၂၀၂၆ခုနှစ် ၊ မေလ၂၉ရက်နေ့ ၁၀း၀၀နာရီအချိန်တွင် ကချင်ပြည်နယ်အစိုးရအဖွဲ့ရုံး အစည်းအဝေး ခန်းမ၌ ကချင်ပြည်နယ်စာသုံးသူရေးရာကော်မတီ၏ (၂/၂၀၂၆) ကြိမ်မြောက် အစည်းအဝေးကို ကျင်းပပြုလုပ်ခဲ့ရာ ကချင်ပြည်နယ်စားသုံးသူရေးရာကော်မတီဥက္ကဋ္ဌ (စီမံကိန်း စီးပွားရေးနှင့် ဘဏ္ဍာရေး ဝန်ကြီး) ဦးဆောင်၍ ကချင်ပြည်နယ်စားသုံးသူရေးရာကော်မတီဒုတိယဥက္ကဋ္ဌ (ကချင်ပြည်နယ်ဥပဒေချုပ်) နှင့် အဖွဲ့ဝင်များဖြစ်သည့် အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ အစားအသောက်နှင့် ဆေးဝါးကွပ်ကဲရေးဦးစီးဌာန၊ စည်ပင်သာယာရေးအဖွဲ့နှင့် ကချင်ပြည်နယ်စားသုံးသူရေးရာကော်မတီ အတွင်းရေးမှူး ကချင်ပြည်နယ် စားသုံးသူရေးရာဦးစီးဌာန(ပြည်နယ်ဦးစီးမှူး)တို့က အစည်းအဝေးသို့ တက်ရောက်ကြပါသည်။
ကချင်ပြည်နယ်စားသုံးသူရေးရာကော်မတီဥက္ကဋ္ဌ (စီမံကိန်း၊စီးပွားရေးနှင့်ဘဏ္ဍာရေးဝန်ကြီး) က အဖွင့်အမှာစကားပြောကြားရာတွင် စားသုံးသူရေးရာကော်မတီအနေဖြင့် စားသုံးသူတိုင်းအတွက် အရေးကြီးသော အခန်းကဏ္ဍတွင်ရှိပါကြောင်း၊ စားသုံးသူကာကွယ်ရေးလုပ်ငန်းများ ဆောင်ရွက်ရာ တွင် မြေပြင်အခြေအနေ အရ အခက်အခဲများရှိနိုင်သော်လည်း ကြိုးစားဆောင်ရွက်ရမည်ဖြစ်ပါကြောင်း၊ ယခင်လွှတ်တော်များ တွင်လည်း စားသုံးသူရေးရာကဏ္ဍနှင့်ပတ်သက်၍ ဆွေးနွေးခဲ့ကြပါကြောင်း၊ ကချင်ပြည်နယ်သည် နယ်စပ် ဒေသဖြစ်သဖြင့် စားသုံးရန်မသင့်သည့် ကုန်စည်နှင့် ဝန်ဆောင်မှုအပိုင်းများတွင် စားသုံးသူများ အခွင့်အရေးဆုံးရှုံးမှုမရှိစေရေး အလေးထားဆောင်ရွက်ရန် လိုအပ်ပါကြောင်း၊ အခွင့်အရေးဆုံးရှုံးမှုများ အတွက်လည်း တိုင်ကြားလာပါက စားသုံးသူရေးရာ ကော်မတီအနေဖြင့် အချိန်နှင့်တပြေးညီ ဖြေရှင်းဆောင်ရွက်ပေးရန်လိုအပ်ပါကြောင်း၊ အခြားနိုင်ငံများတွင် ကုန်ပစ္စည်းများအပေါ် ၎င်းတို့၏မိခင်ဘာသာစကားအား ကုန်အညွှန်းအမှတ်အသား တံဆိပ်ကပ် နှိပ်မှသာ ရောင်းချခွင့်ပြုထားပါကြောင်း၊ မိမိတို့ နိုင်ငံအနေဖြင့်လည်း ကုန်စည်များအပေါ် ကုန်အညွှန်း အမှတ်အသား အမှတ်တံဆိပ်ရိုက်နှိပ်ရောင်းချ လျက်ရှိသော်လည်း အပြည့်အဝဆောင်ရွက်နိုင်ခြင်း မရှိသေးသဖြင့် ကြိုးစား၍ ပညာပေးဆောင်ရွက် လျက်ရှိပါကြောင်း၊ စားသုံးသူရေးရာကော်မတီ ဝင်များအနေဖြင့် စားသုံးသူရေးရာကဏ္ဍနှင့်ပတ်သက်၍ တက်တက်ကြွကြွပူးပေါင်းပါဝင်ဆောင်ရွက် ပေးကြရန်နှင့် ကြိုးစားဆောင်ရွက်စေလိုပါကြောင်း ပြောကြား ခဲ့ပါသည်။
ထို့အပြင် ကချင်ပြည်နယ်စားသုံးသူရေးရာကော်မတီအတွင်းရေးမှူးက ၂၀၂၆ ခုနှစ်ဇန်နဝါရီလ မှဧပြီလအထိ စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးလုပ်ငန်း ဆောင်ရွက်ခဲ့မှု အခြေအနေများကိုအမှာစာဖြင့် ရှင်းလင်းတင်ပြခဲ့ပါသည်။
ဆက်လက်၍ ကချင်ပြည်နယ် စားသုံးသူရေးရာကော်မတီဝင်ဒုတိယဥက္ကဋ္ဌနှင့် ကော်မတီ အဖွဲ့ဝင်များက သက်ဆိုင်ရာကဏ္ဍအလိုက် အသီးသီးဆွေးနွေးခဲ့ကြပြီး ကချင်ပြည်နယ်စားသုံးသူရေးရာ ကော်မတီ ဥက္ကဋ္ဌက နိဂုံးချုပ်စကားပြောကြားခဲ့ပြီး အစည်းအဝေးပြီးမြောက်ခဲ့ကြောင်း သတင်းရရှိ ပါသည်။
DOCA(ကချင်)