မွန်ပြည်နယ်အတွင်း ယခုနှစ် ဒူးရင်းသီးရာသီ စတင်ထွက်ပေါ်ချိန်တွင် အထွက် နည်းပြီး ဝယ်လိုအားများနေခြင်းကြောင့် ဒူးရင်းသီးများ ဈေးကောင်းရရှိနေကြောင်း သိရသည်။ ယခုနှစ်တွင် ဒူးရင်းသီးများကို အရွယ်အစားနှင့် အရည်အသွေးပေါ်မူတည်၍ တစ်လုံးလျှင် ကျပ် ၁၅၀၀၀ မှ ၃၀၀၀၀ ထိစ၍ ရောင်းချနေပြီး အရည်အသွေးမြင့် အမျိုးအစားများသည် ထို့ထက်ပို၍လည်း ဈေးရနိုင်ကြောင်း သိရသည်။ ယခင်နှစ်က ဒူးရင်းသီးစတင်ထွက်ပေါ်ချိန်တွင် ၇၀၀၀ ကျပ်မှ ၈၀၀၀ ကျပ်ထိသာ ရှိပြီး ယခင်နှစ်နှင့် ယခုနှစ် ဈေးနှုန်းများ နှိုင်းယှဉ်ပါက ယခုနှစ်တွင် ဈေးနှုန်းမြင့်တက်လာကြောင်း သိရှိရသည်။
“ဒီနှစ် ဒူးရင်းသီးက ဈေးတော်တော်ကောင်းပါတယ်။ တစ်လုံးလျှင် ၁၅၀၀၀ ကျပ် အထက် ရောင်းနိုင်တာတွေရှိတယ်။ ဝယ်သူတွေလည်း များလာတဲ့အတွက် စိုက်ပျိုးသူတွေ အတွက် အကျိုးအမြတ်ပိုရလာတယ်” ဟု မွန်ပြည်နယ်ရှိ စိုက်ပျိုးသူတစ်ဦးက ပြောသည်။
ထို့ပြင် ဒူးရင်းသီးများကို မွန်ပြည်နယ်အတွင်းရှိ မြို့များသာမက ရန်ကုန်နှင့်အခြား ဒေသများသို့ ပို့ဆောင်ရောင်းချနေခြင်းကြောင့် ဈေးကွက်ပိုမိုကျယ်ပြန့်လာကြောင်း သိရသည်။ ဝယ်သူများအနေဖြင့် အရည်အသွေးမြင့် ဒူးရင်းသီးများကို ပိုမိုနှစ်သက်ကြောင်း လည်း သိရသည်။
ယခုကဲ့သို့ ဒူးရင်းသီး ဈေးကောင်းရရှိနေမှုနှင့် ဈေးကွက်ဝယ်လိုအား မြင့်တက်နေမှု သည် ဒေသခံစိုက်ပျိုးရေးလုပ်ငန်းများကို အားပေးမြှင့်တင်ပေးနေပြီး မွန်ပြည်နယ်၏ စီးပွားရေးတိုးတက်မှုအတွက်လည်း အရေးပါသော အခန်းကဏ္ဍတစ်ရပ်ဖြစ်လာကြောင်း သိရသည်။
DOCA (မွန်)