ဗီယက်နမ်နိုင်ငံ၏ အလှအပနှင့် တစ်ကိုယ်ရေသုံးပစ္စည်းစျေးကွက်သည် ၂၀၂၅ ခုနှစ်တွင် အမေရိကန်ဒေါ်လာ ၂.၇၄ ဘီလီယံအထိ ရောက်ရှိရန် မျှော်မှန်းထားပြီး နောက်ပိုင်းတွင် ဒေါ်လာ ၃ ဘီလီယံအထိ ဆက်လက်တိုးတက်လာရန် မျှော်လင့်ရသည်။
ဂျာမန်အချက်အလက်သုတေသနလုပ်ငန်း Statista ၏ အချက်အလက်များကို ကိုးကား၍ ဟိုချီမင်းစီးတီးတွင် မကြာသေးမီက ကျင်းပခဲ့သည့် အလှကုန်နှင့် ကျန်းမာရေးစောင့်ရှောက်မှု ထောက်ပံ့မှုကွင်းဆက်ဆိုင်ရာ အခမ်းအနားတစ်ခု၌ ကျွမ်းကျင်သူများက တင်ပြခဲ့ကြသည်။ ၂၀၂၉ ခုနှစ်အထိ နှစ်စဉ်ပျမ်းမျှတိုးတက်မှုနှုန်း ၃.၃ ရာခိုင်နှုန်းခန့် ရှိနေခြင်းကြောင့် အလှအပနှင့် တစ်ကိုယ် ရေသုံးပစ္စည်းစျေးကွက်သည် မကြာမီ ဒေါ်လာ ၃ ဘီလီယံအထိ ရောက်ရှိလာတော့မည် ဖြစ်သည်။
၂၀၂၅ ခုနှစ်အရောက်တွင် တစ်ကိုယ်ရေစောင့်ရှောက်မှုကဏ္ဍ (Personal care sector) သည် အကြီးမားဆုံးဝေစုအဖြစ် ဒေါ်လာ ၁.၂ ဘီလီယံခန့် ရှိလာမည်ဖြစ်သည်။ ဗီယက်နမ်စားသုံးသူများသည် အရေပြားကျန်းမာရေးနှင့် လူနေမှုဘဝအရည်အသွေးအပေါ် ပိုမိုအလေးထားလာ ကြသဖြင့် အရှိန်အဟုန်အမြန်ဆုံး တိုးတက်လာမည့် ကဏ္ဍမှာ အရေပြားစောင့်ရှောက်မှု (Skincare) နှင့် အလှကုန်ပစ္စည်း (Cosmetics) ကဏ္ဍဖြစ်သည်။
DKSH Group ၏ တစ်ကိုယ်ရေစောင့်ရှောက်မှုနှင့် ဓာတုဗေဒပစ္စည်းဌာနခွဲ ဒုတိယဥက္ကဋ္ဌ Michelle Delac က ဗီယက်နမ်အလှကုန်စျေးကွက်သည် ကမ္ဘာ့ပျမ်းမျှနှုန်းထက် များစွာကျော်လွန် ပြီး ဂဏန်းနှစ်လုံးနေရာ (Double-digit) တိုးတက်မှုနှုန်းကို ကြုံတွေ့နေရကြောင်း မှတ်ချက်ပြုခဲ့ သည်။
အလှအပရေးရာ ထုတ်ကုန်များသည် လက်ရှိ၌ အီလက်ထရွန်နစ်ကုန်သွယ်မှု (E-commerce) ပလတ်ဖောင်းများပေါ်တွင် စုစုပေါင်းကုန်စည်တန်ဖိုး အများဆုံးရရှိနေသည့် အမျိုး အစားဖြစ်သည်။ Metric ၏ အချက်အလက်များအရ ၂၀၂၅ ခုနှစ်တွင် ဗီယက်နမ်စားသုံးသူများ သည် Shopee, TikTok Shop, Lazada နှင့် Tiki ဟူသော ပလတ်ဖောင်း ၄ ခုပေါ်ရှိ အလှအပရေးရာထုတ်ကုန်များအတွက် ဗီယက်နမ်ဒေါင် ၇၄.၅ ထရီလီယံခန့် သုံးစွဲသွားမည် ဖြစ်သည်။
ဗီယက်နမ်နိုင်ငံတွင် Clean Beauty ခေတ်ရေစီးကြောင်းသည် သဘာဝပါဝင်ပစ္စည်းများ (Natural ingredients) သုံးစွဲထားသည်ဟု ကြော်ငြာသည့် ထုတ်ကုန်များနှင့် ဒွန်တွဲနေလေ့ရှိ သည်။ သို့သော်လည်း ကျွမ်းကျင်သူက “သဘာဝအတိုင်းဖြစ်ခြင်း” သည် “ဘေးကင်းခြင်း” ကို ရာနှုန်းပြည့် မဆိုလိုကြောင်း သတိပေးထားသည်ဟု သိရှိရပါသည်။
Source : VN Express
DOCA (ရန်ကုန်)