အင်ဒိုနီးရှားနိုင်ငံ၏ ရင်းနှီးမြှုပ်နှံမှုစီမံခန့်ခွဲရေးအဖွဲ့ Danantara Indonesia သည် Red and White Village Cooperatives (KDKMP) များ၏ ဝန်ဆောင်မှုလုပ်ငန်းများ တိုးချဲ့နိုင်ရေး အတွက် နိုင်ငံပိုင်လုပ်ငန်းများ (SOEs) အကြား ပူးပေါင်းဆောင်ရွက်မှုကို အားကောင်းစေခဲ့ ကြောင်း သိရပါသည်။Danantara Indonesia ၏ Chief Operating Officer ဖြစ်သူ Dony Oskaria က စနစ်ကိုပိုမိုစနစ်တကျဖြစ်စေရန် ဆက်လက်ပြုပြင်မွမ်းမံသွားမည်ဖြစ်ပြီး ဝန်ဆောင်မှုများကိုတိုးချဲ့ကာ ကျေးလက်ဒေသရှိ ပြည်သူများအနေဖြင့် တိုက်ရိုက်အကျိုးခံစားနိုင်စေရေး ဆောင်ရွက်သွားမည်ဖြစ်ကြောင်း ဇူလိုင် ၁၇ ရက်တွင် ထုတ်ပြန်သည့် ကြေညာချက်၌ ပြောကြားခဲ့ပါသည်။ Red and White Village Cooperatives (KDKMP) များကို ကျေးလက်ဒေသ စီးပွားရေးဖွံ့ဖြိုးတိုးတက်မှုကို မောင်းနှင်ပေးမည့် အဖွဲ့အစည်းများအဖြစ်သာမက ဒေသခံပြည်သူများအတွက် ဘက်စုံဝန်ဆောင်မှုပေးနိုင်သည့် ဗဟိုဌာနများအဖြစ်လည်း ဖွံ့ဖြိုးတိုးတက်စေရန် ရည်ရွယ်ဆောင်ရွက်လျက်ရှိကြောင်း သိရပါသည်။ နိုင်ငံတစ်ဝန်း သမဝါယမကွန်ရက်မှတစ်ဆင့် သုံးကီလိုဂရမ် LPG ဓာတ်ငွေ့အိုးများ၊ SPHP ဆန်၊ MinyaKita စားသုံးဆီနှင့် အစိုးရထောက်ပံ့ သည့်ဓာတ်မြေဩဇာများအပါအဝင် အခြေခံစားသောက်ကုန်နှင့် မရှိမဖြစ်ကုန်ပစ္စည်းများ ဖြန့်ဖြူးပေးနိုင်ရေးကို မြှင့်တင်သွားမည်ဖြစ်ကြောင်း သိရပါသည်။ ထို့ပြင် Mekaar အသေးစားငွေကြေး ချေးငွေဝန်ဆောင်မှု၊ BRILink ဘဏ်ဝန်ဆောင်မှု၊ Pos Indonesia မှတစ်ဆင့် ပို့ဆောင်ရေး ဝန်ဆောင်မှုများကိုလည်း သမဝါယမများမှ ဆောင်ရွက်ပေးမည်ဖြစ်ရာ ကျေးလက်ပြည်သူများ၏ ဘဏ္ဍာရေးနှင့် ပို့ဆောင်ရေးဝန်ဆောင်မှုများ လက်လှမ်းမီမှု ပိုမိုကောင်းမွန်လာမည်ဖြစ်ကြောင်း သိရပါသည်။ ထိုပေါင်းစည်းထားသော ဝန်ဆောင်မှုပုံစံသည် ဘဏ်လုပ်ငန်း၊ ပို့ဆောင်ရေးနှင့် အခြေခံလိုအပ်သောကုန်ပစ္စည်းများကို ကျေးလက်ဒေသတစ်ခုတည်းအတွင်း ပေါင်းစည်းပေးခြင်းဖြင့် ပြည်သူများ၏ ဝန်ဆောင်မှုလက်လှမ်းမီမှုကိုမြှင့်တင်ရန် ရည်ရွယ်ထားကြောင်း သိရပါသည်။ အဆိုပါအစီအစဉ်ကို အကောင်အထည်ဖော်နိုင်ရေးအတွက် Dony Oskaria သည် Pertamina Patra Niaga၊ Pupuk Indonesia၊ PTPN IV၊ RNI (ID FOOD)၊ Bulog နှင့် Agrinas Palma တို့၏ ဥက္ကဋ္ဌများနှင့် တွေ့ဆုံဆွေးနွေးခဲ့ကြောင်း သိရပါသည်။ ၎င်းက နိုင်ငံပိုင်လုပ်ငန်းများအကြား ပူးပေါင်းဆောင်ရွက်မှု ပိုမိုခိုင်မာလာပါက သမဝါယမများ၏ လုပ်ငန်းဆောင်ရွက်မှု ထိရောက်မှု မြင့်မားလာမည်ဖြစ်ပြီး KDKMP ဝန်ဆောင်မှုများမှ အကျိုးခံစားရမည့် လူမှုအသိုင်းအဝိုင်းအရေအတွက်လည်း ပိုမိုမြင့်တက်လာမည်ဟု ပြောကြားခဲ့ပါသည်။ အင်ဒိုနီးရှားအစိုးရသည် ဇူလိုင်လ အထိ KDKMP အဆောက်အအုံ ၁၅,၈၄၅ ခု တည်ဆောက်ပြီးစီးခဲ့ပြီး ဩဂုတ်လတွင် နိုင်ငံတစ်ဝန်း စတင်လည်ပတ်နိုင်ရန် စီစဉ်ထားကြောင်း သိရပါသည်။ ထို့ပြင် ၂၀၂၆ ခုနှစ်အကုန်တွင် KDKMP စုစုပေါင်း ၄၀,၀၀၀ ကို ဖွင့်လှစ်လည်ပတ်နိုင်ရန်ရည်မှန်းထားပြီး ကျေးရွာအခြေပြု စီးပွားရေးဖွံ့ဖြိုးတိုးတက်မှုကို အရှိန်မြှင့်တင်မည့် အဓိကမဟာဗျူဟာတစ်ရပ်အဖြစ် အကောင်အထည်ဖော်သွားမည်ဖြစ်ကြောင်း သိရှိရပါသည်။
Antara News
DOCA (ရန်ကုန်)