ပြည်ပကုန်သွယ်မှုသတင်းများ

   လူသားတွေအနေနဲ့ လပေါ်မှာအခြေချပြီးနေ ထိုင်နိုင်ဖို့ဆိုတာ စိတ်ကူးထဲမှာပဲအလုပ် ဖြစ်လိမ့်မယ်လို့ ထင်ခဲ့ဖူးပါတယ်။ ဘာဖြစ်လို့လဲဆိုတော့ လေ့လာတွေ့ရှိထားတဲ့ သိပ္ပံမှတ်တမ်း တွေအရ လရဲ့မျက်နှာပြင်ဟာ အင်မတန်မှခက်ထန် ကြမ်းတမ်းတယ်။ အပူချိန်ကလည်း အပြောင်းအလဲ အလွန်မြန်တယ်။ အသက်ရှူစရာအောက်ဆီဂျင်မရှိဘူး။ လူတစ်ယောက်အတွက် မရှိမဖြစ်လိုအပ်တဲ့ရေ ဆိုတာလည်းမရှိဘူးလို့ ကျွန်တော်တို့ မှတ်ယူခဲ့ကြတဲ့ အတွက်ဖြစ်ပါတယ်။ ဒါပေမဲ့ အခုအချိန်မှာတော့ ဒီစိတ်ကူးဟာ လက်တွေ့ဖြစ်လာတော့မယ့်အချိန်ကို ရောက်ရှိလာပြီလို့ဆိုနိုင်ပါတယ်။ ဘာကြောင့်လဲဆိုရင် လပေါ်မှာ လူသားတွေနေထိုင်နိုင်စေမယ့် နည်းပညာတစ်ခုကို တရုတ်သိပ္ပံပညာရှင်များက ဖော်ထုတ် လိုက်နိုင်လို့ပဲဖြစ်ပါတယ်။

   ရှန်းကျန့်မြို့ရှိ ဟောင်ကောင်တက္ကသိုလ်မှ သိပ္ပံပညာရှင်များက ဒီနည်းပညာကို ဖော်ထုတ်လိုက်တာပါ။ သူတို့ရဲ့နည်းပညာက လရဲ့မြေသားကနေ ရေကို ထုတ်ယူတယ်။ ပြီးတဲ့အခါ ကာဗွန်ဒိုင်အောက်ဆိုက် ကနေ အောက်ဆီဂျင်ကို ပြောင်းလဲနိုင်ဖို့နဲ့ လောင်စာ အတွက် ဓာတုပစ္စည်းများကို ရရှိနိုင်စေဖို့အတွက် အဲဒီ ရေကိုပဲ အသုံးပြုမှာဖြစ်ပါတယ်။ အခုနည်းပညာက  အနာဂတ်မှာ နက်ရှိုင်းကျယ်ပြောတဲ့ အာကာသထဲကို သွားရောက်လေ့လာမှုတွေ လုပ်ဆောင်နိုင်ဖို့အတွက် အခွင့်အလမ်းများကို ဖွင့်လှစ်ပေးနိုင်ခြင်းလည်း ဖြစ်ပါတယ်။ အကြောင်းရင်းကတော့ ရေနဲ့လောင်စာလို မျိုးမရှိမဖြစ်လိုအပ်တဲ့ အရင်းအမြစ်တွေကို ကမ္ဘာမြေ ဆီကနေ အပင်ပန်းခံသယ်ယူဖို့ မလိုအပ်တော့တဲ့ အတွက်ဖြစ်ပါတယ်။

မကြာသေးခင်က    တရုတ်နိုင်ငံရဲ့  အာကာသအေဂျင်စီက အောင်မြင်စွာ အကောင်အထည်ဖော်နိုင်ခဲ့တဲ့ Chang’e-5 မစ်ရှင်ကနေ လရဲ့မြေသားနမူနာများ ကိုရယူနိုင်ခဲ့ပါတယ်။ အဲဒီမြေသားနမူနာများကို စမ်းသပ်မှုအရ လရဲ့မျက်နှာပြင်မှာ ရေရှိတယ်လို့ သုံးသပ် ကြပါတယ်။ ဒီသုံးသပ်ချက်ကိုအခြေခံပြီး သိပ္ပံပညာ ရှင်များက လပေါ်မှာလူသားတွေ အခြေချနိုင်စေဖို့အတွက် နည်းပညာများကို ဖန်တီးလာတာပါ။

