ပြည်ပကုန်သွယ်မှုသတင်းများ

နှစ်ကြာမြင့်စွာ သိုလှောင်ထားသည့်ဆန်များ ထိုင်းနိုင်ငံမှတင်ပို့မည်ကို အာဖရိကနိုင်ငံများ စိုးရိမ်

အာဖရိကနိုင်ငံများမှ သံတမန်များသည် ထိုင်းနိုင်ငံ၌ ၁၀ နှစ်ကြာ သိုလှောင်ထားသော ဆန်များအား ၎င်းတို့နိုင်ငံများသို့ တင်ပို့မည်ဟူသော အစီရင်ခံစာများနှင့်စပ်လျဉ်း၍ စိုးရိမ်ပူပန်မှု များ မြင့်တက်လာခဲ့သည်။

ထိုင်းနိုင်ငံခြားရေးဝန်ကြီးဌာနရှိ တောင်အာရှ၊ အရှေ့အလယ်ပိုင်းဒေသနှင့် အာဖရိကဒေသဆိုင်ရာ တာဝန်ခံအကြီးတန်းအရာရှိများနှင့် အာဖရိကသံတမန်များအကြား မကြာသေးမီက တွေ့ ဆုံမှုတွင် အဆိုပါကိစ္စကို ဆွေးနွေးခဲ့ကြောင်း၊ ဝန်ကြီးဌာနအနေဖြင့် ၎င်းတို့၏ စိုးရိမ်မှုများကို အလေးအနက်ထားပါကြောင်းနှင့် သက်ဆိုင်ရာ အာဏာပိုင်များထံ ထပ်ဆင့်အသိပေး ပြောကြားမည်ဖြစ်ကြောင်းဖြင့် အဆိုပါဝန်ကြီးဌာနမှ သတင်းရင်းမြစ်တစ်ခုက Thai PBS World သတင်းဌာနသို့ အတည်ပြုပြောကြားခဲ့သည်။

ဆယ်နှစ်သက်တမ်းရှိသော ဆန်များကို အာဖရိကသို့တင်ပို့မည့် ထိုင်းအစိုးရ၏ အစီအစဉ် နှင့်ပတ်သက်၍ ဘန်ကောက်ရှိ အာဖရိကသံတမန်များသည် ဒေသဆိုင်ရာ အာဏာပိုင်များထံမှ ရှင်းလင်းချက်များ တောင်းဆိုခဲ့သည်ဟု နိုင်ရိုဘီအခြေစိုက် Nation သတင်းဝက်ဘ်ဆိုက်က ဖော် ပြထားသည်။ အဆိုပါ သိုလှောင်ထားသည့် ဆန်များသည် ဝန်ကြီးချုပ်ယင်လပ် ဦးဆောင်သော အစိုးရလက်ထက်၌ အရှုပ်တော်ပုံဖြစ်ပွားခဲ့သည့် ဆန်အပေါင်ခံ အစီအစဉ်မှ လက်ကျန်ပစ္စည်း များဖြစ်သည်။ ယင်းအချက်သည် အာဖရိကသံတမန်များနှင့် ထိုင်းနိုင်ငံခြားရေးဝန်ကြီးဌာနမှ အရာရှိများကြား ဆွေးနွေးခဲ့သည့် ပြဿနာများအနက် တစ်ခုပင်ဖြစ်ကြောင်း သတင်းရင်းမြစ်က ဆိုခဲ့သည်။

ထိုင်းနိုင်ငံသည် ကင်ညာ၊ နိုင်ဂျီးရီးယားနှင့် တောင်အာဖရိက တို့အပါအဝင် အာဖရိက ဒေသတွင်းရှိ နိုင်ငံများစွာသို့ ဆန်အများဆုံးတင်ပို့သည့်နိုင်ငံဖြစ်ခြင်းကြောင့် အာဖရိကသို့ အဆိုပါ ဆန်များရောင်းချရန် ဆုံးဖြတ်ချက်သည် စိုးရိမ်စရာဖြစ်သည်ဟု အာဖရိကသံတမန်များက ပြော ကြားကြောင်း၊ ဥပမာအားဖြင့် ကုလသမဂ္ဂ ကုန်သွယ်ရေး ကိန်းဂဏန်းများအရ ကင်ညာနိုင်ငံသည် ၂၀၂၂ ခုနှစ်တွင် တန်ဖိုးအားဖြင့် အမေရိကန်ဒေါ်လာ ၁၀.၄ သန်းခန့်ရှိသော ထိုင်းဆန်များကို ဝယ် ယူခဲ့ကြောင်း Nation သတင်းဌာနက ဖော်ပြခဲ့ပါသည်။

နိုင်ဂျီးရီးယားရှိ အင်တာနက်သုံးစွဲသူများကလည်း ၁၀ နှစ်ကြာ သိုလှောင်ထားသော ဆန် များသည် အာဖရိကသို့ နောက်ဆုံးတွင်ရောက်ရှိလာပါက အထူးသဖြင့် နိုင်ဂျီးရီးယားသည် အစား အသောက် ဘေးကင်းလုံခြုံရေးနှင့် စည်းမျဉ်းစည်းကမ်းများဆိုင်ရာ စစ်ဆေးမှုများကို အလေး အနက်ထားမှု အားနည်းသော နိုင်ငံဖြစ်သည့်အတွက် ပြည်သူများ၏ကျန်းမာရေးအပေါ် ဆိုးရွားသော သက်ရောက်မှုများ ဖြစ်ပေါ်လာမည်ကို စိုးရိမ်ကြောင်း မကြာသေးမီက ထုတ်ဖော်ပြောဆိုခဲ့ကြသည်။

Source: Thai PBS World, 27 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

အင်ဒိုနီးရှား၏ ပဉ္စမအကြိမ် ဆန်အဝယ်တင်ဒါ၌ ဗီယက်နမ်နှင့် မြန်မာတို့ လေလံအောင်မြင်

ပြည်ပကုန်သွယ်မှုသတင်းများ

အင်ဒိုနီးရှားနိုင်ငံပိုင် ဝယ်ယူရေးအေဂျင်စီ (Bulog) ၏ မကြာသေးမီက တင်ဒါခေါ်ယူမှုတွင် ဗီယက်နမ်သည် ဆန်ကွဲ ၅% ပါဝင်သော ဆန်ဖြူ တန်ချိန် ၁၅၀၀၀၀ တင်ပို့ရန်အတွက် လေလံ ၆ စောင်ကို အောင်မြင်ခဲ့သည်ဟု ကုန်သွယ်ရေး သတင်းအရင်းအမြစ်များက ပြောဆို ကြောင်း၊ သို့သော် ဗီယက်နမ်၏ ဆန်ဈေးနှုန်းများသည် တင်ဒါရလဒ်ကြေညာမှုမှ အကျိုးအမြတ် ရရှိရန် မျှော်လင့်နိုင်ဖွယ်မရှိကြောင်း S&P Global ဈေးကွက်သုတေသနအဖွဲ့က ဖော်ပြပါသည်။

တင်ဒါခေါ်ယူရာတွင် Bulog အေဂျင်စီသည် ဗီယက်နမ်အတွက် ယှဉ်ပြိုင်နိုင်သည့် ပမာဏ ကို သတ်မှတ်ပေးထားသဖြင့် ဈေးနှုန်းများအပေါ် သိသာစွာ သက်ရောက်ခြင်းမရှိဟု စင်ကာပူ အခြေစိုက် ကုန်သည်တစ်ဦးက ပြောကြားခဲ့သည်။ ဗီယက်နမ်မှ အနိမ့်ဆုံးထား ကမ်းလှမ်းသည့် ဈေးနှုန်းမှာ သင်္ဘောတင်စရိတ်နှင့် သယ်ယူပို့ဆောင်ခတို့ ပါဝင်သည့် ဆိပ်ကမ်းအရောက် CNF ဈေးနှုန်း ၁ တန်လျှင် ၅၆၄.၅ ဒေါ်လာခန့်ဖြစ်ပြီး အဆိုပါ တင်ဒါတွင် ယှဉ်ပြိုင်နိုင်စွမ်း အမြင့်ဆုံး ဖြစ်သည်။

