍ ကုန်စည်နှင့် ဝန်ဆောင်မှုဆိုင်ရာ ဈေးနှုန်းဗဟိုကော်မတီ အထွေထွေအတွင်းရေးမှူးထံမှ ကြိုတင်စာသားဖြင့် ခွင့်ပြုချက်မရရှိဘဲ စားအုန်းဆီအကြမ်း (CPO) ကို ပြည်ပသို့ တင်ပို့ခြင်းပြုနိုင်မည် မဟုတ်ကြောင်း သိရပါသည်။ ခွင့်ပြုချက်လျှောက်ထားလွှာများကို စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၊ ပြည်တွင်းကုန်သွယ်ရေး ဦးစီးဌာနရှိ ဗဟိုကော်မတီရုံးသို့ တင်ပြရမည်ဖြစ်ကြောင်း သိရပါသည်။ အဆိုပါထိန်းချုပ်မှု အစီအမံသည် ကြေညာချက်ထုတ်ပြန်ပြီး နောက်တစ်ရက်မှစ၍ တစ်နိုင်ငံလုံး အတိုင်းအတာဖြင့် တစ်နှစ်ကြာ အကျုံးဝင်မည်ဖြစ်ကြောင်းနှင့် အကယ်၍ အကြောင်းကြားစာအသစ် စောစီးစွာ ထွက်ပေါ်လာခြင်းမရှိပါက ဤအတိုင်း အတည်ဖြစ်ကြောင်း ဖော်ပြထားပါသည်။
ခွင့်ပြုချက်ရရှိသော တင်ပို့သူများသည် ခွင့်ပြုမိန့်တွင် ဖော်ပြထားသည့် အမျိုးအစား၊ အရေအတွက်၊ အချိန်ကာလနှင့် ဦးတည်ရာနိုင်ငံအတိုင်းသာ တင်ပို့ရမည်ဖြစ်ပြီး၊ တင်ပို့မှုတိုင်းတွင် ခွင့်ပြုမိန့်ပါရှိရမည်ဖြစ်ကြောင်းနှင့် ခွင့်ပြုမိန့်တစ်ခုလျှင် တစ်ကြိမ်သာ တင်ပို့ရန်အသုံးပြုနိုင် ကြောင်း သိရပါသည်။ ထိုသတ်မှတ်ချက်များကို လိုက်နာရန်ပျက်ကွက်သည့် မည်သည့်တင်ပို့မှုမဆို ခွင့်ပြုချက်မရှိဘဲ တင်ပို့မှုအဖြစ် သတ်မှတ်မည်ဖြစ်ကြောင်း သိရပါသည်။
အရှေ့အလယ်ပိုင်း ပဋိပက္ခကြောင့် ကမ္ဘာ့ရေနံဈေးနှုန်းများ ဆက်လက်မြင့်တက်နေကြောင်း မတ်လ ၂၅ ရက်နေ့က ဆုံးဖြတ်ချက်ချပြီးနောက် ယခုကဲ့သို့ အရေးယူဆောင်ရွက်ခြင်းဖြစ်သည်ဟု ကော်မတီက ပြောကြားခဲ့ပါသည်။ တစ်ချိန်တည်းမှာပင် စွမ်းအင်ကဏ္ဍ၌ ဒီဇယ်တွင် ဘိုင်အိုဒီဇယ် ရောစပ်မှုနှုန်းမြှင့်တင်ရန် မျှော်မှန်းထားသကဲ့သို့၊ ထိုင်းစားအုန်းဆီအကြမ်းကို ပြည်ပမှဝယ်ယူလိုသည့် အဝယ်လိုက်မှုလည်း မြင့်တက်နေခြင်းက ပြည်တွင်း၌ CPO လိုအပ်ချက် ပိုမိုအားကောင်းလာစေမည့် အလားအလာဖြစ်ပေါ်နေကြောင်း သိရပါသည်။ အဆိုပါ လုပ်ဆောင်ခြင်း၏ ရည်ရွယ်ချက်မှာ စားအုန်းဆီအကြမ်းပမာဏကို ဈေးကွက်အခြေအနေနှင့်အညီ စီမံခန့်ခွဲရန်နှင့် စားသုံးမှု၊ စက်မှုလက်မှုနှင့် စွမ်းအင်ကဏ္ဍတို့အကြား မျှခြေကို ထိန်းသိမ်းရန်ဖြစ်ပြီး၊ တစ်နှစ်ပတ်လုံး ပြည်တွင်းအသုံးပြုရန်အတွက် လုံလောက်သော ရိက္ခာရှိနေစေရန် အာမခံချက်ပေးနိုင်ရန်ဖြစ်ကြောင်း သိရပါသည်။ အဆိုပါကြေညာချက်ကို ကုန်စည်နှင့် ဝန်ဆောင်မှုဆိုင်ရာ ဈေးနှုန်းဗဟိုကော်မတီ ဥက္ကဋ္ဌ တာဝန်ဖြင့် လက်ရှိ ဒုတိယဝန်ကြီးချုပ်နှင့် စီးပွားရေးနှင့် ကူးသန်းရောင်းဝယ်ရေးဝန်ကြီးဖြစ်သူ Suphajee Suthumpun က မတ်လ ၂၆ ရက်နေ့တွင် လက်မှတ်ရေးထိုးခဲ့ခြင်းဖြစ်ကြောင်း သိရှိရပါသည်။
Source: Nation Thailand
DOCA (ရန်ကုန်)