   အရင်တုန်းကဖန်တီးတဲ့ နည်းပညာများက လရဲ့ မြေသားကနေ ရေကိုထုတ်ယူနိုင်ဖို့အတွက် စွမ်းအင်သုံးစွဲမှုမြင့်မားတဲ့ အဆင့်ပေါင်းများစွာ လိုအပ်သလို လောင်စာဆီနဲ့ အခြားမရှိမဖြစ် လိုအပ်ချက်များစွာ အတွက် ကာဗွန်ဒိုင်အောက်ဆိုက်ကို ဖြိုခွဲနိုင်ခြင်း မရှိပါဘူး။

  အခုနောက်ဆုံးနည်းပညာကတော့ အဲဒီလိုမျိုး မဟုတ်ပါဘူး။ ဟောင်ကောင်တက္ကသိုလ်မှ သိပ္ပံပညာ ရှင်များက နေမှအလင်းရောင်ကို အပူအဖြစ်ပြောင်း လဲပေးတဲ့နည်းပညာမှ တစ်ဆင့် လရဲ့မြေသားကနေ ရေကို ထုတ်ယူပါတယ်။ ပြီးတဲ့အခါ အာကာသယာဉ် မှူးများရှူထုတ်လိုက်တဲ့ ကာဗွန်ဒိုင်အောက်ဆိုက်ကို ကာဗွန်မိုနောက်ဆိုက်နဲ့ ဟိုက်ဒရိုဂျင်အဖြစ် ပြောင်းလဲဖို့အတွက် လရဲ့မြေသားကနေရရှိတဲ့ ရေကိုအသုံး ပြုပါတယ်။ ပြောင်းလဲသွားတဲ့ ဓာတ်ငွေ့တွေကို အာကာသယာဉ်မှူးများ အသက်ရှူနိုင်စေမယ့် အောက်ဆီဂျင်နဲ့ အခြားသောလောင်စာများအတွက် အသုံး ပြုနိုင်ပါတယ်။

   သိပ္ပံပညာရှင်များအနေနဲ့ အခုလိုမျိုးအောင်မြင်မှု ရရှိပေမယ့်လည်း စိန်ခေါ်မှုတစ်ခုတော့ ရှိနေပါသေးတယ်။ အဲဒီစိန်ခေါ်မှုက လရဲ့မြေသားဟာတစ်နေရာ နဲ့တစ်နေရာဖွဲ့စည်းပုံခြင်း မတူညီမှုဖြစ်ပြီး ဒီလိုကွဲ ပြားခြားနား မှုကြောင့် နည်းပညာကို ထိရောက်စွာ အသုံးချနိုင် စွမ်းနည်းပါးနိုင်ပါသည်။

(DOCA ဧရာဝတီ)

           လာအိုနိုင်ငံသည် သွင်းကုန်လျှော့ချရန် ရည်ရွယ်ချက်ဖြင့် စိုက်ပျိုးရေးလုပ်ငန်းရှင်များ၏ အရင်းအနှီးရရှိရေး တိုးတက်စေခြင်းဖြင့် ပြည်တွင်းနှင့် ပို့ကုန်ဈေးကွက်အတွက် လယ်ယာထွက်ကုန်များ မြှင့်တင်ရန် ဆက်လက်ကြိုးပမ်းလျက်ရှိသည်။ လာအို လယ်ယာစီးပွားရေးအသင်းနှင့် လာအိုအသေးစားငွေရေးကြေးရေးအသင်းတို့သည် ပြည်တွင်းစားသုံးမှုနှင့် ပို့ကုန်များအတွက် သွင်းကုန်များ လျှော့ချထုတ်လုပ်နိုင်ရေးအတွက် နည်းပညာပူးပေါင်း ဆောင်ရွက်မှု နားလည်မှုစာချွန်လွှာကို လက်မှတ်ရေးထိုးခဲ့ကြောင်း လာအိုအမျိုးသားကုန်သည်များနှင့် စက်မှုလက်မှုလုပ်ငန်းရှင်များအသင်း (LNCCI) မှ ကြာသပတေးနေ့တွင် ပြောကြားခဲ့သည်။ အဆိုပါစာတမ်းသည် သတင်းအချက်အလက် မျှဝေရန်၊ စိုက်ပျိုးရေးစွန့်ဦး တီထွင်မှုမြှင့်တင်ရန်၊ သင်တန်းများပေးခြင်း၊ လုပ်ငန်းစီမံချက်များပြင်ဆင်ရာတွင် အဖွဲ့ဝင်များအား အထောက် အကူပြုစေရန်နှင့် နှစ်ဖက်အသင်းများအကြား ပူးပေါင်းဆောင်ရွက်မှုကို မြှင့်တင်ရန်ရည်ရွယ် ကြောင်း သိရှိရပါသည်။

