အင်ဒိုနီးရှားနိုင်ငံ၏ ရေနံစိမ်းထုတ်လုပ်မှု ပျမ်းမျှပမာဏသည် ဇူလိုင် ၃၁ ရက်အထိ တစ်ရက်လျှင် စည်ပေါင်း ၅၇၈,၁၅၆ စည်ရှိခဲ့ပြီး ၂၀၂၆ ခုနှစ် နိုင်ငံတော်ဘတ်ဂျက်တွင် လျာထားသည့် တစ်ရက်လျှင် စည်ပေါင်း ၆၁၀,၀၀၀ ထက် လျော့နည်းနေကြောင်း စွမ်းအင်နှင့် သတ္တုအရင်းအမြစ်ဝန်ကြီးဌာန(ESDM)က ဩဂုတ် ၂၇ ရက်တွင် ပြောကြားခဲ့ပါသည်။ ရေနံနှင့် သဘာဝဓာတ်ငွေ့ညွှန်ကြားရေးမှူးချုပ် Laode Sulaeman က ဂျကာတာမြို့တွင် ပါလီမန်၏ ကော်မရှင် ၁၂ နှင့် ပြုလုပ်သည့် ကြားနာပွဲ၌ PT Transportasi Gas Indonesia (TGI) ပိုင် သဘာဝဓာတ်ငွေ့ပို့လွှတ်ရေးပိုက်လိုင်းယိုစိမ့်မှုကြောင့် Rokan ရေနံလုပ်ကွက်၏ ထုတ်လုပ်မှု လုပ်ငန်းများထိခိုက်ခဲ့ပြီး ယင်းမှာ ရေနံထုတ်လုပ်မှုကျဆင်းစေသည့် အကြောင်းရင်းများအနက် တစ်ခုဖြစ်ကြောင်း ပြောကြားခဲ့ပါသည်။ ထို့ပြင် Riau ပြည်နယ်ရှိ Rokan ရေနံလုပ်ကွက်၏ လုပ်ငန်းများတွင် လျှပ်စစ်ဓာတ်အားစနစ်ပြဿနာများကြောင့်လည်း ထိခိုက်မှုများဖြစ်ပေါ်ခဲ့ ကြောင်း Sulaeman က ပြောကြားခဲ့ပါသည်။ ထိခိုက်မှုဖြစ်ပေါ်ခဲ့သည့်ဓာတ်အားပေးစက်ရုံကို အမြန်ဆုံးပြန်လည်လည်ပတ်နိုင်ရေးအတွက် စွမ်းအင်နှင့် သတ္တုအရင်းအမြစ်ဝန်ကြီးဌာနက ဆက်လက်ဆောင်ရွက်လျက်ရှိပြီး ယင်းမှတစ်ဆင့် Rokan ရေနံလုပ်ကွက်၏ ထုတ်လုပ်မှုကို အကောင်းဆုံးမြှင့်တင်နိုင်ရန်ရည်ရွယ်ထားကြောင်း ၎င်းကဆိုပါသည်။ ယခင်က စွမ်းအင်နှင့် သတ္တုအရင်းအမြစ်ဝန်ကြီး Bahlil Lahadaliaက ဆူမားတြားဒေသရှိ သဘာဝဓာတ်ငွေ့ပိုက်လိုင်း ယိုစိမ့်မှုကြောင့် ယခုနှစ်အစပိုင်းတွင် ရေနံထုတ်လုပ်မှု စည်ပေါင်း နှစ်သန်းခန့် ဆုံးရှုံးနိုင်ခြေ ဖြစ်ပေါ်ခဲ့ကြောင်း ပြောကြားထားပါသည်။ ထို့ပြင် အရှေ့ဂျာဗားနှင့် အလယ်ပိုင်းဂျာဗားဒေသရှိ Cepu ရေနံလုပ်ကွက်တွင် သဘာဝအလျောက်ထုတ်လုပ်မှုနှုန်း လျင်မြန်စွာကျဆင်းနေခြင်း မှာလည်း အခြားစိန်ခေါ်မှုတစ်ရပ်ဖြစ်ကြောင်း သိရပါသည်။ Cepu ရေနံလုပ်ကွက်၏ သဘာဝ အလျောက်ထုတ်လုပ်မှုကျဆင်းမှုကိုဖြေရှင်းနိုင်ရေးအတွက် အစိုးရက ယင်းလုပ်ကွက်၏လုပ်ငန်း လည်ပတ်သူနှင့် ထုတ်လုပ်မှုကျဆင်းနှုန်းကိုနှေးကွေးစေရေးဆောင်ရွက်နိုင်မည့် နည်းလမ်းများအပေါ် ဆက်သွယ်ညှိနှိုင်းထားကြောင်း Sulaeman က ပြောကြားခဲ့ပါသည်။ လက်ရှိတွင် ရေနံလုပ်ကွက်၏ထုတ်လုပ်မှုကို ထပ်မံကျဆင်းမသွားစေရေးအတွက် တည်ငြိမ်သည့်အဆင့် တွင် ထိန်းသိမ်းထားသည်ဟု ၎င်းက ပြောကြားခဲ့ကြောင်း သိရပါသည်။
DOCA (ရန်ကုန်)