ရခိုင်ပြည်နယ်၊ စစ်တွေခရိုင်၊ စားသုံးသူရေးရာဦးစီးဌာနမှ ခရိုင်ဦးစီးမှူး ဦးမောင်လှဝင်း (ဦးစီးအရာရှိ)နှင့် ဝန်ထမ်းများသည် (၂၈-၃-၂၀၂၃) ရက်နေ့၊ နံနက် (၉:၀၀) နာရီအချိန်တွင် အစားအသောက်နှင့်ဆေးဝါးကွပ်ကဲရေးဦးစီးဌာန (FDA)၊ ကျန်းမာရေးဦးစီးဌာန၊ စည်ပင်သာယာရေးအဖွဲ့တို့ပါဝင်သော ပူးပေါင်းအဖွဲ့ဖြင့် စစ်တွေမြို့၊ မြို့မဈေးအတွင်းရှိ ဆေးဝါးအရောင်းဆိုင်များသို့သွားရောက်၍ ဈေးကွက်အတွင်း ဆေးဝါးမှတ်ပုံတင် Parbisure အမည်ရှိ ဆေးဝါးရောင်းချမှုမရှိစေရန် ကွင်းဆင်းစစ်ဆေးဆောင်ရွက်ခဲ့ပါသည်။
၎င်း Parbisure အမည်ရှိဆေးဝါးသည် ဂျာမနီနိုင်ငံထုတ် Parbisure IV/HV Injection အကြောအားဆေးနှင့်တူ၍ အစားအသောက်နှင့်ဆေးဝါးကွပ်ကဲရေးဦးစီးဌာန၏ DRC No. မပါရှိသည့် အတွက် စံချိန်စံညွှန်းစစ်ဆေးမှုခံယူထားခြင်းမရှိ၍ ၎င်းဆေးဝါးအား သုံးစွဲသူမိဘပြည်သူများအတွက် များစွာထိခိုက်နစ်နာမှုများကြုံတွေ့ရနိုင်၍ ဈေးကွက်အတွင်း ရောင်းချမှုမရှိစေရေး ကွင်းဆင်းစစ်ဆေးဆောင်ရွက်ရခြင်းဖြစ်ပြီး ထိုသို့ ကွင်းဆင်းစစ်ဆေးဆောင်ရွက်ရာတွင် စစ်တွေ မြို့မဈေးအတွင်းရှိ ဆေးဆိုင်များတွင် ၎င်းဆေးဝါးအားရောင်းချမှုမရှိကြောင်း စိစစ်တွေ့ရှိရပါသည်။
ဆေးဝါးရောင်းချသည့် လုပ်ငန်းရှင်များအား FDA ထောက်ခံချက်မရှိသော၊ အရည်အသွေးအာမခံချက်မရှိသော တရားမဝင်ဆေးဝါးများ ရောင်းချခြင်းမပြုကြရန်၊ အတုအပသတိပြု၍ မှာယူရောင်းချကြရန်၊ စားသုံးသူကာကွယ်ရေးဥပဒေ ၂၀၁၉ပါ စီးပွားရေးလုပ်ငန်းရှင်များ၏တာဝန်များနှင့် ကုန်အညွှန်းအမှတ်အသားဆိုင်ရာ လိုက်နာဆောင်ရွက်ရမည့်အချက်များအား အသိပညာပေးမှုလုပ်ငန်းများဆောင်ရွက်ခဲ့ပါကြောင်း သတင်းရရှိပါသည်။
DOCA(ရခိုင်)