ပြည်ပကုန်သွယ်မှုသတင်းများ

    ဗီယက်နမ်နိုင်ငံ၏ ငရုတ်ကောင်းတင်ပို့မှုသည် ယခုနှစ် ပထမ(၅)လတာကာလတွင် အမေရိကန်ဒေါ်လာ ၄၉၃.၁သန်းတန်ဖိုးရှိသည့် ငရုတ်ကောင်းတန်ချိန် ၁၁၄၄၂၄တန်တင်ပို့ခဲ့ပြီး လွန်ခဲ့သည့်နှစ် တူညီသည့်ကာလထက် ပမာဏအားဖြင့် ၁၃.၂ရာခိုင်နှုန်းကျဆင်းခဲ့သော်လည်း တန်ဖိုးအားဖြင့် ၂၀.၆ရာခိုင်နှုန်းမြင့်တက်ခဲ့ကြောင်းသိရပါသည်။ အနက်ရောင်ငရုတ်ကောင်း၏ ပျမ်းမျှတင်ပို့မှုတန်ဖိုးမှာ တစ်တန်ကို အမေရိကန်ဒေါ်လာ၄၁၉၇ရှိပြီး အဖြူရောင်ငရုတ်ကောင်းမှာ တစ်တန်လျှင် အမေရိကန်ဒေါ်လာ၅၈၀၄ရှိကြောင်း၊ လွန်ခဲ့သည့်နှစ်၏ တူညီသည့်ကာလထက် အမေရိကန်ဒေါ်လာ၇၅၄နှင့် အမေရိကန်ဒေါ်လာ၈၄၉ စသည်ဖြင့် အသီးသီးမြင့်တက်ခဲ့ကြောင်းသိရပါသည်။ အမေရိကန်နိုင်ငံသည် တန်ချိန် ၃၀၄၆၆တန်ဖြင့် အကြီးမားဆုံးတင်သွင်းသူဖြစ်ပြီး စုစုပေါင်းပမာဏ၏ ၂၆.၆ရာခိုင်နှုန်းတင်သွင်းခဲ့ခြင်းဖြစ်ပြီး လွန်ခဲ့သည့်နှစ်၏ တူညီသည့်ကာလထက် ၄၄.၄ရာခိုင်နှုန်းတိုးမြှင့်တင်သွင်းခဲ့ခြင်းဖြစ်ကြောင်း သိရပါသည်။ အီတလီ၊ ဂျာမနီ၊ ရုရှားတို့မှာလည်း ၁၇ရာခိုင်နှုန်း၊ ၁၀၃.၂ရာခိုင်နှုန်းနှင့် ၄၉.၇ရာခိုင်နှုန်းတို့ဖြင့် ကြီးမားစွာပိုမိုတိုးမြှင့်ဝယ်ယူခဲ့ခြင်းဖြစ်ကြောင်းသိရပါသည်။ ဗီယက်နမ်နိုင်ငံသည် ငရုတ်ကောင်းတင်ပို့မှုကို အမေရိကန်၊ အိန္ဒိယ၊ ဂျာမနီ၊ နယ်သာလန်၊ တောင်ကိုရီးယားနှင့် အီဂျစ်တို့၏ဈေးကွက်များသို့ အရောင်းမြှင့်တင်မှုပြုလုပ်ခဲ့ခြင်းဖြစ်ကြောင်းသိရပါသည်။ ဈေးကွက်များစွာသို့တင်ပို့မှုမှာ ပမာဏနှင့် တန်ဖိုးတို့တွင် သိသာစွာမြင့်တက်ခဲ့ကြောင်းသိရပါသည်။ ဗီယက်နမ်နိုင်ငံ ငရုတ်ကောင်းနှင့် ဟင်းခတ်အမွှေးအကြိုင်အသင်း၏ ပြောကြားချက်အရ ယခုနှစ်အတွက် ဗီယက်နမ်နိုင်ငံ၏ ငရုတ်ကောင်းထုတ်လုပ်မှုပမာဏမှာ ခန့်မှန်းတန်ချိန် ၁၇၀၀၀၀တန်ဖြင့် လွန်ခဲ့သည့်နှစ်ထက် ၁၀ရာခိုင်နှုန်းလျော့နည်းနိုင်ကြောင်းနှင့် အဆိုပါပမာဏသည် ၅နှစ်အတွင်း အနိမ့်ဆုံးဖြစ်ကြောင်းသိရပါသည်။ ထို့ပြင် တခြားငရုတ်ကောင်းတင်ပို့သည့်နိုင်ငံများဖြစ်သည့် ဘရာဇီး၊ အင်ဒိုနီးရှား၊ အိန္ဒိယနှင့် အသေးစားထုတ်လုပ်ကြသည့် မလေးရှားနှင့် သီရိလင်္ကာနိုင်ငံတို့တွင်လည်း ထုတ်လုပ်မှုကျဆင်းနေကြောင်းသိရှိရပါသည်။

