သတင်းနှင့် လှုပ်ရှားမှုများ

            ကရင်ပြည်နယ် ဘားအံမြို့၊ ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနတွင် ကုန်အညွှန်းအမှတ်အသားဆိုင်ရာ အသိပညာပေးဆွေးနွေးပွဲ Talk Show ကို ၂၀၂၂ခုနှစ်၊ ဇန်နဝါရီ ၁၉ ရက်နေ့ နံနက် (၁၀:၂၀) နာရီအချိန်တွင် ကျင်းပပြုလုပ်ခဲ့ကြောင်း သိရပါသည်။

            ရှေးဦးစွာ ခရိုင်ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ခရိုင်ဦးစီးမှူး ဒေါ်စိုးစိုးအေးက Talk Show ကျင်းပပြုလုပ်ရခြင်း၏ရည်ရွယ်ချက်အား ရှင်းလင်းပြောကြားခဲ့ပါသည်။

          ဆွေးနွေးပွဲတွင် စားသုံးသူရေးရာဦးစီးဌာနမှ  ပြည်နယ်ဦးစီးမှူး ဦးသန်းဦးက ဌာန၏ မျှော်မှန်းချက်ဖြစ်သော “စားသုံးသူများလုံခြုံစိတ်ချရမှုရှိစေရန်”နှင့် ရည်မှန်းချက်ဖြစ်သော  (၁) စားသုံးသူအခွင့်အရေးနှင့် စားသုံးသူအကျိုးစီးပွားကာကွယ်ရေးဆောင်ရွက်ရန်၊ (၂)ထုတ်ကုန်များ လုံခြုံစိတ်ချရမှုရှိစေရေးဆောင်ရွက်ရန်၊ (၃) ကုန်စည်နှင့်ဝန်ဆောင်မှုများ၏ အရည်အသွေးစီမံခန့်ခွဲမှုနှင့် သုတေသနဖွံ့ဖြိုးရေးလုပ်ငန်းများဆောင်ရွက်ရန်၊ (၄) ပြည်တွင်းကုန်သွယ်ရေးဖွံ့ဖြိုးမှုနှင့် သုတေသနလုပ်ငန်းများဆောင်ရွက်ရန် ရှင်းလင်း‌ဆွေးနွေးခဲ့ပြီး စားသုံးသူကာကွယ်ရေး ဉပဒေကို မြန်မာနိုင်ငံ၌ ၂၀၁၄ ခုနှစ်၊ မတ်လ ၁၄ ရက်နေ့တွင် ပထမဦးဆုံးအကြိမ် စတင်ပြဌာန်းခဲ့ပြီး စတင်ပြဌာန်းခဲ့သည့် အချိန်မှစ၍ လိုအပ်ချက်များတွေ့ရှိရပြီး ထုတ်ကုန်လုံခြုံ စိတ်ချရမှုဆိုင်ရာ အားနည်းနေသည်ကို ပြင်ဆင်ပြီး ၂၀၂၀ ပြည့်နှစ် မတ်လ ၁၅ ရက်နေ့တွင် စားသုံးသူကာကွယ်ရေးဉပဒေအသစ်ကို ပြန်လည်ပြင်ဆင် ပြဌာန်းခဲ့ပါကြောင်း ဆွေးနွေးခဲ့ပါသည်။  

