ပြည်တွင်းကုန်သွယ်မှုသတင်း

          စားသုံးသူရေးရာဦးစီးဌာန၊မန္တလေးတိုင်းဒေသကြီး၊မိတ္ထီလာခရိုင်ဦးစီးမှူးရုံးမှ ခရိုင်ဦးစီးမှူး ၏ ကြီး ကြပ်မှုဖြင့် ဦးစီးအရာရှိ နှင့် ဝန်ထမ်းများသည် (၁၆.၂.၂၀၂၂)ရက်နေ့ ( ၁၀:၀၀  ) နာရီအချိန်တွင် မိတ္ထီလာမြို့နယ်အတွင်း ဇီးသီး (အချဉ်မျိုး) ထွက်ရှိရာ တောင်သူများထံနှင့် မိတ္ထီလာ-ကျောက်ပန်းတောင်း လမ်းဘေး၊ ဂွေ့ကြီးကျေးရွာရှိ ဦးခင်မောင်ချို၏ ဇီးသီးပွဲရုံသို့ ကွင်းဆင်းလေ့လာဆောင်ရွက်ခဲ့ပါသည်။

          မိတ္ထီလာမြို့နယ်သည် အပူပိုင်းဒေသ မိုးနည်းရပ်ဝန်းတွင်တည်ရှိပြီး ဆူးခြုံတောများပေါက် ရောက်ရာ‌ဒေသဖြစ်သည့်အတွက် ဆူးပင်အမျိုးအစားဖြစ်သည့် ဇီးပင်(အချဉ်မျိုး)များ သဘာဝအလျောက် အများအပြားပေါက်နေသည်ကို တွေ့ရှိရသည်။ ဇီးပင် (အချဉ်မျိုး)များသည် နှစ်ရှည်ပင်အမျိုး အစားဖြစ််ပြီး တောင်သူများ၏ လယ်ကန်သင်း၊ ယာကန်သင်းများနှင့် မြေလွတ်နေရာများတွင် သဘာဝ ပေါက်ပင်အဖြစ် အလေ့ကျပေါက်‌ရောက်ကြပြီး အပင်များကြီးထွားလာရာမှ အသီးများခူးဆွတ်ရ၍ ‌ရောင်းချရပြီး အပိုဝင်ငွေအဖြစ်ရရှိကြောင်း တောင်သူများထံမှ သိရှိရပါသည်။

          ဒီဇင်ဘာလတွင် ဇီးသီးများစတင်ခူးဆွတ်ရပြီး ဖေဖော်ဝါရီလထိ (၃)လခန့် ခူးဆွတ်ရကြောင်း၊ အရွယ်ရောက်ပြီး ဇီးပင် (၁) ပင်လျှင် စတင်ခူးဆွတ်ချိန်မှ ပြီးဆုံးချိန်ထိ ဇီးသီးခြောက် (၁၅) တင်းမှ (၂၀) တင်းအထိထွက်ရှိကြောင်း၊ စျေးနှုန်းအနေဖြင့် ယခင်နှစ်က ဇီးသီးခြောက် (၁)တင်း အမြင့်ဆုံးစျေးနှုန်း အဖြစ် (၂၉၀၀ မှ ၃၂၀၀ ကျပ်ထိ) သာရရှိခဲ့ပြီး ယခုနှစ်တွင်မှု လက်ရှိပေါက်စျေး (၁) တင်းလျှင် (၄၅၀၀) ကျပ် စျေးထိရရှိနေသည့်အတွက် အကျိုးအမြတ်ဝင်ငွေ ပိုမိုရရှိကြောင်း သိရှိရပါသည်။

          ခူးဆွတ်ရရှိသော ဇီးသီးများကို နေပူလှမ်းအခြောက်ခံပြီး ရွာအရောက်လာဝယ်သော ပွဲစားများ ထံသို့လည်းကောင်း၊ ဇီးသီးပွဲရုံများသို့ သွားရောက်၍လည်းကောင်း ရောင်းချကြကြောင်း၊ ဇီးသီးပွဲရုံများ မှ ဝယ်ယူရရှိသော ဇီးသီးခြောက်များကို မိတ္ထီလာစက်မှုဇုံရှိ ဇီးခွဲစက်များသို့ တင်ပို့ပြီး ရောင်းချကြကြောင်း ပွဲရုံများမှ သိရှိရပါသည်။