Source: Xinhua

DOCA(ရန်ကုန်) 

          မက္ကဆီကိုနိုင်ငံသည် အမေရိကန်နှင့် သဘောတူညီချက်စာချုပ် သက်တမ်းကုန်ဆုံးပြီး နောက် ပြည်တွင်းထုတ်လုပ်မှုကို ကာကွယ်ရန်နှင့် ပြည်တွင်းထောက်ပံ့မှုကို ခိုင်မာစေရန်အတွက် လတ် ဆတ်သောခရမ်းချဉ်သီးများကို အနိမ့်ဆုံးတင်ပို့ခွင့် ဈေးနှုန်းသတ်မှတ်လိုက်ကြောင်း မက္ကဆီကိုနိုင်ငံ၏ စီးပွားရေးဝန်ကြီးဌာနနှင့် စိုက်ပျိုးရေးဝန်ကြီးဌာနက ၂၀၂၅ခုနှစ် သြဂုတ်လ ၁၀ရက်နေ့က ပူးတွဲ ထုတ်ပြန်ခဲ့ပါသည်။

          ဤဆုံးဖြတ်ချက်သည် မက္ကဆီကိုမှ အမေရိကန်သို့ ခရမ်းချဉ်သီးတင်ပို့မှုကို နှစ်နိုင်ငံအကြား ထိန်းချုပ်ထားသည့် ၂၀၁၉ သဘောတူညီမှုမှ ဝါရှင်တန်သည် ဇူလိုင်လတွင် နုတ်ထွက်ပြီးနောက် ထွက်ပေါ်လာခြင်းဖြစ်ကြောင်း သိရပါသည်။

          မက္ကဆီကိုနိုင်ငံမှ တင်သွင်းမည့် လတ်ဆတ်သောခရမ်းချဉ်သီးများကို အခွန် ၁၇ရာခိုင်နှုန်း ကောက်ခံမည့်ဟု ဇူလိုင်လ ၁၄ရက်နေ့တွင် Trump ကပြောကြားခဲ့ပါသည်။

          တစ်ကီလိုဂရမ်လျှင် အနည်းဆုံး ပို့ကုန်ဈေးနှုန်းမှာ ချယ်ရီနှင့် စပျစ်ခရမ်းချဉ်သီးများအတွက် ၁.၇၀ ဒေါ်လာ၊ရောမခရမ်းချဉ်သီးများအတွက် ၀.၈၈ဒေါ်လာ၊လုံးဝန်းသော ခရမ်းချဉ်သီးများအတွက် ၀.၉၅ ဒေါ်လာ၊ လုံးဝန်းပြီးအညှာပါသော ခရမ်းချဉ်သီးများအတွက် ၁.၆၅ ဒေါ်လာ သတ်မှတ်ထားပါ သည်။အခြားမျိုးကွဲများဖြစ်သည့် Cocktail နှင့် Heirloom ခရမ်းချဉ်သီးမျာအတွက် အနည်းဆုံးဈေး နှုန်း ၁.၇၀ဒေါ်လာ ကျသင့်မည်ဖြစ်ကြောင်း သိရပါသည်။

          မက္ကဆီကိုနိုင်ငံသည် ၂၀၂၄ခုနှစ်က ဒေါ်လာ ၃.၃ ဘီလီယံတန်ဖိုးရှိ ခရမ်းချဉ်သီးများ တင်ပို့ နိုင်ခဲ့ကြောင်း သိရှိရပါသည်။

          ထိုသဘောတူညီချက်ကို အစိုးရက သြဂုတ်လ ၈ရက်နေ့တွင် တရားဝင်ထု တ်ပြန်ပြီးနောက် မက္ကဆီကို ခရမ်းချဉ်သီးစိုက်ပျိုးသူများအသင်းက ထောက်ခံကြောင်းပြသခဲ့ သည်ဟု ဝန်ကြီးဌာနက ထပ်လောင်းပြောကြား ခဲ့ပါသည်။

Source : Reuters

DOCA(ရန်ကုန်)                                                                                   

