ဖိလစ်ပိုင်နိုင်ငံ၊ တန်ဂါဝမ်ဒေသတွင် ဆန်၁ ကီလိုလျှင် ပီဆို၂၀ အစီအစဉ်ဖြင့် ဆန်ဖြန့်ဖြူး

      အခြေခံလိုအပ်ချက် ကုန်ဈေးနှုန်းများ မြင့်တက်လာချိန်တွင် ဖိလစ်ပိုင်အစိုးရ၏ ပီဆို ၂၀ နှုန်းဖြင့် ဆန်ရောင်းချပေးသည့် အစီအစဉ်သည် Taglibas၊ Looc၊ Labuan၊ Linguisan၊ Tigpalay၊ San Pedro နှင့် Sto. Niño ကျေးရွာအုပ်စုများသို့ ရောက်ရှိသွားခဲ့သဖြင့် Tungawan မြို့ရှိ အိမ် ထောင်စုများစွာသည် ဈေးနှုန်းသက်သာသော ဆန်ကို ဝယ်ယူခွင့်ရရှိလာကြပြီး အကန့်အသတ် ရှိသော အိမ်ထောင်စုအသုံးစရိတ်များအတွက် ပိုမိုအဆင်ပြေစေခဲ့သည်။

    အဆိုပါအစီအစဉ်သည် သမ္မတ Ferdinand R. Marcos Jr. ဦးဆောင်သည့် အစိုးရအောက် တွင် ဖိလစ်ပိုင်အိမ်ထောင်စုများ၊ အထူးသဖြင့် နေ့စဉ် အိမ်ထောင်စု အသုံးစရိတ် စီမံခန့်ခွဲရာတွင် အကူအညီ လိုအပ်နေသူများအတွက် အဓိက စားနပ်ရိက္ခာများကို ပိုမိုဈေးနှုန်းသက်သာစွာဖြင့် အဆင်ပြေလွယ်ကူစွာ ဝယ်ယူနိုင်ရေး ကြိုးပမ်းဆောင်ရွက်ချက်များ၏ အစိတ်အပိုင်းတစ်ခု ဖြစ်သည်။

    Tungawan မြို့ရှိ မိသားစုများအတွက် ဆန်တစ်ကီလိုလျှင် ပီဆို ၂၀ နှုန်းဖြင့် ဆန်ရရှိနိုင် ခြင်းသည် များစွာသက်သာရာ ရစေခဲ့ကြောင်း၊ ဆန်တစ်ကီလိုလျှင် ချွေတာရရှိသည့် ငွေများကို သွားလာရေးစရိတ်၊ ကျောင်းစရိတ်၊ မီးဖိုချောင်နှင့် အသုံးဆောင်စရိတ်များ၊ အခြား အစားအသောက် ဝယ်ယူမှုများ အပါအဝင် အိမ်ထောင်စု၏ အခြားလိုအပ်ချက်များအတွက် လွှဲပြောင်းအသုံးပြုနိုင် ကြောင်း သိရှိရသည်။

    အထူးသဖြင့် ဆန်စပါးသည် ဝင်ငွေနည်း အိမ်ထောင်စုများအတွက် နေ့စဉ် အစားအသောက် စရိတ်၏ အဓိကပမာဏဖြစ်နေပြီး  အဆိုပါအစီအစဉ်၏ သက်ရောက်မှုသည် သိသိသာသာ အရေး ပါခဲ့ကြောင်း၊ နိုင်ငံ၏ အဓိက စားနပ်ရိက္ခာများထဲမှတစ်ခုကို  ဈေးနှုန်းသက်သာစွာ ဝယ်ယူရခြင်း ဖြင့် မိသားစုများအား မိမိတို့၏ ရရှိနိုင်သော ဝင်ငွေကို အကျိုးရှိရှိ အသုံးချနိုင်မည် ဖြစ်ကြောင်း၊ ဒေသတွင်း ပြည်သူများထံ အစိုးရ၏ ကူညီထောက်ပံ့မှုများကို ပိုမိုနီးကပ်စွာ ဆောင်ရွက်ပေးနိုင် ခြင်းသည် အလွန်အရေးကြီးကြောင်း Tungawan မြို့တော်ဝန် Angelito Anińon က ပြောကြား ခဲ့သည်။

