ပြည်တွင်းကုန်သွယ်မှုသတင်း

          ကြက်သွန်ပင်သည် အပူအအေးမျှတသော ရာသီဥတုကို ကြိုက်နှစ်သက်ပါသည်။ ကြက်သွန်နီသည် ကာလတိုရှင်သန်ကြီးထွားပြီး ပျက်စီးလွယ်သော သက်တမ်းတိုရာသီပင် ဖြစ်ပါ သည်။ကြုံတွေ့ရသောရာသီဥတုအခြေအနေ၊ဇီဝဖြစ်စဉ်အခက်အခဲဖြစ်မှုအပေါ်မူတည်၍ကြက်သွန်နီပင်များကြီးထွားဖွံ့ဖြိုးမှုနှုန်း ကွဲပြားခြားနားနိုင်ပါသည်။ကြက်သွန်နီဥများ အရည်အသွေးကောင်းမွန်စေရန် အပင်များသက်တမ်းရင့်မှသာလျှင် နှုတ်သိမ်းသင့်သည်။ သက်တမ်းကုန်ဆုံးချိန် နီးကပ်လာလျှင် ကြက်သွန်မိတ်အဖူးမျာ ထွက်ပေါ်မှုအခြေအနေ အမြင့်ဆုံးသို့ ရောက်ရှိလာပါသည်။ ထိုအချိန်တွင် ကြက်သွန်ပင်ထိပ်ဖျားများ ညိုခြောက်လာပါက နှုတ်သိမ်းသင့်သည်။ ကြက်သွန်နီမနှုတ်မီ အဖူးအောက် ၁ လက်မ၊၂ လက်မအထိ အမြိတ်ဖူးများကို ဖြတ်တောက်ရမည်၊ ဖြတ်တောက်ပြီးပါက ကြီးထွားမှုနှုန်းလျင်မြန်စွာ ပြောင်းလဲ၍  ပျက်သုဉ်းခြင်းအခြေအနေသို့ လျင်မြန်စွာ ရောက်ရှိနိုင်ပါ သည်။ ကြက်သွန်နီစိုက်ပျိုးသူများသည် ရေဝင်သော လယ်တောများတွင် စိုက်ပျိုးလေ့ရှိသော်လည်း ရိတ်သိမ်းချိန်ရောက်ပါက ကွင်းပြင်များသည် ခြောက်သွေ့သွားကြသည်။သို့သော် အမြိတ်များ ဖြတ်တောက်ရမည့်အချိန်တွင် ရုတ်တရက် နေပူမိုးရွာခြင်းကြောင့် ပူနွေးစွတ်စိုသော ရာသီဥတု အပြောင်းအလဲပြင်းထန်ပါက ရောဂါဖြစ်ပွားမှုနှင့် ပျက်စီးမှုပမာဏ များပြားမည်ဖြစ်ပါသည်။ ထို့ကြောင့် မူလကတည်းက ရေမဝင်နိုင်သော လယ်တောများတွင်သာ စိုက်ပျိုးသင့်ပေသည်။

          အချို့ စိုက်ပျိုးဒေသတို့တွင် ကြက်သွန်ဥများကို စက်ယန္တရားများ အသုံးပြု၍ ကုန်သေတ္တာကြီးများ(သို့)အိတ်ကြီးထဲသို့ ထည့်သွင်းထုပ်ပိုးကြသည်။ ကြက်သွန်ဥများ ကောင်းစွာ မခြောက်သေးခင်အချိန်၌ စက်ကိရိယာကြောင့် ပျက်စီးခြင်း၊ရောဂါပိုးကျရောက်ခြင်းများ လွယ်ကူစွာ ဖြစ်ပေါ်စေနိုင်ပါသည်။နှုတ်သိမ်းချိန်၌ စိုက်ခင်းလုပ်သားများသည် ကြက်သွန်ပင်၏ ထိပ်ပိုင်းကို အဖူးဖြတ် ကပ်ကြေး၊အမြစ်ညှပ်ကပ်ကြေးဖြင့် သေသပ်စွာ ဖြတ်တောက်သင့်ပေသည်။ အမြစ်များအား  အမြစ်အနားရင်းများမှ လေးပုံတစ်ပုံ အောက်တိုး၍ ဖြတ်တောက်ခြင်းမပြုသင့်ပါ။ ကြက်သွန်နှုတ်ချိန်၌ စိုက်ခင်းလုပ်သားများမှ ကြက်သွန်ပင်များကို ကြမ်းတမ်းစွာ ကိုင်တွယ်ခြင်း မပြုလုပ်စေရန် ကြီးကြပ်သူများအား ညွှန်ကြားသင့်ပါသည်။ ကောက်ရိုးထူထူခင်းထားသော သစ်သားကျဲ့သေတ္တာထဲတွင် ထည့်သွင်း၍ ထုပ်ပိုးခြင်းသည် ကြက်သွန်ဥနှင့် အာလူးတို့အတွက် ပိုမိုကောင်းမွန်ပါသည်။

