မန္တလေးတိုင်းဒေသကြီး၊ ကျောက်ဆည်မြို့နယ်အတွင်းရှိ တောင်သူများသည် စပါး၊ ပဲ၊ ပြောင်း၊ နှမ်း၊ ငရုတ် စသည့်သီးနှံများကို အဓိကထားစိုက်ပျိုးလျက်ရှိရာ ယခုအခါ ကုန်စိမ်းသီးနှံဖြစ်သော ခရမ်းချဉ်သီးကိုလည်း တစ်နိုင်တစ်ပိုင်မှ စီးပွားဖြစ်စိုက်ပျိုးလာကြသည်ကိုတွေ့ရပါသည်။ ခရမ်းချဉ်သီးစိုက်ပျိုးမည်ဆိုလျှင် မျိုးစေ့ကိုမြေသားဘောင်ပြုလုပ်၍ ပျိုးထောင်ပြီး တစ်လကျော် (သို့) တစ်လခွဲသားအချိန်တွင်စိုက်ပျိုးနိုင်ပြီး စတင်စိုက်ပျိုးသည်မှ (၂)လကျော်အချိန်တွင် အသီးများစတင်ခူးဆွတ်နိုင်၍ (၄-၅)ရက်ခြားတစ်ကြိမ်ခူးဆွတ်ရကြောင်း၊ စတင်ခူးဆွတ်ချိန်တွင်(၁)ဧကလျှင် ပိဿာချိန် (၃၀-၄၀)ပိဿာခန့်ထွက်ရှိပြီး တစ်ပတ်ထက်တစ်ပတ် အထွက်နှုန်းပိုမိုလာကာ အများဆုံးထွက်ရှိသောအချိန်တွင် ပိဿာချိန်(၂၅၀-၃၀၀)ဝန်းကျင်ထွက်ရှိကြောင်းသိရှိရပါသည်။ ခရမ်းချဉ်သီးစိုက်ပျိုးရာတွင်(၁)ဧကကုန်ကျစရိတ်အနေဖြင့် ပျိုးထောင်ခြင်း၊ မြေပြင်ခြင်း၊ ရေတင်ခြင်း၊ သွင်းအားစု၊ လုပ်သားခ၊ စုစုပေါင်း (၈၀၀၀၀၀- ၉၀၀၀၀၀)ကျပ်ခန့်ကုန်ကျကြောင်း၊ စတင်ခူးဆွတ်သည်မှ (၃)လကျော်အထိခူးဆွတ်နိုင်ကြောင်း၊ ကုန်စိမ်းသီးနှံဖြစ်သည့်အတွက် စျေးနှုန်းအတက်အကျရှိကြောင်း၊ ထွက်ရှိလာသော ခရမ်းချဉ်သီးများကို လက်လီရောင်းချမှုရှိသည့်အပြင် အထွက်နှုန်းများပြားလာပါက ကုန်စိမ်းဒိုင်များသို့သွားရောက်ရောင်းချကြောင်း၊ ယခုအချိန်တွင် ခရမ်းချဉ်သီး (၁)ပိဿာလျှင် (၁၂၀၀-၁၃၀၀)ကျပ်အထိရောင်းချရသောကြောင့် စျေးကောင်းရရှိနေပြီး ရာသီသိမ်းသည်အထိ (၁)ဧကအကျိုးအမြတ်အနေဖြင့်(၁၀-၁၃)သိန်းဝန်းကျင်ရရှိသောကြောင့် ခရမ်းချဉ်သီးစိုက်တောင်သူများ ပျော်ရွှင်ဝမ်းသာလျက်ရှိပြီး တိုးချဲ့စိုက်ပျိုးသင့်သောသီးနှံတစ်မျိုးဖြစ်ကြောင်း ခရမ်းချဉ်သီးစိုက်တောင်သူတစ်ဦး၏ ပြောပြချက်အရသိရှိပါသည်။
DOCA(မန္တလေး)