    Tungawan မြို့တော်ဝန် Angelito Aniñon က ကျေးရွာဒေသများကို သွားရောက် ကြည့်ရှု ခွင့်ရပြီး မြို့သူမြို့သားများနှင့် တွေ့ဆုံကာ မိသားစုပေါင်းများစွာထံ ပီဆို ၂၀ အစီအစဉ် ရောက်ရှိခဲ့ သည့်အတွက် ဝမ်းမြောက်မိပါကြောင်းနှင့် ဈေးနှုန်းသက်သာသည့်ဆန် ဖြစ်သော်လည်း မိသားစု များ၏ နေ့စဉ်အသုံးစရိတ်များကို ကူညီပေးရာ‌ရောက်ပြီး အပြောင်းအလဲတစ်ခုကို လုပ်ဆောင် ပေးနိုင်ပါကြောင်း ပြောကြားခဲ့သည်။

    ပီဆို ၂၀ နှုန်းဖြင့် ဆန်ရောင်းချပေးသည့် အစီအစဉ်သည် အခြေခံကျသည့် ကုန်စည်များကို ပိုမိုရရှိနိုင်အောင် ဆောင်ရွက်ခြင်း၊ အစိုးရ၏ ကြားဝင်ဆောင်ရွက်မှုများကို မြို့နယ်/ကျေးရွာ အဆင့်အထိ အကျိုးရရှိစေရန် ဆောင်ရွက်ပေးခြင်းဖြင့်  ဖိလစ်ပိုင် အိမ်ထောင်စုများအား စားနပ် ရိက္ခာ ဈေးနှုန်း မြင့်တက်မှု၏ ရိုက်ခတ်မှုမှ ကာကွယ်ပေးရန်အတွက် အစိုးရ၏ ပိုမိုကျယ်ပြန့်သော တွန်းအားပေးမှုများကို ထင်ဟပ်စေသည်။

      အကျိုးခံစားခွင့်ရှိသူများအတွက် အဆိုပါ အစီအစဉ်သည် သက်သာသောဈေးနှုန်းဖြင့် ဆန် ရရှိရုံသာမက အိမ်ထောင်စု အသုံးစရိတ်အတွက်လည်း စိတ်သက်သာမှုရရှိနိုင်မည့် အခွင့်အရေး တစ်ခုလည်း ဖြစ်သည်။ စုဆောင်းမိသည့် ငွေကြေးတိုင်းသည် မိဘများအတွက် အခြားသော နေ့စဉ် လိုအပ်ချက်တစ်ခုကို ဖြည့်ဆည်းပေးနိုင်ခြင်း၊ ကလေးများ၏ ကျောင်းမုန့်ဖိုးပေးနိုင်ခြင်း သို့မဟုတ် မိသားစု ထမင်းဝိုင်းတွင် အခြားလိုအပ်သော အစားအစာတစ်ခုခုကို ပိုမို ဖြည့်ဆည်း ပေးနိုင်မည် ဖြစ်သည်။ အစီအစဉ်ကို Tungawan မြို့ရှိ ပိုမိုများပြားသော ကျေးရွာများထံ ဆက်လက် ဆောင်ရွက် ပေးသွားမည်ဖြစ်ပြီး စားနပ်ရိက္ခာလုံခြုံရေးနှင့် ထိခိုက်လွယ်သော မိသားစုများကို ကူညီစောင့်ရှောက် ရေးဆိုင်ရာ အစိုးရ၏ အခြားသော ကြိုးပမ်းမှုများကို အထောက်အကူပြုပေးသွားမည်ဖြစ်ကြောင်း ဒေသဆိုင်ရာတာဝန်ရှိသူများက ပြောကြားခဲ့သည်။

Source :(PIA) Philippine Information Agency, 20 August 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)