          ကြက်သွန်နီများ ပျက်စီးမှုလျော့နည်းစေရန် ထုပ်ပိုးသိုလှောင်ကာလတစ်လျှောက်လုံး ခြောက်သွေ့စွာ ထားရမည်ဖြစ်သည်။ ကြက်သွန်များအား သင့်လျော်သော အခြောက်ခံခြင်းပြုလုပ်ပါက အပင်ပေါက်ခြင်း၊ရောဂါဖြစ်ပွား၍ လွယ်ကူစွာ ပုပ်ရိညိုမဲခြင်းနှင့် စက်ကိရိယာကြောင့် ပျက်စီးခြင်း အခြေအနေများ ဖြစ်ပေါ်နိုင်ပါသည်။ ကြက်သွန်များကို ခြောက်သွေ့စွာထားရှိခြင်းအပေါ် မူတည်၍ အမြစ်များ အသားရွတ်လွှာနှင့် အခွံလွှာပါးများသည် အရောင်အသွေးပြည့်မီသော အခြေအနေတွင်ရှိနိုင်မည်ဖြစ်သည်။ လည်တိုင်တစ်ဝိုက် ခြောက်သွေ့နေလျှင် အကောင်းဆုံးဖြစ်ပြီး လက်ဖြင့် ဖျစ်ညှစ်လျှင် လျှော့မတွက်ဘဲ တင်းခံနေမည်ဖြစ်ပါသည်။ ၎င်းအနေအထားအထိ ခြောက်သွေ့ခြင်းမရှိပါက လျင်မြန်စွာ ပျက်စီးလွယ်မည်ဖြစ်ပါသည်။ နှုတ်သိမ်းပြီးနောက် ကြက်သွန် “လည်တိုင်ပုပ်”ရောဂါအဖြစ်များရခြင်းသည် ခြောက်သွေ့စွာမထားသိုသောကြောင့် ဖြစ်ပြီး တစ်ကြိမ်မျှရောဂါဖြစ်ပွားလျှင်ပင် ကြက်သွန်အားလုံး ပျက်စီးမည်ဖြစ်ပါသည်။

