ပန်းတောင်းဒေသထွက်စစ်စစ် စိမ်းစားသီး (သရက်) ဈေးကွက်အတွင်းသို့ စတင်ဝင်ရောက်လာပြီဖြစ်ပါသည်။ အသီးအရွယ်အစားမှာ လက်တစ်ဆစ်မျှသာရှိပြီး စားဖူးသူတိုင်း အရသာသိသော သရက်သီးဖြစ်၍ ပြည်တစ်ဖက်ကမ်း ပန်းတောင်းမြို့မှထွက်ရှိပါသည်။ အလုံးသေးသေးလေးတွေ ယခုအချိန်တွင်စတင်ပေါ်လာခြင်းဖြစ်၍ သရက်သီးအလုံး ကြီးသွားလျှင် အရသာအနည်းငယ် ချဉ်သွားသဖြင့် စား၍မကောင်းတော့ပါ။ လုံးဝအချဉ်ဓါတ်မရှိ၍ ကြွပ်ကြွပ်မွှေးမွှေးလေးဖြင့် စားကောင်းသဖြင့် ဈေးလည်းကြီးပါသည်။ မစားသုံးခင် ထက်ခြမ်းခွဲ အစေ့ထုတ် ရေစိမ်ထားရှိရပြီး ထမင်းစားလျှင် အတို့အမြုပ်အဖြစ် စားသုံးကြသလို နေ့လည်ခင်းများတွင်လည်း သားရေစာအဖြစ်လည်း စားသုံးကြပါသည်။ မြန်မာတစ်နိုင်ငံလုံးတွင် ပန်းတောင်းတစ်မြို့ထဲတွင်သာ ထွက်ရှိခြင်းဖြစ်၍ ယခုလမှ စတင်အသီးများသီးလာသဖြင့် ဈေးမှာပေါ်ဦးပေါ်ဖျားဖြစ်၍ သရက်သီး (၁၀)လုံးတွဲ တစ်တွဲလျှင် (၃၀၀၀)ကျပ်ဖြင့် ရောင်းချကြောင်းသိရ၍ မတ်လတွင် ဈေးများကျဆင်းလာနိုင်သည်ဟု သိရှိရပါသည်။
DOCA(ပဲခူး)