ပို့ကုန်အမှာစာ အသစ်ရရှိခြင်း မရှိသောကြောင့် ဗီယက်နမ်ရှိ ဆန်ရောင်းချသူ အချို့သည် ၎င်းတို့၏ ဆန်ဈေးနှုန်းများကို လျှော့ချခဲ့ကြပြီး S&P Global ၏ လက်အောက်ရှိ Platts ဈေးကွက် အချက်အလက် ထောက်ပံ့ရေးဌာန၏ အဆိုအရ ဗီယက်နမ်မှ ဆန်ကွဲ ၅% ပါဝင်သော ဆန်ဖြူ၏ ဈေးနှုန်းသည် ရက်သတ္တတစ်ပတ်အတွင်း ဆန် ၁ တန်လျှင် ၁၀ ဒေါ်လာနှုန်းဖြင့် ကျဆင်းခဲ့ပြီး ၂၃-၅-၂၀၂၄ ရက်နေ့တွင် သင်္ဘောပေါ်အရောက် FOB စျေးနှုန်းမှာ ၁ တန်လျှင် ၅၆၉ ဒေါ်လာနှုန်းသို့ ရောက်ရှိခဲ့သည်။

ထိုင်းနိုင်ငံအနေဖြင့် တင်ဒါခေါ်ယူသည့် ဆန်တန်ချိန် ၃ သိန်းအနက် တန်ချိန် ၉၀၀၀၀ အတွက် တင်သွင်းခွင့်ရရှိခဲ့သော်လည်း ထိုင်းကုန်သည်များ၏ အနိမ့်ဆုံး ဈေးနှုန်းကမ်းလှမ်းချက် မှာ ဆိပ်ကမ်းအရောက် CNF ဈေးနှုန်း ၁ တန်လျှင် ၆၄၉ ဒေါ်လာနှုန်းရှိပြီး ဆန်ဈေးနှုန်းကြီးမြင့်မှု ကြောင့် တင်ဒါအောင်မြင်မှု မရှိကြောင်း၊ Bulog အနေဖြင့် အဆိုပါ အောင်မြင်မှုမရှိသော လေလံ စောင်ရေများအတွက် တင်ဒါများ ပြန်လည်ခေါ်ယူရန် သေချာမှုမရှိကြောင်း သိရှိရသည်။ ယင်း ရလဒ် ထွက်ပေါ်လာပြီး မကြာမီကာလအတွင်း ထိုင်းဆန်ဈေးနှုန်းများသည် ကျဆင်းလာနိုင် ဖွယ်ရှိသည်ဟု ကုန်သည်တစ်ဦးက ပြောကြားခဲ့သည်။

မြန်မာနိုင်ငံသည် ဆိပ်ကမ်းအရောက် CNF ဈေးနှုန်း ဆန် ၁ တန်လျှင် ၆၂၁ ဒေါ်လာမှ ၆၂၉ ဒေါ်လာအတွင်း ကမ်းလှမ်းမှုများဖြင့် ဆန်တန်ချိန် ၆၀၀၀၀ ရောင်းချရန်အတွက် လေလံ အောင်မြင်ခဲ့ပြီး မြန်မာနိုင်ငံ၏ ပိုမိုယှဉ်ပြိုင်နိုင်စွမ်းရှိသော ကမ်းလှမ်းမှုများကြောင့် ပါကစ္စတန်မှ တင်ပို့သူများမှာ တင်ဒါကျရှုံးမှု ရှိခဲ့ကြောင်း သိရသည်။

အင်ဒိုနီးရှားနိုင်ငံသည် ဆန်ကွဲ ၅% ပါဝင်သော ဆန်ဖြူ တန်ချိန် ၃၀၀၀၀၀ ဝယ်ယူရန် တင်ဒါအသစ်အား မကြာသေးမီက ကြေညာခဲ့ခြင်းဖြစ်သည်။ ၂၀၂၄ ခုနှစ်အတွင်း ယခုအချိန်အထိ ဆန်တန်ချိန် ၁.၇ သန်း တင်ဒါ ၅ ကြိမ်ခေါ်ယူ၍ ဝယ်ယူခဲ့ပြီးဖြစ်သည်။ ဗီယက်နမ်၊ ထိုင်း၊ မြန်မာ နှင့် ပါကစ္စတန် တို့သည် ယခုနှစ်တွင် အင်ဒိုနီးရှားနိုင်ငံအတွက် အဓိက ဆန်တင်သွင်းသူများ ဖြစ် ကြသည်။

Bulog သည် ၂၀၂၄ ခုနှစ်အတွက် ဆန်တန်ချိန် ၃.၆ သန်း တင်သွင်းရန် ခွဲတမ်းသတ်မှတ် ထားသည်။ အယ်လ်နီညိုဖြစ်စဉ်၏ ခြောက်သွေ့သောရာသီဥတု အခြေအနေများက အင်ဒိုနီးရှား နိုင်ငံ၏ ဆန်စပါးထုတ်လုပ်မှုကို ခြိမ်းခြောက်လျက်ရှိခြင်း၊ ကမ္ဘာလုံးဆိုင်ရာ ဆန်ထောက်ပံ့မှု ပိုမို ကျပ်တည်းလာခြင်းတို့အရ အဆိုပါ ဆန်တင်သွင်းမှုခွဲတမ်း သတ်မှတ်ချက်အား အပြည့်အဝ အသုံး ပြုမည့် အလားအလာရှိနေသည်။

Source: S&P Global, 23 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

ထိုင်းနိုင်ငံတောင်ပိုင်း၌ ဆီအုန်းဈေးနှုန်း ကျဆင်းရသည့် အကြောင်းအရင်းကို အစိုးရက စုံစမ်းမည်

ပြည်ပကုန်သွယ်မှုသတင်းများ

ထိုင်းနိုင်ငံ၌ ဆီအုန်းဈေးကျဆင်းရသည့် အကြောင်းအရင်းကို ရှာဖွေရန်နှင့် ကြိုတင်ကာကွယ်မှု အစီအမံများကို ရှာဖွေ‌ဖော်ဆောင်ရန်အတွက် ဆီအုန်းစိုက်ခင်းများရှိသည့်ဒေသများသို့ သွားရောက်လေ့လာစုံစမ်းရန် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ပြည်တွင်းကုန်သွယ်ရေးဌာနသို့ ညွှန်ကြားထားရှိကြောင်း Bangkok Post သတင်းဌာနက ၂၅-၅-၂၀၂၄ ရက် နေ့တွင် ဖော်ပြပါသည်။

ဆီအုန်း ဝယ်ယူမှုဈေးနှုန်းများ လျှော့ချမှုရှိကြောင်း ဆီအုန်းစိုက်တောင်သူများမှ တိုင်ကြားမှုများ ပြုလုပ်ခဲ့ပြီးနောက် ဆီအုန်းဈေးနှုန်း ကျဆင်းရခြင်းအကြောင်းရင်းများကို အကဲဖြတ် သုံးသပ်ရန်အတွက် ထိုင်းနိုင်ငံတောင်ပိုင်းရှိ Phanngga ၊ Krabi နှင့် Surat Thani ပြည်နယ်များသို့ သွားရောက်ကြည့်ရှုရန် ကူးသန်းရောင်းဝယ်ရေးဝန်ကြီး Mr. Phumtham Wechayachai က ပြည်တွင်းကုန်သွယ်ရေးဌာန၊ ညွှန်ကြားရေးမှူးချုပ် Mr. Wattanasak Suriam အား ပြောကြား ထားကြောင်း သိရပါသည်။

