Suntory PepsiCo Vietnam ကုမ္ပဏီသည် အမေရိကန်ဒေါ်လာ သန်း ၃၀၀ ကျော် ရင်းနှီးမြှုပ်နှံထားသည့် အဖျော်ယမကာထုတ်လုပ်ရေး စက်ရုံသစ်ကို ဇူလိုင် ၁၀ ရက်တွင် ဗီယက်နမ်နိုင်ငံတောင်ပိုင်း Tay Ninh ပြည်နယ်၌ဖွင့်လှစ်ခဲ့ရာ ၎င်းသည် ကုမ္ပဏီ၏ ဗီယက်နမ် နိုင်ငံအတွင်း အကြီးဆုံးရင်းနှီးမြှုပ်နှံမှုဖြစ်သည့်အပြင် အဆင့်မြင့်နည်းပညာနှင့် ရေရှည်တည်တံ့ခိုင်မြဲသော ထုတ်လုပ်မှုလုပ်ငန်းများအတွက် အရည်အသွေးမြင့် နိုင်ငံခြားတိုက်ရိုက်ရင်းနှီးမြှုပ်နှံမှု (FDI) များကို ဆွဲဆောင်နိုင်သည့်နေရာတစ်ခုအဖြစ် ဗီယက်နမ်၏ဆွဲဆောင်မှု မြင့်တက်လာနေ ကြောင်းကို ထင်ဟပ်စေသည်ဟု သိရပါသည်။ Huu Thanh စက်မှုဥယျာဉ်အတွင်း မြေဧရိယာ ဟက်တာ ၂၀ နီးပါးပေါ်တွင် တည်ဆောက်ထားသည့် အဆိုပါစက်ရုံသည် ဗီယက်နမ်နိုင်ငံအတွင်း Suntory PepsiCo ၏ အကြီးဆုံးနှင့် ခေတ်အမီဆုံး စက်ရုံဖြစ်သည့်အပြင် အာရှဒေသရှိ ကုမ္ပဏီ၏ ထုတ်လုပ်မှုကွန်ရက်တွင်လည်း အကြီးဆုံးထုတ်လုပ်ရေးစက်ရုံဖြစ်ကြောင်း သိရပါသည်။ စက်ရုံသည် နှစ်စဉ် အဖျော်ယမကာ လီတာ ၁ ဒသမ ၂၄ ဘီလီယံကျော် ထုတ်လုပ်နိုင်ရန် ဒီဇိုင်းရေးဆွဲထားပြီး အလိုအလျောက်စနစ်မြင့်ထုတ်လုပ်ရေး၊ ဖြည့်သွင်းထုပ်ပိုးရေးနှင့် ဂိုဒေါင်စီမံခန့်ခွဲရေးစနစ်များ တပ်ဆင်ထားကြောင်း သိရပါသည်။ စက်ရုံတွင် ဇီဝလောင်စာစွမ်းအင်၊ အဆောက်အအုံခေါင်မိုးပေါ် နေရောင်ခြည်စွမ်းအင်စနစ်၊ ရေချွေတာသုံးစွဲသည့်နည်းပညာများ၊ ဖန်လုံအိမ်ဓာတ်ငွေ့ လျှော့ချရေးအစီအမံများနှင့် ပြန်လည်အသုံးပြုထားသည့် PET (rPET) ထုပ်ပိုးပစ္စည်းများ အသုံးပြုခြင်းတို့အပါအဝင် ရေရှည်တည်တံ့ခိုင်မြဲရေးဆိုင်ရာနည်းလမ်းများကို ထည့်သွင်းအသုံးပြုထားကြောင်း သိရပါသည်။ စက်ရုံအပြည့်အဝလည်ပတ်နိုင်ချိန်တွင် ပြည်တွင်းဝယ်လိုအားကို ဖြည့်ဆည်းပေးနိုင်မည့်အပြင် ဒေသတွင်းဈေးကွက်များသို့လည်း ပိုမိုတင်ပို့နိုင်မည်ဖြစ်ကြောင်း သိရပါသည်။ ဖွင့်ပွဲအခမ်းအနားတွင် Tay Ninh ပြည်နယ် ပြည်သူ့ကော်မတီဥက္ကဋ္ဌ Le Van Han က အဆိုပါစီမံကိန်းသည် ပြည်နယ်၏စက်မှုဖွံ့ဖြိုးတိုးတက်ရေးအတွက် အရေးပါသည့် မှတ်တိုင်တစ်ခုဖြစ်ပြီး ဗီယက်နမ်၏ရင်းနှီးမြှုပ်နှံမှုဝန်းကျင်အပေါ် ကမ္ဘာ့ထိပ်တန်းကော်ပိုရေးရှင်းများ၏ ယုံကြည်မှုကို ထင်ဟပ်စေကြောင်း၊ စက်ရုံသစ်သည် ကုန်ထုတ်လုပ်မှုကဏ္ဍကို အားကောင်းစေပြီး နည်းပညာလွှဲပြောင်းမှုကိုမြှင့်တင်ပေးကာ ထောက်ပံ့ပို့ဆောင်ရေးလုပ်ငန်းနှင့် ဆက်စပ်စက်မှု လုပ်ငန်းများဖွံ့ဖြိုးတိုးတက်ရေးကို အထောက်အကူပြုမည်ဖြစ်သည့်အပြင် အလုပ်အကိုင်များ ဖန်တီးပေးကာ ဒေသန္တရဘဏ္ဍာငွေတိုးတက်စေရန် အထောက်အပံ့ဖြစ်စေမည်ဖြစ်ကြောင်းနှင့် Tay Ninh ပြည်နယ်အနေဖြင့် စီမံခန့်ခွဲမှုဆိုင်ရာ ပြုပြင်ပြောင်းလဲမှုများနှင့် အခြေခံအဆောက် အအုံများဖွံ့ဖြိုးတိုးတက်ရေးမှတစ်ဆင့် ရင်းနှီးမြှုပ်နှံမှုဝန်းကျင်ကို ဆက်လက်တိုးတက်ကောင်းမွန်စေရန် ဆောင်ရွက်သွားမည်ဖြစ်ကြောင်း ပြောကြားခဲ့ပါသည်။ Suntory Beverage & Food ၏ ဥက္ကဋ္ဌနှင့် အမှုဆောင်အရာရှိချုပ် Josuke Kimura က စက်ရုံသစ်သည် ဗီယက်နမ်နိုင်ငံအပေါ် Suntory ၏ ရေရှည်ကတိကဝတ်ကိုဖော်ပြသည့် အရေးပါသောမှတ်တိုင်တစ်ခုဖြစ်ကြောင်းနှင့် ဗီယက်နမ်သည် အာရှဒေသအတွင်း ကုမ္ပဏီ၏တိုးတက်မှုအမြန်ဆုံး ဈေးကွက်များထဲမှတစ်ခုဖြစ်ပြီး ယခုရင်းနှီးမြှုပ်နှံမှုသည် စားသုံးသူလိုအပ်ချက်များကို ပိုမိုလျင်မြန်စွာဖြည့်ဆည်းပေးနိုင်မည့်အပြင် ဆန်းသစ်တီထွင်မှုများတိုးမြှင့်ရေးနှင့် ဒေသတွင်းလုပ်ငန်းတိုးချဲ့ရေးကို အထောက်အကူပြုမည်ဖြစ်ကြောင်း ပြောကြားခဲ့ပါသည်။ PepsiCo ၏ International Beverages လုပ်ငန်း အမှုဆောင်အရာရှိချုပ်နှင့် အမှုဆောင်ဒုတိယဥက္ကဋ္ဌ Eugene Willemsen ကလည်း ဗီယက်နမ်သည် PepsiCo အတွက် တိုးတက်မှုအလျင်မြန်ဆုံးနှင့် အလားအလာအရှိဆုံး ဈေးကွက်များအနက် တစ်ခုဖြစ်ကြောင်း၊ Tay Ninh