 Source: Vietnam Plus

DOCA(ရန်ကုန်)

     ဗီယက်နမ်နိုင်ငံတွင် ရင်းနှီးမြှုပ်နှံလျက်ရှိသည့် ကနေဒါစီးပွားရေးလုပ်ငန်းများ၏ အာရုံစိုက်မှုကိုဆွဲဆောင်ရန်နှင့် အရှိန်အဟုန်နှင့်တိုးတက်နေသည့် အာရှဈေးကွက်၌ အခွင့်အရေးများရှာဖွေနေကြသူများအတွက် ကနေဒါနိုင်ငံရှိ ဗီယက်နမ်ကုန်သွယ်ရေးရုံးသည် ကနေဒါနိုင်ငံမှ အေဂျင်စီများနှင့် တိုရွန်တိုမြို့တွင် စီးပွားရေးဆွေးနွေးပွဲကျင်းပရန် ညှိနှိုင်းလျက်ရှိပါသည်။ ကနေဒါနိုင်ငံ၊ ဗီယက်နမ်သံရုံးရှိ ကုန်သွယ်ရေးအတိုင်ပင်ခံပုဂ္ဂိုလ် Tran Thu Quynh က အခမ်းအနားတွင်ဆွေးနွေးမည့် ကျွမ်းကျင်သူများနှင့် ဆွေးနွေးမည့်သူများသည် ဗီယက်နမ်နိုင်ငံတွင် ကုန်သွယ်ရေးနှင့် ရင်းနှီးမြှုပ်နှံမှုအခွင့်အရေးနှင့်ပတ်သက်၍ အလွန်တန်ဖိုးထားလျက်ရှိကြောင်းမှတ်ချက်ပြုခဲ့ပါသည်။ Quynh က ဗီယက်နမ်နိုင်ငံတွင် စီမံကိန်းများလည်ပတ်လျက်ရှိသူများနှင့် စီမံကိန်းများပြုလုပ်ရန်စီစဉ်နေကြသူများသည် ဗီယက်နမ်နိုင်ငံကိုရင်းနှီးမြှုပ်နှံရန် လုံခြုံသည့်နေရာနှင့် အခွင့်အရေးကောင်းမြောက်များစွာရှိသည့် ဈေးကွက်တစ်ခုအဖြစ် စဉ်းစားလျက်ရှိကြောင်းပြောကြားခဲ့ပါသည်။ ကနေဒါစီးပွားရေးလုပ်ငန်းများအား နိုင်ငံခြားတွင်ရင်းနှီးမြှုပ်နှံရန် ပံ့ပိုးပေးလျက်ရှိသည့် နယ်ပယ်မှ ကျွမ်းကျင်ပညာရှင်များနှင့် လုပ်ငန်းများက ဗီယက်နမ်‌ဈေးကွက်သည် အခွင့်အရေးမြောက်များစွာရှိသည်သာမက အစိုးရအဆင့်အကုန်လုံး၏ ထိရောက်သည့်ပံ့ပိုးမှုရသည်ဟု ရှုမြင်ထားကြောင်းသိရပါသည်။ ထို့ပြင် ဗီယက်နမ်သည် တစ်ခြားနိုင်ငံများနှင့်ယှဉ်ပါက နိုင်ငံရေးတည်ငြိမ်မှု၊ ငွေကြေးစွန့်စားရခြင်းနည်းမှု၊ ဈေးကွက်တည်ငြိမ်မှုတို့ရရှိရန် အရှိန်မြှင့်ဆောင်ရွက်လျက်ရှိကြောင်းသိရပါသည်။ ကနေဒါနိုင်ငံ၏ အာရှပစိဖိတ်ဒေသဖောင်ဒေးရှင်း၏ ဒုတိယဥက္ကဋ္ဌဖြစ်သူ Christine Nakamura က ဗီယက်နမ်နိုင်ငံသည် အာဆီယံတွင် စီးပွားရေးတိုးတက်မှုအမြန်ဆုံးနိုင်ငံများအနက် တစ်ခုဖြစ်ပြီး နိုင်ငံခြားရင်းနှီးမြှုပ်နှံမှုများကို စွဲဆောင်လျက်ရှိ‌ကြောင်းနှင့် ကနေဒါလူမျိုးများသည်လည်း ဗီယက်နမ်ဈေးကွက်ကို စိတ်ဝင်စားလျက်ရှိကြောင်းပြောကြားခဲ့ပါသည်။ ယခုနှစ်၏ ပထမ(၅)လတွင် ကနေဒါနိုင်ငံမှ ဗီယက်နမ်နိုင်ငံသို့တင်ပို့မှုသည် ၂၇ရာခိုင်နှုန်းမြင့်တက်ခဲ့ကြောင်းသိရပါသည်။ ကနေဒါနိုင်ငံသည် ဗီယက်နမ်ဈေးကွက်တွင် ရင်းနှီးမြှုပ်နှံမှုစီမံကိန်းအသစ် ၁၀ခုနှင့် ကုမ္ပဏီချင်းပူးပေါင်းဆောင်ရွက်မည့်စီမံကိန်း ၁၃ခုထားရှိပြီးဖြစ်ပြီး စီမံကိန်းတစ်ခုချင်းစီသည် အမေရိကန်ဒေါ်လာ ၂သန်းတန်ကြေးရှိကြောင်း အချက်အလက်များအရသိရပါသည်။