          ဇီးခွဲစက်များမှလည်း ဝယ်ယူရရှိသော ဇီးသီးခြောက်များကို ကြိတ်ခွဲရာ ဇီးစေ့၊ အဆံ၊ ဇီးကြိတ်ဖတ်၊ ဇီးစေ့ခွဲခြမ်းဟူ၍ ထွက်ရှိကြောင်း၊ ဇီးစေ့အဆံ (၁) ပြည်လျှင် (၂၀၀၀၀) ကျပ် စျေးဖြင့် တရုတ်နိုင်ငံသို့ တင်ပို့ရောင်းချကြောင်း၊ ဇီးကြိတ်ဖက် (၁) အိတ်လျှင်(၁၅၀၀) ကျပ်စျေးဖြင့် တိရိစ္ဆာန်စာအဖြစ် လည်းကောင်း၊ ဇီးစေ့ခွဲခြမ်း (၁) အိတ်လျှင် (၅၀၀) ကျပ် စျေးနှုန်းဖြင့် မီးသွေးလောင်စာအဖြစ် အသုံးပြု ကြကြောင်း၊ ဒေသတွင်း ဇီးပင်အကြီး (၁) ပင်လျှင် ဇီးသီးခြောက်ရောင်းချရမှုမှ ခန့်မှန်းဝင်ငွေ (၆၀၀၀၀)ကျပ်မှ (၇၀၀၀၀) ကျပ်ခန့် အထိရရှိကြောင်း သိရှိရပါသည်။

          ဇီးသီး(အချဉ်မျိုး)များကို ဇီးပင်မှ ခူးဆွတ်ပြီး ဇီးခွဲစက်များသို့ ကြိတ်ခွဲပြီးချိန်ထိ ဖြစ်စဉ်တစ်လျှောက် တောင်သူ၊ ကုန်သည်၊ စက်ပိုင်အားလုံး အကျိုးအမြတ်များရရှိကြပြီး အလေ့ကျပေါက်ပင်ဖြစ်သည့်အတွက် စိုက်ပျိုးမှု ကုန်ကျစရိတ်မရှိခြင်း၊ ဂရုစိုက်ပြုစုပေးရန် မလိုအပ်ခြင်း၊ အပိုဝင်ငွေအဖြစ်ရရှိကြခြင်း၊ အပင်များများရှိလျှင် ရှိသလောက်ဝင်ငွေရခြင်း စသည့်ဖြင့် အကျိုးပြုသော အပင်အမျိုးအစားဖြစ်ပါသည်။ ထိုကဲ့သို့ တန်ဖိုးရှိသော ဇီးပင်(အချဉ်မျိုး)များကို စနစ်တကျ စိုက်ပျိုးပြီး သေချာပြုစု ပျိုးထောင်ပေးမည်ဆိုလျှင် ယခုထက်မကသော ဝင်ငွေများရရှိနိုင်မည်ဖြစ်ပါကြောင်း အကြံပြုတင်ပြအပ်ပါသည်။

DOCA(မန္တလေး)

          မကွေးတိုင်းဒေသကြီး၊ ဆိပ်ဖြူမြို့အနောက်ပိုင်းရပ်ကွက်ရှိ ကြက်သွန်နီ အရောင်းအဝယ်ဖြစ်လျက်ရှိသော ကုန်စည်ဒိုင်၌ ဖေဖော်ဝါရီလ(၁)ရက်မှ (၁၄)ရက်အတွင်း ကြက်သွန်နီအသစ် မိုးစိုက်(ဥစိုက်)များသော ဆိပ်ဖြူမြို့ ဧရာဝတီမြေနုကျွန်းပေါ်ဒေသများနှင့် ကုန်းတွင်းပိုင်းဒေသများအပြင် ဆင်ဖြူကျွန်း၊ စလင်းမြို့နယ်များမှ နေ့စဉ်ဝင်ရောက်လျက်ရှိပြီး (၁)ရက်လျှင် ပျမ်းမျှပိဿာ(၇)သောင်းခွဲခန့် (၂)ပတ် အတွင်း စုစုပေါင်းပိဿာချိန် (၁၀)သိန်းခန့် ကုန်စည်ဒိုင်သို့ ဝင်ရောက်ခဲ့ကြောင်း သိရှိရပါသည်။