စက်ရုံသည် ဗီယက်နမ်၏ ရေရှည်စီးပွားရေးအလားအလာ အပေါ် PepsiCo ၏ ယုံကြည်မှုကိုထင်ဟပ်စေပြီး အဆင့်မြင့်ကုန်ထုတ်လုပ်ခြင်း၊ ဒစ်ဂျစ်တယ် အသွင်ကူးပြောင်းခြင်း၊ ရေရှည်တည်တံ့ခိုင်မြဲသော လုပ်ငန်းလည်ပတ်မှုနှင့် ပြည်တွင်းထောက်ပံ့ ရေးကွင်းဆက်ဖွံ့ဖြိုးတိုးတက်ရေးတို့တွင် ဆက်လက်ရင်းနှီးမြှုပ်နှံသွားမည့် ကတိကဝတ်ကိုလည်း အားဖြည့်ပေးကြောင်း ပြောကြားခဲ့ပါသည်။ Suntory PepsiCo Vietnam ၏ အဆိုအရ အဆိုပါ စီမံကိန်းကြောင့် ဒေသတွင်းထောက်ပံ့ရေးကွင်းဆက်တစ်လျှောက် အလုပ်အကိုင်ပေါင်း ၃,၀၀၀ ခန့် ဖန်တီးပေးနိုင်မည်ဟု မျှော်မှန်းထားကြောင်း သိရပါသည်။ ထို့ပြင် ဗီယက်နမ်မိတ်ဖက် လုပ်ငန်းများနှင့် ပူးပေါင်းဆောင်ရွက်မှုများ ပိုမိုနက်ရှိုင်းစေရန်၊ ပြည်တွင်းထောက်ပံ့ရေးကွင်းဆက် အသုံးပြုမှုတိုးမြှင့်ရန်၊ နည်းပညာသစ်များတွင် ရင်းနှီးမြှုပ်နှံရန်နှင့် ပညာရေး၊ ရေအရင်းအမြစ်ထိန်းသိမ်းရေး၊ သဘာဝပတ်ဝန်းကျင်ကာကွယ်ရေးနှင့် လူမှုအသိုက်အဝန်းဖွံ့ဖြိုးတိုးတက်ရေး အစီအစဉ်များကို အကောင်အထည်ဖော်သွားမည်ဖြစ်ကြောင်း သိရပါသည်။ လုပ်ငန်းနယ်ပယ် ကျွမ်းကျင်သူများက ယခုရင်းနှီးမြှုပ်နှံမှုသည် အာရှဒေသတွင် နိုင်ငံစုံကုမ္ပဏီများက ထောက်ပံ့ရေး ကွင်းဆက်များကို ကွဲပြားစွာတိုးချဲ့လျက်ရှိသည့်အခြေအနေတွင် မျိုးဆက်သစ် FDI များကို ဆွဲဆောင်ရာ၌ ဗီယက်နမ်၏ ယှဉ်ပြိုင်နိုင်စွမ်းကို အပြုသဘောဆောင်သော အချက်ပြမှုတစ်ရပ် အဖြစ် ဖော်ပြနေကြောင်း သုံးသပ်ကြပါသည်။ ထို့ပြင် Suntory PepsiCo ၏ အာရှဒေသ အကြီးဆုံးထုတ်လုပ်ရေးစက်ရုံကို ဗီယက်နမ်တွင်တည်ဆောက်ရန်ရွေးချယ်ခဲ့ခြင်းသည် အဆင့်မြင့်နည်းပညာ၊ ဆန်းသစ်တီထွင်မှုနှင့် ရေရှည်တည်တံ့ခိုင်မြဲသော စက်မှုလုပ်ငန်းများအတွက် ဒေသတွင်း မဟာဗျူဟာမြောက်ထုတ်လုပ်မှု ဗဟိုချက်အဖြစ် ဗီယက်နမ်၏အခန်းကဏ္ဍ ပိုမိုမြင့်တက်လာနေသည်ကို ဖော်ပြနေကြောင်း သိရှိရပါသည်။
Vietnam Plus
DOCA (ရန်ကုန်)