ပြည်ပကုန်သွယ်မှုသတင်းများ

            ၂၀၂၅ ခုနှစ်၊ ဖော်ဖော်ဝါရီလ ၂၇ ရက်မှ မတ်လ ၂ ရက်နေ့အထိ လေးရက်ကြာ ကျင်းပရန်စီစဉ်ထားသည့် “၁၈ ကြိမ်မြောက်၊ ကမ္ဘောဒီးယား ထုတ်ကုန်များ၊ သစ်သီးများ နှင့် ဟင်းသီး ဟင်းရွက်များပြပွဲ ၂၀၂၅” ကို Siem Reap ပြည်နယ်တွင် လက်ခံကျင်းပသွားမည်ဖြစ်ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန(MOC) မှာထုတ်ပြန်ခဲ့သည်။ ပြပွဲသည် ဒေသတွင်းထုတ်လုပ်မှုများ မြှင့်တင်ရန်၊ ကမ္ဘောဒီးယားထုတ်ကုန်များကိုပံ့ပိုးကူညီရန်၊ ပုဂ္ဂလိကကဏ္ဍကို ဖွံ့ဖြိုးတိုးတက်စေရန်နှင့် စိုက်ပျိုးရေးကဏ္ဍ၊ အိမ်ခြံမြေပိုင်ရှင်များ၊ သစ်သီးဝလံ စိုက်ပျိုးသူများ၊ ဖြန့်ဖြူးရောင်းချသူများနှင့် ကုန်သည်များအကြား တူညီသည့်ကုန်သွယ်မှု ပလပ်ဖောင်းတစ်ခုဖန်တီးရန် ရည်ရွယ်သည်။ စီးပွားရေးနှင့်ကူးသန်းရောင်းဝယ်ရေး ဝန်ကြီး ဌာန(MOC) မှ စီးပွားရေးလုပ်ငန်းရှင်များ၊ ထုတ်လုပ်သူများ၊ တင်သွင်းသူများ၊ ပရိုဆက်ဆာများ၊ စိုက်ပျိုးရေးကဏ္ဍမှ တာဝန်ရှိသူများ၊ ခြံပိုင်ရှင်များ၊ သစ်သီးဝလံနှင့် ဟင်းသီးဟင်းရွက် စိုက်ပျိုး သူများအား ၎င်းတို့၏ထုတ်ကုန်များကို ခင်းကျင်းပြသကာ ပြပွဲတွင်ရောင်းဝယ်ဖောက်ကားခြင်း စာချုပ်များချုပ်ဆိုနိုင်ရန် စီးပွားရေးလုပ်ငန်းရှင်များအား ဖိတ်ကြားခဲ့သည်။ ၂၀၂၄ ခုနှစ်၊ ဖေဖော်ဝါရီလ ၂၂ ရက်မှ ၂၅ ရက်နေ့အထိ ၄ ရက်တာကျင်းပပြုလုပ်ခဲ့သော “၁၇ ကြိမ်မြောက် ကမ္ဘောဒီးယား၊ သစ်သီးဝလံနှင့် ဟင်းသီးဟင်းရွက်ပြပွဲ ၂၀၂၄” တွင် နိုင်ငံတကာ ခရီးသွားများ နှင့်အတူ Siem Reap ပြည်နယ်မှ ဒေသခံအများအပြားသည် ပြပွဲသို့လာရောက်ခဲ့ ကြပြီး လက်ဆက်သောသစ်သီးဝလံများ၊ ဟင်းသီးဟင်းရွက်များ၊ သီဟိုဠ်စေ့နှင့် ငရုတ်ကောင်းကဲ့သို့သော ကမ္ဘောဒီးယားလယ်ယာထွက်ကုန်များနှင့် လက်မှုပစ္စည်းများဝယ်ယူမှု သိသိသာသာမြင့်တက်ခဲ့သည်ဟု စီးပွားရေးနှင့်ကူးသန်းရောင်းဝယ်ရေးဝန်ကြီးဌာန (MOC) မှ ထုတ်ပြန်ခဲ့ကြောင်းသိရှိရပါသည်။

Source : Khmer Times

DOCA(ရန်ကုန်)