          ဖေဖော်ဝါရီလ ပထမပတ်နှင့်ဒုတိယပတ် (၂)ပတ်အတွင်း ကြက်သွန်နီ(အသစ်)(၁)ပိဿာ ဈေးနှုန်းမှာ ထိပ်စ(ရှယ်) အမြင့်ဆုံးဈေးနှုန်းမှာ (၅၂၅)ကျပ်မှ (၄၇၅)ကျပ်အထိ ကုန်စည်ဒိုင်ဖြတ် ဈေးနှုန်းဖြစ်ခဲ့ပြီး အသေးအနုပ် အနိမ့်ဆုံးဈေးနှုန်းမှာ (၁၅၀)ကျပ်မှ (၁၀၀)ကျပ်အထိ ဈေးနှုန်းရှိခဲ့ကြောင်း၊ ယခင်တစ်ပတ်ဈေးနှုန်းထက် ကြက်သွန်နီ အမြင့်ဆုံးထိပ်စ ဈေးနှုန်းမှာ (၂၅)ကျပ်ခန့် ကျဆင်းခဲ့ကြောင်း၊ ကြက်သွန်နီ(၁)ပိဿာလျှင် လက်လီဈေးနှုန်းအနေဖြင့် ထိပ်စ (ရှယ်) (၈၀၀) ကျပ်နှင့်အလတ်စ(ကြီး) (၆၅၀)ကျပ်၊ အလတ်စ(သေး) (၅၀၀)ကျပ် ဈေးနှုန်းရှိကြောင်း သိရှိရပါ သည်။

          ယခင်(၁)ပတ်ထက် ဈေးအနည်းငယ်ကျဆင်းသွားရခြင်းမှာ ဘင်္ဂလားဒေ့ရှ်၊ ဗီယက်နမ်၊ မြဝတီ သို့ တင်ပို့လျက်ရှိသော ဝယ်လက်များမှ ဝယ်လိုအားနည်း၍ ဈေးကွက်နည်းသွားခြင်းကြောင့် ဈေး အနည်းငယ်ကျဆင်းသွားခြင်းဖြစ်ကြောင်း၊ ကုန်စည်စီးဆင်းမှုအနေဖြင့် ဆိပ်ဖြူကုန်စည်ဒိုင်မှ ဖေဖော်ဝါရီလ(၁)ရက်မှ(၁၄)ရက်အထိ ပထမ(၂)ပတ်အတွင်းတွင် (၆/၁၂)ဘီးမော်တော်ယာဉ်များ ဖြင့် ရန်ကုန်(ဘုရင့်နောင်ပွဲရုံ)သို့ ကားစီးရေ (၆၅)စီး၊ ပြည်မြို့(၇)စီး၊ စစ်တွေမြို့(၁၇)စီး၊ မြဝတီမြို့ (၁၁)စီး၊ ပုသိမ်မြို့(၁)စီး စုစုပေါင်း(၁၀၁)စီးခန့်၊ ကြက်သွန်နီ(အသစ်) တန်ချိန် (၅၈၀၆၇)တန်ခန့်  စီးဆင်းခဲ့ပါကြောင်း ကုန်စည်ဒိုင်ဈေးကွက်မှ သိရှိရပါသည်။       

DOCA(မကွေး)

