ပြည်ပကုန်သွယ်မှုသတင်းများ

    ၂၀၂၅ ခုနှစ်တွင် ဗီယက်နမ်၏အုန်သီးတင်ပို့မှုမှာ ဝင်ငွေအမေရိကန်ဒေါ်လာ ၁.၁၅ ဘီလီယံ ရရှိရန်ခန့်မှန်းရပြီး ကမ္ဘာ့ထိပ်တန်းအုန်းသီးတင်ပို့သူ ၅ နိုင်ငံတွင် ရပ်တည်နိုင်ကြောင်း သိရပါသည်။ ရှေ့ဆက်၍လည်းကျယ်ပြန့်သည့်ဈေးကွက်အလားအလာနှင့်အတူ အုန်းသီးလုပ်ငန်း သည် စဉ်ဆက်မပြတ် တန်ဖိုးကွင်းဆက်များတည်ထောင်ခြင်း၊ ထုတ်လုပ်မှုခေတ်မီခြင်းနှင့် ကုန်ကြမ်း ပစ္စည်းဧရိယာများစံနှုန်းမြှင့်တင်ခြင်းတို့အပေါ် အဓိကထားမည်ဖြစ်ကြောင်း သိရပါ သည်။ ဗီယက်နမ်အုန်းသီးလုပ်ငန်းအသင်း၏ အထွေထွေအတွင်းရေးမှူး Cao Ba Dang Khoa ၏ အဆိုအရ ၂၀၂၅ ခုနှစ်၏ ပထမနှစ်ဝက်တွင် ကဏ္ဍ၏ အဓိကထုတ်ကုန်အုပ်စု ၄ ခုတင်ပို့မှုမှ ဝင်ငွေ အမေရိကန်ဒေါ်လာ သန်း ၅၂၀ ကျော်ရရှိခဲ့ပြီး ၂၀၂၄ ခုနှစ် တူညီသည့်ကာလနှင့်နှိုင်းယှဉ်ပါက ၂၀ ရာခိုင်နှုန်းမြင့်တက်ခဲ့ကြောင်း သိရပါသည်။ ထိုအဓိကထုတ်ကုန်အုပ်စုများတွင် လတ်ဆတ်သော အုန်းသီးများ၊ အေးခဲထားသောအုန်းနို့၊ အုန်းဆီစိမ်း၊ အစားအစာ၊ လက်မှုပစ္စည်းနှင့် အုန်းသီးမှ ထုတ်လုပ်သည့်အလှကုန်များပါဝင်ကြောင်း သိရပါသည်။ တင်ပို့မှုများသည် ဒုတိယနှစ်ဝက်တွင် အားအကောင်းဆုံးဖြစ်တတ်သောကြောင့် ထိုစွမ်းဆောင်ရည်သည် ဆက်လက်အပေါင်းလက္ခဏာ ဆောင်နိုင်ကြောင်း သိရပါသည်။ ဈေးကွက်၏အလားအလာကို အပြည့်အဝရယူရန် ဗီယက်နမ် အုန်းသီးလုပ်ငန်းနယ်ပယ်သည် စဉ်ဆက်မပြတ်ဖွံ့ဖြိုးတိုးတက်ရန်၊ ဂေဟစနစ်နှင့်သင့်လျှော်သော စိုက်ပျိုးမှုပုံစံ၊ ရာသီဥတုဒဏ်ခံနိုင်မှုနှင့် ကာဗွန်ထုတ်လွှင့်မှုလျှော့ချရန် လိုအပ်ကြောင်း သိရပါသည်။ Khoa က အရေးပေါ်လိုအပ်ချက်သည် အပင်အတွက် အဆိပ်အတောက်ဖြစ်စေသည့် ဓာတုပစ္စည်းများကို တားမြစ်ခြင်းပါဝင်သည့် အားကောင်းသောဥပဒေမူဘောင်တည်ထောင်ရန် ဖြစ်ကြောင်း အသားပေးပြောကြားခဲ့ပါသည်။ စီးပွားရေးဘက်တွင် ပွင့်လင်းမြင်သာမှုနှင့် အစား