အိန္ဒိယနိုင်ငံ၏ ပေါင်သန်းပေါင်းများစွာ တန်ဖိုးရှိသော သရက်သီးကုန်သွယ်မှုလုပ်ငန်းသည် ပြင်းထန်သော ရာသီဥတုဖောက်ပြန်မှုများ၊ ကုန်သွယ်မှုကန့်သတ်ချက်များနှင့် ကမ္ဘာလုံးဆိုင်ရာ ထောက်ပံ့ပို့ဆောင်ရေး ကုန်ကျစရိတ်များ မြင့်တက်လာမှုကြောင့် ကြီးမားသော ဖိအားများနှင့် ရင်ဆိုင်နေရပါသည်။
ကမ္ဘာ့သရက်သီးထွက်ရှိမှု၏ ထက်ဝက်နီးပါးကို အိန္ဒိယနိုင်ငံမှ ထုတ်လုပ်ပေးနေပြီး၊ ယခင်နှစ်က အဆိုပါကဏ္ဍမှ ဝင်ငွေ ဒေါ်လာ ၅၆ သန်းကျော်ရရှိခဲ့ပြီး အရှေ့အလယ်ပိုင်း ဒေသသည် အိန္ဒိယသရက်သီးကို အများဆုံး ဝယ်ယူနေဆဲဖြစ်သော်လည်း၊ ယူကေနိုင်ငံနှင့် ဂျပန်နိုင်ငံကဲ့သို့သော ဈေးကွက်များသည် ပိုမိုမြင့်မားသောဈေးနှုန်းနှင့် တင်းကျပ်သည့် အရည်အသွေး စံချိန်စံညွှန်းများအတွက် အဓိကကျသော ဈေးကွက်များဖြစ်ပြီး ယခုအခါ သရက်သီးဘုရင်ဟု တင်စားခေါ်ဆိုကြသော အယ်ဖွန်ဆို(Alphonson) သရက်သီး အမျိုးအစားများသည် ကမ်းရိုးတန်းဒေသဖြစ်သော ကွန်ကန်(Konkan) ဒေသတွင် ကြီးမားသော ဆုံးရှုံးမှုူများနှင့် ကြုံတွေ့နေရကြောင်း သိရှိရပါသည်။
စိုက်ပျိုးရေးဌာနမှ တာဝန်ရှိသည်များ၏ အဆိုအရ အယ်လ်နီညို ရာသီဥတုဖြစ်စဉ်ကြောင့် ဖြစ်ပေါ်လာသည့် စံချိန်တင် အပူလှိုင်းများသည် သရက်ခြံများကို ပျက်စီးစေခဲ့ပြီး ဆောင်းရာသီတွင် အပူချိန် အတက်အကျ ပြင်းထန်းမှုများကြောင့် အပွင့်၊ အဖူးများပျက်စီးစေခဲ့ရသလို၊ ဧပြီလနှင့် မေလအတွင်း ဖြစ်ပေါ်ခဲ့သည့် ပြင်းထန်သောအပူချိန်ကြောင့် ကျန်ရှိနေသော အသီးအများစုမှာလည်း ပျက်စီးသွားခဲ့ပြီး အဓိက စိုက်ပျိုးသည့် ဒေသအချို့တွင် တောင်သူများ မျှော်မှန်းထားသည့် အထွက်နှုန်း၏ ၉၀ ရာခိုင်နှုန်းအထိ ဆုံးရှုံးခဲ့ရပြီး ဒေသတွင်းစီးပွားရေး၏ ကျောရိုးဖြစ်သော တောင်သူများသည် လုပ်ငန်းများလည်ပတ်နိုင်ရန် လုံလောက်သော သရက်သီးများကိုပင် စုဆောင်းရန် အခက်အခဲများဖြစ်ပေါ်နေကြောင်း သိရှိရပါသည်။
ထို့အပြင် ဂျပန်နိုင်ငံမှ ရုတ်တရက် တင်သွင်းမှုများ ရပ်ဆိုင်းလိုက်ခြင်းကြောင်း အိန္ဒိယ သရက်သီးဈေးကွက်အခြေအနေမှာ ပိုမိုဆိုးရွားလာပြီး ဂျပန်နိုင်ငံမှ စစ်ဆေးရေးအဖွဲ့သည် သရက်သီးသန့်စင်သည့် စက်ရုံများသို့ သွားရောက်စစ်ဆေးကာ လိုအပ်သော စံချိန်စံညွှန်းများနှင့် မကိုက်ညီကြောင်း တွေ့ရှိခဲ့ကြပြီး မတ်လအတွင်း Uttar Pradesh ဒေသရှိ စက်ရုံတစ်ခုတွင် ပြုလုပ်ခဲ့သော စစ်ဆေးမှုအရ သရက်သီးယင်ကောင်များကို ဖယ်ရှားရန်အတွက် အသုံးပြုသည့် ဓာတုဗေဒကင်းစင်သော “Vapour Heat Treatment” (ရေနွေးငွေ့ဖြင့် အပူပေးသန့်စင်ခြင်း) လုပ်ငန်းစဉ်တွင် ချို့ယွင်းချက်များရှိနေကြောင်း တွေ့ရှိခဲ့ရသောကြောင့် ဂျပန်နိုင်ငံမှ အိန္ဒိယ သရက်သီးအမျိုးအစားများ အားလုံးကို ၂၀၂၆ခုနှစ်အတွက် တင်သွင်းမှုများ ရပ်ဆိုင်းလိုက်ခြင်းဖြစ်ကြောင်း သိရပြီး ထိုရပ်ဆိုင်းမှုသည် နှစ်ပေါင်းနှစ်ဆယ်ကြာ တည်ငြိမ်ခဲ့သော ကုန်သွယ်မှု ဆက်ဆံရေးအတွက် အတားအဆီးတစ်ခုဖြစ်လာခဲ့ကြောင်း သိရှိရပါသည်။
ထို့အပြင် အနောက်အာရှဒေသတွင် ဖြစ်ပွားနေသော ပဋိပက္ခများကြောင့် ကုန်သင်္ဘောခများမှာ နှစ်ဆကျော်မြင့်တက်လာပြီး၊ ပုပ်သိုးလွယ်သော ကုန်ပစ္စည်းများပို့ဆောင်မှုမှာ ပိုမိုကုန်ကျ စရိတ်များပြားလာပြီး ပင်လယ်ကွေ့ဒေသများသို့ ပို့ဆောင်မှုများတွင် ထောက်ပံ့ပို့ဆောင်ရေး အခက်အခဲများကြောင့် တင်ပို့မှု ၄၀ ရာခိုင်နှုန်းအထိ ကျဆင်းသွားကြောင်း ပို့ကုန်လုပ်ငန်းရှင် အချို့ကပြောကြားခဲ့ပြီး ဂျပန်နိုင်ငံသို့ တင်ပို့မှုများရပ်ဆိုင်းသွားခြင်းနှင့် ပင်လယ်ကွေ့ ပို့ဆောင်ရေးလမ်းကြောင်းများ ဖိအားများလာခြင်းတို့ကြောင့် သရက်သီးများ ပြည်တွင်းဈေးကွက်သို့ ပြန်လည်ပို့ဆောင်နေရပြီး၊ ပြည်တွင်းတွင် သရက်သီး အလွန်အကျွံပိုလျှံကာ ဈေးနှုန်းများ ကျဆင်းလာခဲ့ကြောင်း သိရှိရပါသည်။
Source: Zee News
DOCA(ရန်ကုန်)