သတင်းနှင့် လှုပ်ရှားမှုများ

       စားသုံးသူရေးရာဦးစီးဌာန၊ တောင်ငူခရိုင်ဦးစီးမှူး ဦးမျိုးအောင်နှင့် တောင်ငူမြို့နယ် တာဝန်ခံ ဦးမြင့်သူတို့သည် (၅.၄.၂၀၂၃)ရက်နေ့၊ နံနက်ပိုင်းက တောင်ငူမြို့နယ်၊ ကေတုမတီမြို့၊ နတ်သျှင်နောင်ရပ်ကွက်ရှိ မြတ်မုန့်မျိုးစုံ လုပ်ငန်းသို့ သွားရောက်၍ ထုတ်လုပ်သူ ဦးမြတ်သီဟနှင့် ‌တွေ့ဆုံဆွေးနွေးပြီး ထုတ်လုပ်မှုကို ကြည့်ရှုစစ်ဆေးခဲ့ပါသည်။

      မြတ်မုန့်မျိုးစုံလုပ်ငန်းသည် မြတ်အမှတ်တံဆိပ်ဖြင့် ပဲဖယုံမုန့်၊ ဖယုံမုန့်၊ ဒူးရင်းပဲလမုန့်၊ နာနတ်လမုန့်၊ ပဲမုန့်၊ ပဲအံစာမုန့်နှင့် ပဲလမုန့်စသည့် အသင့်စားမုန့်(၇)မျိုးကို ထုတ်လုပ်ပြီး ဒေသတွင်း အတော်အသင့်အောင်မြင်နေသည့် MSMEs လုပ်ငန်းဖြစ်ပါသည်။ ခရိုင်ဦးစီးမှူးက ဈေးကွက်သို့ ဖြန့်ဖြူးခြင်းမပြုမီ စားသုံးသူများ ထိခိုက်နစ်နာမှုများမရှိအောင် စနစ်တကျဆောင်ရွက်ရန်၊ စားသုံး သူကာကွယ်ရေးဥပဒေပါ ပြဌာန်းချက်များနှင့်အညီ ဆောင်ရွက်ရန် ဆွေးနွေးပြောကြားခဲ့ပါသည်။

    ထို့အတူ ယင်းနေ့ နံနက်ပိုင်းတွင် စားသုံးသူရေးရာဦးစီးဌာန၊ တောင်ငူခရိုင်၊ ဖြူးမြို့နယ် တာဝန်ခံ ဒေါ်သန္တစိုးသည် ဖြူးမြို့၊ ဘူတာမြောက်ရပ်ကွက်၊ ထန်းကုန်းလမ်းရှိ ပါရမီ ထင်းအစားထိုး လောင်စာတောင့်ထုတ်လုပ်ရေးလုပ်ငန်းသို့ သွားရောက်လေ့လာပြီး လုပ်ငန်းရှင်ဦးအောင်ဖြိုးနှင့် တွေ့ဆုံဆွေးနွေးခဲ့ရာ လုပ်ငန်းရှင်က လုပ်ငန်းဆောင်ရွက်မှု အခြေအနေများကို ရှင်းလင်းပြသပါ သည်။

   ပါရမီ ထင်းအစားထိုးလောင်စာတောင့် ထုတ်လုပ်ရေးလုပ်ငန်းသည် ၎င်းတို့မိသားစုပိုင် ပါရမီဆန်စက်မှစပါးခွံများဖြင့် လောင်စာတောင့်များကိုထုတ်လုပ်ခြင်းဖြစ်ပြီး တစ်နေ့လျှင် လုပ်သား ၆ ဦးဖြင့် လောင်စာတောင့် ပိဿာ ၆၀၀ ခန့်ထုတ်လုပ်နိုင်ကြောင်း သိရှိရပါသည်။

DOCA(ပဲခူး)

         စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူး၏လမ်းညွှန်မှုဖြင့် ပခုက္ကူခရိုင်ဦးစီးမှူးရုံးတွင် တွဲဘက်တာဝန်ထမ်းဆောင်နေသော ဂန့်ဂေါခရိုင်ဦးစီးမှူး ဒေါ်မွန်မွန်စိုး ၊ ပခုက္ကူမြို့နယ်တာဝန်ခံနှင့်ဝန်ထမ်းများအဖွဲ့သည် စားသုံးပြည်သူများ လုံခြုံစိတ်ချရမှုရှိစေရေး အတွက်ရည်ရွယ်၍ (၄.၄.၂၀၂၃)ရက်နေ့၊ နံနက် (၁၀:၀၀) အချိန်တွင် ပခုက္ကူမြို့၊  အမှတ်(၁၅) ရပ် ကွက်အတွင်းရှိ မုန့်မျိုးစုံဆိုင်များနှင့် ကုန်မျိုးစုံဆိုင်များတွင် ရောင်းချလျက်ရှိသော ကုန်စည်များမှာ ထုတ်ကုန်လုံခြုံစိတ်ချရမှုရှိစေရန်အတွက် သက်တမ်းလွန်ကုန်ပစ္စည်းများ ရောင်းချနေမှုရှိ/မရှိ၊ ကုန်အညွှန်းအမှတ်အသားနှင့်စပ်လျဉ်း၍ မြန်မာဘာသာဖြင့် ဖော်ပြထားခြင်း ရှိ/မရှိနှင့် ကုန်အညွှန်းအမှတ်အသားများပြည့်စုံစွာ ဖော်ပြထားမှုရှိ/မရှိကို ဈေးကွက်စောင့်ကြည့်စစ်ဆေးခဲ့ပါသည်။       

         ထိုသို့ဈေးကွက်စောင့်ကြည့်စစ်ဆေးရာတွင် စားသုံးသူရေးရာဦးစီးဌာနမှ မုန့်မျိုးစုံရောင်းချနေသော ဆိုင်ရှင်များအား စားသုံးသူကာကွယ်ရေးဥပဒေ ၂၀၁၉ အခန်း(၁၈)၊ ပုဒ်မ(၄၁)အရ ကုန်စည်များတွင် ကုန်အညွှန်းအမှတ်အသားပြည့်စုံစွာဖော်ပြထားသည့်ကုန်စည်များကိုသာရောင်းချရန်နှင့်မြန်မာနိုင်ငံစားသုံးသူကာကွယ်ရေးကော်မရှင်မှထုတ်ပြန်ထားသည့် ညွှန်ကြားချက်အမှတ် (၂/၂၀၁၉)နှင့်အညီ ပြည့်စုံစွာဖော်ပြလာစေရေးနှင့်မြန်မာဘာသာဖြင့်ဖော်ပြရမည့် ကုန်ပစ္စည်းအမျိုးအမည်၊ အရွယ်အစား၊ အရေအတွက်(သို့မဟုတ်) အသားတင်ပမာဏ၊ ထားသိုသိမ်းဆည်းမှုအညွှန်း၊ ဓာတ်မတည့်ကြောင်းဖော်ပြချက်တို့ကို မဖြစ်မနေထည့်သွင်းဖော်ပြရမည်ဖြစ်ပြီး ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲများကိုလည်း ထည့်သွင်းဖော်ပြရမည်ဖြစ်ကြောင်း ကုန်အညွှန်းအမှတ်အသားပြည့်စုံစွာဖော်ပြထားခြင်းမရှိသော ကုန်စည်များရောင်းချသည်ကို စစ်ဆေးတွေ့ ရှိရပါက စားသုံးသူကာကွယ်ရေး ဥပဒေအရ အရေးယူဆောင်ရွက်သွား မည်ဖြစ်ကြောင်းနှင့် စားသုံး သူကာကွယ်ရေးဥပဒေအခန်း(၁၀)ပါ စီးပွားရေးလုပ်ငန်း ရှင်၏တာဝန်များ၊ တားမြစ်ချက်များ၊ ပြစ်မှု ပြစ်ဒဏ်များအကြောင်းတို့ကို အသိပေးပြောကြားခဲ့ပြီး စားသုံးသူအသိပညာပေးလက်ကမ်း စာစောင်များ ဖြန့်ဝေခဲ့ပါသည်။

DOCA(မကွေး)