အစာလုံခြုံစိတ်ချရမှုကို အရှိန်မြှင့်တင်ရန် ထုတ်လုပ်မှုစီမံခန့်ခွဲခြင်းတွင် AI နည်းပညာအသုံးပြု ခြင်းနှင့် စက်နှင့်အလိုအလျှောက်ပြုပြင်ထုတ်လုပ်ခြင်းတို့ လိုအပ်ကြောင်း သိရပါသည်။ အဓိက အချက်အနေဖြင့် ထုတ်လုပ်မှုပွင့်လင်းမြင်သာခြင်းနှင့် အုန်းပင်စိုက်ပျိုးသည့်ဒေသများတွင် ဒစ်ဂျစ် တယ်မြေပုံများဖန်တီးခြင်းတို့ လိုအပ်ကြောင်း Khoa က ဖြည့်စွက်ပြောကြားခဲ့ပါသည်။

    DOCA (ရန်ကုန်)

        အင်ဒိုနီးရှားနိုင်ငံစီးပွားရေးရာညှိနှိုင်းဆွေးနွေးရေးဝန်ကြီး Airlangga Hartarto က အစိုးရ ၏ ဦးစားပေးပရိုဂရမ် ၅ ခုသည် နိုင်ငံတစ်ဝှမ်းအလုပ်အကိုင် ၃ သန်းကျော်ဖန်တီးနိုင်ရန် မျှော်မှန်း ရကြောင်း ပြောကြားခဲ့ပါသည်။ ထိုပရိုဂရမ် ၅ ခုသည် ကျေးရွာသမဝါယမအသင်းများ၊ ငါးဖမ်း ကျေးရွာများ၊ ငါးကန်များပြန်လည်အသက်ဝင်ရေး၊ အသေးစားစိုက်ပျိုးရေးနှင့်ငါးဖမ်းရေယာဉ်များ ခေတ်မီရေးတို့ဖြစ်ကြောင်း သိရပါသည်။ စက်တင်ဘာလ ၁၅ ရက်နေ့ကကျင်းပပြုလုပ်ခဲ့သည့် သတင်းစာရှင်းလင်းပွဲတွင် Hartarto က ထိုပရိုဂရမ်များကို သမ္မတ Prabowo Subianto နှင့် ကန့်သတ်အစည်းအဝေးအတွင်း ဆွေးနွေးခဲ့ကြခြင်းဖြစ်ကြောင်း‌‌ပြောကြားခဲ့ပါသည်။ ၂၀၂၅ ခုနှစ် ဒီဇင်ဘာလကုန်တွင် ကျေးရွာသမဝါယမအသင်းများ ပရိုဂရမ်တစ်ခုတည်းတွင် အလုပ်အကိုင် ၆၈၁၀၀၀ နှင့် ၁ သန်းကြားနှင့် ငါးဖမ်းကျေးရွာ ၁၀၀၀ တည်ထောင်ခြင်းက အလုပ်အကိုင် ၉၀၀၀ ပတ်လည်ဖန်တီးနိုင်ရန် မျှော်မှန်းရကြောင်း သိရပါသည်။ ရေရှည်တွင် အလုပ်အကိုင် ၂၀၀၀၀၀ ဖန်တီးပေးနိုင်သည့် ငါးဖမ်းကျေးရွာ ၄၀၀၀ ရှိလာမည်ဟု သိရပါသည်။ ဂျာဗားကျွန်း မြောက်ဘက် ကမ်းရိုးတန်းတွင် ငါးမွေးမြူရေးကန်များပြန်လည်အသက်ဝင်စေရန် ဆောင်ရွက်ခြင်း က အလုပ် အကိုင် ၁၆၈၀၀၀ နှင့် ငါးဖမ်းရေယာဉ်ခေတ်မီစေရေး ပရိုဂရမ်က အလုပ်အကိုင် ၂၀၀၀၀၀ ဖန်တီး နိုင်ရန်မျှော်မှန်းရကြောင်း