Source: Vietnam Plus

DOCA(ရန်ကုန်)

     နှစ်နိုင်ငံမဟာဗျူဟာမြောက်ပူးပေါင်းဆောင်ရွက်ရေးနှင့် မိတ်ဖက်ဆက်ဆံရေးကို တိုးမြင့်ရန်သဘောတူညီခဲ့ကြပြီး ရလဒ်ကောင်းများရရှိနိုင်ရန် တရုတ်ဝန်ကြီးချုပ် Li Qiang နှင့် ပါကစ္စတန်ဝန်ကြီးချုပ် Shebbaz Sharif တို့သည် ဘေကျင်းမြို့တွင် ဇွန်လ ၈ရက်နေ့ကတွေ့ဆုံဆွေးနွေးခဲ့ကြသည်။

       တရုတ်နိုင်ငံသည် ၎င်း၏အိမ်နီးချင်းသံတမန်ဆက်ဆံ‌ရေးတွင် ပါကစ္စတန်ကို အမြဲဦးစားပေးခဲ့ပြီး ၎င်းတို့၏အစဥ်အလာချစ်ကြည်ရင်းနှီးမှုကို မြှင့်တင်ရန် အပြန်အလှန်အကျိုးရှိသော ပူးပေါင်းဆောင်ရွက်မှုတို့ကိုချဲ့ထွင်ရန်နှင့် တရုတ်ပါကစ္စတန်အသိုက်အဝန်းတည်ဆောက်ရေးကို အရှိန်မြှင့် တင်ရန်အတွက် ပါကစ္စတန်နှင့်လက်တွဲဖို့အသင့်ရှိကြောင်း Li က ပြောကြားခဲ့သည်။

    တရုတ်နိုင်ငံသည် ၎င်း၏နိုင်ငံတော်အချုပ်အခြာအာဏာ၊ လွတ်လပ်‌ရေးနှင့် နယ်မြေပိုင်ဆိုင်မှုကိုကာကွယ်ရန်နှင့် စည်းလုံးညီညွတ်ရေး၊ တည်ငြိမ်ရေး၊ လုံခြုံရေးနှင့်သာယာဝပြောရေးတို့ရရှိရန် ပါကစ္စတန်အား အခိုင်အမာထောက်ခံကြောင်း ဝန်ကြီးချုပ်က ဆက်လက်ပြောကြားခဲ့သည်။