          တောင်သူများအနေဖြင့် ကြက်သွန်များနှုတ်ပြီးလျှင်  သဘာဝနေရောင်ဖြင့် ကောင်းမွန်စွာ အခြောက်လှန်းရန်လိုအပ်ပါသည်။ အချို့ ငွေကြေးတတ်နိုင်သူမျာကမူ သဘာဝ နေရောင်အပြင်  တီထွင်ဖန်တီးထားသော အခြောက်ခံစနစ်များကိုလည်း အသုံးပြုကြသည်။ ပတ်ဝန်းကျင်ရှိ ရေငွေ့ ကင်းသောလေများကြောင့် ရံဖန်ရံခါခြောက်သွေ့မှုလွန်ကဲတတ်၍ အပူပေးချိန် တိုတောင်းစေရန် အရေးကြီးပါသည်။ ရေငွေ့အပူပေးကိရိယာများ (သို့) သစ်စေ့ အပူပေးစက်များ (သို့) ဆေးရွက်ကြီး အခြေက်ခံသော လေပူစက်များဖြင့်လည်း ခြောက်သွေ့စေနိုင်သည်။ လေပူဖြင့် အပူပေးချိန်မှာ ၄၈ နာရီမှ ၇၂ နာရီအတွင်း သင့်ပါသည်။ ထိုသို့  အပူပေးရာတွင် လေဝင်လေထွက်ကောင်းစေရန် လိုအပ်ပါသည်။ လေအပူချိန် ၁၀၀ ဒီဂရီဖာရင်ဟိုက်သည် ကြက်သွန်များအတွက် ပြည့်စုံလုံလောက်ပါသည်။ ကြက်သွန်များအား အပူမပေးမီလေ၏ အပူချိန်ကို တိုင်းတာရမည်၊ခန့်မှန်းတိုင်းတာခြင်း မပြုလုပ်ရပါ။ အဘယ်ကြောင့်ဆိုသော် အပူချိန် ၁၀၀ ဒီဂရီ ဖာရင်ဟိုက် ကျော်လွန်ပါက ကြက်သွန်ဥ များပျက်စီးနိုင်သောကြောင့် ဖြစ်ပါသည်။

          ခြောက်သွေ့အောင် ပြုလုပ်ရမည့် ကြက်သွန်များ လေစီးကြောင်းကောင်းစွာရရှိစေရန်နှင့် လုံလောက်သော  ခြောက်သွေ့မှုရရှိစေရန် လေပန်ကာများကို တပ်ဆင်ရပါမည်။ကောက်ရိုးပေါ် တွင် ပုံထားသော ကြက်သွန်များခြောက်သွေ့စေရန် တစ်မိနစ်လျှင် လေထုထည် ၃ ကုဗပေ မှ ၅ ကုဗပေ ပေးနိုင်သော လေပန်ကာများကပို၍ ကောင်းမွန်သည်။ အခြောက်ခံရာတွင် ပုံမှန်အားဖြင့် ကြက်သွန် အလေးချိန် ၅%  မှ ၃% အထိသာ ကျဆင်းလေ့ရှိသည်။ ခြောက်သွေ့လျှင် ကြက်သွန်များကို အကြီး အသေး ခွဲသင့်ပါသည်။ ကြက်သွန်ထိပ်နှင့်အမြစ်များ အခွံပါးအလွှာကောင်းစွာ ခြောက်သွေ့ တင်းမာလာပါက လွယ်ကူစွာကြီးသေးခွဲ၍ ထုပ်ပိုးနိုင်ပြီဖြစ်ပါသည်။

          အရွယ်အစား ခွဲခြားထုပ်ပိုးချိန်တွင် ကြက်သွန်နီများ လေလွင့်ဆုံးရှုံးမှုအလွန်များသည်။ စက်၏ ဒဏ်ကြောင့်နာခြင်း၊ကြမ်းတမ်းစွာ ပွတ်မိခြင်း၊ အခွံပါးနှင့် အတွင်းလွှာများကကျိတ်၍ ဖြတ်တောက်ခြင်းစသော ဒဏ်ရာအနာများသည် အစောပိုင်းအချိန်တွင် ထင်ရှားသိသာစွာ ဖြစ်ပေါ်ခြင်းမရှိပေ၊ သို့သော် ရက်သတ္တပတ်ပို၍ ကြာသော သယ်ယူပို့ဆောင်ရေးကာလ (ဥပမာ- သင်္ဘောဖြင့် ) ဖြင့်တင်လျှင် ကြက်သွန်များ ပုပ်ရိခြင်းဖြစ်ပွားနိုင်ပါသည်။