သိရပါသည်။ ခေတ်မီစေရေးပရိုဂရမ်တွင် တန် ၃၀ တင်ဆောင်နိုင်သော ရေယာဉ် အစီး ၁၀၀၀၊ တန် ၁၅၀ တင်ဆောင်နိုင်သောရေယာဉ် အစီး ၂၀၀၊ တန် ၂၀၀ တင်ဆောင် နိုင်သောရေယာဉ် အစီး ၂၀၀၊ တန် ၃၀၀ တင်ဆောင်နိုင်သောရေယာဉ် အစီး ၁၇၀၊ တန် ၆၀၀ တင်ဆောင်နိုင်သောရေယာဉ် အစီး ၁၀ နှင့် တန် ၂၀၀၀ တင်ဆောင်နိုင် သော ရေယာဉ် ၂ စီးတို့ ပါဝင်ကြောင်း သိရပါသည်။ Hartarto က အစိုးရသည် အသေးစား စိုက်ပျိုးမြေ ၈၇၀၀၀၀ ဟတ်တာကို သကြား၊ ကိုကိုး၊ အုန်းသီး၊ ကော်ဖီ၊ သီဟိုဠ်စေ့နှင့် ကွမ်းသီး အစရှိသည့် အဓိကကုန် ပစ္စည်းများပြန်လည်စိုက်ပျိုးသွားမည်ဖြစ်ပြီး ထိုပရိုဂရမ်သည် အလုပ်အကိုင် ၁.၆ သန်း ကျော် ဖန်တီးနိုင်ရန်မျှော်မှန်းရကြောင်း ပြောကြားခဲ့ပါသည်။

 DOCA (ရန်ကုန်)

             အင်ဒိုနီးရှားနိုင်ငံစီးပွားရေးရာညှိနှိုင်းဆွေးနွေးရေးဝန်ကြီး Airlangga Hartarto က စီးပွားရေးမူဝါဒအသစ်များမှတစ်ဆင့် အင်ဒိုနီးရှား၏ စီးပွားရေးကြီးထွားမှုသည် ၂၀၂၅ ခုနှစ်တွင် ၅.၂ ရာခိုင်နှုန်းရောက်ရှိရန် မျှော်မှန်းရကြောင်း ပြောကြားခဲ့ပါသည်။ စီးပွားရေးမူဝါဒအသစ်များကို ၈+၄+၅ ဟုအမည်ပေးထားပြီး ၂၀၂၅ ခုနှစ်အတွက် စီးပွားရေးပရိုဂရမ် ၈ ခု၊ ၂၀၂၆ ခုနှစ်အတွက် ၄ ခုနှစ် အလုပ်အကိုင်ဖန်တီးမှုကနဦးဆောင်ရွက်ချက် ၅ ခုတို့ဖြစ်ကြောင်း သိရပါသည်။ ဝန်ကြီးက ထိုအကောင်းမြင်သုံးသပ်ချက်သည် အစိုးရက မူဝါဒသစ်များမှတစ်ဆင့် ၎င်းတို့၏သုံးစွဲမှုကိုအရှိန် မြှင့်တင်ရန်နှင့် ပြည်သူလူထု၏ဝယ်ယူနိုင်စွမ်းကို တိုးမြှင့်ရန် အားထုတ်မှုအပေါ် အခြေခံကြောင်း နှင့် အလယ်အလတ်တန်းလွှာလူတန်းစားကိုလည်း အစိုးရ၏ VAT မှတစ်ဆင့် ပိုမိုပြောင်းလွယ် ပြင်လွယ်ဖြစ်ရန် ဖန်တီးပေးမည်ဟု သိရပါသည်။ ဘဏ္ဍာရေးဝန်ကြီး Purbaya Yudhi Sadewa ကလည်း ၎င်းသည် အစိုးရ၏စီးပွားရေးမူဝါဒသစ် ၈+၄+၅ ကို မိတ်ဆက်ပေးခဲ့ကြောင်း