    စားသုံးသူရေးရာဦးစီးဌာန၊ တောင်ငူခရိုင်ဦးစီးမှူးဦးမျိုးအောင်နှင့် စစ်ဆေးရေးအရာရှိ စားသုံး/ထုတ်လုံတာဝန်ခံ ဦးမင်းဇော်တို့သည် အစားအသောက်နှင့်ဆေးဝါးကွပ်ကဲရေးဦးစီးဌာန၊ ခရိုင်ဦးစီးမှူးရုံးမှ ဒုတိယကြီးကြပ်ရေးမှူး ဦးကျော်လင်းထွန်း၊ ပြည်သူ့ကျန်းမာရေးဦးစီးဌာန ခရိုင် ဦးစီးမှူးရုံးမှ ကျန်းမာရေးကြီးကြပ်-၁ ဦးမိုးကျော်သူ၊ တောင်ငူမြို့နယ် စည်ပင်သာယာရေးအဖွဲမှ ဦးစီးအရာရှိ ဦးအောင်ကိုကိုတို့ ဦးဆောင်သော ပူးပေါင်းအဖွဲ့ဝင်များနှင့်အတူ (၄.၄.၂၀၂၃) ရက်နေ့၊ နံနက်ပိုင်းက တောင်ငူမြို့ ခရိုင်ပြည်သူ့ဆေးရုံကြီးအနီး ရန်ကုန်-မန္တလေးလမ်းပေါ်ရှိ ဆေးဆိုင်များသို့ သွားရောက်၍ ဈေးကွက်စောင့်ကြည့် စစ်ဆေးခြင်းကို ဆောင်ရွက်ခဲ့ပါသည်။

    ပူးပေါင်းအဖွဲ့သည် ဆေးဆိုင်များ၌ မြန်မာနိုင်ငံဆေးဝါးမှတ်ပုံတင်ထားခြင်းမရှိသော ဆေးဝါးများ၊ သက်တမ်းလွန်ဆေးဝါးများ ရောင်းချမှုရှိ/မရှိကို စစ်ဆေးကြည့်ရှုပြီး စားသုံးသူရေးရာ ဦးစီးဌာနအနေဖြင့် မြန်မာနိုင်ငံစားသုံးသူကာကွယ်ရေးကော်မရှင် ညွှန်ကြားချက်အမှတ် ၂/၂၀၁၉ နှင့် အညီ ဆရာဝန်ညွှန်ကြားချက်မလိုသော ဆေးဝါးများ၌ မြန်မာဘာသာဖြင့် ဖော်ပြရန် သတ်မှတ် ထားသောကုန်အညွှန်းအမှတ်အသားများ ဖော်ပြထားခြင်းရှိ/မရှိကို ကြည့်ရှုစစ်ဆေးခဲ့ရာ အချို့ဆေးဝါးများ၌ ဘူးခွံပေါ်တွင် မြန်မာဘာသာဖြင့် ကုန်အညွန်းအမှတ်အသားကို ဖော်ပြထားပြီး ဆေးဝါးအများစုမှာ ဘူးအတွင်း၌ မြန်မာဘာသာကုန်အညွှန်းအမှတ်အသား ဖော်ပြထားသည့် စာရွက်ထည့်သွင်းထားသည်ကို တွေ့ရပါသည်။

    စားသုံးသူရေးရာဦးစီးဌာန၊ ခရိုင်ဦးစီးမှူးက တရားမဝင်ဆေးဝါးများရောင်းချခြင်းသည် နိုင်ငံတော်အတွက်ရသင့်ရထိုက်သည့် အခွန်ဘဏ္ဍာများကို ဆုံးရှုံးစေသကဲ့သို့ စားသုံးသူများအတွက်လည်း အာမခံချက်မရှိသဖြင့် တရားမဝင်ဆေးဝါးများကို ရောင်းချခြင်းမပြုကြရန်၊ စားသုံးသူကာကွယ်ရေးဥပဒေ(၂၀၁၉)တွင်လည်း ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားများ ဖော်ပြကြရန်တို့အား ပြဌာန်းထားရာ ဆရာဝန်ညွှန်ကြားချက်မလိုသောဆေးဝါးများတွင် မြန်မာဘာသာဖြင့် ကုန်အညွှန်းအမှတ်အသားများဖော်ပြရာတွင် လွယ်ကူအဆင်ပြေစေရေးအတွက် မြန်မာနိုင်ငံစားသုံးသူကာကွယ်ရေးကော်မရှင်က ညွှန်ကြားချက်အမှတ် ၂/၂၀၁၉ ကို ထုတ်ပြန်ထားပြီးဖြစ်ပါသဖြင့် ညွှန်ကြားချက်နှင့်အညီ မြန်မာဘာသာဖြင့်ကုန်အညွှန်းအမှတ်အသားအား အပြည့်အစုံဖော်ပြထားသော ဆေးဝါးများကိုသာ ရောင်းချကြရန် ဆေးဆိုင်ပိုင်ရှင်များအား အသိပညာပေးခဲ့ကြောင်း သိရှိရပါသည်။

