ပြည်ပကုန်သွယ်မှုသတင်းများ

          အိန္ဒိယနိုင်ငံ၊ စိုက်ပျိုးရေးဝန်ကြီးဌာနသည် အနောက်ဘင်္ဂလားဒေသထွက် ဘာစမာတီ မဟုတ်သော အရည်အသွေးကောင်းမွန်သည့် ဆန်အမျိုးအစား ၅ မျိုးဖြစ်သည့် Gobindabhog ၊ Tulaipanji ၊ Kataribhog ၊ Kalonunia နှင့် Radhunipagal တို့အတွက် ဘာစမာတီမဟုတ်သော ဆန်မွှေးအဆင့်အတန်းသတ်မှတ်ခြင်းနှင့် အမှတ်အသားပြုခြင်းဆိုင်ရာစည်းမျဉ်းများကို ထုတ်ပြန် ကြေညာခဲ့ပါသည်။

          ထိုင်းနိုင်ငံ၌ နိုင်ငံခြားငွေလဲနှုန်းများ မတည်ငြိမ်မှု၊ ထိုင်းဆန်၏ ယှဉ်ပြိုင်နိုင်စွမ်းကျဆင်းမှု၊ ဈေးနှုန်းအကြိတ်အနယ်ပြိုင်ဆိုင်ရမှု၊ အယ်လ်နီညို ရာသီဥတုဖြစ်စဉ်၏ အကျိုးသက်ရောက်မှုနှင့် အိန္ဒိယနိုင်ငံ၏ ဆန်ပို့ကုန်အပေါ် တားမြစ်ကန့်သတ်သည့် မူဝါဒချမှတ်ထားရှိမှု စသည့် မြောက်မြား စွာသော စွန့်စားရမည့်အချက်များမှာ ယခုနှစ်ဆန်တင်ပို့မှုလုပ်ငန်းလုပ်ကိုင်ရာတွင် ဆက်လက်ကြုံ တွေ့နေရဦးမည်ဖြစ်ကြောင်း ထိုင်းဆန်တင်ပို့သူများအသင်းက ပြောကြားခဲ့ပါသည်။

          တောင်ကိုရီးယားနိုင်ငံ၌ ၂၀၂၄ ခုနှစ်အတွင်း ဆန်ရောင်းလိုအားကို အသင့်လျော်ဆုံး အနေ အထားဖြင့် ဈေးနှုန်းများကို ထိန်းသိမ်းနိုင်ရန်အတွက် ဒေသစပါးများအား ဟက်တာ ၂၆၀၀၀ ခန့် လျှော့ချ စိုက်ပျိုးရန် စီစဉ်လျက်ရှိကြောင်း သိရှိရပါသည်။

          ၂၀၂၄ ခုနှစ်အတွက် စံသတ်မှတ်ထားရှိသင့်သည့် စပါးစိုက်ဧရိယာ ပမာဏသည်  ဟက်တာ ၆၉၉၀၀၀ ခန့်ရှိကြောင်း အစိုးရ၏ ဆန်းစစ်လေ့လာ တွေ့ရှိချက်အရ ယခုကဲ့သို့ စပါးစိုက်ဧရိယာ လျှော့ချရန် ဆုံးဖြတ်ခဲ့ခြင်းဖြစ်ကြောင်း ကိုရီးယား စိုက်ပျိုးရေး၊ စားနပ်ရိက္ခာနှင့် ကျေးလက်ရေးရာ ဝန်ကြီးဌာနက ၇-၂-၂၀၂၄ နေ့တွင် ပြောကြားခဲ့သည်။

          အိန္ဒိယနိုင်ငံ၌ အမျိုးသား လယ်ယာထွက်ကုန် သမဝါယမ ဈေးကွက်အသင်းချုပ် (NAFED) နှင့် အမျိုးသား စားသုံးသူများ သမဝါယမအသင်းချုပ် (NCCF) တို့သည် တောင်သူများထံမှ ပဲစင်းငုံ များကို အခြေခံရည်ညွှန်းဈေးနှုန်း (MSP) ထက် ၄၂% ခန့်ပိုမိုမြင့်မားသော ဈေးကွက်ပေါက်ဈေးဖြင့် ဝယ်ယူခြင်းအား စတင်ဆောင်ရွက်ခဲ့ပြီဖြစ်ကြောင်း Financial Express သတင်းဌာန၏ ဖော်ပြ ချက်အရ သိရှိရပါသည်။

          အင်ဒိုနီးရှားနိုင်ငံ၊ ကုန်သွယ်ရေးဝန်ကြီးဌာနသည် ၂၀၂၄ ခုနှစ် ဖေဖော်ဝါရီလ ၁ ရက်မှ ၂၉ ရက်နေ့အထိ ကာလအပိုင်းအခြားအတွက် စားအုန်းဆီ ရည်ညွှန်းဈေးနှုန်းကို မက်ထရစ် ၁ တန် လျှင် ၇၇၄.၉၃ အမေရိကန်ဒေါ်လာနှုန်းမှ ၈၀၆.၄၀ ဒေါ်လာနှုန်းသို့ မြှင့်တင်သတ်မှတ်လိုက် ကြောင်း ၃၁-၁-၂၀၂၄ နေ့တွင် ကြေညာချက်ထုတ်ပြန်ခဲ့ပါသည်။