၂၀၂၄ ခုနှစ်၊ ဧပြီလမှ မေလအထိ ရောင်းလိုအား မြင့်မားနေခြင်းကြောင့် ပြည်တွင်း၌ ထွက် ရှိသည့် လတ်ဆတ်သော ဆီအုန်းသီးဈေးနှုန်းမှာ ယခင်သီတင်းပတ်တွင် တစ်ကီလိုဂရမ်လျှင် ၄.၉၈ ဘတ်မှ ၄.၆၀ ဘတ်နှုန်းသို့ ကျဆင်းသွားကြောင်း၊ ထို့အပြင် အလွန်ပူပြင်းသော ရာသီဥတုကြောင့် ဆီအုန်းအစေ့အဆန်များမှာ သဘာဝအတိုင်း ရင့်မှည့်ခြင်းမရှိပဲ အရည်အသွေးကျဆင်းပြီး ဆီ ပါဝင်မှု ရာခိုင်နှုန်းလျော့နည်းသဖြင့် ဈေးနှုန်းနိမ့်ကျမှုကို ဖြစ်ပေါ်စေခဲ့ကြောင်း၊ ဈေးကောင်းရရှိ စေရေးအတွက် ရိတ်သိမ်းချိန်ကို နောက်သို့ရွှေ့ဆိုင်းလျက် ကောင်းစွာရင့်မှည့်မှုရှိသော ဆီအုန်းခိုင် များကိုသာ ဖြတ်တောက်ခူးဆွတ်ရန် တောင်သူများသို့ အသိပေး ပြောကြားထားပြီးသည့်နောက် ဒေသထွက် လတ်ဆတ်သော ဆီအုန်းအဆန်ဈေးနှုန်းများမှာ ပြန်လည်မြင့်တက် ကောင်းမွန်လာ မည်ဟု မျှော်လင့်ရကြောင်း ညွှန်ကြားရေးမှူးချုပ် Mr. Wattanasak က ပြောဆိုပါသည်။

ထိုင်းပြည်တွင်းကုန်သွယ်ရေးဌာနသည် ဆီအုန်းသီးဝယ်ယူသူများနှင့် စားအုန်းဆီထုတ်လုပ်သည့် စက်ရုံများအား ပုံမှန်အတိုင်း ဆက်လက်ဝယ်ယူရန်နှင့် ဆီအုန်းသီးများ သဘာဝအလျောက် ရင့်မှည့်ကြွေကျမှုမဟုတ်ပဲ အချိန်မတိုင်မီ ဆွတ်ခူးယူခြင်းမှ ရှောင်ကြဉ်ရန် ညွှန်ကြားထားကြောင်း၊ အဆိုပါတားမြစ်ချက်ကို ဖောက်ဖျက်ပါက ၁၉၉၉ ခုနှစ် ကုန်စည်နှင့် ဝန်ဆောင်မှုများ အက်ဥပဒေအရ ထောင်ဒဏ်ငါးနှစ်၊ ဒဏ်ငွေ ဘတ် ၁၀၀၀၀၀ သို့မဟုတ် ဒဏ်နှစ်ရပ်လုံး ချမှတ်ခံရနိုင်ကြောင်း သတင်းရရှိပါသည်။

Source: Bangkok Post, 25 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

ဆန်ဖူလုံမှုရှိစေရန် အကောက်ခွန်ကို သုညရာခိုင်နှုန်းသို့ ဘရာဇီးအစိုးရ လျှော့ချ

ပြည်ပကုန်သွယ်မှုသတင်းများ

ဘရာဇီးနိုင်ငံ၊ စီးပွားရေးရာဝန်ကြီးဌာန၊ နိုင်ငံခြားကုန်သွယ်မှုကောင်စီ (CAMEX) ၏ လက်အောက်ရှိ စီမံခန့်ခွဲရေးအမှုဆောင်ကော်မတီသည် ဆန်အမျိုးအစား ၃ ခုအပေါ် သွင်းကုန်ခွန် ဖယ်ရှားရန် လယ်ယာစိုက်ပျိုးရေးနှင့် မွေးမြူရေးဝန်ကြီးဌာနနှင့် အမျိုးသားဆန်အရောင်းကုမ္ပဏီ (CONAB) တို့၏ အဆိုပြုချက်ကို ၂ဝ၂၄ ခုနှစ် မေလ ၂ဝ ရက်နေ့၌ သဘောတူခွင့်ပြုခဲ့ပါသည်။

အဆိုပါ ခွင့်ပြုချက်အရ ပေါင်းဆန်မဟုတ်သော ဆန်အမျိုးအစား နှစ်ခုနှင့် အရောင်တင် ထားသော ဆန်အမျိုးအစား တစ်ခုတို့ကို သာမန်ပြည်ပ အကောက်ခွန်ကင်းလွတ်ခွင့်စာရင်း (List of Exceptions to the Common External Tariff) တွင် ထည့်သွင်းခဲ့ပါသည်။ ထိုကဲ့သို့ ဆန်သွင်းကုန်ခွန် ဖယ်ရှားရခြင်းမှာ ဘရာဇီးနိုင်ငံ၏ ဆန်ထုတ်လုပ်မှုတွင် ၇ဝ% ခန့် ပါဝင်နေသည့် Rio Grande do Sul ဒေသ၌ ရေလွှမ်းမိုးမှု ဖြစ်ပေါ်ခဲ့သည့်အတွက် နိုင်ငံအတွင်း ဆန်ရောင်းချမှုကို ထိခိုက်မှု မရှိစေရန် ဖြစ်ပါသည်။

ဘရာဇီး ဖွံ့ဖြိုးတိုးတက်မှု၊ စက်မှု၊ ကုန်သွယ်ရေးနှင့်ဝန်ဆောင်မှုဝန်ကြီး Geraldo Alckmin က အစိုးရအနေဖြင့် စားနပ်ရိက္ခာဖူလုံရေးအတွက် အာမခံနိုင်ရန် ကြိုးပမ်းလျက်ရှိကြောင်းနှင့် အကောက်ခွန်နှုန်းထားများကို သုညရာခိုင်နှုန်းသို့ လျှော့ချဖြတ်တောက်ခြင်းဖြင့် နိုင်ငံအတွင်း ဆန်အရောင်းလျော့နည်းမှုကြောင့် ဆန်ပြတ်လပ်ခြင်း သို့မဟုတ် ဆန်ဈေးနှုန်းများ မြင့်တက်ခြင်း အရေးကိစ္စတို့ကို ရှောင်ရှားနိုင်မည်ဟု ယုံကြည်ကြောင်း ပြောကြားခဲ့ပါသည်။

ဘရာဇီးနိုင်ငံအပါအဝင် မာကိုဆာသဘောတူညီချက်ကို ချုပ်ဆိုထားသောနိုင်ငံများတွင် ကုန်ပစ္စည်းများအတွက် သတ်မှတ်ထားသော Nomenclatura Comum do Mercosul (NCMs) ခေါ် ကုန်စည်အမျိုးအမည် ခွဲခြားမှုစနစ်အရ NCM 1006.10.92 အောက်ရှိ မကြိတ်ခွဲရသေးသော စပါး၊ NCM 1006.20.20 အောက်ရှိ ကြိတ်ခွဲပြီးဆန်လုံးညိုနှင့် NCM 1006.30.21 အောက်ရှိ ကြိတ် ခွဲပြီးဆန်ဖြူများအတွက် အကောက်ခွန်နှုန်းကို ၂ဝ၂၄ ခုနှစ် ဒီဇင်ဘာလ ၃၁ ရက်နေ့အထိ သုည ရာခိုင်နှုန်း လျှော့ချ သတ်မှတ်သွားမည်ဖြစ်ကြောင်း ဘရာဇီးနိုင်ငံတော်ပြန်တမ်း၌ ထုတ်ပြန်ဖော်ပြ ထားပါသည်။ လိုအပ်ပါက အဆိုပါ အကောက်ခွန်လျှော့ချပေးသည့် အချိန်ကာလကို ဘရာဇီး ဖွံ့ဖြိုး တိုးတက်မှု၊ စက်မှု၊ ကုန်သွယ်ရေးနှင့်ဝန်ဆောင်မှုဝန်ကြီးဌာန၊ နိုင်ငံခြားကုန်သွယ်မှု အထွေထွေ အတွင်းရေးမှူးချုပ်ရုံးက ပြန်လည်သုံးသပ်သွားမည်ဖြစ်ပါသည်။