      ကြမ်းတမ်းသော မျက်နှာပြင်ကြမ်းခင်းများတွင် ကြက်သွန်များလိမ့်စေခြင်း၊ အိတ်သွန်၍ လှယ်ခြင်းကြောင့် ခွံပါးနှင့်လည်တိုင်ပြတ်တောက်ခြင်း၊ အတွင်းသားနာခြင်းများ ဖြစ်ပွားစေသည်။ ကြီး၊သေး ခွဲခြားထုပ်ပိုးစက်၏ လျောလိုင်းတစ်လျှောက်တွင် ထိခိုက်မိခြင်းအား ကာကွယ်ရန် ပါးလွှာသော ရေမြှုပ်ပြားများ တပ်ဆင်၍ အသုံးပြုပါက ကြက်သွန်ဆုံးရှုံးမှု ၂၅% အထိ လျှော့ကျစေနိုင်ပါသည်။ လျောလိုင်းမှ ကြက်သွန်များကျသင့်သော အမြင့်ကိုနိမ့်၍လည်းကောင်း၊ ကြက်သွန်များအား အရှိန် ဖြင့်ပစ်ထည့်ခြင်းကို တားမြစ်ခြင်းဖြင့်လည်းကောင်း၊ ဆုံးရှုံးမှုပမာဏ လျော့နည်းစေနိုင်ပါသည်။ ကြက်သွန်များကို တစ်အိတ်လျင် ၂၅ ပေါင် ၃၀ ပေါင် (သို့) ၅၀ ပေါင်အထိ ဆန့်သောဇာကွက်ကျဲ ပိုက်အိတ်များဖြင့် ထုပ်ပိုးနိုင်ပါသည်။

          ကြက်သွန်များအား သိုလှောင်ခြင်းနှင့် သယ်ယူခြင်းပြုလုပ်ရာတွင် အခြားသော ဟင်းသီးဟင်းရွက်စိမ်းများနှင့် ရောနှောခြင်း မရှိစေဘဲ သီးသန့်ဆောင်ရွက်ရမည်၊ ကောင်းစွာခြောက်သွေ့ပြီးသော ကြက်သွန်နီများသည် ဟင်းသီးဟင်းရွက်စိမ်းများတွင် ပါဝင်သော အစိုဓာတ်ကို လွယ်ကူစွာ စုပ်ယူနိုင်သောကြောင့် ဖြစ်ပါသည်။ ကြက်သွန်ဈေးနှုန်းများအား အရွယ်အစားဖြင့်မဆုံးဖြတ်ဘဲ အရည်အသွေးကို မူတည်၍ဆုံးဖြတ်ကြပါသည်။

          အပူချိန် ၃၁ ဒီဂရီဖာရင်ဟိုက်ထိန်းညှိ၍ အအေးခံခြင်းသည် ကြက်သွန်များအတွက် သင့်လျော်ပါသည်။ ၃၁ ဒီဂရီဖာရင်ဟိုက်၌ ကာလတို သိုလှောင်ခြင်းသည် ၃၁ ဒီဂရီဖာရင်ဟိုက်၌ပင် ကာလရှည်သိုလှောင်ခြင်းထက် ပျက်စီးမှုနှုန်းလျော့နည်းစေပါသည်။အအေးလွန်ကဲလျှင် ကြက်သွန် များပွ၍ လျင်မြန်စွာပျက်ဆီးနိုင်ပြီး ပုပ်ရိစေနိုင်ပါသည်။အပူချိန်အခြေအနေ ၅၀ ဒီဂရီဖာရင်ဟိုက် အောက်၌ ၂၄ နာရီကြာလျင် ကြက်သွန်များအညှောင့်ထွက်စေနိုင်ပါသည်။ ထိုအခါအလေးချိန်လွန်စွာလျော့နည်းကျဆင်းသွားပြီး ဈေးကွက်တွင် ရောင်းတန်းမဝင်နိုင်တော့ပါ။