ပြောကြား ခဲ့ပါသည်။ ၂၀၂၅ ခုနှစ်အတွက် အစီအစဉ် ၈ ခုတွင် တက္ကသိုလ်ဘွဲ့ရကျောင်းသားများအတွက် အလုပ်သင်အလုပ်အကိုင်ချိတ်ဆက်ရေးအစီအစဉ်၊ ခရီးသွားလုပ်ငန်းကဏ္ဍကျောင်းသားများ အတွက် အခွန်အကျသက်သာခွင့်နှင့် အောက်တိုဘာလမှ နိုဝင်ဘာလအထိ မိသားစုတစ်စုလျှင် ဆန် ၁၀ ကီလိုဂရမ်ဖြန့်ဝေမှုတို့ပါဝင်ကြောင်း သိရပါသည်။ ထို့ပြင် ယာဥ်မောင်းများနှင့် ပို့ဆောင် ရေးဝန်ထမ်းများအတွက် လုပ်ငန်းဆောင်ရွက်စဉ်ဖြစ်ပေါ်သော မတော်တဆမှုနှင့် သေဆုံးမှု အာမခံကြေးများကို ၅၀ ရာခိုင်နှုန်းလျှော့ဈေးဖြင့်ပေးသွင်းနိုင်ရေး၊ BPJS Ketenagakejaan လူမှု ဖူလုံရေးပရိုဂရမ်အောက်မှ အိမ်ရာအထောက်အပံ့အစီအစဉ်များနှင့် အလုပ်အကိုင်ဖန်တီးမှုအခြေ ပြုလုပ်ငန်းများအတွက် လစာအထောက်အပံ့ပေးခြင်းတို့ ပါဝင်ကြောင်း သိရပါသည်။ ပရိုဂရမ် တွင် စည်းမျဉ်းသတ်မှတ်ချက်များလျှော့ချ၍ မြန်ဆန်စွာပြုပြင်ပြောင်းလဲခြင်းအစီအစဉ်၊ အိမ်ရာ အရည်အသွေးတိုးတက်ရေးအစီအစဉ်နှင့် အချိန်ပိုင်းဝန်ထမ်းများအတွက် ဈေးကွက်နှင့် စီးပွားရေး ပလက်ဖောင်းများဖန်တီးပေးခြင်းတို့ပါဝင်ကြောင်း သိရပါသည်။ တစ်ချိန်တည်းမှာပင် အလုပ် အကိုင် ၃ သန်းကျော် ဖန်တီးပေးမည့် အစီအစဉ်တွင် Red and White ကျေးရွာသမဝါယမအသင်း များ၊ အသေးစားစိုက်ပျိုးရေးလုပ်ငန်းများ၊ Red and White ငါးဖမ်းကျေးရွာများ၊ ဂျာဗားကျွန်း‌ မြောက်ဘက်ကမ်းရိုးတန်းများတွင် ငါးမွေးမြူရေးကန်များ ပြန်လည်အသက်သွင်းခြင်းနှင့် ငါးဖမ်း ယာဉ်များခေတ်မီအောင်ဆောင်ရွက်ခြင်းတို့ ပါဝင်ကြောင်း သိရပါသည်။

DOCA (ရန်ကုန်)

       ကမ္ဘောဒီးယားနိုင်ငံသည် ၂၀၂၅ ခုနှစ် ဇန်နဝါရီလမှ သြဂုတ်လအတွင်း ဒေသတွင်း ဘက်စုံ စီးပွားရေး ပူးပေါင်းဆောင်ရွက်မှု (RCEP) နိုင်ငံများသို့ ကုန်စည် ကန်ဒေါ်လာ ၆,၆၂၈ သန်းဖိုး တင်ပို့ခဲ့ပြီး ယမန်နှစ် အလားတူကာလက ကန်ဒေါ်လာ သန်း ၆,၀၅၀ ထက် ၁၀ ရာခိုင်နှုန်းနီးပါး တိုးလာခဲ့ကြောင်း စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန(MoC) ၏ အစီရင်ခံစာတွင် ဖော်ပြထားသည်။ RCEP နိုင်ငံများသို့ ကမ္ဘောဒီးယားနိုင်ငံ၏ ပို့ကုန်သည် စုစုပေါင်း ပို့ကုန်၏ ၃၁.