ဗီယက်နမ်နိုင်ငံအနေဖြင့် ၂၀၂၆ ခုနှစ်အတွင်း ဒူးရင်းသီးတင်ပို့မှုမှရရှိသည့်ဝင်ငွေကို ယမန်နှစ်က ရရှိခဲ့သည့် အမေရိကန်ဒေါ်လာ ၃.၈၅ ဘီလီယံအဆင့်အထိ ရောက်ရှိစေရန်နှင့် ယင်းထက်ပိုမို၍ အမေရိကန်ဒေါ်လာ ၄ ဘီလီယံခန့်အထိရရှိနိုင်ရန် ကျန်ရှိနေသည့်လုပ်ထုံး လုပ်နည်းများကိုပြီးစီးရန်ဆောင်ရွက်နေကြောင်း စိုက်ပျိုးရေးနှင့် သဘာဝပတ်ဝန်းကျင်ဝန်ကြီး ဌာန ဒုတိယဝန်ကြီး Dang Ngoc Diep က ပြောကြားခဲ့ပါသည်။ စက်တင်ဘာလ ၃ ရက် မွန်းလွဲပိုင်းတွင်ကျင်းပသည့် အစိုးရ၏ ဩဂုတ်လအတွက်ပုံမှန်သတင်းစာရှင်းလင်းပွဲ၌ ဒုတိယ ဝန်ကြီးကပြောကြားရာတွင် ဒူးရင်းသီးသည် တန်ဖိုးမြင့်စိုက်ပျိုးရေးထွက်ကုန်များအနက် တစ်မျိုး ဖြစ်ပြီး စိုက်ပျိုးဧရိယာ ဟက်တာ ၂၀၀,၀၀၀ ခန့်ရှိကာ ထုတ်လုပ်မှုတန်ချိန် ၂.၀၈ သန်းခန့် ရှိကြောင်း ဆိုပါသည်။ ဒူးရင်းသီးသည် စိုက်ပျိုးရေးကဏ္ဍ၏ အဓိကသီးနှံတစ်မျိုးဖြစ်ပြီး စုစုပေါင်း လယ်ယာထွက်ကုန်တင်ပို့မှုတန်ဖိုး၏ ၄၀ ရာခိုင်နှုန်းခန့်ပါဝင်ကြောင်း သိရပါသည်။ ယခုနှစ် ပထမရှစ်လအတွင်း ဒူးရင်းသီးတင်ပို့မှုမှဝင်ငွေမှာ အမေရိကန်ဒေါ်လာ ၁.၉၅ ဘီလီယံခန့် ရရှိခဲ့ပြီး ယင်းအနက် တရုတ်နိုင်ငံသို့တင်ပို့မှုမှ အမေရိကန်ဒေါ်လာ ၁.၈၅ ဘီလီယံ ရရှိခဲ့ကာ စုစုပေါင်း တင်ပို့မှု၏ ၉၅ ရာခိုင်နှုန်းအထိပါဝင်ကြောင်း သိရပါသည်။ ဒူးရင်းသီးတင်ပို့မှုတွင် ကြုံတွေ့နေရ သည့်အခက်အခဲများကိုဖြေရှင်းရန် ဝန်ကြီးဌာနသည် ဒုတိယဝန်ကြီးများဦးဆောင်သည့် လုပ်ငန်း အဖွဲ့များကို ဒေသအသီးသီးသို့စေလွှတ်ကာ တိုက်ရိုက်တွေ့ဆုံဆွေးနွေးခဲ့ကြောင်း Diep က ပြောကြားခဲ့ပါသည်။ အထူးသဖြင့် ထုတ်လုပ်မှုမြင့်မားသည့် အလယ်ပိုင်းကုန်းမြင့်ဒေသ၊ အရှေ့ တောင်ပိုင်းနှင့် အနောက်တောင်ပိုင်းဒေသများ၊ Dong Nai ပြည်နယ်တို့ရှိ စိုက်ပျိုးထုတ်လုပ်သူ များနှင့်တွေ့ဆုံ၍ တင်ပို့မှုဆိုင်ရာအခက်အခဲများကိုဖြေရှင်းပေးခဲ့ကြောင်း ၎င်းကဆိုပါသည်။ ဇူလိုင် ၁ ရက်မှစ၍ ဝန်ကြီးဌာနသည် အီလက်ထရွန်နစ်စနစ်မှတစ်ဆင့် ထုတ်ကုန်မူရင်းဒေသ ခြေရာခံ စနစ်ကို စတင်အသုံးပြုခဲ့ကြောင်း သိရပါသည်။ အမေရိကန်နှင့် တရုတ်နိုင်ငံတို့၏ ကုန်သွယ်ရေး အကြံပေးများကိုတွေ့ဆုံခဲ့ပြီး