          စိုက်ပျိုးသူများနှင့်ကုန်သည်များသည် လက်တွေ့ကျစွာအရည်အသွေးထိန်းသိမ်းနိုင်သော သန့်ရှင်းသပ်ရပ်တိကျမှန်ကန်သော ကိရိယာများကို အသုံးပြု၍ ထုတ်ပိုးမှုပြုသင့်ပါသည်။ ဈေးကွက်တွင် ရောင်းပန်းလှစေသော အဓိကအချက်သည် ဝယ်ယူစာသုံးသူများ၏ လိုလားချက်များကို နီးကပ်စွာ လေ့လာပြီး ကုန်ပစ္စည်းများကို စားသုံးသူလိုလားချက်များနှင့်ကိုက်ညီအောင် ထုတ်လုပ်ခြင်းပင်ဖြစ်ပါသည်။ စားသုံးသူများနှင့်လိုလားချက်နှင့် ကိုက်ညီသောသီးနှံများကို ထုတ်လုပ်နိုင်ခြင်းအားဖြင့် စားသုံးသူများအတွက် Food Safety ဖြစ်စေသော ဈေးကွက်ဝယ်လိုအားများ ပိုမိုရရှိ လာပြီး တောင်သူကုန်သည်များလည်း ပိုမိုအကျိုးအမြတ်ရရှိလာနိုင်ပါကြေင်း သတင်းဆောင်းပါး ရေးသားလိုက်ရပါသည်။

စားသုံးသူရေးရာဦးစီးဌာန

မန္တလေးတိုင်းဒေသကြီး

        စားသုံးသူရေးရာဦးစီးဌာန၊  ရန်ကုန်အရှေ့ပိုင်းခရိုင်ဦးစီးမှူးရုံးမှ တာဝန်ရှိသူများသည် အရှေ့ပိုင်းခရိုင်အတွင်းရှိ ဘိလပ်မြေအရောင်းဆိုင်များ၏ ဘိလပ်မြေဈေးနှုန်းများအား နေ့စဉ်စုံစမ်းစိစစ်ကြပ်မတ်၍ ဈေးနှုန်းများကောက်ယူပြီး ရန်ကုန်တိုင်းဒေသကြီးဦးစီးမှူးရုံးသို့ ပေးပို့ တင်ပြလျက်ရှိပါသည်။

          အဓိကထား၍ ကောက်ယူနေသော အရှေ့ပိုင်းခရိုင်အတွင်းရှိ ဘိလပ်မြေအရောင်းဆိုင်(၃) ဆိုင် ၏ (၂.၂.၂၀၂၂) ရက်နေ့ဈေးနှုန်းများမှာ ကြံ့နှစ်ကောင် (နီ) တစ်အိတ် ၉၀၀ဝိ/-၊ ထိုင်းဆင်တစ်အိတ် 1000ဝိ/- ၊ Crown တစ်အိတ် 910ဝိ/-၊ Alpha တစ်အိတ် ၉3၀ဝိ/- ဖြစ်ပြီး (8.2.2022) ရက်နေ့ဈေး နှုန်းများမှာ ကြံ့နှစ်ကောင်(နီ)တစ်အိတ် 910ဝိ/- ၊ ထိုင်းဆင်တစ်အိတ် 995ဝိ/- ၊Crown တစ်အိတ် 920ဝိ/-၊ Alpha တစ်အိတ် ၉၂၀ဝိ/-၊ ယခုရောက်ရှိလာသော Apacheတစ်အိတ် 89၀ဝိ/- ရောင်းချနေ၍ ဖေဖော်ဝါရီလ ပထမပတ်နှင့် ဒုတိယပတ်ဈေးကွာဟမှုကြီးကြီးမားမားမရှိခြင်းကို စီစစ်တွေ့ရှိရပြီး၊ ယခုဒုတိယပတ်တွင်ဆိုင်များသို့ ဘိလပ်မြေအိတ်များ အတန်အသင့်ဝင်ရောက်လာ‌ကြောင်း စုံစမ်းစီစစ်သိရှိရပါသည်။

DOCA(ရန်ကုန်)