          ဆက်လက်၍ စားသုံးသူများထိခိုက်နစ်နာမှုမရှိစေရန်အတွက် စားသုံးသူများ၏ အခွင့်အရေးအပြည့်အဝရရှိစေရန် စီးပွားရေးလုပ်ငန်းရှင်များ လိုက်နာဆောင်ရွက်ရမည့် အချက်များဖြစ်သော စားသုံးသူကာကွယ်ရေးဥပဒေ အခန်း(၁၈)၊ ပုဒ်မ(၄၃)အရ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်များပေါ်တွင် မြန်မာဘာသာဖြင့် ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ တွဲလျက်ဖြစ်စေ ဖော်ပြရမည်ဖြစ်ကြောင်းနှင့် ကုန်စည်များပေါ်တွင် အဓိကပါဝင်ရမည်အချက်များမှာ ကုန်စည်၏ အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာရေးဆိုင်ရာ ဘေးထွက်ဆိုးကျိုး၊ ဓာတ်မတည့်ကြောင်းဖော်ပြချက်၊ ကြိုတင်သတိပေးချက်များ ပါဝင်ရမည်ဖြစ်ကြောင်း အကျယ်တဝင့် ဟောပြောဆွေးနွေးခဲ့ကြောင်း သိရှိရပါသည်။

        ထို့နောက် ထားသိုသိမ်းဆည်းမှုအညွှန်းနှင့် ပတ်သက်၍ မလိုက်နာသည့်အတွက် ဖြစ်ပေါ်လာမည့် မှိုဆိပ် ( Aflatoxins) အကြောင်းနှင့် ပြည်တွင်းကုန်သွယ်မှု ဖွံ့ဖြိုးတိုးတက်စေရန်အတွက် သိရှိစေရန် အသိပညာပေးများကို နောက်လများတွင် ဆွေးနွေးဆောင်ရွက်သွားမည်ဖြစ်ပါကြောင်း ပြောကြားခဲ့ပြီး ထုတ်လုပ်မှုအစီအစဉ်အား (၁၀:၅၀)အချိန်တွင် ပြီးမြောက်ခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန

ကရင်ပြည်နယ်

      ပြောင်းလဲလာတဲ့ခေတ်စနစ်အရ  နေ့စဉ်နေထိုင်စားသောက်ဖို့ ချက်ပြုတ်မှုတွေ အတွက် အချိန်မပေးနိုင်သူတွေ၊ အလုပ်ပင်ပန်းနွမ်းနယ်မှုတွေအပြင် အိမ်အလုပ်ကြောင့် ဝန်ပိနေတဲ့ အိမ်ရှင်မတွေအတွက်တော့ အသင့်စားစားသောက်ကုန် (Ready To Eat)  တွေဟာ အဆင်ပြေ လွယ်ကူစေတဲ့ လက်စွဲကုန်စည်တွေဖြစ်လာပါတယ်၊ ယခင်ကတော့ (Ready To Eat) ကုန်စည် ဆိုရင် စည်သွပ်ဗူး၊ ဘာလချောင်ကြော်နဲ့ ငါးရံ့ခြောက်မီးကင် အစရှိတာတွေလောက်သာရှိခဲ့ပေမဲ့  ယခုဆိုရင်တော့  ချဉ်ပေါင်ကြော်၊ ငါးပိရည်၊ တို့စရာ မှအစ အသီးအနှံမျိုးစုံအထိကို  (Ready To Eat) အသင့်စား စားသောက်ကုန်အဖြစ် တွေ့ရှိလာ ရပြီး အမှတ်တံဆိပ်မျိုးစုံနဲ့ ဈေးကွက်မှာ နေရာယူလာပြီ ဖြစ်ပါတယ်၊ (Ready To Eat) ကုန်စည်တွေဟာ အချိန်နဲ့ လူပင်ပန်းမှုသက်သာစေတဲ့ ကုန်စည် တွေဖြစ်လို့ အလုပ်ချိန် များပြားလွန်းတဲ့သူတွေ အထူးသဖြင့် အလုပ်တဖက်နဲ့ အိမ်ရှင်မတွေအတွက် အားထားစရာဖြစ်လာပါတော့တယ်၊ ဈေးကွက်ဝယ်လိုအားများပြားလာတာနဲ့အညီ ထုတ်လုပ်သူ တွေကလဲ (Ready To Eat) ကုန်စည်အမျိုးမျိုးကို အမှတ်တံဆိပ်အမျိုးမျိုးနဲ့ ထုတ်လုပ်လာကြပါတယ်၊ ဒီလိုထုတ်လုပ်မှုများပြားလာတဲ့ ကုန်စည်အမှတ်တံဆိပ်တွေ ထဲကမှ ဘေးကင်းပြီးစိတ်ချရတဲ့ကုန်စည်တွေကို ရွေးချယ်ဝယ်ယူစားသုံး တတ်ဖို့ကလည်း လွန်စွာ အရေးကြီးတဲ့အခန်းကဏ္ဍဖြစ်လာပါတယ်။ ဒီတော့ဘယ်လိုအချက်အလက်တွေ ပါတဲ့ (Ready To Eat) ကုန်စည်ကို ဝယ်ယူအသုံးပြုရမလဲဆိုတာကို စားသုံးသူတွေ သိထားဖို့ရာ လိုအပ်ပါတယ်၊ (Ready To Eat) ကုန်စည်တွေမှာ သက်တမ်း ကြာကြာ ထားလို့ရတဲ့ကုန်စည်တွေရှိသလို သက်တမ်းကြာကြာထားမရတဲ့ကုန်စည်တွေလဲ ရှိတဲ့ အတွက် သက်တမ်းဖော်ပြမှုပါဝင်ဖို့အလွန်အရေးကြီးပါတယ်၊ ဘယ်နေ့ဘယ်ရက်က စတင်ထုတ်လုပ်ထားတယ် ဘယ်နေ့ဘယ်ရက်မှာကုန်ဆုံးမယ် ဆိုတာမျိုးကိုသိမှ လတ်ဆတ်မှုကို ခန့်မှန်းနိုင်မှာဖြစ်ပါတယ်။ နောက်ထပ်အရေးကြီးတဲ့အချက်တစ်ချက် ကတော့ ပါဝင်ပစ္စည်းဖော်ပြမှုဖြစ်ပါတယ်၊ ဘယ်လိုပါဝင်ပစ္စည်းတွေပါဝင်တယ်ဆိုတာကို သိရှိထားမှသာ ကိုယ်နဲ့ဓါတ်တည့်မှုရှိခြင်း/မရှိခြင်း နှင့်  ဘေးထွက်ဆိုးကျိုးရှိနိုင်/မရှိနိုင်ကို သတိထားဆင်ခြင်နိုင်မှာဖြစ်ပါတယ်၊  (Ready To Eat) ကုန်စည်မှ မဟုတ်ပါဘူး ဘယ်ကုန်စည်ကိုဘဲဖြစ်ဖြစ် ဝယ်ယူ စားသုံးတဲ့အခါမှာ အမှတ်တံဆိပ်၊ အမျိုးအမည် ၊ သက်တမ်း ၊  ပါဝင်ပစ္စည်းနဲ့ ဘယ်လို ထားသိုသိမ်းဆည်းစားသုံးရမယ်ကအစ ဘေးထွက် ဆိုးကျိုးနဲ့ တားမြစ်ထားတဲ့တာရှည်ခံဆေးများ ပါဝင်မှု ရှိ/ မရှိ ကိုအဆုံး သေချာလေ့လာ စိစစ်ပြီးမှ ဝယ်ယူ သုံးစွဲသင့်တာဖြစ်ပါတယ်၊ (Ready To Eat) ကုန်စည်တွေကြောင့် တစ်ဖက်မှာ အချိန်ကုန် သက်သာခြင်း၊ လူပင်ပန်းမှု သက်သာခြင်း ဆိုတဲ့အကျိုးကျေးဇူး တွေရှိနိုင်သလို တစ်ဖက် မှာလည်း အချို့သော (Ready To Eat) ကုန်စည်များတွင် တာရှည်ခံဆေးများ ပါဝင်မှုရှိနိုင်ခြင်း၊ လတ်ဆတ်သန့်ရှင်းမှုလျော့နည်းနိုင်ခြင်းများ ကြောင့် ရေရှည်တွင် ကျန်းမာရေး ထိခိုက်မှုရှိနိုင်ခြင်းကဲ့သို့သော ဆိုးကျိုးများလည်း ရှိလာနိုင်ပါတယ်  ဒါကြောင့် စားသုံးသူ ပြည်သူတွေအနေနဲ့  အသင့်စား စားသောက်ကုန် (Ready To Eat) တွေကို ဝယ်ယူတဲ့အခါမှာ ဘေးအန္တရာယ်ကင်းရှင်းပြီး အရည်အသွေးပြည့်မှီတယ်လို့ စိတ်ချရတဲ့ ကုန်စည် အမှတ်တံဆိပ်တွေကိုသာ အသိဉာဏ် ပညာဖြင့် ချင့်ချိန်ရွေးချယ် စားသုံးသင့်ပါကြောင်း အသိ သတိပေး တင်ပြလိုက်ရပါတယ်။

