(၁၃-၈-၂၀၂၆) ရက်နေ့ နေ့လည် (၂:၀၀) နာရီအချိန်တွင် မအူပင်မြို့နယ်ရှိ Polytechnic တက္ကသိုလ်၌ စားသုံးသူ ကာကွယ်ရေးဥပဒေနှင့် စားသုံးသူများ သိရှိထားသင့်သည့် အကြောင်းအရာများကို အသိပညာပေးနိုင်ရန် မိတ်ဖက်အဖွဲ့များနှင့် ပူးပေါင်း၍ အသိပညာပေးဟောပြောပွဲကို ကျင်းပပြုလုပ်ခဲ့သည်။
အဆိုပါဟောပြောပွဲတွင် စားသုံးသူကာကွယ်ရေးဥပဒေပါ စားသုံးသူများ၏ အခွင့်အရေးနှင့် တာဝန်များ၊ ကုန်စည်နှင့် ဝန်ဆောင်မှုများကို ဝယ်ယူသုံးစွဲရာတွင် သတိပြုရမည့်အချက်များ၊ ကုန်အညွှန်းအမှတ်အသားများကို စနစ်တကျဖတ်ရှုစစ်ဆေး၍ အရည်အသွေးပြည့်မီပြီး ဘေးကင်းလုံခြုံသည့် ကုန်ပစ္စည်းများကို ရွေးချယ်ဝယ်ယူသုံးစွဲရန် လိုအပ်ချက်များကို မအူပင်ခရိုင်ဦးစီးမှူးရုံးမှ ဒုခရိုင်ဦးစီးမှူး ဦးအောင်ဇော်ဦးက ရှင်းလင်းဟောပြောခဲ့သည်။ ထို့အပြင် စားသုံးသူများအနေဖြင့် ကုန်စည်နှင့် ဝန်ဆောင်မှုများနှင့်ပတ်သက်၍ နစ်နာဆုံးရှုံးမှုများ ဖြစ်ပေါ်လာပါက သက်ဆိုင်ရာ ဌာနများထံ တိုင်ကြားနိုင်သည့် နည်းလမ်းများနှင့် စားသုံးသူရေးရာ Call Center (1535) သို့ ဆက်သွယ်မေးမြန်း၊ တိုင်ကြား နိုင်ကြောင်းကိုလည်း အသိပညာပေး ရှင်းလင်းပြောကြားခဲ့သည်။ အဆိုပါ အသိပညာပေးဟောပြောပွဲသို့ ဆရာ/ဆရာမများနှင့် ကျောင်းသား/ကျောင်းသူ စုစုပေါင်း (၃၇၅) ဦး တက်ရောက်ခဲ့ကြပြီး သိရှိလိုသည်များကို အပြန်အလှန်မေးမြန်းဆွေးနွေးခဲ့ကြောင်း သိရသည်။
DOCA(ဧရာဝတီ)