         မန္တလေးတိုင်းဒေသကြီး၊ ကျောက်ဆည်ခရိုင်သည် စပါး၊ ပဲ၊ ပြောင်းနှင့် ဆီထွက်သီးနှံများအား အဓိကစိုက်ပျိုးလျှက်ရှိပြီး ၎င်းသီးနှံများထဲမှ ဆီထွက်သီးနှံတစ်မျိုးဖြစ်သည့် ဆောင်းမြေပဲများကို စိုက်ပျိုးလျှက်ရှိရာယခင်နှစ်တွင်(၆၂၈၄)ဧကစိုက်ပျိုးနိုင်ခဲ့ပြီး ယခုနှစ်တွင် (၆၃၃၄)ဧကစိုက်ပျိုးနိုင်ခဲ့၍ ယခင်နှစ်ထက်ပိုမိုစိုက်ပျိုးနိုင်ခဲ့ကြောင်း ၊ ယခုအချိန်တွင် ကျောက်ဆည်ခရိုင်အနေဖြင့် ဆောင်းမြေပဲ (၁၂၀)ဧက ရိတ်သိမ်းလျှက်ရှိကြောင်း သက်ဆိုင်ရာဌာန၏စာရင်းများအရသိရှိရပါသည်။ ဆောင်းမြေပဲများအား စက်တင်ဘာလနှင့် အောက်တိုဘာလများတွင် စတင်စိုက်ပျိုးကြပြီး ဖေဖော်ဝါရီ လဆန်းမှစ၍ စတင်ထွက်ရှိနေပြီဖြစ်ပါသည်။ မြေပဲအားစိုက်ပျိုးရာတွင် ထယ်ရေးနက်ရမည်၊ ထွန်ရေးညက်ရမည်၊ စိုက်ခင်းမြေ ညီညာပြန်ပြူးရမည်ဖြစ်ပြီး စိုက်ကြောင်းဖော်စနစ်ဖြင့် အများဆုံးစိုက်ပျိုးကြပြီး ဘောင်ဖော်စနစ်ဖြင့်စိုက်ပျိုးလျှင် ပိုကောင်းကြောင်း ၊ မျိုးမြေပဲအား အတောင့်စိုက်ပျိုးခြင်းထက် အစေ့ချစိုက်ပျိုးပါက ပို၍ကောင်းမွန်ပြီး အခြားဒေသများတွင် ပင်ထောင်မြေပဲမျိုးများကိုလည်း စိုက်ပျိုးကြပါသည်။ မျိုးအနေဖြင့် တစ်ဧကလျှင် မျိုးတောင့်အနေဖြင့် စိုက်ပျိုးပါက(၄) တင်းခန့်နှင့် အစေ့စိုက်ပျိုးလျှင်(၁.၅)တင်းကုန်ကျကြောင်း၊ တစ်ဧကကုန်ကျစရိတ်အနေဖြင့် မျိုးစေ့၊ ထွန်ယက်ခ၊ လုပ်သားခ၊ စုစုပေါင်း(၃၀၀၀၀ဝ/-)ကျပ်ဝန်းကျင်ခန့် ကုန်ကျကြောင်း ၊ အထွက်နှုန်းအနေဖြင့် ယခင်နှစ်တွင်(၅၀)တင်းခန့်ထွက်ရှိပြီး ယခုနှစ်တွင် (၅၈)တင်းခန့် ထွက်ရှိကြောင်း ၊ အချို့ဒေသများတွင် စိုက်ပျိုးရေးဦးစီးဌာန၏ ညွှန်ကြားချက်အရ အထွက်နှုန်းကောင်းသော မြေပဲမျိုးများကိုပြောင်းလဲစိုက်ပျိုးလာသောကြောင့် တစ်ဧကလျှင် အထွက်တင်း (၁၀၀)ဝန်းကျင်ခန့် ထွက်ရှိလာကြောင်းသိရှိရပါသည်။ မြေပဲတောင့် တစ်တင်းလျှင် ယခင်နှစ် စျေးနှုန်းမှာ (၁၀၅၀ဝ/-)ကျပ် ၊ မြေပဲဆံ(၁)ပိဿာလျှင်(၂၄၀ဝ/-)ကျပ်၊မြေပဲဆီတစ်ပိဿာလျှင် (၅၈၀၀/-)ကျပ်ရှိပြီး ယခုနှစ် စျေးနှုန်း အနေဖြင့် မြေပဲတောင့်တစ်တင်းလျှင် (၁၅၀၀၀/-)ကျပ် ၊ မြေပဲဆံ(၁)ပိဿာလျှင်(၃၁၀ဝ/-)ကျပ်၊မြေပဲဆီတစ်ပိဿာလျှင်(၈၀၀ဝိ/-)ကျပ်စျေးနှုန်းရှိကြောင်း စားသုံးရန်အတွက် မြေပဲတစ်တင်း ကြိတ်ခွဲပါကမြေပဲဆီ(၇)ပိဿာနှင့် မြေပဲဖတ်(၇)ပိဿာ ထွက်ရှိကြောင်း၊ မြေပဲဖတ်(၁)ပိဿာလျှင် (၁၀၀၀/-)ကျပ်ရှိကြောင်းသိရှိရပြီး တစ်ဧက အကျိုးအမြတ်အနေဖြင့် (၅၅၀၀၀၀/-)ကျပ်ခန့်ရရှိကြောင်း မြေပဲစိုက်တောင်သူတစ်ဦး၏ ပြောကြားချက်အရသိရှိရပါသည်။ မြေပဲသီးနှံသည် ပြည်တွင်းစားသုံးမှုတွင် အရေးပါသောသီးနှံတစ်မျိုးဖြစ်သည့်အတွက် မြေပဲစိုက်တောင်သူများအနေဖြင့် အကျိုးအမြတ်ရှိသလို မြေပဲပင်စည်နှင့်မြေပဲဖတ်များအားကျွဲ၊ နွားများအတွက် အစားအစာအဖြစ် အသုံးဝင်သောကြောင့် ကျွဲ ၊ နွားများအတွက် အစာများမပူပင်ရကြောင်း၊ မြေပဲစိုက်ပျိုးခြင်းသည် တောင်သူများ တွက်ချေကိုက်သည့် သီးနှံဖြစ်သည့်အတွက် ပိုမိုစိုက်ပျိုးသင့်ပါကြောင်း အကြံပြုရေးသားလိုက်ရပါသည်။