စားသုံးသူရေးရာဦးစီးဌာန

ရှမ်းပြည်နယ်

Photo - Credit (Google)

စားသုံးသူရေးရာဦးစီးဌာန၊ မကွေးတိုင်းဒေသကြီး၊ ပခုက္ကူခရိုင်ဦးစီးမှူးရုံးမှ ခရိုင်ဦးစီးမှူး ဦးဝေဠုအောင် ဦးဆောင်၍ ရေစကြိုမြို့နယ်တာဝန်ခံ ဦးမြတ်မင်းနှင့်အဖွဲ့သည် (၁၃.၁.၂၀၂၂) ရက်နေ့၊ နေ့လည်(၃:၀၀)နာရီအချိန်တွင် ကျေးရွာတစ်ရွာ၊ ထုတ်ကုန်တစ်မျိုး ထုတ်လုပ်မှုနှင့် ပြည်တွင်းကဏ္ဍ မြှင့်တင်နိုင်ရေးအတွက် ရေစကြိုမြို့၊ အမှတ် (၅) ရပ်ကွက်ရှိ “မနု ထန်းသီးမုန့်” ထုတ်လုပ်နေသည့် လုပ်ငန်းရှင်နှင့်တွေ့ဆုံပြီး ထန်းသီးမုန့်ထုတ်လုပ်ရောင်းဝယ်မှုအခြေအနေနှင့် အကျိုးအမြတ်ရရှိနိုင် မည့်အခြေအနေများကို မေးမြန်းဆွေးနွေးခဲ့ပါသည်။

          ကျေးရွာတစ်ရွာထုတ်ကုန်တစ်မျိုးနှင့်အညီ မကွေးဆိုလျှင် ပဲယို၊နှမ်းယို၊ ကျောက်ပန်းတောင်း ဆိုလျှင် အာလူးကြော်၊ ညောင်ဦးဆိုလျှင် ပုန်းရည်ကြီးဟူ၍ မြို့နှင့်ထွက်ကုန်များ ယှဉ်တွဲ၍ လူသိ များသလို ရေစကြိုဟုဆိုလျှင် ထန်းသီးမုန့်ကို ပြေးမြင်ရမည်ဖြစ်ပြီး ယခင်ကရန်ကုန်မြို့၊ အင်းလျားလိပ် ဟော်တယ်၌ ရေစကြိုထန်းသီးမုန့်ကို ရောင်းချခဲ့ရာ နိုင်ငံခြားသားများလွန်စွာကြိုက်နှစ်သက်ကြောင်း လုပ်ငန်းရှင်ကပြောကြားခဲ့ပါသည်။ ထန်းသီးမုန့်ပြုလုပ်မည်ဆိုလျှင် အဓိကအနေဖြင့် ဆန်၊ ထန်းလျှက် (သကာရည်)၊ ဆား၊ ကြက်ဥနှင့် အချဉ်ဖောက်စေရန် အုန်းမှုတ်ခွက်နှင့်အဓိကထန်းသီးမှည့်အနှစ် တို့လိုအပ်ကြောင်း သိရှိရပါသည်။