လက်ရှိကာလတွင် ဘရာဇီးနိုင်ငံသည် မာကိုဆာသဘောတူညီချက်အရ အကောက်ခွန် သုညရာခိုင်နှုန်းအထိ လျှော့ချထားပြီးဖြစ်သော အဆိုပါ မာကိုဆာအဖွဲ့ဝင်နိုင်ငံများထံမှ ဆန်များ ကို အဓိကဝယ်ယူတင်သွင်းလျက်ရှိသည်။ ဘရာဇီးနိုင်ငံ၏ အကောက်ခွန်နှုန်း လျှော့ချမှုအရ ထိုင်း နိုင်ငံကဲ့သို့သော အခြားသောပင်ရင်းဒေသနိုင်ငံများ ထံမှလည်း ဆန်ဝယ်ယူတင်သွင်းမည့် အလား အလာရှိသည်။ ၂ဝ၂၄ ခုနှစ်အတွင်း ဧပြီလအထိ ဘရာဇီးနိုင်ငံ၏ စုစုပေါင်း ဆန်တင်သွင်းမှုတွင် ထိုင်းနိုင်ငံထံမှ ၁၈.၂% ကို ဝယ်ယူတင်သွင်းခဲ့ပါသည်။

Source: SSRiceNews, 24 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

ဥရောပသို့ တန်းမြင့်ဆန် တင်ပို့ရန် ကမ္ဘောဒီးယားကြိုးပမ်း

ပြည်ပကုန်သွယ်မှုသတင်းများ

အရည်အသွေးမြင့် ကမ္ဘောဒီးယားဆန်အား ဝယ်လိုအားမြင့်မားလာမှုအရ ကမ္ဘောဒီးယား ဆန်တင်ပို့သူ ကုမ္ပဏီဖြစ်သည့် Amru Rice သည် ၎င်း၏ ပရီမီယံဆန်နှင့် အော်ဂဲနစ်ဆန်အမျိုး အစားများကို ဥရောပဈေးကွက်သို့ တိုးမြှင့်တင်ပို့သကဲ့သို့ ရင်းနှီးမြှုပ်နှံမှုများ လုပ်ဆောင်လျက်ရှိသည်။

ဥရောပသမဂ္ဂဈေးကွက်အတွင်း နှစ်အတန်ကြာ ဝင်ရောက်ခဲ့ပြီးနောက် Amru Rice အမှတ် တံဆိပ် ကမ္ဘောဒီးယားဆန်သည် ဥရောမြောက်ပိုင်းရှိ နော်ဒစ်နိုင်ငံများအနက် ဖင်လန်နိုင်ငံရှိ စူပါမားကတ်များတွင် အရောင်းရဆုံးဆန် အဖြစ်သို့ ရောက်ရှိသွားပြီဖြစ်ကြောင်း၊ ဥရောပနိုင်ငံများ မှ စားသုံးသူများ အထူးသဖြင့် နော်ဒစ်နိုင်ငံများမှ စားသုံးသူများသည် ကမ္ဘောဒီးယားဆန်၏ ထူးခြားသည့် အရည်အသွေး၊ အထူးသဖြင့် ယင်းဆန်၏ အရသာနှင့် အနံ့ကို နှစ်ခြိုက်မှုရှိကြ ကြောင်းဖြင့် Amru Rice (Cambodia) ၏ အမှုဆောင်အရာရှိချုပ်ဖြစ်သူ Song Saran က ၂၃-၅-၂၀၂၄ ရက်နေ့၌ Khmer Times သတင်းဌာနသို့ ပြောကြားခဲ့သည်။

Amru Rice သည် ဥရောပသမဂ္ဂ၏ တင်းကြပ်သော အစားအစာ ဘေးကင်းရေးစံနှုန်းများ ပြည့်မီရန်အတွက် အခြေခံအဆောက်အအုံများအပေါ် ရင်းနှီးမြှုပ်နှံမှု များစွာပြုလုပ်ထားကြောင်း၊ အဆိုပါ ရင်းနှီးမြှုပ်နှံမှုများတွင် ခေတ်မီဆန်းသစ်သော အဆောက်အအုံများနှင့် ခိုင်မာသော အရည် အသွေးထိန်းချုပ်မှု အစီအမံများ ပါဝင်ကြောင်း သိရှိရသည်။

အဆိုပါအချက်သည် ဥရောပဈေးကွက်သို့ ဝင်ရောက်ရန် ကမ္ဘောဒီးယားဆန်နှင့် ဆန်စက် များ၏ အရည်အသွေးမြင့်မားမှုကို ပြသခဲ့ကြောင်း ကမ္ဘောဒီးယား ဆန်စပါးအသင်းချုပ် (CRF) မှ ပြောကြားခဲ့သည်။ Amru Rice မှ တင်ပို့သည့် ကမ္ဘောဒီးယားဆန်များသည် ဖင်လန်ဈေးကွက်၌ နိုင်ငံတကာအဆင့်မီ အသိအမှတ်ပြုမှု ရရှိခဲ့ခြင်းမှာ ကောင်းမွန်သောခြေလှမ်းတစ်ခုဖြစ်ကြောင်း၊ ဈေးကွက်တွင် ပိုမိုယှဉ်ပြိုင်နိုင်ရန်အတွက် ကမ္ဘောဒီးယား ဆန်လုပ်ငန်းနယ်ပယ်၌ ရာသီဥတုဒဏ် ခံနိုင်မှု မူဘောင်ကို ထူထောင်လုပ်ဆောင်နေကြောင်း CRF ၏ ပြောကြားချက်အရ သိရသည်။

CRF ၏ ကိန်းဂဏန်းများအရ ကမ္ဘောဒီးယားနိုင်ငံသည် ယမန်နှစ်တွင် ဥရောပသမဂ္ဂသို့ ဆန်တန်ချိန် ၂၄၆၆၈၃ တန် တင်ပို့ခဲ့ပြီးနောက် ကမ္ဘောဒီးယားဆန်များအတွက် ၎င်းဒေသသည် အကြီးဆုံးဈေးကွက် ဖြစ်လာကြောင်း၊ ကမ္ဘောဒီးယား၏ နောက်တွင် တရုတ်နှင့် အာဆီယံနိုင်ငံများ သည် ဆန်တန်ချိန် ၂၁၂၇၅၆ တန် နှင့် ၉၃၃၇၆ တန်ဖြင့် ဥရောပသမဂ္ဂနိုင်ငံများသို့ အသီးသီး တင်ပို့ခဲ့ကြောင်း သိရှိရသည်။

ယုံကြည်စိတ်ချရသော ပရီမီယံအဆင့် ကမ္ဘောဒီးယားဆန်များ ထောက်ပံ့ပေးနိုင်ရေး အတွက် ကမ္ဘောဒီးယားသည် ဥရောပမိတ်ဖက်များနှင့် နီးကပ်စွာ လက်တွဲလုပ်ဆောင်သွားရန် ကတိကဝတ် ပြုထားကြောင်းနှင့် အဆိုပါကတိကဝတ်သည် ဥရောပဈေးကွက်၌ ရေရှည်တည်တံ့ စေနိုင်လိမ့်မည် ဖြစ်ကြောင်း Saran က ပြောကြားခဲ့ပါသည်။ ကယ်လီဖိုးနီးယားပြည်နယ်၊ Long Beach မြို့ရှိ နေထိုင်သူများထံမှ ကမ္ဘောဒီးယား ဆန်ဝယ်လိုအား မြင့်မားနေသည့်အတွက် Amru Rice ကုမ္ပဏီအနေဖြင့် ပရီမီယံဆန် တင်ပို့မှုအား အမေရိကန်နိုင်ငံအထိ တိုးချဲ့တင်ပို့ရန်လည်း စီစဉ်ထားသည်။