DOCA(မန္တလေး)

             မန္တလေးတိုင်းဒေသကြီး၊ ကျောက်ဆည်ခရိုင်တွင် ကျောက်ဆည်၊ စဉ့်ကိုင်၊  မြစ်သား၊ တံတားဦး မြို့နယ်ဟူ၍(၄)မြို့နယ်ရှိသည့်အနက် မြစ်သားမြို့နယ်သည် ကြက်သွန်သီးနှံအား အများဆုံးစိုက်ပျိုးကြပြီး စျေးကွက်အတွင်းတွင် မြစ်သားဒေသမှထွက်ရှိသော ကြက်သွန်များမှာ အခြားဒေသမှထွက်ရှိသောကြက်သွန်များထက် စားသုံးသူများမှပို၍ ကြိုက်နှစ်သက်သောကြောင့် စျေးကွက်အတွင်းတွင် မြစ်သားကြက်သွန်ဟူ၍ အများဆုံးအရောင်းအဝယ်ဖြစ်လျှက်ရှိပါသည်။ မြစ်သားမြို့တွင် ကြက်သွန်သီးနှံအား ပုဂ္ဂလိကပွဲရုံများ၌ အရောင်းအဝယ်ပြုလုပ်လျှက်ရှိသလို အချို့စီးပွားရေးလုပ်ငန်းရှင်များမှာလည်း ကြက်သွန်အားတန်ဖိုးမြှင့်ထုတ်ကုန် တစ်ခုအနေဖြင့်  ကြက်သွန်နီကြော်လုပ်ငန်းများအားလုပ်ကိုင်လျှက်ရှိရာ မြစ်သားမြို့နယ်၌ ကြက်သွန်နီကြော်လုပ်ငန်းရှင်(၃)ဦးရှိသည့်အနက်မှ ကျောက်ဆည်ခရိုင် ၊ စားသုံးသူရေးရာဦးစီးဌာနမှ မြစ်သားမြို့နယ်၊ ရွာသစ်ကျေးရွာရှိ အရသာချို ကြက်သွန်ကြော်လုပ်ငန်းအားကွင်းဆင်း မေးမြန်း ခဲ့ပါသည်။ ၄င်းလုပ်ငန်းအား လွန်ခဲ့သော(၅)နှစ်ခန့်မှစ၍ စတင်လုပ်ကိုင်ရောင်းချလျှက်ရှိပြီး ကြက်သွန်ကြော်ရာတွင် အသုံးပြုသည့် ကြက်သွန်နီအား သီးနှံပေါ်ချိန်တွင် တောင်သူများထံမှ တိုက်ရိုက်ဝယ်ယူသလို ရာသီချိန်မဟုတ်ပါက ပွဲရုံများ၌ဝယ်ယူ၍ကြော်ရကြောင်း၊ ယခုပေါက်စျေးအနေဖြင့်(၁)ပိဿာလျှင်(၅၀၀-၅၅၀)ကျပ်ပေးရကြောင်း၊ တစ်နေ့လျှင်ကြက်သွန်နီ(၁၀၀၀)ပိဿာအထိ ကြော်ရကြောင်း၊ ကြက်သွန်နီကြော်လုပ်ငန်း လုပ်ကိုင်ရာတွင် အကြော်ဆရာ(၁၂)ဦးရှိပြီး လူတစ်ဦး(၁)လလျှင် ပုတ်ပြတ်အနေဖြင့် (၁၇၀၀၀၀/-)ကျပ်ပေးရကြောင်း၊ ကြက်သွန်နီကြော်လုပ်ငန်း၌ တစ်ရက်လျှင် လုပ်သားဦးရေ(၅၀)ခန့် အထိအသုံးပြုရပြီး တစ်ဦးလျှင် ကြက်သွန်(၂၅) ပိဿာခန့် အခွံခွာ/ခြစ်ပြီးစီးကြောင်း၊ အခွံခွာ/ခြစ်(၁)ပိဿာလျှင်(၂၀၀/-)ကျပ်ပေးရကြောင်း၊ လုပ်သားတစ်ဦးအနေဖြင့် တစ်နေ့လျှင်ဝင်ငွေ(၅၀၀၀/-)ကျပ်ရရှိပြီး အနီးနားဝန်းကျင်မှ လုပ်သားများအား အလုပ်အကိုင်ပေးနိုင်ကြောင်း ၊ ကြက်သွန်နီအား ကြော်ရာတွင် အခြောက်လှန်း၍ ကြော်ခြင်းမဟုတ်ဘဲ နေဖြင့်ထန့်အောင်လှန်းပြီးကြော်ခြင်းဖြစ်ကြောင်း၊ အချို့မှာအစိုကြော်ကြောင်း၊ အစိုကြော်လျှင် ဆီပိုမိုကုန်ကျပြီး အခြားပစ္စည်းများ ပါဝင်ကြော်ခြင်းမျိုးမဟုတ်ဘဲ ကြက်သွန်နီကုန်ကြမ်းတစ်မျိုးဖြင့်သာ ကြော်၍ရောင်းချပါသည်။ကြော်ပြီး ကြက်သွန်ကြော်ထုတ်များအား အမြို့မြို့အနယ်နယ်သို့ တင်ပို့ရောင်းချလျက်ရှိပြီး ကြက်သွန်နီကြော် (၁)ပိဿာ တစ်ထုပ်လျှင်(၈၀၀၀/-)ကျပ်၊ (၅၀)ကျပ်သားတစ်ထုပ်လျှင် (၄၀၀၀/-)ကျပ် ၊ (၂၅)ကျပ်သား တစ်ထုပ်လျှင် (၂၀၀၀/-)ကျပ်ဖြစ်ပြီး ဖောက်သည်စျေးအနေဖြင့်(၁)ပိဿာအထုပ် (၁၀)ထုပ်အထက်မှာယူပါက(၁)ပိဿာထုပ်(၁)ထုပ်လျှင်(၆၀၀၀/-)ကျပ်ဖြင့် ရောင်းချပေးကြောင်း ၊ အရသာချို ကြက်သွန်နီကြော်လုပ်ငန်းပိုင်ရှင်၏ ပြောကြားချက်အရသိရှိရပါသည်။ အရသာရှိပြီး ကြွပ်ရွမွှေးကြိုင်နေသော ကြက်သွန်နီကြော်များကို အလှူ ၊ မင်္ဂလာဆောင်ပွဲများ ၊ ဆွမ်းကပ် ၊ ကထိန်ပွဲများတွင် ဒံပေါက်ချက်ခြင်း၊ငါးခြောက်ကြော်ခြင်း၊ ငရုတ်သီးကြော်ခြင်းနှင့် အသုပ်စုံတို့တွင် လိုအပ်သလိုထည့်၍ စားသုံးကြပါသည်။ ကြက်သွန်နီကြော်အား မည်သည့်ဓါတုပစ္စည်းမှ အရောအနှောမပါဝင်ဘဲ ကြက်သွန်နီ သီးသန့်ကြော်ထားပြီး သန့်ရှင်းလတ်ဆတ်၍ အသင့်စားသုံးနိုင်သောကြောင့် သုံးစွဲသူများအနေဖြင့် အလွယ်တကူဝယ်ယူစားသုံးနိုင်သလို လုပ်ငန်းရှင်များအနေဖြင့်လည်း ကြက်သွန်သီးနှံအား ဒေသတန်ဖိုးမြှင့်ထုတ်ကုန်အဖြစ် ထုတ်လုပ်ရောင်းချပါက ပိုမိုအဆင်ပြေမည်ဖြစ်ကြောင်း ရေးသားတင်ပြအပ်ပါသည်။