     တရုတ်-ပါကစ္စတန်စီးပွားရေးစင်္ကြန် (CPEC) အဆင့်မြှင့်တင်ရေး၊ ဘုံဖွံ့ဖြိုးတိုးတက်ရေးအတွက် ကုန်သွယ်မှုနှင့်ရင်းနှီးမြှုပ်နှံမှုပူးပေါင်းဆောင်ရွက်မှုများ တိုးချဲ့လုပ်ဆောင်ရန်နှင့် စက်မှုလုပ်ငန်းဆိုင်ရာ ပူးပေါင်းဆောင်ရွက်မှုကိုမြှင့်တင်ရန် တရုတ်နိုင်ငံအနေဖြင့် ပါကစ္စတန်နှင့်ပူးပေါင်းဆောင်ရွက်သွားရန်ဆန္ဒရှိပြီး စိုက်ပျိုး‌ရေး၊ အာကာသ၊ သတင်းအချက်အလက်နည်းပညာ၊ ဂေဟစနစ်နှင့် သဘာဝပတ်ဝန်းကျင်ကာကွယ်‌ရေး အစရှိသောအခန်းကဏ္ဍများတွင် ပူးပေါင်းဆောင်ရွက်သွားမည်ဖြစ်ကြောင်းသိရသည်။

      တရုတ်နိုင်ငံသည် ပါကစ္စတန်နိုင်ငံမှ အရည်အသွေးမြင့်ကုန်ပစ္စည်းများကိုတင်သွင်းလိုပြီး ပါကစ္စတန်တွင်ရင်းနှီးမြှုပ်နှံရန် အရည်အချင်းပြည့်မီသော တရုတ်လုပ်ငန်းများကိုပံ့ပိုးကူညီရန်ဆန္ဒရှိကြောင်း LI က ပြောကြားခဲ့သည်။

     တရုတ်နိုင်ငံသည် ပါကစ္စတန်၏ အယုံကြည်ရဆုံးမိတ်ဖက်နိုင်ငံဖြစ်ပြီး ပါကစ္စတန်၏ စီးပွားရေးနှင့်လူမှုရေးဖွံဖြိုးတိုးတက်မှုတွင် တရုတ်နိုင်ငံ၏ကူညီပံ့ပိုးမှုအား ကျေးဇူးတင်ရှိကြောင်း ပါကစ္စတန်ဝန်ကြီးချုပ်က ပြောကြားခဲ့သည်။

         Belt and Road ပူးပေါင်းဆောင်ရွက်မှုမူဘောင်အရ CPEC ၏ တည်ဆောက်ရေးကိုတိုးတက်စေရန် ပါကစ္စတန်အနေဖြင့် တရုတ်နိုင်ငံနှင့်လက်တွဲဆောင်ရွက်လိုကြောင်း၊ စီးပွားရေး၊ ကုန်သွယ်ရေး၊ ရင်းနှီးမြှုပ်နှံမှု၊ စိုက်ပျိုးရေးနှင့် ယဥ်ကျေးမှု စသည့်နယ်ပယ်များတွင် ဖလှယ်မှုနှင့်ပူးပေါင်းဆောင်ရွက်မှုအားကောင်းလာစေရန်မျှော်လင့်ကြောင်း ပါကစ္စတန်ဝန်ကြီးချုပ်က ပြောကြားခဲ့သည်။

          ဆွေနွေးပြောကြားပြီးနောက် ဝန်ကြီးချုပ် Li နှင့် ဝန်ကြီးချုပ် Shehbez တို့သည် သယ်ယူပို့ဆောင်ရေး၊ စက်မှုလုပ်ငန်း၊ စိုက်ပျိုးရေး၊ စျေးကွက်စည်းမျဉ်း၊ အသက်မွေးဝမ်းကျောင်းမှု၊ စွမ်းရည်မြှင့်တင်ရေး၊ ရုပ်ရှင်နှင့် ရုပ်မြင်သံကြား စသည့်ကဏ္ဍများတွင် နှစ်နိုင်ငံပူးပေါင်းဆောင်ရွက်ရေးဆိုင်ရာစာရွက်စာတမ်းများ လက်မှတ်ရေးထိုးပွဲအခမ်းအနားသို့တက်‌‌ရောက်ခဲ့ကြသည်။

Source : Xinhua

DOCA(ရန်ကုန်)