DOCA(ပဲခူး)

     ၆-၄-၂၀၂၃ ရက်နေ့ နံနက် (၀၈:၀၀) နာရီအချိန်တွင် ၂၀၂၃ ခုနှစ်၊ ကရင်ပြည်နယ် အားကစားနှင့်ကာယပညာဦးစီးဌာန၏ ကြီးကြပ်လမ်းညွှန်မှုဖြင့် (၂၀-၃-၂၀၂၃မှ ၆-၄-၂၀၂၃) ရက်နေ့ အထိ အားကစားနည်း(၁၂)နည်း သင်တန်းသား(၆၁၄)ဦးတို့ဖြင့် ဘားအံမြို့ပေါ်တွင် ဖွင့်လှစ်ခဲ့သည့်  ကရင်ပြည်နယ်၊ ဘားအံမြို့၊ နွေရာသီအခြေခံအားကစားသင်တန်း၊ သင်တန်းဆင်းပွဲအခမ်းအနားကို  ဘားအံမြို့ အောင်သံလွင်အားကစားကွင်း၌ ကျင်းပပြုလုပ်ခဲ့ကြောင်း သတင်းရရှိသည်။

    အခမ်းအနားတွင် ပြည်နယ်ဝန်ကြီးချုပ်က အားကစားနည်းများအလိုက် သင်ကြားပို့ချပေးခဲ့သည့် လေ့ကျင့်ခန်းများသည် အခြေခံလေ့ကျင့်မှုများသာဖြစ်သည့်အတွက် မိမိတို့စိတ်ပါဝင်စားပြီး စိတ်အားထက်သန်တဲ့အားကစားနည်းများကို ပိုမိုကျွမ်းကျင်ပိုင်နိုင်ပါက ထူးချွန်သောအားကစားသမားကောင်းများဖြစ်လာအောင် ဆက်လက်လေ့လာလိုက်စား ကစားသွားကြရန် လိုအပ်ကြောင်း၊ ကရင်ပြည်နယ်နှင့်နိုင်ငံတော်မှ အားကိုးအားထားပြုရသည့် ထူးချွန်ထက်မြက်သူများအဖြစ် ပြုစုပျိုးထောင် သွားကြရန်တိုက်တွန်းလိုကြောင်းတို့အား ပြောကြားခဲ့ပါသည်။ ဆက်လက်၍ ပြည်နယ်လမ်းပန်းဆက် သွယ်ရေးဝန်ကြီးဗိုလ်မှူးကြီးခင်ဇော်၊ ပြည်နယ်တိုင်းရင်းသားရေးရာဝန်ကြီးဦးဆန်းကို၊  ပြည်နယ်ဥပဒေချုပ်ဦးရဲလွင်၊ ပြည်နယ်အတွင်းရေးမှူးဦးကျော်စိုးတို့က အားကစားနည်းအလိုက် သင်တန်း ဆင်းလက်မှတ်များ ပေးအပ်ချီးမြင့်ခဲ့ပြီး ပြည်နယ်ဝန်ကြီးချုပ်ဦးစောမြင့်ဦး၊ လုံခြုံရေးနှင့်နယ်စပ်ရေးရာဝန်ကြီးဗိုလ်မှူးကြီးမျိုးမင်းနောင်၊ စီးပွားရေးရာဝန်ကြီးဦးစောခင်မောင်မြင့်၊ သယံဇာသရေးရာ ဝန်ကြီးဦးဇော်ဝင်တို့က အားကစားနည်းအလိုက် ထူးချွန်ဆုရရှိသူများကို ဂုဏ်ပြုဆုများပေးအပ်ချီးမြင့်ကာ ပြည်နယ်လူမှုရေးရာဝန်ကြီးဦးစီုးလွင်က သင်တန်းနည်းပြများအား ဂုဏ်ပြုမှတ်တမ်းလွှာများကို ပေးအပ်ချီးမြင့်ခဲ့ပါသည်။ ထိုနောက် ကရာတေးတိုအဖွဲ့နှင့် မြန်မာ့သိုင်းအဖွဲ့တို့က သရုပ်ပြသခဲ့ရာ ပြည်နယ်ဝန်ကြီးချုပ်က ဂုဏ်ပြုဆုငွေများချီးမြှင့်ခဲ့ကြောင်းနှင့် ထိုအခမ်းအနားသို့ စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးဦးသန်းဦးနှင့်ဝန်ထမ်း(၅)ဦး တက်ရောက်ခဲ့ကြောင်း သတင်းရရှိပါသည်။