            ဗီယက်နမ်နိုင်ငံ Binh Duong ပြည်နယ်၏ ပြည်သူ့ကော်မတီသည် စုစုပေါင်းမတည်‌ငွေ အမေရိကန်ဒေါ်လာ ၁ ဘီလီယံတန်ဖိုးရှိသော ပြည်ပရင်းနှီးမြှုပ်နှံမှု စီမံကိန်း ၇ ခုအတွက် ရင်းနှီး မြှုပ်နှံမှုအသိအမှတ်ပြုလက်မှတ်နှင့် မူအားဖြင့်ခွင့်ပြုချက်ပေးခဲ့ကြောင်း သိရပါသည်။ ၎င်းတို့ထဲ တွင် Vietnam-Singapore Industrial Park Joint Venture Co.,Ltd (VSIP) သည် စက်မှုဇုန် အခြေခံအဆောက်အအုံစီမံကိန်း ၂ ခုအတွက် ရင်းနှီးမြှုပ်နှံမှုလိုင်စင် ရရှိခဲ့ကြောင်း သိရပါသည်။ ၎င်းတို့တွင် VSIP Binh Duong Residental Development Co.,Ltd ၏ ဗီယက်နမ်-စင်ကာပူ စက်မှုဇုန် ၃ ( VSIP 3) တွင် အမေရိကန်ဒေါ်လာ ၃၄၁.၂ သန်း ရင်းနှီးမြှုပ်နှံမည့်စီမံကိန်းနှင့် အမေရိကန်ဒေါ်လာ ၄၇၁ သန်းရင်းနှီးမြှုပ်နှံမည့် မြို့ပြဧရိယာသစ်စီမံကိန်း တို့ပါဝင်ကြောင်း သိရပါသည်။ ထိုစီမံကိန်းနှစ်ခု၏ စုစုပေါင်းရင်းနှီးမြှုပ်နှံမှုတန်ဖိုးမှာ အမေရိကန်ဒေါ်လာ ၈၁၂.၂ သန်း ရှိကြောင်း သိရပါသည်။ ထို့ပြင် VSIP 3 တွင် တည်ရှိသည့် Timotion Vietnam Limited Liability Company နှင့် Axman Vietnam Co.,Ltd ၏ စုစုပေါင်း အမေရိကန်ဒေါ်လာ ၅၃ သန်း တန်ဖိုးရှိသည့် ရင်းနှီးမြှုပ်နှံမှုစီမံကိန်း ၂ ခုကိုခွင့်ပြုခဲ့ကြောင်း သိရပါသည်။ ပြည်နယ်သည် တည်ရှိပြီး စီမံကိန်း ၃ ခု၏ စုစုပေါင်းအမေရိကန်ဒေါ်လာ ၁၀၅ သန်းတန်ဖိုးရှိသော မတည် ရင်းနှီးမြှုပ်နှံမှု ထပ်မံတိုးချဲ့မှုကိုလည်း ခွင့်ပြုချက်ချ‌‌ပေးခဲ့ကြောင်း သိရပါသည်။ ၎င်းတို့တွင် Cheng Loong Binh Duong Paper Co.,Ltd ၏ အမေရိကန်ဒေါ်လာ သန်း ၅၀ တန်ဖိုးရှိသော ထပ်တိုးရင်းနှီးမြှုပ်နှံမှု၊ Deneast Vietnam Co.,Ltd ၏ အမေရိကန်ဒေါ်လာ ၄၀.၂ သန်း ထပ်တိုး ရင်းနှီးမြှုပ်နှံမှုနှင့်  Dongil Rubber Belt Vietnam Co.,Ltd ၏ အမေရိကန်ဒေါ်လာ ၁၅ သန်း ထပ်တိုးရင်းနှီးမြှုပ်နှံမှုတို့ ပါဝင်ကြောင်း သိရပါသည်။ Binh Duong ပြည်သူ့ကော်မတီ၏ ဥက္ကဌ ဖြစ်သူ Vo Van Minh က ရင်းနှီးမြှုပ်နှံသူများနှင့် စီးပွားရေးလုပ်ငန်းများအား ပံ့ပိုးပေးမည့် ပြည်နယ်၏အာမခံချက်နှင့် အားကောင်းပြီးစဉ်ဆက်မပြတ်တည်ငြိမ်စွာကြီးထွားရန်အတွက် အခွင့်အလမ်းများကိုရှာဖွေသွားရန် ထပ်မံကတိကဝတ်ပြုခဲ့ကြောင်း သိရပါသည်။ တစ်ချိန်တည်း မှာပင် ဒေသအာဏာပိုင်များသည် အမေရိကန်ဒေါ်လာ ၃၃၂ သန်းတန်ဖိုးရှိသော အိမ်ရာစီမံကိန်း ၇ ခုအတွက် ရင်းနှီးမြှုပ်နှံမှု မူဝါဒများကို ခွင့်ပြုပေးခဲ့ကြောင်း သိရှိရပါသည်။