Amru Rice ကုမ္ပဏီအနေဖြင့် ၂၀၂၄ ခုနှစ်တွင် စုစုပေါင်း ဆန်တန်ချိန် ၄၅၀၀၀ တင်ပို့ မည်ဖြစ်ရာ အော်ဂဲနစ်ဆန် ၃၀% နှင့် ပရီမီယံဆန် ၇၀% ပါဝင်ကြောင်း၊ ၂၀၂၄ ခုနှစ် ဇန်နဝါရီလမှ ဧပြီလအတွင်း ဆန်တန်ချိန် ၁၅၀၀၀ ခန့် တင်ပို့ခဲ့ပြီး ၂၀၂၃ ခုနှစ် ကာလတူနှင့် နှိုင်းယှဉ်ပါက ၅၀% ကျော် တိုးမြင့်လာကြောင်း သိရှိရသည်။

Source: Khmer Times, 24 May, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

ဗီယက်နမ်၏ ကော်ဖီထွက်ရှိမှု ၂၀၂၃-၂၄ ခုနှစ်၌ ၂၀% ကျဆင်းခဲ့

ပြည်ပကုန်သွယ်မှုသတင်းများ

ဗီယက်နမ် လယ်ယာစိုက်ပျိုးရေးနှင့်ကျေးလက်ဖွံ့ဖြိုးရေးဝန်ကြီးဌာန၏ ထုတ်ပြန်ချက်အရ ဗီယက်နမ်နိုင်ငံ၏ ၂၀၂၃-၂၀၂၄ ခုနှစ် သီးနှံရာသီအတွင်း ကော်ဖီထွက်ရှိမှုပမာဏသည် ယခင်နှစ်နှင့် နှိုင်းယှဉ်ပါက ၂၀% လျော့ကျလျက် တန်ချိန် ၁.၄၇ သန်းသာရှိကြောင်း၊ ၎င်းပမာဏသည် ၄ နှစ် အတွင်း အနိမ့်ဆုံးဖြစ်ပြီး ကမ္ဘာ့ရိုဘတ်စတာကော်ဖီဈေးကွက်၌ ရောင်းလိုအားအပိုင်းအပေါ် ဖိအားများ ဖြစ်ပေါ်လျက်ရှိကြောင်း သိရှိရသည်။

ရာသီဥတုပြောင်းလဲမှုဖြစ်စဉ်၏ သက်ရောက်မှု၊ ဗီယက်နမ်နိုင်ငံ၌ ခြောက်သွေ့ရာသီသည် ပုံမှန်ထက် ဆောလျင်စွာ ဝင်ရောက်မှုနှင့် ရာသီဥတု ပူပြင်းခြောက်သွေ့သည့်ကာလ ကြာမြင့်မှုတို့က အချို့သော ပြည်နယ်များရှိ ဆည်တာတမံများတွင် ရေသိုလှောင်မှုကို လျင်မြန်စွာ လျော့ကျစေ ခဲ့သည်။ ရာသီဥတုခြောက်သွေ့မှုက သီးနှံအထွက်အပေါ် သက်ရောက်သဖြင့် လွန်ခဲ့သော သီတင်းပတ်အတွင်း ပြည်တွင်းကော်ဖီဈေးနှုန်းများ တစ်ဟုန်ထိုးမြင့်တက်လာခြင်းမှာ စိုးရိမ်ဖွယ်ဖြစ်သည်။

ဗီယက်နမ်နိုင်ငံ အလယ်ပိုင်းကုန်းမြင့်ဒေသများနှင့် တောင်ပိုင်းပြည်နယ်များ၌ ကော်ဖီစေ့ ဈေးနှုန်းသည် ၁ ကီလိုဂရမ်ပေါ်တွင် ဗီယက်နမ်ဒေါင်ငွေ ၁၅၀၀ (၀.၀၅၉ အမေရိကန်ဒေါ်လာ) မြင့်တက်ခဲ့ရာ ပြည်တွင်း၌ ကော်ဖီစေ့ ဝယ်ယူမှု ဈေးနှုန်းများမှာ ၁ ကီလိုဂရမ်လျှင် ဒေါင်ငွေ ၁၁၄၅၀၀ မှ ၁၁၆၀၀၀ အတွင်းသို့ ရောက်ရှိခဲ့သည်။ လွန်ခဲ့သောနှစ်ကာလများအတွင်း ကော်ဖီဈေးနှုန်းများမှာ နိမ့်ကျမှုရှိခဲ့သဖြင့် ကော်ဖီစိုက်တောင်သူ အများအပြားသည် တန်ဖိုးပိုမိုမြင့်မား သည့် သီးနှံများသို့ တဖြည်းဖြည်း ပြောင်းလဲစိုက်ပျိုးလာခဲ့ကြသည်။ သို့သော် ယခုနှစ်၌ ကော်ဖီစေ့ ဈေးနှုန်းများ စံချိန်တင်မြင့်တက်ခြင်းက တောင်သူများ၏ ကော်ဖီစိုက်ဧရိယာ ပြန်လည်တိုးမြင့်မှုကို တွန်းအားပေးမည့် အခွင့်အလမ်းတစ်ရပ်အဖြစ် မျှော်လင့်နိုင်ဖွယ်ရှိသည်။

ဗီယက်နမ် လယ်ယာစိုက်ပျိုးရေးနှင့် ကျေးလက်ဖွံ့ဖြိုးရေးဝန်ကြီးဌာန၏ အချက်အလက်များအရ ဗီယက်နမ်နိုင်ငံသည် ၂၀၂၄ ခုနှစ် ပထမလေးလအတွင်း တန်ဖိုးအားဖြင့် အမေရိကန် ဒေါ်လာ ၂.၅၇ ဘီလီယံရှိသော ကော်ဖီတန်ချိန် ၇၅၆၀၀၀ တန်ကို တင်ပို့နိုင်ခဲ့ကြောင်း၊ ယခင်နှစ် ကာလတူ၌ တင်ပို့ခဲ့မှုနှင့် နှိုင်းယှဉ်ပါက ပမာဏအားဖြင့် ၅.၄% နှင့် တန်ဖိုးအားဖြင့် ၅၇.၉% တိုးတက်လာခြင်းဖြစ်ကြောင်း သိရှိရသည်။

Source: Vietnam Plus, 29 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

ယခုနှစ်အတွင်း ဂျပန်ဈေးကွက်သို့ ထောပတ်သီးတင်ပို့နိုင်ရန် ဖိလစ်ပိုင်မျှော်လင့်

ပြည်ပကုန်သွယ်မှုသတင်းများ

ဖိလစ်ပိုင် စိုက်ပျိုးရေးဦးစီးဌာနသည် ဂျပန်ဈေးကွက်သို့ Hass အမျိုးအစား ထောပတ်သီးများ တင်ပို့ခြင်းကို ယခုနှစ်အတွင်း စတင်နိုင်ရန် မျှော်မှန်းလျက်ရှိကြောင်း သိရှိရသည်။