          ထန်းသီးမုန့် ပြုလုပ်ရာတွင် ဆန်အနေဖြင့် ပေါ်ဆန်းဆလတ်နှင့် မနောသုခကို သုံးချိုး တစ်ချိုးရော၍ ရေစင်အောင်ဆေးပြီး (၁)နာရီခန့်ရေစိမ်ရကြောင်း၊ ထိုသို့ရေစိမ်ပြီးနောက် ဆန်ကို ကြိတ်စက်ဖြင့် ကြိတ်၍ထွက်ရှိလာသည့် မုန့်နစ်ရည်အား ထန်းလျှက်(သကာရည်) အေးခဲထားသော ထန်းသီးမှည့်အနှစ်တို့နှင့်ရောမွှေရကြောင်း၊ သန့်ရှင်းစေရန်အတွက် ဇကာစစ်ခါ စဉ့်အင်တုံအတွင်းသို့ ထည့်၍ အုန်းမှုတ်ခွက်ဖြင့် နာနာမွှေခါ(၇)နာရီခန့်  အုန်းမှုတ်ခွက်ထည့်စိမ်၍ နှပ်ထားရပြီး ရေနွေး ပွက်ပွက်ဆူနေသော ပေါင်းဖို ပေါ်တင်၍ (၂၅) မိနစ်ခန့်ပေါင်းလျှင် ထန်းသီးမုန့်ရပြီ ဖြစ်ကြောင်း မုန့်ပေါ်မှကြက်ဥဖြန်းပေးရကြောင်း၊ ထန်းသီးမှည့်လှိုင်လှိုင်ပေါ်သည့် ဝါဆိုလမှသီတင်းကျွတ်၊ တန်ဆောင်မုန်းထိ လက်ဆတ်သည့်ထန်းသီးမှည့်အနှစ် များများထည့်နိုင်သော်လည်း ထန်းသီးမှည့် ရှားပါးသည့်ကာလများအတွက် အေးခဲထားသည့် ထန်းသီးမှည့်အနှစ် အနည်းငယ်သာထည့်နိုင် ကြောင်း၊ ထန်းသီးမှည့်ထည့်၍ပြုလုပ်သည့် မုန့်မှာပို၍အရသာကောင်းမွန်ပြီး ပို၍နူးညံ့ကြောင်း၊ အချို့လုပ်ငန်းရှင်များအနေဖြင့် နည်းပညာအခက်အခဲကြောင့် ထန်းသီးမှည့်အနှစ်အစား ပွဆေးများ သုံး၍ ထုတ်လုပ်လာကြသဖြင့် ထန်းသီးမုန့် အရည်အသွေးလည်းကျဆင်းလာသည့် အတွက် Qualityပိုင်းကို အထူးထိန်းသိမ်းရန်လိုအပ်ကြောင်း လုပ်ငန်းရှင်ဒေါ်နုမှ ရှင်းလင်းပြောကြားခဲ့ပါသည်။