Vietnam Plus

DOCA(ရန်ကုန်)

             တိုယိုတာဗီယက်နမ်သည် ဇန်နဝါရီလက ဗီယက်နမ်၌ ကားအစီးရေ ၃၃၄၆ စီးရောင်းချခဲ့ ရပြီး ၂၀၂၄ ခုနှစ် ဇန်နဝါရီလကထက် ၄၆ ရာခိုင်နှုန်း မြင့်တက်ခဲ့ကြောင်း သိရပါသည်။ ထိုစုစုပေါင်း ရောင်းချရမှုထဲတွင် အစီးရေ ၉၂၉ စီးမှာ ပြည်တွင်း၌ ထုတ်လုပ်တပ်ဆင်သည့်ကားများဖြစ်ပြီး အစီးရေ ၂၄၁၇ စီးမှာ အပြည့်အဝတင်သွင်းလာသည့် ကားများဖြစ်ကြောင်း သိရပါသည်။ Toyota Hybrid ကားများရောင်းချရမှုမှာ အစီးရေ ၅၆၅ စီးရှိပြီး လွန်ခဲ့သည့်နှစ်တူညီသည့်ကာလနှင့် နှိုင်းယှဉ်ပါက ၅၀၄ ရာခိုင်နှုန်းအထိ အထင်ကြီးဖွယ်မြင့်တက်ခဲ့ကြောင်း သိရပါသည်။ ထိုအချက် သည် စားသုံးသူများက လောင်စာသက်သာပြီး သဘာဝပတ်ဝန်းကျင်နှင့်သင့်လျော်သော မော်တော်ကားအမျိုးစားများကို စိတ်ဝင်စားမှုမြင့်တက်လာမှုကို ပြသနေကြောင်း သိရပါသည်။ ဇန်နဝါရီလတွင် Toyota Lexus သည် အစီးရေ ၇၀ စီး ရောင်းချခဲ့ရပြီး ထိုအမှတ်တံဆိပ်ကို ဗီယက်နမ်၌ မိတ်ဆက်သည့်အချိန်မှစ၍ စုစုပေါင်း အစီးရေ ၁၃၈၈၂ စီး ရောင်းချခဲ့ပြီးဖြစ်ကြောင်း သိရပါသည်။ တိုယိုတာမော်တော်ကားများကြားတွင် Yaris Cross သည် အစီးရေ ၆၄၅ စီးဖြင့် ဇန်နဝါရီလက ဗီယက်နမ်၌ရောင်းချရမှုတွင် ထိပ်ဆုံးတွင်ဦးဆောင်ခဲ့ပြီး ၎င်းတို့နောက်တွင် Vios (အစီးရေ ၄၉၀)နှင့် Innova Cross (အစီးရေ ၄၈၀) ဖြင့် အသီးသီးရပ်တည်နေကြောင်း သိရပါသည်။ Corolla Cross ၊ Veloz နှင့် အပြည့်အဝတပ်ဆင်တင်သွင်းလာသည့်ကားများ ရောင်းချရမှုမှာလည်း သိသာစွာအားကောင်းခဲ့ကြောင်း သိရှိရပါသည်။

Vietnam Plus

DOCA(ရန်ကုန်)

