Prabowo Subianto က ကမ္ဘာလုံးဆိုင်ရာ မသေချာမရေရာမှုများနှင့် အရှေ့အလယ်ပိုင်း ဒေသပဋိပက္ခများကြောင့် အစားအသောက်ထောက်ပံ့မှုအပေါ် ဖိအားများမြင့်တက်လာနေသည့် အခြေအနေတွင် ပြည်တွင်းစားနပ်ရိက္ခာဖူလုံရေးကို တင်ပို့မှုထက်ဦးစားပေးဆောင်ရွက်ရန် အစိုးရ ပိုင်စားနပ်ရိက္ခာအေဂျင်စီ Bulog ကို မေလ ၁၆ ရက်နေ့တွင် ညွှန်ကြားခဲ့ပါသည်။ အရှေ့ဂျာဗား ပြည်နယ် Nganjuk တွင် ပြောကြားရာ၌ Prabowo က ကမ္ဘာလုံးဆိုင်ရာ အစားအသောက် အကျပ်အတည်း ပိုမိုဆိုးရွားလာနေသော်လည်း အင်ဒိုနီးရှားအနေဖြင့် ပြည်တွင်းစားနပ်ရိက္ခာ သိုလှောင်မှုကို လုံလောက်စွာ ထိန်းသိမ်းထားနိုင်ခဲ့ကြောင်းနှင့် လက်ရှိတွင် နိုင်ငံအများအပြားက အင်ဒိုနီးရှား၏ ကုန်ပစ္စည်းများကို ဝယ်ယူလိုကြောင်း ပြောကြားခဲ့သည်။ Prabowo က ယခုအကျပ်အတည်းသည် ကြာရှည်နိုင်သည့်အတွက် Bulog အနေဖြင့် ဈေးနှုန်းအလွန်ချိုသာစွာ မရောင်းရသကဲ့သို့ ဈေးနှုန်းအလွန်မြင့်မားစွာလည်း မရောင်းသင့်ကြောင်း၊ ၎င်းတို့၏ ဦးစားပေးသည် ပြည်သူများဖူလုံရေးဖြစ်ကြောင်းနှင့် အင်ဒိုနီးရှား၏ဆန်ရိက္ခာထောက်ပံ့မှုမှာ တည်ငြိမ်နေဆဲဖြစ်ပြီး နိုင်ငံခြားဝယ်ယူသူများ၏ဝယ်လိုအားသည် မကြာသေးမီလများအတွင်း မြင့်တက်လာ ကြောင်း ပြောကြားခဲ့ပါသည်။ Prabowo ၏ အဆိုအရ India နှင့် Bangladesh အပါအဝင် နိုင်ငံအချို့က ပြည်တွင်းစားနပ်ရိက္ခာဖူလုံရေးအတွက် တင်ပို့မှုကန့်သတ်ချက်များ ချမှတ်ခဲ့ပြီးနောက် နိုင်ငံခြားဝယ်ယူသူများ၏ စိတ်ဝင်စားမှု မြင့်တက်လာခဲ့ခြင်းဖြစ်ကြောင်း သိရပါသည်။ ထို့ပြင် အင်ဒိုနီးရှား၏ စားနပ်ရိက္ခာကိုယ်ပိုင်ဖူလုံမှုကို တောင်သူလယ်သမားများ၊ စစ်တပ်နှင့် အမျိုးသားရဲတပ်ဖွဲ့တို့ ပူးပေါင်းကြိုးပမ်းမှုများကြောင့် ရရှိခဲ့ခြင်းဖြစ်ကြောင်း ၎င်းကပြောကြားခဲ့ပါသည်။ Prabowo က food sovereignty ဆိုသည်မှာ ဈေးနှုန်းသက်သာရေးတစ်ခုတည်းမဟုတ်ဘဲ ကမ္ဘာလုံးဆိုင်ရာ အကျပ်အတည်းများအတွင်း လုံလောက်သောထောက်ပံ့မှုရရှိနိုင်ရေးလည်းပါဝင်ကြောင်း၊ ၎င်းတို့၏စားနပ်ရိက္ခာထောက်ပံ့မှု ဖူလုံနေသည့်အတွက် ပြင်ပအကျပ်အတည်းများကို ပိုမိုကောင်းမွန်စွာ ရင်ဆိုင်နိုင်ရန် ပြင်ဆင်ထားကြောင်းနှင့် “Red and White Village and Sub-district Cooperatives” အစီအစဉ်သည် ဒေသအနှံ့စိုက်ပျိုးထုတ်လုပ်မှုနှင့် ကုန်ပစ္စည်းဖြန့်ဖြူးရေးကို အားကောင်းလာစေရန် ကူညီပေးမည်ဖြစ်ကြောင်း ပြောကြားခဲ့ပါသည်။ အဆိုပါဖွင့်ပွဲ အခမ်းအနားတွင် ကော်ပိုရေးတစ်အသင်းပေါင်း ၁,၀၆၁ ခု တည်ဆောက်ပြီးစီးခဲ့ကြောင်း ကြေညာခဲ့ပြီး ၎င်းတို့အနက် ၅၃၀ ခုမှာ အရှေ့ဂျာဗားရှိ ခရိုင် ၇ ခုတွင် တည်ရှိကာ ကျန် ၅၃၁ ခုမှာ ဗဟို ဂျာဗားရှိ ခရိုင်နှင့် မြို့ ၈ ခုတွင် တည်ရှိကြောင်း သိရပါသည်။ ၂၀၂၆ ခုနှစ် မေ ၁၅ ရက်အထိ အင်ဒိုနီးရှားသည် ကော်ပိုရေးတစ်အရောင်းဆိုင်ပေါင်း ၉,၁၈၂ ခု တည်ဆောက်ပြီးဖြစ်ကာ နိုင်ငံတစ်ဝန်း ၈၀,၀၀၀ အထိ တိုးချဲ့သွားရန် ရေရှည်ရည်မှန်းချက် ချမှတ်ထားကြောင်း သိရပါသည်။ ထို့အပြင် အစိုးရပိုင် စားနပ်ရိက္ခာကုမ္ပဏီ PT Agrinas Pangan Nusantara ကလည်း နောက်ထပ်ကော်ပိုရေးတစ်ဆိုင်ခွဲပေါင်း ၂၅,၀၀၀ ခု တည်ဆောက်နေပြီး အစိုးရအနေဖြင့် ၂၀၂၆ ခုနှစ် ဩဂုတ်လမတိုင်မီ ဆိုင်ခွဲ ၃၀,၀၀၀ ကို ပြီးစီးဖွင့်လှစ်နိုင်ရန် ရည်မှန်းထားကြောင်း သိရှိရပါသည်။
Antara News
DOCA (ရန်ကုန်)