          ကရင်ပြည်နယ်စားသုံးသူရေးရာ ဦးစီးဌာန၊ ပြည်နယ်ဦးစီးမှူးရုံးမှ ဦးစီးအရာရှိ ဦးမျိုးဝင်းနိုင် ဦးဆောင်သော ဝန်ထမ်းများသည် မိတ်ဘက်ဌာနဆိုင်ရာများဖြစ်သော ပြည်နယ်ရေနံထွက် ပစ္စည်းကြီးကြပ်စစ်ဆေးရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့်အတူ (၈.၂.၂၀၂၂) ရက်နေ့ နံနက် (၁၀:၀၀)နာရီအချိန်တွင် ကရင် ပြည်နယ်၊ ဘားအံမြို့ရှိ  အထူးဈေးနှုန်းဖြင့် ရောင်းချပေးလျှက်ရှိသော DENKO (ဘားအံ-၁)၊ DENKO (ဘားအံ-၂)၊   DENKO (သာမည) စက်သုံးဆီအရောင်းဆိုင်များသို့ သွားရောက်၍ စက်သုံးဆီများအား အထူးဈေးနှုန်းဖြင့် ရောင်းချနေမှုအခြေအနေများ၊ အချင်အတွယ်ပြည့်ဝ မှန်ကန်မှုရှိစေရေးနှင့် သတ်မှတ်ထားသည့် ဈေးနှုန်းများအတိုင်းရောင်းချမှုရှိစေရေး ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ကြောင်း သိရှိရပါသည်။

         ထို့သို့စစ်ဆေးရာတွင် လုပ်ငန်းရှင်များအနေဖြင့် မိမိတို့ရောင်းချသော ကုန်စည်နှင့်ပတ်သက်၍ သတင်းအချက်အလက်များအား ပြည်သူများသို့ ရှင်းလင်းစွာသိရှိနိုင်ရန်အတွက် ပြည့်စုံမှန်ကန်သော သတင်းအချက်အလက်များဖြန့်ဝေပေးကြရန်၊ သတ်မှတ်အရည်အသွေးပြည့်မီသော စက်သုံးဆီများကိုသာ ရောင်းချကြရန်နှင့် အထူးဈေးနှုန်းဖြင့် ရောင်းချမည်ဆိုပါက စည်းကမ်းချက်များနှင့်အညီ မှန်ကန်စွာရောင်းချပေးကြရန် အသိပေးပြောကြားခဲ့ပြီး အချင်အတွယ်မှန်ကန်မှုရှိ/မရှိအား (၂၀)လီတာဝင် စံခွက်ဖြင့် ချိန်တွယ်စစ်ဆေးခဲ့ကြကြောင်း သိရှိရပါသည်။

