ကျောက်မဲခရိုင်၊ ကျောက်မဲမြို့နယ်၊ နောင်ပိန်ကျေးရွာရှိ တောင်သူများသည် ပြောင်း ဈေးကွက်ကောင်း မရရှိသဖြင့် အချိန်တိုအတွင်း တွက်ချေကိုက်သော နေကြာဆီသီးနှံများအား အစားထိုးစိုက်ပျိုးလာကြောင်း သိရှိရပါသည်။ နေကြာဆီသီးနှံမျိုးစေ့များကို စိုက်ပျိုးရေးဦးစီးဌာန၊ တောင်ကြီးမျိုးစေ့ဌာနရုံးမှ ချိတ်ဆက်မှာယူ၍ တောင်သူများထံသို့ လက်ဝယ်ရောက်ဖြန့်ချိပေးနေကြောင်း သိရပါသည်။ မျိုးစေ့မှာ ရေဆင်းစပ်မျိုးဖြစ်ပြီး ကျောက်မဲမြို့နယ်တွင် နေကြာဆီသီးနှံ စိုက်ဧကမှာ မိုးနေကြာ(၁၈၀)ဧကနှင့် ဆောင်းနေကြာ(၈၀)ဧက စိုက်ပျိုးထားကြောင်း သိရှိရပါသည်။ နေကြာဆီသီးနှံတစ်ဧက ခန့်မှန်းကုန်ကျစရိတ်မှာ (၂၅၀၀၀၀)ကျပ်ခန့်ရှိပြီး အထွက်နှုန်းမှာ တစ်ဧက လျှင်(၃၀)တင်း၊ ပိဿာအားဖြင့် တစ်ဧကလျှင်(၃၈၀)ပိဿာခန့် ထွက်ရှိကြောင်း သိရှိရပါသည်။ ရောင်းဈေးမှာ တစ်ပိဿာလျှင် (၁၂၀၀)ကျပ်ဝန်းကျင်ခန့် ဈေးနှုန်းရရှိကြောင်းသိရပါသည်။ ထို့ကြောင့် နေကြာဆီတစ်ဧကလျှင် (၄၆၅၀၀၀)ကျပ် ဈေးရရှိ၍ အကျိုးအမြတ်တစ်ဧကလျှင် (၂၀၀၀၀၀)ကျပ် အမြတ်ရရှိသောကြောင့် ပြောင်းသီးနှံထက် နေကြာဆီသီးနှံများကို ပိုမိုစိုက်ပျိုးလာကြောင်း သိရှိရပါသည်။
ထွက်ရှိလာသောနေကြာဆီများကို ဆီစက်လုပ်ငန်းရှင်များအသင်းသို့ တိုက်ရိုက်ရောင်းချနိုင် ရန်အတွက် ကျောက်မဲစိုက်ပျိုးရေးဦးစီးဌာနမှ ချိတ်ဆက်ဆောင်ရွက်ပေးလျက်ရှိကြောင်း သိရှိရပါ သည်။ နေကြာဆီသီးနှံကို တစ်နှစ်လျှင် နှစ်သီးစားအဖြစ် စိုက်ပျိုးလာကြသဖြင့် တောင်သူများ အတွက် အကျိုးအမြတ်ဖြစ်ထွန်းပြီး ဝင်ငွေကောင်း၍ တွက်ချေကိုက်သော သီးနှံများဖြစ်ကြောင်း၊ ဈေးကွက်ရှာဖွေစရာမလိုသောကြောင့် ပြောင်းအစား နေကြာဆီသီးနှံကို အစားထိုးစိုက်ပျိုးခြင်း ဖြစ်ကြောင်း သတင်းရရှိပါသည်။
ရှမ်းပြည်နယ်
စားသုံးသူရေးရာဦးစီးဌာန