     ၂၀၂၄ ခုနှစ်ပထမလေးလတွင် ထုတ်လုပ်မှုလျှော့ကျခဲ့သော်လည်း ထိုင်းနိုင်ငံမော်တော် ဆိုင်ကယ်ထုတ်လုပ်မှုပမာဏသည် ယခုနှစ်အတွက်ရည်မှန်းချက်ဖြစ်သည့်အစီးရေ (၂.၁၂)သန်း ကို ရောက်ရှိရန်မျှော်လင့်ရကြောင်း ထိုင်းနိုင်ငံစက်မှုလုပ်ငန်းအဖွဲ့ချုပ်(FTI) ပြောကြားခဲ့ပါသည်။ နိုင်ငံတွင် အိမ်ထောင်စုအကြွေးနှုန်းမြင့်တက်လာမှုကြောင့် ဘဏ်များမှာငွေချေးရာတွင် ပိုမိုစိစစ်လာမှုကြောင့် ကားထုတ်လုပ်သူများကဲ့သို့ မော်တော်ဆိုင်ကယ်ထုတ်လုပ်သူများမှာ စားသုံးသူများ၏ ဝယ်ယူနိုင်စွမ်းအားနည်းသည့်ပြသနာနှင့် ရင်ဆိုင်နေရကြောင်း သိရပါသည်။ FTI ၏ ဒုတိယ ဥက္ကဌနှင့် မော်တော်ယာဥ်စက်မှုလုပ်ငန်းအသင်း၏ ပြောခွင့်ရပုဂ္ဂိုလ်ဖြစ်သူ Surapong Paisitpatanapong က စျေးကွက်အတွင်း ဝယ်လိုအားရှိနေသည်ဟု ယုံကြည်သောကြောင့် ၎င်းတို့ ၏ ၂၀၂၄ ခုနှစ်အတွက်ထုတ်လုပ်မှုရည်မှန်းချက်ကို ထိမ်းသိမ်းထားကြောင်း ပြောကြားခဲ့ပါသည်။ ထို့ပြင် Surapong က ရောင်းချမှုများသည် မော်တော်ဆိုင်ကယ် မော်ဒယ်အသစ်များ ဖြန့်ချိမှု၊ လျှပ်စစ်ဆိုင်ကယ်များနှင့် အရောင်းပြပွဲများကျင်းပခြင်းတို့ကြောင့် အဆင်ပြေနိုင်မည်ဟု ပြောကြားခဲ့ပါသည်။ အသင်းသည် ယခုနှစ်အတွက်မော်တော်ဆိုင်ကယ် ထုတ်လုပ်မှုမှာ ပြည်တွင်းစျေးကွက်အတွက်အစီးရေ(၁.၇)သန်း၊ ပြည်ပစျေးကွက်အတွက်အစီးရေ (၄၂၀၀၀၀) ရှိမည်ဟု ခန့်မှန်းထားပါသည်။ ဇန်နဝါရီလမှဧပြီလထိ မော်တော်ဆိုင်ကယ်ထုတ်လုပ်မှုပမာဏမှာ အစီးရေ (၈၂၁၆၉၅)စီးဖြင့် လွန်ခဲ့သည့်နှစ်တူညီသည့်ကာလထက် (၃.၉၄)ရာခိုင်နှုန်းလျှော့ကျခဲ့ကြောင်းနှင့် ရောင်းချရမှုပမာဏသည်လည်းလျှော့ကျခဲ့ကြောင်း သိရပါသည်။ ပြည်ပစျေးကွက်သို့ တင်ပို့မှုမှာလည်း အစီးရေ(၅၂၇၇၀)စီးဖြင့် (၁၆.၇) ရာခိုင်နှုန်းကျဆင်းခဲ့ကြောင်း သိရပါသည်။

Source; Bangkok Post

DOCA(ရန်ကုန်)

