ရုရှားနိုင်ငံသည် ဇွန်လအတွင်း လောင်စာဆီပြတ်လပ်မှု ကြုံတွေ့ရနိုင်ခြေရှိခြင်းကြောင့် ရေနံချက်စက်ရုံများ၏ လည်ပတ်မှုကို မြှင့်တင်ရန် စီစဉ်နေသဖြင့် ၎င်း၏ ရေနံစိမ်းတင်ပို့မှုကို လျှော့ချသွားရန်ရှိနေကြောင်း သိရပါသည်။ စက်မှုလုပ်ငန်းနှင့် ကုန်သွယ်ရေးဆိုင်ရာ သတင်းရင်းမြစ်များထံမှ ရရှိသော အကြိုအချက်အလက်များအရ ပရီမော့စ် (Primorsk)၊ အုစ်တ်-လူဂါ (Ust-Luga) နှင့် နိုဗိုရိုဆီးစ်ခ် (Novorossiysk) စသည့် ရုရှားနိုင်ငံအနောက်ဘက်ရှိ ဆိပ်ကမ်းများမှ ရေနံစိမ်းတင်ဆောင်မှုသည် မေလတွင် တစ်ရက်လျှင် ဘာရယ်လ် ၂.၅ သန်း ရှိခဲ့ရာမှ ဇွန်လတွင် တစ်ရက်လျှင် ဘာရယ်လ် ၁.၇ သန်းအထိ ကျဆင်းသွားနိုင်ကြောင်း သိရပါသည်။ အဆိုပါ ကျဆင်းမှုသည် ရေနံထုတ်လုပ်မှုပမာဏ လျော့နည်းလာခြင်းကြောင့်လည်း တစ်စိတ်တစ်ပိုင်းဖြစ်နိုင်ကြောင်း သိရပါသည်။
ရုရှားနိုင်ငံ၏ ရေနံထုတ်လုပ်မှုသည် ၂၀၂၆ခုနှစ်ဆန်းပိုင်းကတည်းက ကျဆင်းခဲ့ခြင်းဖြစ်ပြီး၊ ထိုသို့ကျဆင်းရခြင်းမှာ ရေနံချက်စက်ရုံများတွင် ကြိုတင်စီစဉ်ထားခြင်းမရှိသော ပြုပြင်ထိန်းသိမ်းမှုများကြောင့် ဖြစ်သည်ဟု ဒုတိယဝန်ကြီးချုပ် အလက်ဇန္ဒားနိုဗက်ခ် (Alexander Novak) က ဇွန်လ ၁၀ ရက်နေ့တွင် ပြောကြားခဲ့ကြောင်း သိရပါသည်။
ပြုပြင်ထိန်းသိမ်းရေးနှင့် ပြင်ဆင်ရေးလုပ်ငန်းများ ပြီးစီးခြင်းက ရုရှား၏ ရေနံချက်စက်ရုံများကို ရာသီအလိုက် လောင်စာဆီလိုအပ်ချက် မြင့်တက်လာခြင်းနှင့် အချို့သော ဒေသများတွင် လောင်စာဆီပြတ်လပ်မှုများ အစီရင်ခံထားရခြင်းတို့အကြား ရေနံချက်လုပ်မှုပမာဏကို မြှင့်တင်နိုင်စေမည်ဖြစ်သော်လည်း၊ ထုတ်လုပ်မှုကျဆင်းနေခြင်းကြောင့် ချက်လုပ်ရန်အတွက် လိုအပ်သော အပိုဆောင်း ကုန်ကြမ်းများကို တင်ပို့မှုများမှ လွှဲပြောင်းရယူရမည်ဖြစ်ကြောင်း သိရပါသည်။
ရုရှားနိုင်ငံသည် ဇွန်လတွင် ရေနံစိမ်းချက်လုပ်မှုကို တစ်ရက်လျှင် ဘာရယ်လ် ၂၅၀,၀၀၀ မှ ၄၀၀,၀၀၀ အထိ တိုးမြှင့်ရန် ကြိုးပမ်းမည်ဖြစ်ကြောင်းနှင့် ရေနံထုတ်လုပ်မှုကို မူလအခြေ အနေအတိုင်း ပြန်လည်ရောက်ရှိစေရန်မှာမူ အချိန်အတန်ကြာ ယူရမည်ဖြစ်ကြောင်း သိရပါသည်။
ရိုက်တာသတင်းရင်းမြစ်များ၏ အဆိုအရ ရေနံစိမ်းထုတ်လုပ်မှုသည် မေလတွင်လည်း ဆက်လက်ကျဆင်းခဲ့ဖွယ်ရှိပြီး ဧပြီလထက် တစ်ရက်လျှင် ဘာရယ်လ် ၁၀၀,၀၀၀ ခန့် လျော့နည်းသွားခဲ့ကြောင်း သိရပါသည်။ ဧပြီလတွင် ရုရှားနိုင်ငံ၏ ရေနံထုတ်လုပ်မှု ကျဆင်းမှု သည် ၂၀၂၀ ပြည့်နှစ် ကိုဗစ်-၁၉ ကပ်ရောဂါ စတင်ဖြစ်ပွားချိန်ကတည်းက ဆိုလျှင် ၆ နှစ်အတွင်း အကြီးမားဆုံး ကျဆင်းမှုအဖြစ် ရိုက်တာသတင်းရင်းမြစ်များက ခန့်မှန်းခဲ့ကြပြီး၊ ၂၀၂၆ ခုနှစ် ယခင်လများ၏ ပျမ်းမျှအဆင့်ထက် တစ်ရက်လျှင် ဘာရယ်လ် ၃၅၀,၀၀၀ ခန့်မှ ၄၀၀,၀၀၀ ခန့်အထိ ကျဆင်းခဲ့ကာ ယမန်နှစ်ကုန်ပိုင်းနှင့် နှိုင်းယှဉ်ပါက တစ်ရက်လျှင် ဘာရယ်လ် ၅၀၀,၀၀၀ မှ ၆၀၀,၀၀၀ ခန့်အထိ ကျဆင်းခဲ့ခြင်းဖြစ်ကြောင်း သိရပါသည်။
တစ်ချိန်တည်းမှာပင် ထုတ်လုပ်သူများသည် တင်ပို့မှုအပေါ်၌သာ အာရုံစိုက်နေကြပြီး ယခုလတွင် ကုန်ကြမ်းပြတ်လပ်မှုကို အကြောင်းပြနေကြသောကြောင့် ဇွန်လတွင် တင်ဆောင်မည့် ဆိုက်ဘေးရီးယားအနောက်ပိုင်းထွက် ရေနံစိမ်းပြည်တွင်းဖြန့်ဖြူးမှုအတွက် လက်ငင်းအရောင်းအဝယ်ပြုလုပ်မှုများ မရှိခဲ့ကြောင်း စက်မှုလုပ်ငန်းတွင်းရှိ သတင်းရင်းမြစ်များက ဇွန်လ ၉ ရက်နေ့တွင် ပြောကြားချက်များအရ သိရှိရပါသည်။
Source: Reuters
DOCA (ရန်ကုန်)