           ဗီယက်နမ်နိုင်ငံ Thai Binh ပြည်နယ်တွင် တရုတ်နိုင်ငံမှ ကားကုမ္ပဏီများသည် ဗီယက်နမ် ကုမ္မဏီများနှင့်ပူးပေါင်း၍  မော်တော်ကားထုတ်လုပ်တပ်ဆင်သည့်စက်ရုံများကို ၂၀၂၅ ခုနှစ်၏ ပထမနှစ်ဝက်တွင် စတင်ဆောက်လုပ်မည်ဟု သိရပါသည်။ တရုတ်နိုင်ငံမှ ထိပ်တန်းကားကုမ္ပဏီ ဖြစ်သည့် Geely Auto Group သည် ဗီယက်နမ်၏ Tasco Joint Stock ကုမ္ပဏီနှင့် ပူးပေါင်း၍ မော်တော်ကားတပ်ဆင်ထုတ်လုပ်သည့်စက်ရုံကို Tien Hai စီးပွားရေးဇုန် တွင် ဇွန်လ ၂၀၂၅ ၌ စတင်ဆောက်လုပ်မည်ဟု သိရပါသည်။ ၂၀၂၆ ခုနှစ်အစောပိုင်းတွင် ပထမဆုံးမော်တော်ယာဉ်များ ထုတ်လုပ်နိုင်ရန် မျှော်လင့်ရကြောင်း သိရပါသည်။ ထိုစက်ရုံသည် ဟတ်တာ ၃၀ အကျယ်အဝန်း ရှိပြီး တစ်နှစ်လျှင် အစီးရေ ၇၅၀၀၀ ထုတ်လုပ်နိုင်စွမ်းရှိကြောင်း သိရပါသည်။ ထိုစီမံကိန်းသည် စုစုပေါင်းရင်းနှီးမြှုပ်နှံမှုတန်ဖိုး အမေရိကန်ဒေါ်လာ ၁၆၈ သန်းရှိပြီး Tasco ကအစုရှယ်ယာ ၆၄ ရာခိုင်နှုန်းနှင့် Geely က အစုရှယ်ယာ ၃၆ ရာခိုင်နှုန်း ပါဝင်ကြောင်း သိရပါသည်။ ထိုပူးပေါင်း ဆောင်ရွက်မှုတစ်စိတ်တစ်ပိုင်းအနေဖြင့် Tasco Auto သည် ဗီယက်နမ်တွင် Geely မော်တော်ကားများကို တရားဝင်ဖြန့်ချိသူဖြစ်လာမည်ဟု သိရပါသည်။ ဈေးကွက်တွင်ပထမဆုံးဖြန့်ချိမည့် အမျိုး အစားသည် ဖိလစ်ပိုင်နှင့်ရုရှားတို့တွင် လူကြိုက်များလျှက်ရှိသည့် Geely Coolray ဖြစ်ကြောင်း သိရပါသည်။ ထုတ်လုပ်မှုနှင့် ဖြန့်ချိမှု အပြင် Geely နှင့် Tasco သည် ပြည်တွင်းထောက်ပံ့မှု ကွင်းဆက်၊ R&D စင်တာများနှင့် ဗီယက်နမ်၏ မော်တော်ယာဉ်လုပ်ငန်း ရေရှည်ဖွံ့ဖြိုးတိုးတက်ရေးအတွက် လုပ်သားထု လေ့ကျင့်ရေးပရိုဂရမ်များတွင် ရင်းနှီးမြှုပ်နှံရန် စီစဉ်ထားကြောင်း သိရပါသည်။ တစ်ချိန်တည်းမှာပင် တရုတ်ကား ထုတ်လုပ်သူ Chery ၏လုပ်ငန်းခွဲဖြစ်သည့် Omoda ရ Jaecoo သည် ဗီယက်နမ်၏ Geleximco နှင့်ပူးပေါင်း၍ Thai Binh ပြည်နယ်၏ Hung Phu စက်မှုဇုန်တွင် မော်တော်ကား ထုတ်လုပ်သည့် စက်ရုံတည်ထောင်မည်ဟု သိရပါသည်။ အမေရိကန်ဒေါ်လာ သန်း ၈၀၀ တန်ဖိုးရှိသည့် ထိုစက်ရုံ ဆောက်လုပ်မှုကို ယခုနှစ်၏ ဒုတိယသုံးလပတ်ကာလတွင် စတင်စီစဉ်ထားကြောင်း သိရပါ သည်။ အပြည့်အဝလည်ပတ် နိုင်ပါက ထိုစက်ရုံသည် တစ်နှစ်လျှင် မော်တော်ကား အစီးရေ ၂၀၀၀၀၀ ထုတ်လုပ်နိုင်စွမ်း ရှိကြောင်း သိရပါသည်။ ထိုစက်ရုံဆောက်လုပ်ခြင်းမတိုင်မီ Omoda & Jaecoo သည် အင်ဒိုနီးရှား နိုင်ငံမှတင်သွင်းသည့် OMODA C5 ကားအမျိုးအစားကို ဗီယက်နမ် ၌ဖြန့်ချိပြီး ၎င်းတို့၏ အမှတ် တံဆိပ်ကို စတင်မိတ်ဆက်ခဲ့ကြောင်း သိရပါသည်။ ဇန်နဝါရီလ ၂၀၂၅ တွင်လည်း Jaecoo J7 PHEV အမျိုးအစားကို ဗီယက်နမ်နိုင်ငံ၌ ထပ်မံမိတ်ဆက်ခဲ့ကြောင်း သိရပါသည်။ ထိုရင်းနှီးမြှုပ်နှံမှုများသည် ဗီယက်နမ်၏ မော်တော်ကားလုပ်ငန်းကို အားကောင်းစေရန်နှင့် အလုပ်အကိုင်သစ် ထောင်ပေါင်းများစွာကို ဖန်တီးပေးနိုင်ရန် မျှော်လင့်ရကြောင်း သိရှိရပါသည်။