             ကမ္ဘောဒီးယားနိုင်ငံ၏ တိုးပွားလာသော နိုင်ငံခြားတိုက်ရိုက်ရင်းနှီးမြှုပ်နှံမှု (FDI) သည် ၂၀၂၄ ခုနှစ်အထိ ကန်ဒေါ်လာ ၁.၇ ဘီလီယံကျော် ရှိသည်ဟု ကုလသမဂ္ဂ ကုန်သွယ်ရေးနှင့် ဖွံ့ဖြိုးတိုးတက်ရေးဆိုင်ရာညီလာခံ (UNCTAD) မှ ထုတ်ပြန်သည့် ကမ္ဘာ့ရင်းနှီးမြှုပ်နှံမှု အစီရင်ခံစာတွင် ဖော်ပြထားသည်။ UNCTAD သည် ကုန်သွယ်ရေး၊ ရင်းနှီးမြှုပ်နှံမှုနှင့် ဖွံ့ဖြိုးတိုးတက်ရေးဆိုင်ရာကိစ္စရပ်များကို ကိုင်တွယ်ဖြေရှင်းသည့် ကုလသမဂ္ဂ၏ အမြဲတမ်းအဖွဲ့ဖြစ်သည်။ ကုမ္ပဏီများသည် ၎င်းတို့၏ စျေးကွက်ကို ချဲ့ထွင်ရန်၊ အရင်းအမြစ်များကို ရယူရန်နှင့် အခြားနိုင်ငံများတွင် နည်းပညာအသစ်များရယူရန် ကြိုးပမ်းနေသောကြောင့် ၎င်းသည် ယှဉ်ပြိုင်နိုင်စွမ်း တိုးမြင့်လာမည့် လက္ခဏာတစ်ရပ်လည်း ဖြစ်သည်။ နိုင်ငံ၏ပြင်ပ FDI စတော့ရှယ်ယာသည် ၂၀၁၉ ခုနှစ်တွင် ကန်ဒေါ်လာ ၁ ဘီလီယံကျော်သွားခဲ့ပြီး ထိုအချိန်မှစ၍ ၂၀၂၄ ခုနှစ်ကုန်အထိ ကန်ဒေါ်လာ ၇၄၂ သန်းထပ်တိုးလာခဲ့သည်။ ၂၀၂၀ ခုနှစ်တွင် FDI စီးဆင်းမှုသည် ကန်ဒေါ်လာ ၁၂၇ သန်းရှိခဲ့ပြီး ၂၀၂၁ ခုနှစ်တွင် ကန်ဒေါ်လာ ၂၉ သန်းသို့ ကျဆင်းသွားခဲ့သည်။ အစီရင်ခံစာအရ အသားတင်ပြည်ပ FDI စီးဆင်းမှုနှင့် GDP အကြား အချိုးသည်  ၂၀၂၀ ခုနှစ်တွင် ၃.၄ ရာခိုင်နှုန်းမှ ၂၀၂၄ ခုနှစ်တွင် ၃.၇ ရာခိုင်နှုန်းအထိ တိုးတက်လာခဲ့ပါသည်။ ကမ္ဘောဒီးယားနိုင်ငံသည် ၂၀၂၅ ခုနှစ် ပထမနှစ်ဝက်တွင် FDI မှ ကန်ဒေါ်လာ ၅.၈ ဘီလီယံ ရရှိခဲ့ပြီး တစ်နှစ်ထက်တစ်နှစ် ၇၇ ရာခိုင်နှုန်း တိုးလာခဲ့ကြောင်း ကမ္ဘောဒီးယား၊ ဖွံ့ဖြိုးတိုးတက်ရေးကောင်စီ (CDC) ၏ အဆိုအရသိရသည်။

Source: Khmer Times

DOCA (ရန်ကုန်)

       အိန္ဒိယနိုင်ငံ၊ ကာနာတကာပြည်နယ်တွင် ပဲမျိုးစုံစိုက်ပျိုးထားရှိမှု ဧရိယာ ဟက်တာ ၄ သိန်းခန့်သည် ထိခိုက်ပျက်စီးဆုံးရှုံးမည့် အခြေအနေ တွေ့ကြုံနေရကြောင်း အိန္ဒိယစိုက်ပျိုးရေးဌာန၏ ခန့်မှန်းချက်အရ သိရှိရပါသည်။ အဆိုပါ ပြည်နယ်အတွင်း Dharwad, Belagave, Haveri, Gadag နှင့် Bagalkot  ခရိုင်များရှိ တောင်သူများသည် မေလလယ်ပိုင်း မိုးများ စတင်ရွာသွန်းချိန်၌ ပဲမျိုးစုံကို ဆောလျင်စွာ စိုက်ပျိုးခဲ့ကြပြီး ယခုအခါ သီးနှံရိတ်သိမ်းရန် အသင့်ဖြစ်နေချိန်တွင် အချိန်အခါမသင့် မိုးသည်းထန်စွာရွာသွန်းမှုကြောင့် ပျက်စီးဆုံးရှုံးမှုများ ဖြစ်ပေါ်လျက်ရှိသည်။

