အင်ဒိုနီးရှားနိုင်ငံတွင် လျှပ်စစ်မော်တော်ယာဉ် (EV) ထုတ်လုပ်ရေးအတွက် ကုန်ကြမ်း ပစ္စည်းများ၊ ဘက်ထရီထုတ်လုပ်ရေးမှစ၍ မော်တော်ယာဉ်ထုတ်လုပ်ခြင်းနှင့် အသုံးပြုပြီး ဘက်ထရီများ ပြန်လည်အသုံးချခြင်းအထိ ပြည်တွင်း EV စက်မှုကွင်းဆက်တစ်ခုလုံး တည်ဆောက်နိုင်သည့် အရင်းအမြစ်များရှိကြောင်း စက်မှုဝန်ကြီး Agus Gumiwang Kartasasmita က ပြောကြားခဲ့ပါသည်။ မော်တော်ယာဉ်ထုတ်လုပ်ရေးတစ်ခုတည်းတွင် ရင်းနှီး မြှုပ်နှံမှုများအာရုံစိုက်မနေဘဲ နိုင်ငံ၏ EV ထောက်ပံ့ရေးကွင်းဆက် ခိုင်မာလာစေရန် လုပ်ငန်း ကဏ္ဍအသီးသီးတွင် ရင်းနှီးမြှုပ်နှံမှုများ တိုးချဲ့လုပ်ဆောင်ရန်လိုအပ်ကြောင်း ၎င်းကပြောကြား ခဲ့ပါသည်။ ထို့ပြင် တရုတ်လျှပ်စစ်မော်တော်ယာဉ်ထုတ်လုပ်သူ BYD အနေဖြင့်လည်း အင်ဒိုနီးရှား ၏ EV စက်မှုဂေဟစနစ်အတွင်း ပိုမိုနက်ရှိုင်းစွာပေါင်းစည်းပါဝင်ရန် တိုက်တွန်းခဲ့ကြောင်း သိရ ပါသည်။ ဝန်ကြီးက အဆိုပါအချက်များကို စက်တင်ဘာလ ၃ ရက်နေ့တွင် အင်ဒိုနီးရှားနိုင်ငံ အနောက်ဂျာဗားပြည်နယ်၌ တရုတ်လျှပ်စစ်မော်တော်ယာဉ်ကုမ္ပဏီ BYD က ဖွင့်လှစ်သည့် ထုတ်လုပ်ရေးစက်ရုံအခမ်းအနား၌ ပြောကြားခဲ့ခြင်းဖြစ်ကြောင်း သိရပါသည်။ အင်ဒိုနီးရှား၏ အကြီးမားဆုံးစက်မှုလုပ်ငန်းဗဟိုချက်များအနက်တစ်ခုဖြစ်သည့် အနောက်ဂျာဗားတွင် ထုတ်လုပ် ရေးစက်ရုံတည်ဆောက်ရန် BYD ၏ ဆုံးဖြတ်ချက်ကိုလည်း Kartasasmita က ကြိုဆိုခဲ့ကြောင်း သိရပါသည်။ အင်ဒိုနီးရှား၏ EV စက်မှုလုပ်ငန်း လျင်မြန်စွာဖွံ့ဖြိုးတိုးတက်နေချိန်တွင် အဆိုပါ စက်ရုံဖွင့်လှစ်ခြင်းဖြစ်ကြောင်း ၎င်းကဆိုပါသည်။ ၂၀၂၆ ခုနှစ် ဧပြီလအထိ အင်ဒိုနီးရှားနိုင်ငံ၌ EV အစီးရေ ၄၆၈,၂၃၁ စီး ထုတ်လုပ်ခဲ့ပြီး ယင်းတို့အနက် နှစ်ဘီးတပ်ယာဉ် ၂၄၂,၉၀၉ စီးနှင့် လေးဘီး တပ်ယာဉ် ၂၂၃,၁၀၀ စီး ပါဝင်ကြောင်း သိရပါသည်။ ၂၀၂၆ ခုနှစ် ပထမခြောက်လအတွင်း ဘက်ထရီလျှပ်စစ်ယာဉ် (BEV) ရောင်းချရမှုမှာ အစီးရေ ၇၀,၀၉၅ စီးရှိပြီး စျေးကွက်ဝေစု၏ ၁၆.၀၆ ရာခိုင်နှုန်းရှိခဲ့ကြောင်း သိရပါသည်။ အလားတူ ဟိုက်ဘရစ်ယာဉ်ရောင်းချရမှုမှာ အစီးရေ ၄၀,၄၀၅ စီးရှိပြီး စျေးကွက်ဝေစု ၉.၂၆ ရာခိုင်နှုန်း ရှိခဲ့ကြောင်း သိရပါသည်။ အဆိုပါကာလအတွင်း အင်ဒိုနီးရှားနိုင်ငံ၏ လေးဘီးတပ်ယာဉ်ဈေးကွက်တွင် BYD က ရောင်းအားအများဆုံးဖြစ်ပြီး စုစုပေါင်းဈေးကွက်၏ ၄၃.၂ ရာခိုင်နှုန်းအထိ ရှိခဲ့ကြောင်း Kartasasmita က ပြောကြားခဲ့ပါသည်။ ထို့ပြင် BYD ၏ ထုတ်ကုန်များသည် အင်ဒိုနီးရှားနိုင်ငံတွင် သတ်မှတ်ထားသည့် ပြည်တွင်းအစိတ် အပိုင်းအသုံးပြုမှုအဆင့် (TKDN) ၄၀.၈ ရာခိုင်နှုန်းမှ ၄၇ ရာခိုင်နှုန်းအထိ ရရှိထားကြောင်း ၎င်းက ဆိုပါသည်။ အင်ဒိုနီးရှားမော်တော်ယာဉ်စက်မှုလုပ်ငန်းအသင်း (GAIKINDO) ၏ မှတ်တမ်းများအရ ၂၀၂၄ ခုနှစ်မှ ၂၀၂၆ ခုနှစ် ပထမခြောက်လအထိ အင်ဒိုနီးရှားစားသုံးသူများထံ BYD လျှပ်စစ် မော်တော်ယာဉ် အစီးရေ ၉၃,၈၆၉ စီး ရောင်းချခဲ့ပြီးဖြစ်ကြောင်း သိရပါသည်။ ယင်းရောင်းအား ပမာဏသည် BYD ၏ အင်ဒိုနီးရှားဈေးကွက်အတွင်း လျင်မြန်စွာတိုးချဲ့ဝင်ရောက်လာမှုနှင့် နိုင်ငံ၏ မော်တော်ယာဉ်စက်မှုလုပ်ငန်းတွင် BYD ၏ အခန်းကဏ္ဍ ပိုမိုကြီးမားလာမှုကို ထင်ရှားစွာ ဖော်ပြနေကြောင်း စက်မှုဝန်ကြီးက ပြောကြားခဲ့ပါသည်။
DOCA (ရန်ကုန်)