မကွေးတိုင်းဒေသကြီး၊ပခုက္ကူခရိုင်အတွင်းရှိ ဆိပ်ဖြူမြို့နယ်သည် ကြက်သွန်နီ စိုက်ပျိုးထားရှိမှု အများဆုံးမြို့ ဖြစ်ပြီး မြို့ပေါ်ရှိ ကုန်စည်ဒိုင်နှင့် ပွဲရုံဈေးကွက်တွင် ဒေသတွင်းစိုက်ပျိုးလျက်ရှိသော ကြက်သွန်နီများ နေ့စဉ် အရောင်းအဝယ်ဖြစ်လျက်ရှိပါသည်။
ဈေးကွက်အနေဖြင့် ဇွန်လ(တတိယပတ်)တွင် ကြက်သွန်နီဈေးနှုန်းအနည်းငယ်တက်နေပြီး အရောင်းအဝယ်ဖြစ်လျက်ရှိသည်။ ကုန်စည်ဒိုင်ဈေးကွက်တွင် အရောင်းအဝယ်ဖြစ်မှုနည်းပြီး မြို့ပေါ်ရှိ ပွဲရုံများတွင်သာ အရောင်းအဝယ်ဖြစ်နေကြောင်း၊ ဈေးကွက်သို့ ကုန်ဝင်ရောက်မှု နည်းကြောင်း၊ တစ်ရက်လျှင် ကုန်ချိန်ပိဿာ(၅)သောင်းခန့်သာ ဝင်ရောက်ကြောင်း သိရှိရသည်။ ကြက်သွန်နီ (ဂျွန်)တစ်ပိဿာလျှင် အရည်အသွေးလိုက်၍ ကျပ်(၃၂၀၀ မှ ၂၅၀၀)ဈေးအသီးသီးဖြင့် အရောင်းအဝယ် ဖြစ်ပြီး ယခင်မေလ(တတိယပတ်)နှင့် နှိုင်းယှဉ်ပါက ဈေးတက်၍ အရောင်းအဝယ်ဖြစ်ကြောင်း သိရှိရသည်။
ဆိပ်ဖြူဒေသထွက် ကြက်သွန်နီများကို ရန်ကုန် ဘုရင့်နောင်ပွဲရုံသို့ ကုန်ချိန်အများဆုံး တင်ပို့လျက်ရှိပြီး မြဝတီ၊ မော်လမြိုင်၊ ပုသိမ်မြို့များသို့ တင်ပို့လျက်ရှိကြောင်း၊ ဇွန်လ(တတိယပတ်) တွင် ကုန်စည်စီးဝင်မှုအနေဖြင့် ရန်ကုန်ဘုရင့်နောင်ပွဲရုံသို့ (၁၂)ဘီးကား(၂၀)စီး၊ မြဝတီ၊ မော်လမြိုင် မြို့သို့ တွဲကား(၄)စီး၊ ပုသိမ်မြို့သို့ (၆)ဘီကား(၂)စီးခန့် တစ်ပတ်အတွင်း ကြက်သွန်နီ ကုန်ချိန်ပိဿာ (၄)သိန်း ခန့် တန်ချိန်အားဖြင့် (၅၆၃)တန်ခန့် ကုန်စည်စီးဆင်းကြောင်း ဈေးကွက်မှ သိရှိရပါသည်။
DOCA(မကွေး)