ဂျပန်ဈေးကွက်သို့ Hass ထောပတ်သီးများ ဝင်ရောက်ခွင့်ပြုရန် ဖိလစ်ပိုင်နိုင်ငံအစိုးရ၏ တောင်းဆိုထားရှိမှုအပေါ် မကြာသေးမီကာလ၌ ဂျပန်နိုင်ငံ သံအမတ်ကြီး Endo Kazuya နှင့် တွေ့ ဆုံရာတွင် စိုက်ပျိုးရေးအတွင်းဝန် Francisco Tiu Laurel Jr. က ထပ်လောင်း မေတ္တာရပ်ခံခဲ့သည်။ ၎င်းအနေဖြင့် ဖိလစ်ပိုင်နိုင်ငံထွက် ထောပတ်သီးများအား ဈေးကွက်ဝင်ရောက်ခွင့်ပြုမည့် ကြေညာချက်ကို ယခုနှစ်အတွင်း ဂျပန်နိုင်ငံဘက်မှ ထုတ်ပြန်ပေးရန် မျှော်လင့်ထားသည်ဟု ပြောကြားခဲ့ခြင်းဖြစ်သည်။

ဖိလစ်ပိုင် စိုက်ပျိုးရေးအတွင်းဝန် Tiu Laurel က ပြီးခဲ့သော ဒီဇင်ဘာလ၌ ဂျပန်နိုင်ငံသို့ သွားရောက်ခဲ့သည့် ၎င်း၏ ခရီးစဉ်အတွင်း ဂျပန်ဈေးကွက်သို့ ဖိလစ်ပိုင် လတ်ဆတ်ထောပတ်သီးများ တင်သွင်းရန်အတွက် အပင်ရောဂါပိုးမွှားကင်းရှင်းမှုဆိုင်ရာ လိုအပ်ချက်များအပေါ် လုပ်ငန်း ဆောင်ရွက်မည့် အစီအမံအား မူအားဖြင့် သဘောတူညီမှု ရရှိခဲ့သည်ဟု ပြောကြားခဲ့သည်။

ပြည်ပသို့တင်ပို့ရန် အလားအလာ ကြီးမားမှုအရ ထောပတ်သီးသည် ဖိလစ်ပိုင် စိုက်ပျိုးရေး ဦးစီးဌာနက ပို့ကုန်မြှင့်ရေး ကြိုးပမ်းလျက်ရှိသော တန်ဖိုးမြင့်သီးနှံများတွင် တစ်ခုအပါအဝင်ဖြစ် သည်။ ယခင်နှစ်တွင် ဖိလစ်ပိုင်အစိုးရသည် တောင်ကိုရီးယားနိုင်ငံသို့ ထောပတ်သီးများ ဈေးကွက်ဝင်ရောက်ခွင့် ရရှိအောင် စွမ်းဆောင်နိုင်ခဲ့သည်။ ဂျပန်နိုင်ငံသည် ၂၀၂၃ ခုနှစ်၌ တန်ဖိုးအားဖြင့် ဒေါ်လာ ၁၆၀ သန်းရှိသော ထောပတ်သီးများကို တင်သွင်းခဲ့ရာ ဖိလစ်ပိုင်အတွက် အလေးထားရ မည့် ဈေးကွက်တစ်ခုပင်ဖြစ်သည်။

လက်ရှိကာလတွင် ဖိလစ်ပိုင်နိုင်ငံသည် တရုတ်၊ မလေးရှား၊ တောင်ကိုရီးယား၊ စင်ကာပူ၊ ဟောင်ကောင်၊ ဘရူနိုင်း၊ ဗြိတိန်နှင့် မြောက်အိုင်ယာလန် တို့ပါဝင်သော ဈေးကွက်ဒေသ ၈ ခုသို့ ထောပတ်သီးများကို တင်ပို့လျက်ရှိသည်။ ဖိလစ်ပိုင်စာရင်းအင်းအာဏာပိုင်အဖွဲ့ (PSA) ၏ အချက် အလက်များအရ ဖိလစ်ပိုင်နိုင်ငံသည် ၂၀၂၃ ခုနှစ်တွင် ထောပတ်သီး တန်ချိန် ၁.၀၄ သန်းကို ပြည်ပ သို့ တင်ပို့ခဲ့ကြောင်း၊ ၂၀၂၂ ခုနှစ်၌ တင်ပို့နိုင်ခဲ့သော တန်ချိန် ၁.၄၉ သန်းနှင့် နှိုင်းယှဉ်ပါက ၃၀% ကျဆင်းခဲ့ခြင်းဖြစ်ကြောင်း သိရှိရသည်။

ဖိလစ်ပိုင်နိုင်ငံ၌ တာဝန်ထမ်းဆောင်ရန် မကြာသေးမီကမှ စတင်ရောက်ရှိခဲ့သော ဂျပန် သံအမတ်ကြီး Endo Kazuya နှင့် ထိုကဲ့သို့ တွေ့ဆုံစဉ်အတွင်း ဂျပန်နိုင်ငံသို့ တင်ပို့နေသော ဖိလစ်ပိုင် ငှက်ပျောသီးများအပေါ် အကောက်ခွန်နှုန်း လျှော့ချပေးရေးကိစ္စနှင့် ဖိလစ်ပိုင်နိုင်ငံ၏ ကြက်ငှက်တုပ်ကွေး ဖြစ်ပေါ်မှုနှင့်စပ်လျဉ်း၍ ကြက်မွေးမြူရေးထုတ်ကုန်များ တင်သွင်းခွင့်ပြုရာ၌ တစ်နိုင်ငံလုံးအပေါ် ပိတ်ပင်မှုအစား ဒေသခွဲခြားဆောင်ရွက်ခြင်းကို ဂျပန်နိုင်ငံဘက်မှ အကောင် အထည်ဖော် ဆောင်ရွက်ပေးနိုင်မည့် အခြေအနေတို့ကိုလည်း ဖိလစ်ပိုင် စိုက်ပျိုးရေးအတွင်းဝန် Tiu Laurel က အရေးဆိုဆွေးနွေးခဲ့ကြောင်း The Philippine Star သတင်းဌာနက ဖော်ပြပါသည်။

Source: The Philippine Star, 28 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

အိန္ဒိယနိုင်ငံ၌ ရွေးကောက်ပွဲအလွန်ကာလတွင် ပဲမျိုးစုံဈေးနှုန်းများ မြင့်တက်ဖွယ်ရှိ

ပြည်ပကုန်သွယ်မှုသတင်းများ

အိန္ဒိယနိုင်ငံတွင် ပဲမျိုးစုံဈေးနှုန်းများမှာ လွန်ခဲ့သော ၄ - ၅ လ ကာလအတွင်း ၁၀% မှ ၁၅% အထိ မြင့်တက်ခဲ့ပြီး ၂၀၂၄ ခုနှစ် အထွေထွေရွေးကောက်ပွဲရလဒ်များကို ထုတ်ပြန်ကြေညာမည့် ဇွန်လ ၄ ရက်နေ့၏ နောက်ပိုင်း၌ ၂၀% မှ ၃၀% ခန့်အထိ ထပ်မံမြင့်တက်လာဖွယ်ရှိကြောင်း Times of India သတင်းဌာနက ဖော်ပြပါသည်။

နိုင်ငံတစ်ဝန်း၌ ရေကြီးရေလျှံမှုနှင့် မိုးရွာသွန်းသည့်ပုံသဏ္ဌာန် မမှန်ကန်မှုတို့ကြောင့် ပဲမျိုးစုံ ထွက်ရှိမှု ကျဆင်းမည်ဟု အစီရင်ခံစာများ ထွက်ပေါ်ခဲ့ပြီးနောက် တောင်သူများထံမှ ကုန်ကြမ်းများကို မြင့်မားသောဈေးနှုန်းဖြင့် ဝယ်ယူထားရှိခဲ့ကြရသော ပဲကြိတ်ခွဲပြုပြင်ထုတ်လုပ်သူများသည် ပဲဈေးနှုန်းများကို မြှင့်တင်ရန်အတွက် အထွေထွေရွေးကောက်ပွဲ ပြီးဆုံးမည့်အချိန်ကို စောင့်ဆိုင်း လျက်ရှိကြကြောင်း သတင်းအရင်းအမြစ်များက ပြောဆိုကြသည်။