စားသုံးသူရေးရာဦးစီးဌာန

ကရင်ပြည်နယ်

      စားသုံးသူရေးရာဦးစီးဌာန၊ မကွေးခရိုင်ဦးစီးမှူးရုံး၊ မြို့သစ်မြို့နယ်ဦးစီးမှူး ဦးဆယ်မောင် သည် တိုင်း/ခရိုင်ဦးစီးမှူးတို့၏ လမ်းညွှန်ချက်နှင့်အညီ မြို့သစ်မြို့နယ်မြို့နယ်ဦးစီးမှူးအနေဖြင့် စားသုံးသူကာကွယ်ရေးဆိုင်ရာ အသိပညာပေးခြင်းလုပ်ငန်းများ၊ စားသုံးသူကာကွယ်ရေးဥပဒေပါ ပြဌာန်းချက်များအား သိရှိလိုက်နာဆောင်ရွက်စေရန် စီးပွားရေးလုပ်ငန်းရှင်များနှင့် တွေ့ဆုံဆွေးနွေးအသိပညာပေးခြင်း၊ ထုတ်ကုန်များလုံခြုံစိတ်ချရမှုရှိစေရေးအတွက် စျေးကွက်စောင့်ကြည့်စစ်ဆေးခြင်း၊ ပြည်တွင်းကုန်သွယ်မှုကဏ္ဍ ဖွံ့ဖြိုးတိုးတက်လာစေရေးအတွက် စိုက်ပျိုးမွေးမြူသူ တောင်သူများနှင့် တွေ့ဆုံဆွေးနွေးခြင်း သတင်းအချက်အလက်ဖြန့်ဝေပေးခြင်း လုပ်ငန်းများအား စဉ်ဆက်မပြတ်ဆောင်ရွက်လျှက်ရှိရာ စားသုံးသူများ ဘေးအန္တရာယ်ကင်းရှင်းပြီး ထုတ်ကုန်များ လုံခြုံစိတ်ချရမှုရှိစေရန်နှင့် ကုန်အညွှန်းအမှတ်အသားများ ပြည့်စုံစွာ ဖော်ပြလာစေရေးအတွက် မိတ်ဖက်ဌာနဖြစ်သည့် မြို့နယ်စည်ပင်သာယာရေးအဖွဲ့နှင့် ပူးပေါင်းကာ (၇.၂.၂၀၂၂) ရက်နေ့ နံနက်(၁၁:၀၀)အချိန်တွင် မြို့သစ်မြို့ပေါ်ရှိ  အချိုရည်နှင့်အိမ်သုံးလျှပ်စစ်ပစ္စည်း ဖြန့်ဖြူးရောင်းချလျှက်ရှိသည့် စျေးဆိုင်(၈) ဆိုင်တို့မှ လုပ်ငန်းရှင်များအား တွေ့ဆုံ၍ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဆိုင်ရာ ပြဌာန်းချက်များသည် ယခုအခါတွင် အသက်ဝင်ပြီဖြစ်သည့်အတွက် စီးပွားရေးလုပ်ငန်းရှင်များအနေဖြင့် မြန်မာဘာသာဖြင့် ဖော်ပြပါရှိသည့် ကုန်စည်များကိုသာ ထုတ်လုပ်ဖြန့်ဖြူးရောင်းချရမည်ဖြစ်ကြောင်း၊ မိမိရောင်းချသည့်ကုန်စည်တွင် ဖော်ပြထားသည့် ကုန်အညွှန်းအမှတ်အသားများအား စားသုံးသူများ အလွယ်တကူ ဖတ်ရှုနားလည်နိုင်မှုမရှိ၍ မှားယွင်းစွာသုံးစွဲခဲ့ခြင်းကြောင့် နစ်နာမှုဖြစ်ပေါ်လာပါက ရောင်းချဖြန့်ဖြူး ထုတ်လုပ်သည့် လုပ်ငန်းရှင်မှ တာဝန်ယူဖြေရှင်းပေးရမည်ဖြစ်ကြောင်း၊ မိမိရောင်းချသည့် ကုန်စည်အပေါ်တွင် စားသုံးသူအတွက် ဘေးအန္တရာယ်ကင်းရှင်းကြောင်း အာမခံမှုပေးရမည် ဖြစ်ကြောင်း အသေးစိတ်ရှင်းလင်းဆွေးနွေးခဲ့ပြီး စားသုံးသူကာကွယ်ရေး အသိပညာပေး လက်ကမ်း စာစောင်နှင့် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားသည့် ကြော်ငြာချက် အမှတ(၂/၂၀၁၉)ပါ အသိပညာပေး လက်ကမ်းစာစောင်များ ဖြန့်ဝေခဲ့ပါကြောင်းသိရှိရပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး

              စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊  မကွေးတိုင်းဒေသကြီး၊ မကွေးခရိုင်၊ ချောက်မြို့နယ်တာဝန်ခံ ဒေါ်မြတ်မြတ်မိုးနှင့် ဒေါ်ချိုဝေလွင် (ဒု-ဦးစီးမှူး) တို့သည် (၂.၂.၂၀၂၂)နေ့ နံနက်(၁၀:၃၀)တွင် ပြည်တွင်းကုန်သွယ်မှုကဏ္ဍ ဖွံ့ဖြိုးတိုးတက်ရေးအတွက် ပဲစဉ်းငုံ (၇)ဧက စိုက်ပျိုးထားရှိသည့် ချောက်မြို့နယ်၊ ဆားတောင်အရှေ့ကျေးရွာမှ တောင်သူဦးဉာဏ်ရင်နှင့် သွားရောက်တွေ့ဆုံပြီး ယခုနှစ် ပဲစဉ်းငုံသီးနှံတစ်ဧက စိုက်ပျိုးထုတ်လုပ်မှု ကုန်ကျစရိတ်၊ အထွက်နှုန်းနှင့် တစ်ဧကအကျိုးအမြတ်ရရှိမှုတို့အား သွားရောက်ကွင်းဆင်း တွေ့ဆုံမေးမြန်းခဲ့ကြောင်း သိရှိရပါသည်။

