မကွေးတိုင်းဒေသကြီး၊ ပခုက္ကူခရိုင်အတွင်းရှိ ဆိပ်ဖြူမြို့နယ်သည် စိုက်ပျိုးရေးလုပ်ငန်းကို ဒေသစီးပွားဖြစ် လုပ်ကိုင်ကြပြီး စိုက်ပျိုးသီးနှံများစွာမှ တောင်သူအကျိုးအမြတ်ရရှိနိုင်သော ကြက်သွန်နီသီးနှံကို တစ်မြို့နယ်လုံးနီးပါး အဓိကအားထားစိုက်ပျိုးကြသည်။ ရေမြေရာသီဥတု ကောင်းမွန် ရာဒေသဖြစ်ပြီး အရည်အသွေးကောင်းမွန်သော ကြက်သွန်နီများထွက်ရှိ၍ ကြက်သွန်နီ စိုက်ပျိုးရေးလုပ်ငန်းကို အဓိကအားထားစိုက်ပျိုးလျက်ရှိပြီး နှစ်စဉ်စိုက်ဧက(၆၀၀၀)ခန့် စိုက်ပျိုးခြင်းဖြင့် ဒေသတွင်းကုန်သွယ်မှုလုပ်ငန်းများ ဖွံ့ဖြိုးလျက်ရှိပြီး ဒေသခံပြည်သူများမှလည်း နှစ်ပတ်လည် အလုပ်အကိုင် အခွင့်အလမ်းများစွာ ရရှိလျက်ရှိသည်။ မြို့ပေါ်ရှိ ကြက်သွန်နီပွဲရုံဈေးကွက်၌လည်း သီးနှံအရည်အသွေးနှင့် အရွယ်အစားလိုက်၍ ဈေးနှုန်းအသီးသီးဖြင့် အရောင်းအဝယ်ဖြစ်လျက်ရှိကြောင်း သိရသည်။
ဆိပ်ဖြူကြက်သွန်နီဈေးကွက်တွင် ဆောင်းပင်စိုက် ကြက်သွန်နီများ သီးနှံပေါ်စအချိန် မတ်လကုန် ဧပြီလဆန်းတွင် တောဈေး ကြက်သွန်နီ(ဂျွန်)တစ်ပိဿာလျှင် ကျပ်(၁၀၀၀ - ၁၅၀၀) ဈေးဖြင့် အရောင်းအဝယ်ဖြစ်ကြောင်း၊ မေလတွင် ကျပ်(၁၅၀၀-၂၀၀၀)ပေါက်ဈေးရှိပြီး ဇွန်လဆန်းမှ စတင်၍ ပြည်တွင်းကြက်သွန်နီသီးနှံများ ပြည်ပအဝယ်လိုက်လာ၍ ကြက်သွန်နီတစ်ပိဿလျှင် ကျပ်(၂၀၀၀-၃၀၀၀)ထိ ဈေးတက်ပြီး အရောင်းအဝယ်ဖြစ်ကြောင်း သိရှိရသည်။
၂၀၂၆ခုနှစ်၊ ဇူလိုင်လ (တတိယပတ်)တွင် ဂျွန်ကြက်သွန်နီ တစ်ပိဿာလျှင် အနိမ့်ဈေး ကျပ် (၃၅၀၀)မှ အမြင့်ဈေး ကျပ်(၄၅၀၀)ထိမြင့်တက်လာကြောင်း၊ ယခင်ဇွန်လ(စတုတ္ထပတ်)နှင့် ဈေးနှုန်းနှိုင်းယှဉ်ပါက တစ်ပိဿာလျှင် ကျပ်(၁၅၀၀)ခန့်ဈေးတက်ပြီး အရောင်းအဝယ်ဖြစ်ကြောင်း၊ ကြက် သွန်နီဈေးနှုန်း တရိပ်ရိပ်မြင့်တက်လျက်ရှိသော်လည်း ဈေးကွက်သို့ ကုန်ဝင်ရောက်မှုနည်းကြောင်း၊ ဒေသတွင်း လက်လီဈေးကွက်အနေဖြင့် ကြက်သွန်နီ တစ်ပိဿလျှင် ကျပ်(၃၀၀၀ မှ ၅၀၀၀)ရှိကြောင်း၊ အရည်အသွေးကောင်းပါက ကျပ်(၅၅၀၀)ခန့်ရှိကြောင်း ပတ္တမြားဈေးအတွင်းရှိ လက်လီအရောင်းဆိုင်များမှ သိရှိရသည်။
အရောင်းအဝယ်ဖြစ်မှုအနေဖြင့် ကြက်သွန်နီပွဲရုံဈေးကွက်သို့ ဇူလိုင်လ (၁)ရက် မှ (၁၆)ရက် အတွင်း ဒေသတွင်း ကြက်သွန်နီစိုက်ပျိုးမှုများသော တခေါင်း၊ ကူရှည်ရွာမှ အလယ်စု၊ ဆိုက်ခမ်း၊ ထမ္မကောက်၊ တွင်းမငယ်၊ ကံတွင်း၊ လယ်သာဝ၊ အနောက်ကမ်းဖြူ ကျေးရွာများမှ နေ့စဉ် ဝင် ရောက်ပြီး တစ်ရက်လျှင် ကြက်သွန်နီပျမ်းမျှ ပိဿာ(၅)သောင်းခန့်(၂)ပတ်အတွင်း ပိဿာချိန် (၇) သိန်းခန့် ဝင်ရောက်ကြောင်း၊ ကုန်စည်စီးဆင်းမှုအနေဖြင့် ဇူလိုင်လ ပထမ(၂)ပတ်အတွင်း ပျမ်းမျှ ကားအစီးရေ ရန်ကုန်ဘုရင့်နောင်ပွဲရုံသို့ (၄၅)စီး၊ မြဝတီမြို့သို့ (၂၀)စီး၊ ပုသိမ်မြို့သို့ (၅)စီး၊ စုစုပေါင်း အစီးရေ (၇၀) ရှိခဲ့ပြီး ကြက်သွန်နီ ပျမ်းမျှပိဿာ(၇)သိန်းခန့် စီးဆင်းခဲ့ကြောင်း၊ ဆိပ်ဖြူ မြို့နယ် ဒေသထွက်ကုန် ကြက်သွန်နီများကို ရန်ကုန်ဘုရင့်နောင်ပွဲရုံသို့ တင်ပို့ပြီး ထိုမှတဆင့် အခြားမြို့များသို့ တင်ပို့ရောင်းချဖြန့်ဖြူးပြီး ပြည်ပပို့ကုန်အဖြစ် ဆိပ်ဖြူမြို့မှ မြဝတီမြို့သို့ တင်ပို့၍ နယ်စပ်ဝယ်လက်များမှတစ်ဆင့် ထိုင်းနိုင်ငံသို့ တင်ပို့ကြောင်း သိရှိရပါသည်။
DOCA(မကွေး)