၈ ရာခိုင်နှုန်းဖြစ်ပြီး ယင်းကာလအတွင်း ကုန်ပစ္စည်းတင်ပို့မှုမှ ကန်ဒေါ်လာ သန်း ၂၀,၈၃၀ ရရှိခဲ့ကြောင်း အစီရင်ခံစာတွင် ဖော်ပြထားသည်။ ယခုနှစ် ဇန်နဝါရီလမှ သြဂုတ်လအထိ ကမ္ဘောဒီးယားနိုင်ငံသို့ RCEP နိုင်ငံများမှ ဒေါ်လာ ၁၉,၇၂၈ သန်း တန်ဖိုးရှိ ကုန်ပစ္စည်းများ တင်သွင်းခဲ့ပြီး ယမန်နှစ် အလားတူကာလက ကန်ဒေါ်လာ ၁၆,၈၆၉ သန်းမှ ၁၆.၉၅ ရာခိုင်နှုန်း တိုးလာခဲ့သည်။ အဆိုပါ ကိန်းဂဏန်းများအရ ကမ္ဘောဒီးယားနိုင်ငံသည် အခြားသော RCEP နိုင်ငံများနှင့် ကုန်သွယ်မှုသည် ကန်ဒေါ်လာ ၂၆,၃၇၅ သန်းအထိ ရှိလာကာ တစ်နှစ်ထက်တစ်နှစ် ၁၅ ရာခိုင်နှုန်း တိုးမြင့်လာခဲ့သည်။ ကမ္ဘောဒီးယားနိုင်ငံ၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၏ ပြောရေးဆိုခွင့်ရှိသူ Penn Sovicheat က နိုင်ငံ၏ ကုန်သွယ်မှုနှင့် စီးပွားရေး ဖွံ့ဖြိုးတိုးတက်မှုတွင် RCEP သဘောတူညီချက်သည် အဓိက အခန်းကဏ္ဍမှ ပါဝင်ခဲ့ကြောင်း ချီးကျူးခဲ့သည်။ ကမ္ဘောဒီးယား၏ အဓိကပို့ကုန်များမှာ အထည်ချုပ်လုပ်ငန်း၊ စက်ယန္တရားများ၊ လျှပ်စစ်ပစ္စည်းများ၊ ဖိနပ်ထုတ်ကုန်များ၊ သားရေပစ္စည်းများ၊ စပါး၊ ပရိဘောဂ၊ ရော်ဘာ၊ သစ်သီးများ၊ ဟင်းသီးဟင်းရွက်များ၊ ပုလဲများ၊ အရုပ်များနှင့် အထည်အလိပ်များဖြစ်သည်။ ကမ္ဘောဒီးယား၏ အဓိကသွင်းကုန်များမှာ အထည်ချုပ်လုပ်ငန်းအတွက် ကုန်ကြမ်း၊ ဆေးဝါးနှင့် ဖြည့်စွက်စာများ၊ လူသုံးကုန်များနှင့် အစားအသောက်နှင့် အဖျော်ယမကာများ ပါဝင်ကြောင်း အစီရင်ခံစာတွင်ဖော်ပြထားသည်။

DOCA (ရန်ကုန်)