          ကာနာတကာပြည်နယ်တွင် ယခုနှစ် မိုးသီးနှံရာသီ၌ ပဲတီစိမ်းစိုက်ဧရိယာ ဟက်တာ ၂၃.၁၆ သိန်း စိုက်ပျိုးခဲ့ပြီး ၎င်း၏ ၇၀ ရာခိုင်နှုန်း (ဟက်တာ ၁၈ သိန်း) ခန့်သည် ပြည်နယ် အလယ်ပိုင်းနှင့် မြောက်ပိုင်းဒေသများတွင် စုစည်းလျက်ရှိသဖြင့် အဆိုပါ ခရိုင် ၅ ခုအတွက် အဓိကသီးနှံဖြစ်လျက်ရှိ သည်။ စီရင်စု ၁၄ ခုကျော်ရှိ တောင်သူလယ်သမားများမှာ ပဲတီစိမ်းကို ပုံမှန်စိုက်ပျိုးချိန်ထက် စော၍ မေလလယ် မိုးအစောပိုင်းကျရောက်ချိန်တွင် စိုက်ပျိုးခဲ့ကြခြင်းဖြစ်သည်။ သို့သော် ဇွန်လ နှင့် ဇူလိုင်လများတွင် မိုးရေချိန် ကြီးမားလွန်ကဲစွာ ဖြစ်ပေါ်ခဲ့ပြီး အပင်ပေါက်ကာစ သီးနှံစိုက်ခင်း ဧရိယာ ဟက်တာ ၂ သိန်းခန့်၌ ထိခိုက်ပျက်စီးစေခဲ့ရာ တောင်သူလယ်သမားအများစုအတွက် ပြောင်းသီးနှံကို ပြောင်းလဲစိုက်ပျိုးရန် တွန်းအားပေးခဲ့သည်။ ယခုထပ်မံ၍ ပဲတီစိမ်းစိုက်ဧရိယာ ဟက်တာ ၄ သိန်းခန့်သည် စိုက်ခင်းများရေဝင်၍ သီးနှံများ ပျက်စီးဆုံးရှုံးလျက်ရှိကြောင်း သိရှိရ သည်။

          ကာနာတကာပြည်နယ် အလယ်ပိုင်းနှင့် မြောက်ပိုင်းဒေသများမှ စိုက်ဧရိယာ ဟက်တာ ၄ သိန်းခန့် အပါအဝင်  ပြည်နယ်တစ်ဝန်း၌ မတ်ပဲသီးနှံကို ဧရိယာ ဟက်တာ ၁၁.၄၆ သိန်းခန့် စိုက်ပျိုးထားရှိမှုမှာလည်း ထိခိုက်ပျက်စီးမှု ဖြစ်ပေါ်လျက်ရှိသည်။ မတ်ပဲသီးနှံ၏ ပျက်စီးဆုံးရှုံးမှု သည် ၁၀-၁၅ ရာခိုင်နှုန်းခန့်ထိ ရှိနိုင်ကြောင်း အရာရှိများ၏ ခန့်မှန်းချက်အရ သိရှိရသည်။

          ယခင်နှစ်တွင်လည်း ဩဂုတ်လမိုးကြောင့် သီးနှံရိတ်သိမ်းထွက်ရှိမှုကို ထိခိုက်မှုရှိခဲ့ပြီး အထွက် ၅၀ ရာခိုင်နှုန်းမျှသာ ရရှိခဲ့ကြောင်း၊ ယခုနှစ်၌ စိုက်ပျိုးသီးနှံ ၆၀ ရာခိုင်နှုန်းခန့်မှာ ရေဝင်၍ ပျက်စီးဆုံးရှုံးမှုများ ဖြစ်‌ပေါ်လျက်ရှိကြောင်း Belagavi ခရိုင် Yawad ကျေးရွာရှိ မတ်ပဲနှင့် ပဲတီစိမ်း ဧက ၂၀ စိုက်ပျိုးသည့် တောင်သူ Mallikarjun Hiremath က ပြောကြားခဲ့သည်။ Nargund နှင့် Bagalkot ခရိုင်ရှိ တောင်သူလယ်သမားများမှလည်း မိုးကြောင့် သီးနှံများ ပျက်စီးဆုံးရှုံးခဲ့ကြောင်း ဆန္ဒထုတ်ဖော်ခဲ့သည်။ ပြီးခဲ့သည့် ၂ နှစ်တာကာလအတွက် သီးနှံပျက်စီး ဆုံးရှုံးမှုလျော်ကြေးနှင့် အာမခံကြေးများလည်း မရရှိသေးသည့်အတွက် တောင်သူများအနေဖြင့် ကျေနပ်မှု မရှိကြောင်း သိရှိရပါသည်။