ဗီယက်နမ်လယ်ယာထွက်ကုန်များကို ပြည်တွင်းနှင့် နိုင်ငံတကာ ဈေးကွက်များတွင် ယုံကြည်စိတ်ချရသည့်အမှတ်တံဆိပ်များအဖြစ်မြှင့်တင်ရန်နှင့် ထုတ်ကုန် မူရင်းခြေရာခံစနစ်ကို ပထမဆုံးအကြိမ်အကောင်အထည်ဖော်နိုင်ခဲ့သည့်အတွက် ဝန်ကြီးဌာန၏ ဆောင်ရွက်ချက်များကို အထူးတန်ဖိုးထားကြကြောင်း Diep က ပြောကြားခဲ့ပါသည်။ ယင်းသည် ဒူးရင်းသီးတင်ပို့မှုမြှင့်တင်ရေးနှင့် ထုတ်ကုန်တန်ဖိုးတိုးမြှင့်ရေးအတွက် အရေးပါသည့်ဖြေရှင်း ချက်တစ်ရပ်ဖြစ်ကြောင်း ၎င်းကဆိုပါသည်။ ထို့ပြင် ဝန်ကြီးဌာနအနေဖြင့် ဒူးရင်းသီးစိုက်ပျိုး ဧရိယာကုဒ်များထုတ်ပေးရေးနှင့်ပတ်သက်သည့်အခက်အခဲများ၊ အတားအဆီးများကို ဖြေရှင်းရန် လည်း ဆောင်ရွက်ခဲ့ကြောင်း သိရပါသည်။ လက်ရှိတွင် ဒူးရင်းသီးစိုက်ပျိုးဧရိယာအားလုံးကို လုပ်ပိုင်ခွင့်ခွဲဝေပေးထားပြီး ရပ်ကွက်နှင့် ကျေးရွာအဆင့်အာဏာပိုင်များက စိုက်ပျိုးဧရိယာနှင့် ထုပ်ပိုးစက်ရုံကုဒ်များကိုထုတ်ပေးနိုင်ပြီဖြစ်သောကြောင့် လုပ်ငန်းစဉ်များပိုမိုလွယ်ကူလာကြောင်း ၎င်းကပြောကြားခဲ့ပါသည်။ ဩဂုတ် ၁၄ ရက်တွင် ဝန်ကြီးဌာနခေါင်းဆောင်များနှင့် တရုတ်ဘက်မှ တာဝန်ရှိသူများ တွေ့ဆုံဆွေးနွေးပြီးနောက် တရုတ်နိုင်ငံအကောက်ခွန်အထွေထွေအုပ်ချုပ်ရေး အဖွဲ့က ဗီယက်နမ်ဒူးရင်းသီးအတွက် စိုက်ပျိုးဧရိယာကုဒ် ၅၆၇ ခုကို ထပ်မံခွင့်ပြုခဲ့ကြောင်း သိရ ပါသည်။ ထို့ကြောင့် လက်ရှိစုစုပေါင်းစိုက်ပျိုးဧရိယာကုဒ်အရေအတွက်မှာ ၁,၈၀၀ ကျော်အထိ ရှိလာကြောင်း သိရပါသည်။ ဒုတိယဝန်ကြီးက ဒူးရင်းသီးကဏ္ဍတွင် လိုအပ်ချက်များလည်းရှိနေ သေးကြောင်း ထောက်ပြခဲ့သည်ဟု သိရပါသည်။ ဒူးရင်းသီးစိုက်ပျိုးထုတ်လုပ်မှုမှာ လျင်မြန်စွာ တိုးတက်လာသော်လည်း တန်ဖိုးကွင်းဆက်များကို စနစ်တကျဖွဲ့စည်းနိုင်မှုမှာ ယင်းတိုးတက်မှုနှင့် လိုက်လျောညီထွေမဖြစ်သေးကြောင်းနှင့် ထို့ပြင် နည်းပညာပိုင်းနှင့် ဈေးကွက်ပိုင်းဆိုင်ရာ သတ်မှတ်ချက်များသည်လည်း ပိုမိုတင်းကျပ်လာကြောင်း ပြောကြားခဲ့ပါသည်။ နိုင်ငံတကာ ဈေးကွက်တွင် ပြိုင်ဆိုင်မှုများပြားလာခြင်းသည်လည်း စိန်ခေါ်မှုတစ်ရပ်ဖြစ်ပြီး မလေးရှားနှင့် ထိုင်းနိုင်ငံတို့က တရုတ်နိုင်ငံသို့ ဒူးရင်းသီးတင်ပို့မှုမြှင့်တင်ရန် မူဝါဒများချမှတ်ဆောင်ရွက်လာကြ ကြောင်း ၎င်းကထောက်ပြခဲ့ပါသည်။ ယင်းအခြေအနေများကိုဖြေရှင်းရန် ဝန်ကြီးဌာနသည် ကုန်သွယ်မှုမြှင့်တင်ရေးလုပ်ငန်းများတိုးမြှင့်ဆောင်ရွက်ပြီး ပို့ကုန်ဈေးကွက်များကိုလည်း မျိုးစုံ ခွဲခြားဖော်ဆောင်သွားမည်ဖြစ်ကြောင်း သိရပါသည်။ ထို့ပြင် အိန္ဒိယ၊ ဩစတြေးလျနှင့် နယူးဇီလန် ကဲ့သို့သော အလားအလာရှိသည့်ဈေးကွက်များသို့ ဈေးကွက်ဝင်ရောက်ခွင့်နှင့် ဈေးကွက်ဝေစု တိုးမြှင့်နိုင်ရေးဆွေးနွေးညှိနှိုင်းမှုများကို ဆက်လက်လုပ်ဆောင်သွားမည်ဖြစ်ကြောင်း သိရပါသည်။
ဇူလိုင်လအတွင်း အိန္ဒိယနိုင်ငံက ဗီယက်နမ်နိုင်ငံမှဒူးရင်းသီးများကို ၎င်းတို့ဈေးကွက်အတွင်း တင်သွင်းခွင့်ပြုခဲ့ကြောင်း သိရပါသည်။ လူဦးရေ ၁ ဘီလီယံကျော်ရှိပြီး လာမည့်ကာလအတွင်း ဒူးရင်းသီးဝယ်လိုအား အလွန်မြင့်မားလာနိုင်သည့်ဈေးကွက်ဖြစ်သဖြင့် အိန္ဒိယနိုင်ငံတွင် ပို့ကုန် မြှင့်တင်ရေးလုပ်ငန်းများကို တိုးချဲ့ဆောင်ရွက်နေကြောင်း Diep က ပြောကြားခဲ့ပါသည်။ ဒုတိယ အချက်အနေဖြင့် ထုတ်လုပ်မှုကိုပြန်လည်ဖွဲ့စည်းပြီး ရေရှည်တည်တံ့သည့် ကုန်ကြမ်းထုတ်လုပ် ရာဒေသများ ဖော်ဆောင်သွားမည်ဖြစ်ကြောင်း သိရပါသည်။ ထို့ပြင် မြေယာ၊ ရေအရင်းအမြစ်၊ ရာသီဥတုနှင့် အခြေခံအဆောက်အအုံအခြေအနေများနှင့် ကိုက်ညီမှုရှိစေရန် ထုတ်လုပ်မှုဒေသ များ၏စီမံကိန်းများကို ပြန်လည်သုံးသပ်သွားမည်ဖြစ်ကြောင်း သိရပါသည်။ တတိယအချက်မှာ အရည်အသွေး၊ အစားအသောက်ဘေးကင်းလုံခြုံရေးနှင့် ထုတ်ကုန်မူရင်းခြေရာခံစနစ်များကို စံချိန်စံညွှန်းနှင့်အညီဖြစ်စေရန် ဆောင်ရွက်သွားမည်ဖြစ်ကြောင်း သိရပါသည်။ ထို့ပြင် သိပ္ပံနှင့် နည်းပညာဆိုင်ရာသုတေသန၊ အသုံးချမှုနှင့် နည်းပညာလွှဲပြောင်းမှုများကိုမြှင့်တင်ကာ ဒစ်ဂျစ် တယ်အသွင်ကူးပြောင်းရေးကိုလည်း အရှိန်မြှင့်ဆောင်ရွက်သွားမည်ဖြစ်ကြောင်း သိရပါသည်။ အခြားဆောင်ရွက်မည့်အချက်နှစ်ရပ်မှာ သိုလှောင်ခြင်း၊ ပြုပြင်ထုတ်လုပ်ခြင်းနှင့် ထောက်ပံ့ ပို့ဆောင်ရေးအခြေခံအဆောက်အအုံများ ဖွံ့ဖြိုးတိုးတက်စေရန်နှင့် ဓာတ်ခွဲခန်းကွန်ရက်၏ စွမ်းဆောင်ရည်ကို တိုးချဲ့မြှင့်တင်ရန်တို့ ဖြစ်ကြောင်း သိရပါသည်။
DOCA (ရန်ကုန်)