DOCA(ကရင်)

       ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မြောင်းမြခရိုင်၊ ဝါးခယ်မမြို့နယ် မြို့နယ်တာဝန်ခံဦးအောင်မိုးသည် (၃.၄.၂၀၂၃)ရက်နေ့၊ နံနက်(၁၁:၀၀)နာရီက ဝါးခယ်မမြို့နယ် စက်သုံးဆီအရောင်းဆိုင်အား  LED မီးဖြင့် ဆီဈေးနှုန်း ဖော်ပြထားခြင်းရှိ/မရှိ ကွင်းဆင်းစိစစ် ကြပ်မတ်ဆောင်ရွက်ခဲ့ပါသည်။

        ထိုသို့စစ်ဆေးရာတွင်   မြို့နယ်တာဝန်ခံက စက်သုံးဆီတင်သွင်းရောင်းချ ဖြန့်ဖြူးနေသည့် လုပ်ငန်းရှင်များအား တိုင်းဒေသကြီးဦးစီးမှူးရုံး၏ ညွှန်ကြားချက်အရ စက်သုံးဆီအရောင်းဆိုင်အား  LED မီးဖြင့် ဆီဈေးနှုန်းဖော်ပြသည့်ဆိုင်းဘုတ်များ တပ်ဆင်ထားရန်နှင့် မီးဘေးလုံခြုံရေးအတွက် မီးသတ်ဆေးဘူးများ ချိတ်ဆွဲထားရန်၊ အသိပညာပေး‌ဟောပြောကာ တရားမဝင်သွင်းကုန်စက်သုံးဆီ၊ ချောဆီများအား တရားမဝင် ကုန်သွယ်မှုတိုက်ဖျက်ရေး အထူးအဖွဲ့ဖြင့် စစ်ဆေးဖော်ထုတ်ဆောင်ရွက်နေကြောင်း၊ စက်သုံးဆီ၊ ချောဆီများ သယ်ဆောင်မှုအား စောင့်ကြည့် စစ်ဆေးနေပါကြောင်း၊ မြို့နယ်အလိုက်စက်သုံးဆီအရောင်းဆိုင် အရေအတွက်နှင့် လက်ကားဝယ်ယူသည့် ကုမ္ပဏီစာရင်းများကောက်ယူနေကြောင်း လုပ်ငန်းရှင်များအနေဖြင့် တရားမဝင်စက်သုံးဆီ၊ ချောဆီများတင်သွင်း၊ ဖြန့်ဖြူးရောင်းချနေခြင်း စစ်ဆေးတွေ့ရှိရပါက  အရေးယူဆောင်ရွက်သွားမည် ဖြစ်ကြောင်း PPRD မှ နေ့စဉ်ထုတ်ပြန် ထားသော စက်သုံးဆီ ရည်ညွှန်းဈေးထက်ပိုမိုရောင်းချခြင်းမပြုရန်၊ ပြည်သူများအဆင်ပြေစွာ ဝယ်ယူနိုင်ရေးအတွက် မြို့နယ်အတွင်းရှိ စက်သုံးဆီ အရောင်းဆိုင်များ စက်သုံးဆီပြတ်လပ်မှုမရှိစေရေး ပုံမှန်ဖွင့်လှစ်ရောင်းချနိုင်ရေး စက်သုံးဆီများကို သတ်မှတ်ဈေးနှုန်းထက် ပိုမိုရောင်းချခြင်းမပြုပဲ အချိန်အတွယ်မှန်ကန်စွာရောင်းချနိုင်ရေး ထုတ်ပြန်ထားသောညွှန်ကြားချက်များအတိုင်း လိုက်နာဆောင်ရွက်ကြရန်တို့အား  စက်သုံးဆီလုပ်ငန်းရှင်များထံသို့ ကွင်းဆင်းစစ်ဆေးဆောင်ရွက်ခဲ့ကြောင်း သိရှိရပါသည်။

DOCA(ဧရာဝတီ)