ကမ္ဘောဒီးယား စိုက်ပျိုးရေးကဏ္ဍကို တန်ဖိုးမြင့် စီးပွားရေးလုပ်ငန်းများအဖြစ် ပြောင်းလဲရန် အီးယူနှင့် ပူးပေါင်း

           ကမ္ဘောဒီးယား စိုက်ပျိုးရေး၊ သစ်တောနှင့် ငါးလုပ်ငန်းဝန်ကြီးဌာန (MAFF) နှင့် ဥရောပ သမဂ္ဂ (EU) တို့သည် ဥရောပဖွံ့ဖြိုးရေးမိတ်ဖက်အဖွဲ့များနှင့် ပူးပေါင်းကာ ပြည်တွင်းစိုက်ပျိုးရေး လုပ်ငန်းများကို တန်ဖိုးမြင့် စီးပွားရေးလုပ်ငန်းများအဖြစ် ပြောင်းလဲဖွံ့ဖြိုးရန် ဆောင်ရွက်နေကြ သည်။ အဆိုပါပူးပေါင်းဆောင်ရွက်မှုတွင် ရေရှည်တည်တံ့သည့် စိုက်ပျိုးထုတ်လုပ်မှု၊ အစားအစာ ဘေးကင်းလုံခြုံရေးနှင့် ထုတ်ကုန်တန်ဖိုးမြှင့် ပြုပြင်ထုတ်လုပ်ရေးတို့ကို အဓိကထားပြီး ကမ္ဘောဒီးယားနိုင်ငံထွက် စိုက်ပျိုးရေးထုတ်ကုန်များကို အရည်အသွေးမြင့် ဒေသတွင်းဈေးကွက်များနှင့် ဥရောပဈေးကွက်များသို့ ပိုမိုဝင်ရောက်နိုင်ရန် ရည်ရွယ်ထားသည်။ ယင်းဆောင်ရွက်မှုများကို ဩဂုတ် ၁၇ ရက်မှ ၁၈ ရက်အထိ Tboung Khmum၊ Kratie နှင့် Stung Treng ပြည်နယ်များတွင်ပြုလုပ်ခဲ့သည့် Cambodia-Team Europe ပူးတွဲခရီးစဉ်အတွင်း အလေးထားဖော်ပြခဲ့သည်။ ခရီးစဉ်ကို MAFF ဝန်ကြီး Dith Tina နှင့် ကမ္ဘောဒီးယားနိုင်ငံဆိုင်ရာ EU သံအမတ် Igor Driesmans တို့က ဦးဆောင်ခဲ့ပြီး ဥရောပသံအမတ်များ၊ ဖွံ့ဖြိုးရေးမိတ်ဖက်များနှင့် အစိုးရတာဝန်ရှိသူများ ပါဝင်ခဲ့ကြသည်။ အဆိုပါအဖွဲ့တွင် ချက်သမ္မတနိုင်ငံ သံအမတ် Markéta Kolc Hájková၊ ရိုမေးနီးယား သံအမတ် Cristina Romila နှင့် ခရိုအေးရှား သံအမတ် Ivan Velimir Starčević တို့အပြင် သြစတြီးယား၊ ဘယ်လ်ဂျီယံ၊ ပြင်သစ်၊ ဂျာမနီ၊ အိုင်ယာလန်နှင့် ဆွစ်ဇာလန်နိုင်ငံတို့၏ သံရုံးများမှ အကြီးအကဲများလည်း ပါဝင်ခဲ့ကြသည်။ ခရီးစဉ်အတွင်း ဥရောပ၏ ပံ့ပိုးမှုဖြင့် ဆောင်ရွက်နေသည့် အစီအစဉ်များမှ လယ်သမားများနှင့် စီးပွားရေးလုပ်ငန်းများအား အခြေခံကုန်ကြမ်း စိုက်ပျိုးထုတ်လုပ်မှုအဆင့်မှ ကျော်လွန်ကာ တန်ဖိုးမြှင့်ထုတ်ကုန်များ ထုတ်လုပ်နိုင်ရန် ကူညီပေးနေမှုများကို