DOCA(မန္တလေး)

         မန္တလေးဈေးကွက်သို့ စစ်ကိုင်းတိုင်းဒေသကြီး ရွှေဘို၊ မြင်းမူနယ်မှ မြေပဲဆံအသစ်များ ဝင်ရောက်မှုရှိပြီး အညာဒေသ မကွေးနှင့် ရေနံချောင်းနယ်တို့မှလည်း အညာဆီဆံများ ဝင်ရောက်လျက်ရှိပါသည်။ အဆိုပါ မြေပဲလုံးဆံများကို ဒေသတွင်းရောင်းဝယ်သူများအနေနှင့် မန္တလေးမှတဆင့် တရုတ်ဝယ်လက်များမှ အဝယ်ရှိသလို ရန်ကုန်သို့လည်း တင်ပို့မှုရှိကြောင်းနှင့် မန္တလေးမြို့တွင်းရှိ ဆီစက်များမှလည်း စက်ကြိတ်များကောင်းမွန်သဖြင့် ဆီကြိတ်ခွဲမှုရှိကာ အဝယ်လိုက်ကြောင်း သိရပါသည်။မန္တလေးဈေးကွက်တွင် လက်တလောဈေးနှုန်းအနေနှင့် မြေပဲလုံးဆံ(နီ)သစ် တစ်ပိဿာ ၃၀၅၀ ကျပ်၊ S1 လုံးဆံ တစ်ပိဿာ ၃၂၀၀ ကျပ်၊ အနီဆီဆံ တစ်ပိဿာ ၂၇၀၀ ကျပ် ရှိပြီး ယခင်လတူဈေးနှုန်းမှာ မြေပဲလုံးဆံ(နီ)သစ် တစ်ပိဿာ ၃၁၅၀ ကျပ်၊ S1 လုံးဆံ တစ်ပိဿာ ၃၁၅၀ ကျပ်၊ အနီဆီဆံ တစ်ပိဿာ ၂၇၀၀ ကျပ် ဈေးနှုန်းများနှင့် အရောင်းအဝယ်ဖြစ်ခဲ့သည့်အတွက် အနီလုံးဆံအနေနှင့် တစ်ပိဿာ ၁၀၀ ကျပ်၊ S1 လုံးဆံ တစ်ပိဿာ ၅၀ ကျပ်၊ အနီဆီဆံ အနေနှင့် ဈေးငြိမ်နေသည်ကို တွေ့ရပါသည်။ မြေပဲဆီဈေးအနေနှင့် တစ်ပိဿာ ၆၅၀၀-၇၀၀၀ ကျပ်ဈေးရှိကြောင်း သိရသည်။

DOCA(မန္တလေး)