          ထန်းသီးမုန့်(၁)ပေါင်းပြုလုပ်ရန် ဆန် (၅) ဗူး၊ ထန်းလျှက် (သကာရည်) (၅၀) ကျပ်သား၊ ဆား (၁) ကျပ်ခွဲသား၊ ကြက်ဥ (၁)လုံးနှင့် နို့ကျဲ (၁၀)ကျပ်သား ထည့်၍ (၂၅) မိနစ် ပေါင်းရကြောင်း၊ ကျက်လျှင် ကြက်ဥ (၁) လုံးအပေါ်မှဖြန်းပေးရကြောင်း၊ အုန်းသီးကို ခြစ်၍ ဆုံဆီသန့်နှင့်ကြော်ခါ မုန့်ပေါ်မှ အုန်းဆံကြော်၊ ဆီ၊ သကြားနှင့် ဖရုံယို ဖြူးပေးကြောင်း၊ တန်ဖိုးအားဖြင့် (၉၀၀၀/-) ကျပ် ခန့်ကုန်ကျကြောင်း၊ မုန့်(၁)ပေါင်းလျှင် (၂)ပိဿာခွဲခန့်ထွက်ရှိကြောင်း၊ ထန်းသီးမုန့်(၁) ပိဿာကို (၅၀၀၀/-)ကျပ်ရောင်းရပါကြောင်း၊ (၁) ပေါင်းလျှင် (၁၂၅၀၀/-) ကျပ် ရရှိပြီး ဖောက်သည်အနေဖြင့် (၁)ပေါင်းလျှင် (၁၀၀၀၀/-)ပေးရကြောင်း၊  အကျိုးအမြတ် အနေဖြင့် ကိုယ်တိုင်ရောင်းလျှင် (၃၅၀၀/-)ကျပ်ရရှိပြီး ဖောက်သည်ယူရောင်းသူများအနေဖြင့် (၂၅၀၀/-) ကျပ်မြတ်ကြောင်း၊ နေ့စဉ် မုန့်(၁၅ မှ ၂၀)ပေါင်းခန့် ပြုလုပ်ရောင်းချလျက်ရှိကြောင်းနှင့် မွေးနေ့ကိတ်ကဲ့သို့ မွေးနေ့ထန်းသီး မုန့်များလည်း ပုံစံအမျိုးမျိုးဖြင့် အော်ဒါပြုလုပ်ပေးနေရကြောင်း  လုပ်ငန်းရှင်၏ပြောကြားမှုအား သိရှိခဲ့ရပါသည်။

စားသုံးသူရေးရာဦးစီးဌာန(မကွေးတိုင်းဒေသကြီး)

          ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်ဦးစီးမှူးရုံး၊ ခရိုင်ဦးစီးမှူး ဦးဇော်လင်းအောင်၊ ဒု/ခရိုင်ဦးစီးမှူး၊ မြို့နယ်ဦးစီးမှူးတို့သည် (၁၃.၁.၂၀၂၂)ရက်နေ့ နံနက်(၁၁:၀၀) နာရီတွင် မြောင်းမြမြို့၊ မြရတနာရပ်ကွက်၊ မကိုဋ်ဂျိုးဖြူဆန်စက်သို့သွားရောက်၍ ဆန်ကြိတ်ခွဲထုတ် လုပ်မှုအခြေအနေ၊ စပါး/ဆန်ဈေးနှုန်းဈေးကွက်အခြေအနေများနှင့် ကုန်သွယ်မှုဖွံ့ဖြိုးတိုးတက်ရေး ကိစ္စများဆွေးနွေး ဆောင်ရွက်ခဲ့ပါသည်။

      ထို့သို့ကွင်းဆင်းလေ့လာဆောင်ရွက်ရာတွင် လက်ရှိအချိန်၌ မိုးစပါးလှိုင်လှိုင်ထွက်ပေါ်သည့် ကာလဖြစ်ပြီး၊ ဆန်ကြိတ်ခွဲတင်ပို့မှုလျော့နည်းလာ၍  စပါးဈေးမှာ အနည်းငယ်ကျဆင်းလျှက်ရှိ ကြောင်း၊ စပါးဈေးနှုန်းအနေဖြင့် ဧည့်မထစပါး (၄၆) ပေါင် တစ်တင်းလျှင်(၆၁၀၀)ကျပ်ရှိပြီး၊ အရောင်းအဝယ်အေးကြောင်း၊ ဆန်ဈေးနှုန်းမှာ (၁၀၈)ပေါင်ထိပ်စ တစ်အိတ်လျှင်(၂၄၀၀၀)ကျပ်ဖြင့် အရောင်းအဝယ်ဖြစ်နေကြောင်း၊ ဆန်ကြိတ်ခွဲရာတွင် ပြည်တွင်းစားဆန်ကို အဓိကထားကြိတ်ခွဲပြီး အထက်အညာဒေသများဖြစ်သော မကွေး၊ပခုက္ကူ၊ မန္တလေး၊ မြင်းခြံမြို့များနှင့် ရန်ကုန်သို့တင်ပို့ ရောင်းချလျှက်ရှိကြောင်း၊ ဆန်ဈေးကွက်တွင် ဆန်လက်ကျန်များနေ၍ ဆန်ဈေးနှုန်းအနည်းငယ် ကျဆင်းပြီး အရောင်းအဝယ်အေးလျက်ရှိကြောင်း သိရှိရပါသည်။