လေ့လာခဲ့ကြသည်။ ယင်းတွင် စာချုပ်ချုပ်ဆိုစိုက်ပျိုးရေး၊ ရိတ်သိမ်းပြီးနောက် ထုတ်ကုန်ပြုပြင်ထုတ်လုပ်ရေး၊ အရည်အသွေးအာမခံရေးနှင့် ဈေးကွက်ချိတ်ဆက်ပေးရေးတို့ ပါဝင်သည်။ Modern Agricultural Communities (MACS) နှင့် စာချုပ်ချုပ်ဆိုစိုက်ပျိုးရေးစနစ်များမှတစ်ဆင့် လယ်သမားများကို စုစည်းကာ ပြုပြင်ထုတ်လုပ်ရေးလုပ်ငန်းများအတွက် တည်ငြိမ်ပြီး ယုံကြည်စိတ်ချရသည့် ကုန်ကြမ်းထောက်ပံ့မှုရရှိစေရန် ဆောင်ရွက်နေကြောင်း Dith Tina က ဆိုသည်။ ထို့အပြင် သီဟိုဠ်စေ့နှင့် ငရုတ်ကောင်းကဲ့သို့ အဓိကစိုက်ပျိုးရေးထုတ်ကုန်များအတွက် အစားအစာဘေးကင်းလုံခြုံရေး စံနှုန်းများ၊ ရေရှည်တည်တံ့မှုနှင့် ဈေးကွက်ယှဉ်ပြိုင်နိုင်စွမ်းတို့ကို EU နှင့် မိတ်ဖက်အဖွဲ့များနှင့် အတူမြှင့်တင်ပေးနေပြီး ပြည်တွင်းနှင့် နိုင်ငံတကာဈေးကွက်များတွင် လယ်သမားများအတွက် အခွင့်အလမ်းသစ်များ ဖန်တီးပေးနိုင်မည်ဟု Dith Tina က ထပ်လောင်းပြောကြားခဲ့သည်။ EU သံအမတ် Igor Driesmans က Team Europe သည် EU Global Gateway မဟာဗျူဟာ မှတစ်ဆင့် နည်းပညာကျွမ်းကျင်မှု၊ အစားအစာဘေးကင်းလုံခြုံရေးနှင့် ထုတ်ကုန်ပြုပြင် ထုတ်လုပ်ရေးစနစ်များတွင် ရင်းနှီးမြှုပ်နှံကာ ကမ္ဘောဒီးယား၏ သီဟိုဠ်စေ့နှင့် ငရုတ်ကောင်း တန်ဖိုးကွင်းဆက်များကို ခိုင်မာစေရန် ဆောင်ရွက်နေကြောင်း ပြောကြားခဲ့သည်။ ယင်း ကြိုးပမ်းမှုများကြောင့် ပြည်တွင်းစိုက်ပျိုးရေး စီးပွားရေးလုပ်ငန်းများအနေဖြင့် တန်ဖိုးမြင့်ထုတ်ကုန်များကို ပြည်တွင်း၌ ထုတ်လုပ်နိုင်ပြီး အရည်အသွေးမြင့် ပို့ကုန်ဈေးကွက်များသို့ ဝင်ရောက်နိုင်မည်ဟု ၎င်းက ထပ်လောင်းပြောကြားခဲ့သည်။ ထို့အပြင် ခရီးစဉ်အတွင်း ဒေသခံလယ်သမားများနှင့် ကိုယ်တိုင်တွေ့ဆုံခဲ့ခြင်းက စိုက်ပျိုးရေးဝန်ကြီးဌာနနှင့် ဥရောပ မိတ်ဖက်များအကြား ပူးပေါင်းဆောင်ရွက်မှု၏ အကျိုးသက်ရောက်မှုကို လက်တွေ့မြင်တွေ့ နိုင်စေခဲ့ကြောင်း Driesmans က ပြောကြားခဲ့ကြောင်း သိရှိရပါသည်။

DOCA(ရန်ကုန်)