    ဒတ်ချ်နိုင်ငံ၏ တစ်ပိုင်းလျှပ်ကူးပစ္စည်းများ ရေးဆွဲထုတ်လုပ်သည့် NXPကုမ္ပဏီနှင့် ထိုင်ဝမ် တစ်ပိုင်းလျှပ်ကူးပစ္စည်းထုတ်လုပ်သော TSMC ကုမ္ပဏီ၏ကျောထောက်နောက်ခံပြု Vanguard International တို့သည်မော်တော်ယာဥ်၊ စက်မှုလုပ်ငန်း၊ လူသုံးကုန်နှင့်မိုဘိုင်းကုန် စျေးကွက်များ ကိုဖြည့်ဆည်းပေးနိုင်ရန်အတွက် အမေရိကန်ဒေါ်လာ ၇.၈ဘီလီယံတန်ဖိုးရှိသော တစ်ပိုင်းလျှပ်ကူးပစ္စည်းထုတ်လုပ်မှုစက်ရုံကို စင်ကာပူနိုင်ငံတွင် တည်ဆောက်ရန် ဖက်စပ်ပူးပေါင်းဆောင်ရွက် မည်ဖြစ်ကြောင်း ကုမ္ပဏီများက ဇွန်လ ၅ ရက်နေ့ (ဗုဒ္ဓဟူးနေ့) က ထုတ်ပြန်ခဲ့သည်။

    Vanguard သည် ဖက်စက်လုပ်ငန်းတွင်ရှယ်ယာ ၆၀ ရာခိုင်နှုန်းဖြင့် အမေရိကန်‌ဒေါ်လာ ၂.၄ ဘီလီယံရင်းနှီးမြှုပ်နှံမည်ဖြစ်ပြီး NXP သည်အမေရိကန်‌ဒေါ်လာ ၁.၆ ဘီလီယံရင်းနှီးမြှုပ်နှံမည်ဖြစ်ပြီး ဖက်စပ်လုပ်ငန်း၏ရှယ်ယာ ၄၀ ရာခိုင်နှုန်းကို ကိုင်ထားကြောင်း ထုတ်ပြန်ချက်တွင် ဖော်ပြထားသည်။ကုမ္မဏီများသည် စက်ရုံ၏ရေရှည်စွမ်းဆောင်ရည်ကို ပံ့ပိုးရန်အတွက် နောက်ထပ် အမေရိကန်ဒေါ်လာ ၁.၉ ဘီလီယံကိုလည်း ပံ့ပိုးပေးမည်ဖြစ်သည်။

     စက်ရုံကို ၂၀၂၄ ခုနှစ် ဒုတိယနှစ်ဝက်တွင် စတင်တည်ဆောက်ရန် မျှော်မှန်းထားပြီး ၂၀၂၇ ခုနှစ်တွင် ကနဦးထုတ်လုပ်မှုကိုဖောက်သည်များထံသို့ချပြသွားမည်ဟုကုမ္မဏီများက ပြောကြားခဲ့သည်။ စည်းမျဥ်းစည်းကမ်းများ အတည်ပြုပြီးပါက ကနဦးဆောက်လုပ်မည့်အဆင့်ကို စတင်မည် ဖြစ်သည်။

     TSMC သည် တရုတ်နှင့်တင်းမာမှုများတိုးလာချိန်တွင် ထိုင်ဝမ်မှ၎င်း၏ထုတ်လုပ်‌ရေး စက်ရုံများကို ရွေ့ပြောင်းရန်ရှိမရှိပက်သက်၍ ၎င်း၏ဖောက်သည်များနှင့်ဆွေးနွေးမှုများ ပြုလုပ်ခဲ့သည်။ ထိုသို့သောအပြောင်းအလဲသည် မဖြစ်နိုင်သေးကြောင်း ကုမ္မဏီအကြီးတန်းအမှုဆောင် အရာရှိတစ်ဦးက အင်္ဂါနေ့တွင် ပြောကြားခဲ့သည်။

     NXP နှင့် TSMC တို့လုပ်ဆောင်မည့် ဖက်စပ်လုပ်ငန်းသည် စင်ကာပူနိုင်ငံတွင် အလုပ်အကိုင်ပေါင်း ၁၅၀၀၀ ခန့်ကိုဖန်တီးပေးနိုင်ရန် မျှော်လင့်ထားကြသည်။

      ယခုနှစ်အစောပိုင်းတွင် United Microelectronics Corp (UMC) သည် စင်ကာပူရှိ မိုက်ခရိုချစ်ပ်စက်ရုံအသစ်တွင် အမေရိကန်ဒေါ်လာ ၅ ဘီလီယံရင်းနှီးမြှုပ်နှံထားသေးကြောင်း သိရှိရပါသည်။

Source : Reuters    

DOCA(ရန်ကုန်)