Vietnam Plus

DOCA(ရန်ကုန်)

               ဥရောပသမဂ္ဂမဟုတ်သော နိုင်ငံများသို့ Slovenia ၏ ကုန်ပစ္စည်းတင်ပို့မှုသည် ၂၀၂၄ ခုနှစ် တွင် ၂၅ ရာခိုင်နှုန်း ခုန်တက်ခဲ့ပြီး ထိုနိုင်ငံများမှ တင်သွင်းမှု ၄၇ ရာခိုင်နှုန်း မြင့်တက်ခဲ့ကြောင်း နိုင်ငံ၏ စာရင်းအင်းရုံးက ၄.၂.၂၀၂၅ ရက်နေ့တွင် ပြောကြားခဲ့သည်။ Slovenia သည် ၂၀၀၄ ခုနှစ်တွင် အီးယူသို့ ဝင်ရောက်ခဲ့ပြီး ဆယ်စုနှစ်များစွာကြာ EU အဖွဲ့ဝင်နိုင်ငံများသည် ၎င်း၏အဓိကကုန်သွယ် ဖက်များဖြစ်လာခဲ့သည်။ သို့သော်လည်း ၂၀၂၄ ခုနှစ်တွင် EU မဟုတ်သောနိုင်ငံများမှ သွင်းကုန်များသည် အီးယူနိုင်ငံများမှ တင်သွင်းမှုကို ကျော်လွန်သွားခဲ့ပြီး EU အဖွဲ့ဝင်မဟုတ်သော နိုင်ငံများသို့ တင်ပို့မှုသည် EU နိုင်ငံများသို့ တင်ပို့မှုထက် ၂ ရာခိုင်နှုန်းအောက် လျော့နည်းခဲ့သည်။ အဓိကအားဖြင့် သွင်းကုန်ပမာဏ မြင့်မားမှုကြောင့် တရုတ်နိုင်ငံသည် Slovenia ၏ အဓိကကုန်သွယ်ဖက်များထဲမှ တစ်နိုင်ငံဖြစ်သည်။ တရုတ်နိုင်ငံသို့ Slovenia ၏ ပို့ကုန်သည် ၂၀၂၄ ခုနှစ်တွင် ၆.၃ ရာခိုင်နှုန်း တိုးတက်ခဲ့ပြီး တရုတ်နိုင်ငံမှ တင်သွင်းမှု ၅.၄ ရာခိုင်နှုန်း ကျဆင်းခဲ့သည်။ ဆွစ်ဇာလန်မှ တန်ဖိုးအားဖြင့် အများဆုံး တင်သွင်းခဲ့ပြီး ဂျာမနီ၊ တရုတ်၊ အိန္ဒိယနှင့် အီတလီနိုင်ငံ များမှလည်း တင်သွင်းခဲ့ကြောင်း အဆိုပါရုံး၏ ထုတ်ပြန်ချက်တွင် ဖော်ပြထားသည်။ ထိုအချိန်တွင် Slovenia ၏ အဓိကပို့ကုန်ဈေးကွက်များမှာ ဆွစ်ဇာလန်၊ ဂျာမနီ၊ ခရိုအေးရှား၊ အီတလီနှင့် သြစတြီးယားတို့ ဖြစ်သည်။ ဓာတုဗေဒပစ္စည်းများသည် နိုင်ငံ၏ စုစုပေါင်းပို့ကုန်၏ ၄၅.၆ ရာခိုင်နှုန်းနှင့်သွင်းကုန် စုစုပေါင်း၏ ၄၉.၅ ရာခိုင်နှုန်းရှိကြောင်း အဆိုပါရုံးက ထည့်သွင်းပြောကြားခဲ့သည်။ ဆလိုဗေးနီးယား ၏အဓိကပို့ကုန်များတွင် ဆေးဝါးထုတ်ကုန်များ၊ အိမ်သုံးပစ္စည်းများ၊ မော်တော်ကားများ၊ မော်တော်ကားအစိတ်အပိုင်းများနှင့် သတ္တုထုတ်ကုန်များ ပါဝင်သည်။ ယမန်နှစ်က နိုင်ငံ၏စုစုပေါင်း ပို့ကုန်သည် ၁၂ ရာခိုင်နှုန်းနီးပါး မြင့်တက်ခဲ့ပြီး သွင်းကုန် ၂၁ ရာခိုင်နှုန်း တိုးလာ‌ကြောင်းသိရှိရပါသည်။

Source : Xinhua

DOCA(ရန်ကုန်)