ပါကစ္စတန်နိုင်ငံတွင် သရက်ရာသီနောက်ကျမှုကြောင့် ပြည်ပတင်ပို့ရေးအလားအလာ ထိခိုက်

   ပါကစ္စတန်နိုင်ငံတွင် သာမန်နှစ်များထက် နောက်ကျ၍ သရက်ရာသီ စတင်ဝင်ရောက်လာ ပြီး ထွက်ရှိမှုမှာ ၂၀ ရာခိုင်နှုန်းခန့် ကျဆင်းလိမ့်မည်ဟု ခန့်မှန်းရသည်။ ဒေသတွင်း တင်းမာမှုများ၊ နယ်စပ်ပိတ်သိမ်းမှုများနှင့် ကုန်စည်ပို့ဆောင်ခ မြင့်တက်လာမှုတို့က ယခုနှစ် နိုင်ငံခြားသို့ တင်ပို့မှု ကို ဆိုးရွားစွာ ထိခိုက်နိုင်သည်ဟု တင်ပို့သူများက စိုးရိမ်နေကြသည်။

    လုပ်ငန်းရှင်များ၏ အဆိုအရ ပုံမှန်မဟုတ်သော ရာသီဥတုအခြေအနေများကြောင့် သရက် သီး သီးချိန်၏ အစောပိုင်းအဆင့်တွင် သရက်ပန်းပွင့်များ ပျက်စီးခဲ့ရပြီး ယခုနှစ်တွင် တစ်နိုင်ငံလုံး အတိုင်းအတာအနေဖြင့် သရက်သီး ထွက်ရှိမှုပမာဏမှာ တန်ချိန် ၁.၅ သန်းဝန်းကျင်သို့ ကျဆင်း သွားကာ ယခင်နှစ်က တန်ချိန် ၁.၈ သန်းနီးပါးရှိကြောင်း၊ စိုက်ဧရိယာမှာ ဧက ၁၆၀,၀၀၀ ခန့်ဖြင့် မပြောင်းလဲဘဲ ရှိနေကြောင်း သိရှိရသည်။

   မတ်လနှင့် ဧပြီလများအတွင်း ပုံမှန်ထက် အေးမြစိုစွတ်သော ရာသီဥတုကြောင့်လည်း သရက်ရာသီနောက်ကျခဲ့ကြောင်း၊ ပုံမှန်အားဖြင့် ဧပြီလနှောင်းပိုင်းတွင် စတင်လေ့ရှိသော ပြည် တွင်းဈေးကွက်အတွက် သရက်သီးခူးဆွတ်နိုင်ခြင်းမှာ ယခုနှစ်တွင်မေလ ပထမပတ်အထိ မစတင် နိုင်ခဲ့ကြောင်း၊ သရက်သီးတင်ပို့မှု အစီအစဉ်များမှာ မေလ ၂၀ ရက်ဝန်းကျင်အစား ဇွန်လ ၁ ရက် နေ့မှ စတင်ရန် မျှော်လင့်ရကြောင်း သိရှိရသည်။

   သရက်သီးအစောပိုင်းထွက်ရှိသည့် ပါကစ္စတန်နိုင်ငံ၊ Mirpurkhasမြို့၊ Tando Allahyar မြို့နှင့် Hyderabad မြို့တို့အပါအဝင် Sindh ခရိုင်များတွင် ပျမ်းမျှ သရက်အထွက်နှုန်းရှိကြောင်း၊ သို့သော်လည်း Rahim Yar Khanမြို့၊ Multanမြို့၊ Muzaffargarh မြို့နှင့် Shujaabad မြို့ ကဲ့သို့သော Punjab ပြည်နယ်ရှိ ရာသီနောက်ကျမှ သရက်သီးထွက်ရှိသော ဒေသများတွင် သရက် ထွက်ရှိမှု သိသိသာသာ နည်းပါးနေကြောင်း သိရှိရသည်။

   သရက်သီးတင်ပို့သူများက ယခုရာသီသည် ပုံမှန်ထက် ကြာရှည်နိုင်ပြီး နွေရာသီနှောင်းပိုင်း ရာသီဥတုအခြေအနေပေါ်မူတည်၍ စက်တင်ဘာလလယ်အထိ ကြာရှည်နိုင်သည်ဟု ယုံကြည် ကြကြောင်း၊ သို့သော် သရက်သီးထွက်ရှိမှုပမာဏ လျော့နည်းသော်လည်း ပါကစ္စတန် ရိုးရာဈေး ကွက်များတွင် ဝယ်လိုအားနည်းလာသောကြောင့် နိုင်ငံတကာစျေးနှုန်းများ သိသိသာသာမြင့်တက် လာမည်ဟု တင်ပို့သူများက မျှော်လင့်မထားကြောင်း National Fruit Pakistan ၏ စီမံခန့်ခွဲရေး ဒါရိုက်တာ Shoaib Ahmad Basra က ပြောကြားသည်။

    အာဖဂန်နစ္စတန်သို့ ကုန်သွယ်ရေးလမ်းကြောင်းများမှာ ကြာရှည်စွာ နယ်စပ်ပိတ်သိမ်းမှု များအပြီးတွင်လည်း ပြတ်တောက်နေဆဲဖြစ်ပြီး ပင်လယ်ကွေ့ဒေသရှိ တင်းမာမှုများနှင့် ဟော်မုဇ် ရေလက်ကြား အနှောင့်အယှက်များက ကုန်စည်ပို့ဆောင်ခ မြင့်တက်စေပြီး သင်္ဘောရရှိနိုင်မှုကို လျှော့ချလျက်ရှိကြောင်း သိရှိရသည်။

   ဥရောပနှင့် ယူကေသို့ သရက်သီးတင်ပို့ရန်အတွက် ပါကစ္စတန်အနေဖြင့် အရှေ့အလယ် ပိုင်းလေကြောင်းလိုင်းများကို အားထားနေရခြင်းကြောင့် လေကြောင်းကုန်စည်ပို့ဆောင်ရေးလုပ် ငန်းများမှာလည်း မရေရာကြောင်း၊ လေယာဉ်အသွားအလာ လျော့နည်းမှုနှင့် ကုန်စည်နေရာ အကန့်အသတ်များက တင်ပို့သူများအတွက် သရက်တင်ပို့ရေး အစီအစဉ်ကို ရှုပ်ထွေးစေကြောင်း သိရှိရသည်။

Source: DAWN, 12 May 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)