ပြည်ခရိုင်၊ ပေါက်ခေါင်းမြို့နယ်တွင် ဖရဲသီးများစိုက်ပျိုးထားရှိသဖြင့် စားသုံးသူရေးရာဦးစီးဌာန၊ မြို့နယ်တာဝန်ခံနှင့်ဝန်ထမ်းများသည် (၂၇.၂.၂၀၂၃)နေ့ နံနက်ပိုင်းတွင် လေးကြီးအုပ်စု၊ လေးကြီးကျေးရွာသို့သွားရောက်၍ ဖရဲသီးစိုက်ပျိုးထွက်ရှိမှုနှင့် တောင်သူအကျိုးအမြတ်တို့အား ကွင်းဆင်းလေ့လာခဲ့ပါသည်။
ပေါက်ခေါင်းမြို့နယ်၊ လေးကြီးအုပ်စု၊ လေးကြီးကျေးရွာရှိ ဖရဲစိုက်ပျိုးသူတောင်သူ ဒေါ်သင်းသင်းဆွေ နှင့်တွေ့ဆုံပြီး မေးမြန်းရာ ၎င်းမှ ဖရဲသီး ၀.၂၅ ဧက စိုက်ပျိုးထားရှိပြီး စိုက်ပျိုးသည့်မျိုးမှာ ခလေးကြီးမျိုးဖြစ်ပါသည်။ ဖရဲကိုစိုက်ပျိုးသောမြေအမျိုးအစားမှာ သဲနုန်း မြေနှင့် စပါးရိတ်သိမ်းပြီး လယ်ကွင်းများတွင်စိုက်ပျိုးနိုင်ပါသည်။ လေးကြီးကျေးရွာရှိ လယ်မြေများတွင် စိုက်ပျိုးထားကြောင်း တွေ့ရှိရပါသည်။ ဖရဲစိုက်ပျိုးရာတွင် မြေတစ်နေရာထဲတွင် ဆက်တိုက် စိုက်ပျိုးပါက ပိုးမွှားများကျရောက်တတ်သဖြင့် အလှည့်ကျစိုက်ပျိုးပေးရန် လိုအပ်ပါသည်။ ဖရဲသီးကို မေလမှစ၍ ဖေဖော်ဝါရီလအထိ စိုက်ပျိုးကြပြီး ရေဝပ်သည့်မြေမျိုးတွင် စိုက်ပျိုးရန်မသင့်တော်ပါ။ လေးကြီးကျေးရွာတွင် ဖရဲစိုက်ပျိုးရာ၌ ၀.၂၅ ဧကအတွက်စိုက်ပျိုးထုတ်လုပ်ကုန်ကျစရိတ်မှာ (၁၅၀၀၀၀) ကျပ်ခန့်ကုန်၍ အထွက်နှုန်းမှာ အကြီး/အသေးသောင်းပြောင်း အလုံး (၂၀၀)ခန့် ထွက်ရှိသည်ဟု သိရှိရပါသည်။ ယခုအချိန်တွင် ဖရဲသီးဈေးမှာ အလုံးအမျိုးအစားအလိုက် ကြီး/လတ်/ သေး တစ်လုံးလျှင် (၄၀၀၀/၃၀၀၀/၁၅၀၀)ကျပ်ဖြင့် ရောင်းချလျက်ရှိသဖြင့် ဝင်ငွေမှာ (၆)သိန်း ကျပ်ခန့် ရရှိသည်ဟု သိရှိရပါသည်။ ဖရဲစိုက်ပျိုးသူတောင်သူအနေဖြင့် အသားတင်ဝင်ငွေမှာ (၄၅၀၀၀၀) ကျပ်ခန့် အမြတ်အစွန်းရှိသည်ဟု သိရှိရပါသည်။
ဖရဲသီးစိုက်ပျိုးသူတောင်သူအနေဖြင့် ၀.၂၅ ဧကစိုက်ပျိုးလျှင် တောင်သူအမြတ် (၄၅၀၀၀၀) ကျပ်ခန့်ရရှိ၍ တစ်ဧကစိုက်ပျိုးလျှင် (၁၈)သိန်းကျပ်ခန့် ရရှိနိုင်မည်ဟု တွက်ချက်တင်ပြရပါသည်။ ထို့ကြောင့် ဖရဲသီးမှာ လူကြိုက်လည်းများသဖြင့် ဧကများတိုးချဲ့စိုက်ပျိုးမည်ဆိုလျှင် အကျိုး အမြတ်များပိုမိုရရှိလာနိုင်မည်ဖြစ်ပါသည်။
DOCA(ပဲခူး)