          Nargund ခရိုင်ရှိ တောင်သူတစ်ဦးဖြစ်သူ Basangouda Malipatil က သီးနှံပျက်စီးဆုံးရှုံး မှုများ ဆက်တိုက်ဖြစ်ပေါ်နေခဲ့ကြောင်း၊ သီးနှံများအခြေအနေကောင်းမွန်သဖြင့် အထွက်ကောင်း လိမ့်မည်ဟု မျှော်မှန်းခဲ့ကြသော်လည်း ဩဂုတ်လမိုးကြောင့် သီးနှံအားလုံး ပျက်စီးဆုံးရှုံးခဲ့ကြောင်း၊ ယခုအခါ ရိတ်သိမ်းချိန်ဖြစ်သော်လည်း မိုးအဆက်မပြတ် ရွာသွန်းမှုကြောင့် စိုက်ခင်းအတွင်း ဝင်ရောက်လုပ်ကိုင်ရန်ပင် ခက်ခဲမှုရှိကြောင်း ပြောကြားခဲ့သည်။

          ကောက်ပဲသီးနှံ ကုန်စည်အဝယ်ဒိုင်များတွင်မူ ပဲတီစိမ်း တစ်ကွမ်တယ် (၁၀၀ ကီလိုဂရမ်) လျှင် ရူပီး ၉၀၀၀ နှုန်းထိ မြင့်တက်လာပြီး သီးနှံပျက်စီးဆုံးရှုံးမှုများ ဆက်လက်ဖြစ်ပေါ်နေပါက ထပ်မံ၍ ဈေးနှုန်းမြင့်တက်လာနိုင်သည်ဟု ဈေးကွက်ဆန်းစစ်သုံးသပ်သူများက ခန့်မှန်းထားသည်။

          တောင်သူများအနေဖြင့် ပဲတီစိမ်းသီးနှံကို ၁ နှစ်အတွင်း ၂ ကြိမ် စိုက်ပျိုးနိုင်ရန်အတွက် ယခုနှစ်၌ စောစီးစွာ စိုက်ပျိုးခဲ့သဖြင့် ပျက်စီးဆုံးရှုံးမှုပိုမိုခဲ့ကြောင်း စိုက်ပျိုးရေးအရာရှိများက ပြော ကြားခဲ့သည်။ Dharwad ခရိုင်တစ်ခုတည်းတွင်ပင် ပဲတီစိမ်းသီးနှံ စိုက်ဧရိယာ ဟက်တာ ၁ သိန်း ရှိပြီး တောင်သူ ၆၀ ရာခိုင်နှုန်းခန့်မှာ အစောပိုင်းစိုက်ပျိုးခဲ့ကြကြောင်း၊ ယခုကာလသည် သီးနှံရိတ် သိမ်းချိန် ဖြစ်သော်လည်း မိုးအဆက်မပြတ်ရွာသွန်းမှုကြောင့် အလွန်အမင်း စိုးရိမ်ဖွယ်ဖြစ်နေ ကြောင်း စိုက်ပျိုးရေး တွဲဖက်ညွှန်ကြားရေးမှူး Manjunath Antharvalli က ပြောကြားခဲ့သည်။

          ကာနာတကာပြည်နယ်တွင် ပဲတီစိမ်းနှင့် မတ်ပဲအပြင် ပဲပုပ်နှင့် ပြောင်းသီးနှံတို့သည်လည်း မိုးကြောင့် ပျက်စီးဆုံးရှုံးမှုများ ကြုံတွေ့နိုင်ဖွယ်ရှိကြောင်း Deccan Herald သတင်းဌာန၏ ဖော်ပြ ချက်အရ သိရှိရပါသည်။

Source: Deccan Herald, 25 August 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)