ရွေးကောက်ပွဲများရှိနေသောကြောင့် ၎င်းတို့အနေဖြင့် ဈေးနှုန်းများတည်ငြိမ်မှုရှိအောင် ထိန်းသိမ်းရမည်ဟု ပြောကြားခံထားရကြောင်း၊ လက်ရှိ ပဲမျိုးစုံအားရောင်းချသည့် ဈေးနှုန်းများမှာ ၎င်းတို့၏ ဝယ်ယူရေးကုန်ကျစရိတ်များကိုပင် ကာမိခြင်းမရှိသဖြင့် အရှုံးပေါ်လျက်ရှိကြောင်းဖြင့် အန္တရာပရာဒေ့ရှ်ပြည်နယ် Vijayawada ဒေသရှိ ပဲခွဲစက်လုပ်ငန်းရှင်များက ပြောဆိုလျက်ရှိကြ သည်။ အဆိုပါပြည်နယ်သည် အိန္ဒိယပြည်တွင်း၌ ပဲနီလေးကို အဓိကစိုက်ပျိုးထုတ်လုပ် ကြိတ်ခွဲ သည့်အပြင် ပဲစင်းငုံကိုလည်း အခြားသော ပြည်နယ်များသို့ ပံ့ပိုးပေးလျက်ရှိသည်။

အိန္ဒိယနိုင်ငံသည် ကမ္ဘာ့ပဲစင်းငုံစိုက်ပျိုးထုတ်လုပ်မှု၏ ၂၅% ခန့်ကို ထုတ်လုပ်လျက်ရှိသော် လည်း ပြည်တွင်းစားသုံးမှု ကြီးမားခြင်းကြောင့် လိုအပ်သောပမာဏကို ပြည်ပမှ တင်သွင်းနေရသည်။ လက်ရှိသီးနှံရာသီ၌ မုတ်သုံမိုး ပုံပျက်ယွင်းမှုကြောင့် အထွက်ပမာဏမှာ ၃၀% ခန့် ကျဆင်း မည်ဟု အိန္ဒိယစိုက်ပျိုးရေးဦးစီးဌာနက ခန့်မှန်းထားရာ ပဲခွဲစက်များအနေဖြင့် တောင်သူများထံမှ ကုန်ကြမ်းများကို ဈေးကြီးပေးဝယ်ယူခဲ့ရသည်။ ပဲစင်းငုံကုန်ကြမ်း ၁ ကွင်တယ် (၁၀၀ ကီလိုဂရမ်) လျှင် ရူပီး ၁၁၀၀၀ မှ ၁၃၀၀၀ အတွင်းရှိသော နှုန်းထားဖြင့် ကုန်သည်များက ဝယ်ယူခဲ့ကြရပြီး ၎င်း ပမာဏသည် အစိုးရက သတ်မှတ်ထားသည့် အခြေခံရည်ညွှန်းဈေးနှုန်းဖြစ်သော ၇၀၀၀ ရူပီးနှုန်း အပေါ် ၇၀% ခန့်ကျော်လွန်လျက်ရှိကြောင်း သတင်းအရင်းအမြစ်များက ပြောဆိုခဲ့သည်။

လက်လီဈေးကွက်တွင် လွန်ခဲ့သော ၆ လခန့်၌ ၁ ကီလိုဂရမ်လျှင် ရူပီး ၁၃၀ နှုန်းခန့်ဖြင့် ရောင်းချခဲ့ရသော ပဲစင်းငုံခွဲခြမ်း၏ ဈေးနှုန်းများသည် အခုအခါ ရူပီး ၁၉၀ မှ ၂၀၀ အတွင်း နှုန်းထားသို့ ရောက်ရှိနေသည်။ မည်သည့် ဈေးနှုန်းတစ်စုံတစ်ရာ ထပ်မံမြင့်တက်မှုမဆို ပြည်သူများထံမှ ကောင်းမွန်သော တုံ့ပြန်ချက် မရရှိနိုင်မှုကို စိုးရိမ်မှုနှင့်အတူ ကုန်သည်များအနေဖြင့် ဈေးနှုန်းများ မြှင့်တင်ခြင်းမပြုရန်နှင့် သိုလှောင်ဈေးကစားမှုများကို နှိမ်နင်းအရေးယူမည်ဖြစ်ကြောင်း ဗဟိုစိုးရနှင့် ပြည်နယ်အစိုးရများက သတိပေးထားသည်။

သို့ဖြစ်ရာ ပဲကြိတ်ခွဲပြုပြင်ထုတ်လုပ်သူများသည် လွန်ခဲ့သော ၃ လအတွင်း ဈေးနှုန်းများ မြှင့်တင်ခြင်းကို ရှောင်ကြဉ်ခဲ့ကြရသည်။ လက်လီဈေးကွက်အတွင်း ဇွန်လကုန်ပိုင်း၌ ပဲစင်းငုံ ဈေးနှုန်းသည် ၁ ကီလိုဂရမ်လျှင် ရူပီး ၂၄၀ - ၂၆၀ ခန့်သို့လည်းကောင်း၊ လက်ရှိ ၁ ကီလိုဂရမ်လျှင် ရူပီး ၁၆၀ နှုန်းခန့်ရှိသော မတ်ပဲသည် ရူပီး ၂၀၀ နှုန်းခန့်သို့လည်းကောင်း အသီးသီး မြင့်တက်ဖွယ်ရှိကြောင်း Times of India သတင်းဌာနက ဖော်ပြထားသည်။

Source: Times of India, 22 May 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

မလေးရှားသည် နိုင်ငံအတွင်းရှိ ဆီမီးကွန်ဒတ်တာလုပ်ငန်းများတွင် အမေရိကန်ဒေါ်လာ ၁၀၀ဘီလီယံကျော် ရင်းနှီးမြှုပ်နှံရန် ပစ်မှတ်ထားဆောင်ရွက်လျက်ရှိ

ပြည်ပကုန်သွယ်မှုသတင်းများ

မ‌လေးရှားနိုင်ငံသည် ၎င်း၏ ဆီမီးကွန်ဒတ်တာထုတ်လုပ်သော စက်မှုလုပ်ငန်းများအတွက် အနည်းဆုံး ရင်းဂစ် ၅၀၀ဘီလီယံ (အမေရိကန်ဒေါ်လာ ၁၀၇ဘီလီယံ)အား ရင်းနှီးမြှုပ်နှံမှုပြုလုပ်ရန်အတွက် ဆောင်ရွက်လျက်ရှိကြောင်း ဝန်ကြီးချုပ် Anwar Ibrahim က ၂၀၂၄ခုနှစ်၊ မေလ ၂၈ရက်နေ့ (အင်္ဂါနေ့) တွင် ပြောကြားခဲ့သည်။

ထိုရင်းနှီးမြှုပ်နှံမှုသည် IC Design (Integraled circuit design)နှင့် ဆီမီးကွန်ဒတ်တာချစ်ပ်ထုတ်လုပ်ရေးပစ္စည်းများအား ပံ့ပိုးပေးနိုင်ရန်အတွက်ဖြစ်သည်။ ဆီမီးကွန်ဒတ်တာချစ်ပ်များ၏ ဒီဇိုင်းပိုင်းနှင့် အဆင့်မြှင့်ထုပ်ပိုးမှုအပိုင်းများတိုးတက်လာစေရန်အတွက် ပြည်တွင်း၌ ကုမ္ပဏီု ၁၀ခုကိုတည်ထောင်လိုပြီး ၎င်းအတွက် ကုန်ကျစရိတ်မှာ အမေရိကန်ဒေါ်လာ သန်း၂၁၀မှ ၁ဘီလီယံကြားတွင်ရှိကြောင်း စက်မှုလုပ်ငန်းပွဲတော်တစ်ခု၌ မလေးရှားဝန်ကြီးချုပ် Anwar က ပြောကြားခဲ့သည်။

