မုံရွာခရိုင်အတွင်းရှိ စားသုံးသူပြည်သူများ စားသုံးဆီပြတ်လပ်မှုမရှိစေရေး၊ ဈေးနှုန်းချိုသာ၍ အရေအတွက်အလေးချိန်နှင့်အရည်အသွေး ပြည့်ဝမှန်ကန်စွာရရှိနိုင်ရေးအတွက် စားသုံးသူ ရေးရာဦးစီးဌာန၊ မြန်မာနိုင်ငံဆီကုန်သည်များနှင့် ဆီလုပ်ငန်းရှင်များအသင်း၊ မုံရွာခရိုင် စားသုံးဆီကုန်သည်များနှင့် စားသုံးဆီလုပ်ငန်းရှင်များအသင်းတို့ပူးပေါင်း၍ စားအုန်းဆီများ ဖြန့်ဖြူးရောင်းချပေးလျက်ရှိကြောင်းသိရပါသည်၊၊
စားအုန်းဆီများရောင်းချရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီက ထုတ်ပြန်ပေးလျက်ရှိ သော စားအုန်းဆီတစ်ပိဿာလျှင် ရည်ညွှန်းဈေးအပေါ်အခြေခံ၍ သယ်ယူပို့ဆောင်ခအပါ ကုန်ကျစရိတ်တွင် အမြတ် ၂ ရာခိုင်နှုန်းတွက်ချက်၍ ရောင်းချပေးခြင်းဖြစ်ပြီး လူတစ်ဦးလျှင် ၁ ပိဿာနှုန်းဖြင့် ရောင်းချပေးကြောင်းသိရပါသည်။
မုံရွာခရိုင်အတွင်း ၁-၁-၂၀၂၃ ရက်နေ့မှ ၁၃-၁-၂၀၂၃ ရက်နေ့ထိ စားအုန်းဆီပိဿာချိန် ၁၁၈၈၀ ပိဿာခန့်ရောင်းချရာပေးရာတွင် တစ်ပိဿာလျှင် ၅၀၀၀ ကျပ်ဖြင့်လည်းကောင်း၊ ၁၄-၁-၂၀၂၃ ရက်နေ့မှ ၃၁-၁-၂၀၂၃ ရက်နေ့အထိ စားအုန်းဆီပိဿာချိန် ( ၁၅၈၄၀) ပိဿာခန့်ရောင်းချပေးရာတွင် တစ်ပိဿာလျှင် ၄၉၀၀ ကျပ်ဖြင့်လည်းကောင်း စုစုပေါင်းပိဿာချိန် (၂၇၇၂၀) ပိဿာခန့်အား လူစည်ကားရာရပ်ကွက်၊ ဈေးများအပြင် မြို့စွန်ရပ်ကွက်များသို့ပါ ဈေးကားများဖြင့် လှည့်လည်ရောင်းချလျက်ရှိကြောင်း မုံရွာခရိုင်စားသုံးဆီကုန်သည်များနှင့် စားသုံးဆီလုပ်ငန်းရှင်များထံမှ သတင်းရရှိပါသည်။
DOCA(စစ်ကိုင်း)