          ချောက်မြို့နယ်သည် မကွေးတိုင်းဒေသကြီးအတွင်း တည်ရှိပြီး ပူပြင်းခြောက်သွေ့မှုနှင့် မိုးရွာသွန်းမှုနည်းပါးသည့်အတွက် ပဲစဉ်းငုံသီးနှံကိုသာ အဓိကထားစိုက်ပျိုးသည့် မြို့နယ်ဖြစ်ပြီး ပဲစဉ်းငုံသီးနှံ (၂၄၀၇၀)ဧက စိုက်ပျိုးကြောင်း၊ ၂၀၂၁ ခုနှစ်၊ အောက်တိုဘာလအတွင်း မိုးရွာသွန်းမှု များခဲ့သည့်အတွက် အထွက်နှုန်းကောင်းမွန်ကြောင်း၊ ယခုနှစ်တွင် သွင်းအားစု ယူရီးယား၊ ကွန်ပေါင်း တို့မှာ ယခင်နှစ်ထက် နှစ်ဆခန့်ပေး၍ ဝယ်ယူခဲ့ရသည့်အတွက် သီးနှံမပေါ်မီတွင် ရင်တမမဖြင့် စိုးရိမ်စိတ်ဖြစ်မိသော်လည်း သီးနှံပေါ်ချိန်တွင် ဈေးမှာ (၃၆၀၀ဝိ/-)မှစ၍ တဖြေးဖြေး မြင့်တက်လာခဲ့သလို အထွက်နှုန်းမှာလည်း တစ်ဧကလျှင် ယခင်နှစ်အထွက်(၉)တင်းထက်ပိုခဲ့ပြီး (၁၂.၅) တင်းခန့်ရရှိသည့်အတွက် တောင်သူများ ပြုံးပျော်ရပါကြောင်း၊ စျေးနှုန်းမှာ ယခင်နှစ်က ပဲစဉ်းငုံ တစ်တင်း(၂၆၀၀၀)နှုန်း ရောင်းခဲ့ရပြီး ယခုနှစ်တွင် ပဲစဉ်းငုံတစ်တင်း (၄၁၅၀ဝ) ကျပ်ဖြင့် ရောင်းခဲ့ကြောင်း၊ ယခင်နှစ်က ပဲစဉ်းငုံသီးနှံတစ်ဧက စိုက်ပျိုးစရိတ် (၁၆၄၂၅၀/-)ခန့် ကုန်ကျပြီး တစ်ဧက အကျိုးအမြတ် (၆၉၇၅၀/-)ကျပ် ခန့်သာရရှိခဲ့သော်လည်း ယခုနှစ်တွင် သွင်းအားစု စျေးနှုန်းကြီးမြင့်ခဲ့သည့်အတွက် တစ်ဧကစိုက်ပျိုးထုတ်လုပ်မှု ကုန်ကျစရိတ်(၂၀၇၀၀၀/-) ခန့် ရှိခဲ့သော်လည်း ပဲစဉ်းငုံအထွက်နှုန်းကောင်းပြီး ရောင်းချရသည့်စျေးနှုန်းမှာ ယခင်နှစ်ထက် နှစ်ဆခန့် ရရှိ၍ ယခုနှစ် ပဲစဉ်းငုံ တစ်ဧက အကျိုးအမြတ်(၃၁၁၇၅ဝိ/-) ရရှိသဖြင့် ချောက်မြို့နယ်၊ ဆားတောင်ကျေးရွာမှ တောင်သူများအတွက် ပဲစဉ်းငုံသီးနှံသည် တွက်ခြေကိုက်၍ တောင်သူများ ပြုံးပျော်ရသည့် သီးနှံဖြစ်ပါကြောင်း သိရှိရပါသည်။

စားသုံးသူရေးရာဦးစီးဌာန

မကွေးတိုင်းဒေသကြီး