စားသုံးသူရေးရာဦးစီးဌာန(ဧရာဝတီတိုင်းဒေသကြီး)

          စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးဦးမျိုးအောင်သည် ခရိုင်ဦးစီးမှူးရုံးမှ ဌာနခွဲ တာဝန်ခံများ၊ တောင်ငူမြို့နယ်တာဝန်ခံတို့နှင့်အတူ ၂၀၂၂ခုနှစ် ဇန်နဝါရီလ ၁၂ ရက်နေ့တွင် တောင်ငူမြို့၊ အမှတ် ၂၂ ရပ်ကွက်၊ ရန်ကုန်-မန္တလေးလမ်းဘေးရှိ ရွှေပြည်တော်မုန့်တိုက်သို့ သွားရောက်၍ ကွင်းဆင်းစစ်ဆေးခဲ့ပါသည်။

အဆိုပါ ကွင်းဆင်းစစ်ဆေးရာတွင် စားသုံးသူကာကွယ်ရေးဥပဒေပါ စီးပွားရေး လုပ်ငန်းရှင်များနှင့် သက်ဆိုင်သည့် ပြဌာန်းချက်များနှင့်ပတ်သက်၍ ဆွေးနွေးပြီး မုန့်တိုက်အတွင်း အရောင်းစင်တာတွင် ရောင်းချလျက်ရှိသော ရွှေပြည်တော်အမှတ်တံဆိပ် မုန့်မျိုးစုံနှင့် တွဲဖက်ရောင်း ချလျှက်ရှိသော အာဟာရမှုန့်များတွင် မြန်မာဘာသာဖြင့် ကုန်အညွှန်းအမှတ်အသားများ ပြည့်စုံစွာ ဖော်ပြထားခြင်းရှိ/မရှိကို စစ်ဆေးခဲ့ပါသည်။

          ရွှေပြည်တော်မုန့်တိုက် အရောင်းစင်တာတွင် ၎င်းမုန့်တိုက်မှထုတ်လုပ်သည့် ရွှေပြည်တော် အမှတ်တံဆိပ် ကိတ်မုန့်၊ ကိတ်ခြောက်နှင့် ပေါင်မုန့်မျိုးစုံအပြင် အာဟာရမှုန့်များဖြစ်သော Nescafe, Ovaltine, Holick, Nestle Milo များကိုလည်း ရောင်းချလျက်ရှိပြီး ကုန်အညွှန်းအမှတ်အသားနှင့်ပတ်သက်၍ ညွှန်ကြားချက်များကို တိကျစွာ လိုက်နာဆောင်ရွက်မှု ရှိကြောင်း တွေ့ရှိရပြီး စားသုံးသူကာကွယ်ရေးဥပဒေနှင့်ပတ်သက်၍ အသိပညာပေး ဆွေးနွေးခဲ့ကြောင်း သတင်းရရှိပါသည်။

စားသုံးသူရေးရာဦးစီးဌာန(ပဲခူးတိုင်းဒေသကြီး)