       ဖိလစ်ပိုင်နိုင်ငံသည် ဂျပန်နိုင်ငံမှ ကုမ္ပဏီကြီး ၃ ခုနှင့်အတူ ပီဆို ၅၁ ဘီလီယံခန့် တန်ကြေး ရှိသော ရင်းနှီးမြှုပ်နှံမှုများ ပြုလုပ်သွားမည်ဟု အတည်ပြုလိုက်ပြီဖြစ်ကြောင်း ဖလစ်ပိုင်နိုင်ငံ ကုန်သွယ်ရေးနှင့်စက်မှုလက်မှုဌာန (DTI) မှ ထုတ်ပြန်သော အချက်အလက်များအရ သိရပါ သည်။ ကုန်သွယ်ရေးအတွင်းရေးမှူးဆိုသူ Cristina Roque က အဆိုပါရင်းနှီးမြှုပ်နှံမှုများကို ဖိလစ်ပိုင် နိုင်ငံ ကိုယ်စားပြုအဖွဲ့နှင့် ဂျပန်နိုင်ငံမှ ကုမ္ပဏီ အလုပ်အမှုဆောင်များ၏ တွေ့ဆုံပွဲ အတွင်းတွင် အဆုံးသတ်ဆွေးနွေးသွားမည်ဖြစ်ကြောင်း သိရပါသည်။ Koshidaka Holdings Co. Ltd. ကုမ္ပဏီက နောင်လာမည့် ဆယ်စုနှစ်အတွင်းတွင် အဝတ်အထည်ဆိုင် ၃၀၀ ဆိုင်ဖွင့်လှစ်ရန် အတွက် ပီဆို ၃၄ ဘီလီယံခန့် ရင်းနှီးမြှုပ်နှံရန် ကတိပြုခဲ့ကြောင်း သိရပါသည်။ Koshidaka ၏ ရင်းနှီးမြှုပ်နှံမှုမှ တစ်ဆင့် အလုပ်အကိုင်ပေါင်း ၁၅၀၀ ခန့် ခန့်ထားနိုင်မည်ဖြစ်ပြီး ဆောက်လုပ် ရေးနှင့် ပစ္စည်းပို့ ဆောင်မှုများမှတစ်ဆင့် အလုပ်အကိုင်အခွင့်အလမ်းများကို ဖန်တီးနိုင်ရန် ထောက်ပံ့သွားမည်ဖြစ်ကြောင်း သိရပါသည်။ Marubeni Corp သည် အိမ်ခြံမြေနှင့်ကျန်းမာရေး စောင့်ရှောက်မှု စီမံကိန်းများအတွက် ပီဆို ၁၅ ဘီလီယံခန့် ရင်းနှီးမြှုပ်နှံသွားမည်ဖြစ်ကြောင်းနှင့် Sojitz Corp သည် AI၊ လျှပ်ကူးပစ္စည်း ဒီဇိုင်း၊ ဆော့ဝဲလ်နှင့် ကျန်းမားရေးစောင့်ရှောက် လုပ်ငန်းများအတွက် ပီဆို ၂ ဘီလီယံမှ ၃ ဘီလီယံအထိ ရင်းနှီးမြှုပ်နှံမှုများ ပြုလုပ်သွားမည် ဖြစ်ကြောင်း သိရပါသည်။ Roque က DTI သည် အရည်အသွေးပြည့်ဝသော အလုပ်အကိုင်များ၊ ပစ္စည်းပို့ဆောင်ရေးသန်မာစေရေးနှင့် နိုင်ငံ၏စီးပွားရေးပိုမိုကျယ်ပြန့်လာစေရန်အတွက် ဂျပန်နိုင်ငံမှ ရင်းနှီးမြှုပ်နှံမှုများ သေချာစွာပြုလုပ်ရန်အတွက် စီးပွားရေးအသင်းအဖွဲ့များနှင့်အတူ အလုပ်လုပ်ကိုင်သွားမည် ဖြစ်ကြောင်း ပြောကြားခဲ့ပါသည်။

DOCA (ရန်ကုန်)