လက်ရှိတွင် အဆိုပါပစ်မှတ်ပြည့်မီအောင် လုပ်ဆောင်နိုင်ရန်အတွက် အချိန်ဇယားအတိအကျသတ်မှတ်ထားခြင်းမရှိကြောင်း ထပ်မံ၍ပြောကြားခဲ့သည်။

မလေးရှားနိုင်ငံသည် ဆီမီးကွန်ဒတ်တာများထုတ်လုပ်ရာတွင် အဓိကကျသောနိုင်ငံတစ်နိုင်ငံဖြစ်ပြီး မကြာသေးမီနှစ်များအတွင်း၌ Intel နှင့် Infinean အပါအဝင် ထိပ်တန်း နည်းပညာကုမ္ပဏီများမှ ဒေါ်လာဘီလီယံပေါင်းများစွာ ရင်းနှီးမြှုပ်နှံမှုများပြုလုပ်လာအောင် ဆွဲဆောင်နိုင်ခဲ့ကြောင်းသိရှိရပါသည်။

Source: Reuters

DOCA(ရန်ကုန်)

သီရိလင်္ကာမှ လက်ဖက်ခြောက်ထုတ်လုပ်သူများက အလုပ်သမားများအား လစာတိုးမြှင့်ပေးခြင်းသည် စက်မှုလုပ်ငန်းများကို ထိခိုက်စေနိုင်သည်ဟုသတိပေး

ပြည်ပကုန်သွယ်မှုသတင်းများ

သီရိလင်္ကာကျွန်းနိုင်ငံမှ လက်ဖက်ခြောက်ထုတ်လုပ်သော လုပ်ငန်းရှင်များသည် အလုပ်သမားများအား လုပ်ခလစာ ၇၀ရာခိုင်နှုန်းတိုးမြှင့်ပေးရန် အစိုးရ၏ ထုတ်ပြန်ခဲ့သည့် အမိန့်ကို ၂၀၂၄ခုနှစ်၊ မေလ ၂၇ရက်‌နေ့ (တနင်္လာနေ့)က ရှုတ်ချခဲ့ပြီး ၎င်းတို့၏လက်ဖက်ခြောက်သည် တစ်ကမ္ဘာလုံးတွင် ယှဉ်ပြိုင်နိုင်စွမ်းမရှိသည့်အပြင် နိုင်ငံအတွက် ငွေကြေးအခက်အခဲများပေါ်ပေါက်လာစေရန် ဒေါ်လာငွေများလျော့နည်းသွားစေမည်ဟုပြောဆိုခဲ့သည်။

သီရိလင်္ကာမှထုတ်လုပ်သော စီလွန်လက်ဖက်ခြောက်သည် နာမည်ကြီးလူကြိုက်များပြီး နှစ်စဉ်နိုင်ငံအတွင်းမှထုတ်လုပ်သော လက်ဖက်ခြောက်ကီလိုသန်း၂၅၀၏ ၉၅ရာခိုင်နှုန်းခန့် အား ပြည်ပသို့တင်ပို့ရောင်းချလျက်ရှိသည်။ နိုင်ငံအတွင်းရှိ လက်ဖက်ခြောက်လုပ်ငန်းများတွင် အလုပ်သမားအင်အား ၆၁၅၀၀၀ခန့်အပ်ထားရှိကာ လုပ်ငန်းများလည်ပတ်လျက်ရှိကြောင်းသိရသည်။

အစိုးရသည် အလုပ်သမားများ၏ တစ်ရက်တာလုပ်ခများအား ၁၀၀၀ရူပီမှ ၁၇၀၀ရူပီသို့တိုးမြှင့်ပေးရန် အမိန့်ပေးခဲ့ခြင်းဖြစ်သည်။ “ဒါဟာ တရားမျှတမှုမရှိပါဘူး။ ဒီဆုံးဖြတ်ချက်ဟာ မည်သည့်တိုင်ပင်ဆွေးနွေးခြင်းမှမရှိဘဲ ချမှတ်ခဲ့တာဖြစ်ပြီး သီရိလင်္ကာရဲ့လက်ဖက်ခြောက်အရည်အသွေးကို ကျဆင်းလာစေနိုင်ပါတယ်” ဟု စီလွန်လက်ဖက်ခြောက်စိုက်ပျိုးရေးတောင်သူများအသင်းမှ ပြောရေးဆိုခွင့်ရှိသူ Roshan Rajaduria က သတင်းထောက်များအား ပြောကြားခဲ့သည်။

လာမည့်လမှစတင်၍ လစာတိုးပေးရမည်ဟု သီရီလင်္ကာအလုပ်သမားဝန်ကြီးဌာနက ၂၆ရက်နေ့ (တနင်္ဂနွေ)တွင် ပြောကြားခဲ့ပြီး လိုက်နာရန်ငြင်းဆန်သည့် စိုက်ခင်းကုမ္ပဏီများကို အစိုးရက သိမ်းယူနိုင်ကြောင်း သတိပေးပြောကြားခဲ့သည်။ လုပ်ခလစာတိုးမြှင့်မှုကို အကောင်အထည်ဖော်ဆောင်ရွက်ပါက စိုက်ခင်းကုမ္ပဏီများအတွက် ရူပီ၃၅ဘီလီယံ ကုန်ကျမည်ဖြစ်ကြောင်း အဆိုပါအသင်းက ပြောကြားခဲ့သည်။

သီရိလင်္ကာနိုင်ငံ၏ ဘဏ္ဍာရေးအကြပ်အတည်းများကြောင့် လူဦးရေ၏ ၄ပုံ ၁ပုံခန့်သည် ဆင်းရဲနွမ်းပါးလာခဲ့ပြီး ထိုပြဿနာအားဖြေရှင်းရန်အတွက် စိုက်ခင်းကုမ္ပဏီများနှင့် အလုပ်သမားသမဂ္ဂများသည် အလုပ်သမားများကိုလစာတိုးပေးရန် လအတော်ကြာညှိနှိုင်းမှုများပြုလုပ်ခဲ့ကြကြောင်းသိရှိရပါသည်။

Source: Channelnewsasia.com

DOCA(ရန်ကုန်)

Languages

Main menu

ပြည်ပကုန်သွယ်မှုသတင်းများ

နှစ်ကြာမြင့်စွာ သိုလှောင်ထားသည့်ဆန်များ ထိုင်းနိုင်ငံမှတင်ပို့မည်ကို အာဖရိကနိုင်ငံများ စိုးရိမ်

အင်ဒိုနီးရှား၏ ပဉ္စမအကြိမ် ဆန်အဝယ်တင်ဒါ၌ ဗီယက်နမ်နှင့် မြန်မာတို့ လေလံအောင်မြင်

ထိုင်းနိုင်ငံတောင်ပိုင်း၌ ဆီအုန်းဈေးနှုန်း ကျဆင်းရသည့် အကြောင်းအရင်းကို အစိုးရက စုံစမ်းမည်

ဆန်ဖူလုံမှုရှိစေရန် အကောက်ခွန်ကို သုညရာခိုင်နှုန်းသို့ ဘရာဇီးအစိုးရ လျှော့ချ

ဥရောပသို့ တန်းမြင့်ဆန် တင်ပို့ရန် ကမ္ဘောဒီးယားကြိုးပမ်း

ဗီယက်နမ်၏ ကော်ဖီထွက်ရှိမှု ၂၀၂၃-၂၄ ခုနှစ်၌ ၂၀% ကျဆင်းခဲ့

ယခုနှစ်အတွင်း ဂျပန်ဈေးကွက်သို့ ထောပတ်သီးတင်ပို့နိုင်ရန် ဖိလစ်ပိုင်မျှော်လင့်

အိန္ဒိယနိုင်ငံ၌ ရွေးကောက်ပွဲအလွန်ကာလတွင် ပဲမျိုးစုံဈေးနှုန်းများ မြင့်တက်ဖွယ်ရှိ

Pages

You are here

ပြည်ပကုန်သွယ်မှုသတင်းများ

Pages