စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနကပြုစုရေးဆွဲထားသည့် ဆန်စပါးဥပဒေ(မူကြမ်း)နှင့်စပ်လျဉ်း၍ အလုပ်ရုံဆွေးနွေးပွဲကို ရခိုင်ပြည်နယ်၊ စစ်တွေမြို့၊ New World ခန်းမ၌ (၁-၄-၂၀၂၃) ရက်နေ့တွင် ရခိုင်ပြည်နယ်အစိုးရအဖွဲ့၊ စီးပွားရေးရာဝန်ကြီးနှင့်တကွ စားသုံးသူရေးရာဦးစီးဌာန(ရုံးချုပ်)မှ တာဝန်ရှိပုဂ္ဂိုလ်များ၊ ရခိုင်ပြည်နယ်ဦးစီးမှူးနှင့် ပြည်နယ်ဦးစီးမှူးရုံးမှဝန်ထမ်းများ၊ ပြည်နယ်အဆင့်ဌာနဆိုင်ရာတာဝန်ရှိသူများ၊ ရခိုင်ကုန်သည်စက်မှုအသင်း၊ ဆန်စက်လုပ်ငန်းရှင်များ၊ ဆန်စပါးနှင့်ပတ်သက်သော အသင်းအဖွဲ့များမှတာဝန်ရှိသူများ၊ စိုက်ပျိုးထုတ်လုပ်သူများတက်ရောက်ခဲ့ကြပါသည်။
အဆိုပါ အလုပ်ရုံဆွေးနွေးပွဲတွင် ရခိုင်ပြည်နယ်အစိုးရအဖွဲ့၊ စီးပွားရေးရာဝန်ကြီး ဦးစံရွှေမောင်က အဖွင့်အမှာစကားပြောကြားပြီးနောက် စားသုံးသူရေးရာဦးစီးဌာနက ပြုစုရေးဆွဲထားသော ဆန်စပါးဥပဒေ(မူကြမ်း)ကို ပြင်ဆင်ဖြည့်စွက်နိုင်ရန် သက်ဆိုင်ရာကဏ္ဍအလိုက် တာဝန်ရှိသူများတက်ရောက်ကြသည့်အတွက် ဝမ်းသာကြိုဆိုပါကြောင်း၊ ဆန်စပါးလုပ်ငန်းနှင့်ပတ်သက်၍ အတိတ်၌ ရခိုင်ပြည်နယ်မှ ဆန်စပါးများကို ကမ္ဘာသို့ တင်ပို့နိုင်ခဲ့ကြောင်း၊ ဆန်စပါးကဏ္ဍဖွံဖြိုးတိုးတက်ရေးအတွက် ဤဥပဒေဖြင့် ဆောင်ရွက်သွားမည်ဖြစ်ကြောင်း သိရှိရသည့်အတွက် ဆန်စပါးနယ်ပယ်တွင် ပါဝင်ပတ်သက်နေသည့် စိုက်ပျိုးထုတ်လုပ်သော တောင်သူများ၊ ပွဲစားများ၊ စက်ပိုင်များ၊ ကုန်သည်များနှင့် ပြည်ပတင်ပို့လုပ်ငန်းရှင်များထုတ်လုပ်မှုကွင်းဆက်တစ်လျှောက်လုံး ဖွံ့ဖြိုးတိုးတက်မှသာ ဆန်စပါးကဏ္ဍတိုးတက်လာမည့်ဖြစ်သည့်အတွက် ကျယ်ကျယ်ပြန့်ပြန့်ဝိုင်းဝန်းဆွေးနွေးအကြံပြုစေလိုကြောင်း ပြောကြားခဲ့ပြီး စားသုံးသူရေးရာဦးစီးဌာ(ရုံးချုပ်)မှ ညွှန်ကြားရေးမှူး ဒေါ်နီလာသိန်းက ဆန်စပါးဥပဒေ(မူကြမ်း)ရေးဆွဲရခြင်း ရည်ရွယ်ချက်နှင့်ပတ်သက်၍ ရှင်းလင်းဆွေးနွေးခဲ့ကာ ဆက်လက်၍ လက်ထောက်ညွှန်ကြားရေးမှူး ဦးထက်ဝင်းအောင်က ဆန်စပါးဥပဒေ(မူကြမ်း)ပါ ကြောင်းအရာများကို အသေးစိတ်ရှင်းလင်းဆွေးနွေးခဲ့ကာ တက်ရောက်လာသူများ၏အကြံပြုဆွေးနွေးချက်များအား အပြန်အလှန်ဆွေးနွေးခဲ့ပြီး အလုပ်ရုံဆွေးနွေးပွဲကို နေ့လယ်(၁၃:၁၅) နာရီအချိန်တွင် ရုပ်သိမ်းခဲ့ကြောင်း သတင်း ရရှိပါသည်။
DOCA(ရခိုင်)