၂၀၂၆-၂၀၂၇ ဈေးကွက်နှစ်တွင် ဖိလစ်ပိုင်နိုင်ငံ၏ ဆန်တင်သွင်းမှုသည် မက်ထရစ်တန် ၅ သန်းကျော်ရှိမည်ဟု ခန့်မှန်းထားကြောင်း အမေရိကန်စိုက်ပျိုးရေးဌာန (USDA) က ပြောကြားခဲ့ သည်။ ၎င်း၏ အဆိုအရ လက်ရှိ ၂၀၂၅-၂၀၂၆ စျေးကွက်နှစ်တွင် ခန့်မှန်းထားသည့် မက်ထရစ်တန် ၄.၄ သန်းမှ မြင့်တက်လာကာ ထိုကာလအတွင်း ဆန်တင်သွင်းမှုသည် ၁၆% နီးပါး တိုးလာမည်ဟု ခန့်မှန်းထားသည်။
ဆန်ဈေးကွက်နှစ်ကို ဇူလိုင်လမှ စတင်၍ နောက်နှစ် ဇွန်လအထိ သတ်မှတ်ထားခြင်းဖြစ်ပြီး ဆန်တင်သွင်းမှု မြင့်တက်လာခြင်းမှာ လက်ရှိဈေးကွက်နှစ်မှ ကျန်ရှိသည့် သိုလှောင်မှုပမာဏ လျော့နည်းလာခြင်းနှင့် ဆက်စပ်နေကြောင်း သိရသည်။ ၂၀၂၆-၂၀၂၇ စျေးကွက်နှစ်တွင် ဆန် လက်ကျန်ပမာဏသည် မက်ထရစ်တန် ၂.၉ သန်း အထိ ကျဆင်းမည်ဟု ခန့်မှန်းထားပြီး ယခင် နှစ်၏ မက်ထရစ်တန် ၂.၉၅ သန်းထက် အနည်းငယ်ကျဆင်းသွားဖွယ်ရှိသည်။
ထို့အပြင် ဆန်တင်သွင်းမှုကို လေးလကြာ တားမြစ်ထားခြင်း၏ သက်ရောက်မှုကြောင့် သိုလှောင်မှု လက်ကျန်ပမာဏများ လျော့နည်းလာသဖြင့် ယခင်ဈေးကွက်နှစ်နှင့်နှိုင်းယှဉ်လျှင် ဆက်လက်ကျဆင်းမည်ဟု ခန့်မှန်းထားကြောင်း USDA က ပြောကြားထားသည်။
၂၀၂၆-၂၀၂၇ စျေးကွက်နှစ်တွင် စပါးအထွက်ပမာဏသည် မက်ထရစ်တန် ၁၉.၆၈ သန်း အထိရှိမည်ဟု ခန့်မှန်းထားပြီး ယခင်နှစ်ထက် ၀.၄% တိုးမြင့်လာမည်ဖြစ်သည်။ သို့ရာတွင် ထုတ်လုပ်မှုနှင့် အထွက်နှုန်းတိုးတက်မှု အနည်းငယ်ရှိသော်လည်း လူဦးရေ တိုးပွားလာမှုကြောင့် အဓိက စားသုံးအစားအစာဖြစ်သော ဆန်အပေါ် လိုအပ်ချက်သည် ဆက်လက်မြင့်တက်နေမည်ဟု USDA က ပြောကြားခဲ့သည်။
ထို့အပြင် ၂၀၂၆-၂၀၂၇ စျေးကွက်နှစ်အတွက် ဖိလစ်ပိုင်နိုင်ငံ၏ ဆန်စားသုံးမှုသည် မက်ထရစ်တန် ၁၇.၆၅ သန်းအထိ ရှိလာမည်ဟု ခန့်မှန်းထားပြီး လက်ရှိ စျေးကွက်နှစ်တွင်ရှိသည့် မက်ထရစ်တန် ၁၇.၆ သန်းမှ အနည်းငယ်တိုးတက်လာမည်ဖြစ်သည်။
Source: Business World Online, 31 March 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)