အပြန်အလှန်ပူးပေါင်းဆောင်ရွက်မှု တိုးမြှင့်ရန် ဆွစ်ဇာလန်-ဗီယက်နမ် စီးပွားရေးဖိုရမ် ကြိုးပမ်း
အဆင့်မြင့်အရာရှိများ၏ဆွေးနွေးမှုမှသည် လက်တွေ့ပူးပေါင်းဆောင်ရွက်ခြင်းသို့ အသွင်ကူးပြောင်းရန်ရည်ရွယ်၍ ဆွစ်ဇာလန်-ဗီယက်နမ်စီးပွားရေးဖိုရမ် ၂၀၂၅ ကို ဗီယက်နမ်နိုင်ငံ Da Nang မြို့တော်တွင် နိုဝင်ဘာလ ၄ ရက်နေ့က စတင်ဖွင့်လှစ်ခဲ့ကြောင်း သိရပါသည်။ နိုဝင်ဘာလ ၃ ရက်နေ့မှ ၅ ရက်အထိ ၃ ရက်တာကျင်းပမည့်ထိုဖိုရမ်ကို အစိုးရအေဂျင်စီများနှင့် စီးပွားရေးလုပ်ငန်းများ၊ ရင်းနှီးမြှုပ်နှံသူများ၊ တက္ကသိုလ်ကျောင်းသားများနှင့် ဆွစ်ဇာလန်၊ ဗီယက်နမ်၊ ဥရောပနှင့် အရှေ့တောင်အာရှမှ စီးပွားရေးမိတ်ဖက်များပါဝင်သော ပြည်တွင်းနှင့် ပြည်ပမှ ကိုယ်စားလှယ် ၄၀၀ နီးပါးတက်ရောက်ခဲ့ကြောင်း သိရပါသည်။ ဗီယက်နမ်နိုင်ငံဆိုင်ရာ ဆွစ်ဇာလန်သံအမတ် Thomas Gass က ကုန်သွယ်ရေးတံခါးများဖွင့်လှစ်ထားသည့်မူများအရ နှစ်နိုင်ငံစလုံးသည် ဆန်းသစ်တီထွင်မှုမောင်းနှင့် သည့်ကြီးထွားမှုတွင် ပွင့်လင်းမြင်သာမှုကို မြှင့်တင်နိုင်မည်ဖြစ်ကြောင်းနှင့် ထိုဖိုရမ်သည် ၎င်းတို့၏မိတ်ဖက်ဖွဲ့မှုအားကောင်းရန်အတွက် ဗဟုသုတများဝေမျှရန်နှင့် ကတိကဝတ်များတိုးမြှင့်ရန် စင်မြင့်တစ်ခုဖြစ်သည်ဟု ယုံကြည်ကြောင်း ပြောကြားခဲ့ပါသည်။ ဗီယက်နမ်နိုင်ငံခြားရေးရာ ဒုတိယဝန်ကြီး Le Thi Thu Hang က ဆွစ်ဇာလန် နိုင်ငံတွင် ၂၀၂၄ ခုနှစ် ဇွန်လကကျင်းပခဲ့သည့် ပထမကြိမ်မြောက်ဖိုရမ်သည် အစိမ်းရောင်အသွင် ကူးပြောင်းမှု၊ ဒစ်ဂျစ်တယ်အသွင်ကူးပြောင်းမှု၊ လုပ်သားထုလေ့ကျင့်ရေးနှင့် သန့်စင်သောစွမ်းအင် အစရှိသည့် ပူးပေါင်းဆောင်ရွက်ရန် ဦးစားပေးဧရိယာများကို ခွဲခြားနိုင်ရန် အခြေခံအုတ်မြစ်ဖြစ်ခဲ့ ကြောင်း ပြောကြားခဲ့ပါသည်။ ဆွစ်ဇာလန်သည် လတ်တလောတွင် ဗဟိုဥရောပတွင် ဗီယက်နမ်၏ အရေးပါသောကုန်သွယ်ရေးမိတ်ဖက်ဖြစ်ပြီး ၆ ခုမြောက် အကြီးမားဆုံးဥရောပရင်းနှီးမြှုပ်နှံသူ ဖြစ်ကြောင်း သိရပါသည်။ Hang ကဖိုရမ်သည် စီးပွားရေးမိတ်ဖက်ဖွဲ့မှုတစ်ခုသာမက ဗီယက်နမ်အား ၎င်းတို့၏ရည်ရွယ်ချက်ဖြစ်သည့် အစိမ်းရောင်ဖွံ့ဖြိုးတိုးတက်မှု၊ ဆန်းသစ်တီထွင်မှုနှင့် လူထုဗဟိုပြုကြီးထွားရေးတို့ အကောင်အထည်ဖော်ရန် ကူညီပေးမည့် ရေရှည်မိတ်ဖက်ဖွဲ့မှုဖြစ်ကြောင်း ပြောကြားခဲ့ပါသည်။ ဖိုရမ်၏ဥက္ကဌဖြစ်သူ Ho Quang Buu ၏အဆိုအရ ဖိုရမ်သည် မြို့တော်၏ကတိကဝတ်ဖြစ်သည့် နိုင်ငံတကာပူးပေါင်းဆောင်ရွက်ရေး၊ စဉ်ဆက်မပြတ်ဖွံ့ဖြိုး တိုးတက်ရေးနှင့် ဆန်းသစ်တီ ထွင်မှုမောင်းနှင့်သည့်ကြီးထွားရေးတို့အတွက် သက်သေပြချက် တစ်ခုဖြစ်ကြောင်းသိရပါသည်။ ထောက်ပံ့ပို့ဆောင်ရေးအားကောင်းစွာချိတ်ဆက်နိုင်မှု၊ ကျွမ်းကျင် သောဒစ်ဂျစ်တယ်လုပ်သားထုနှင့် ဆန်းသစ်တီထွင်သည့်စီးပွားရေးဝန်းကျင်တို့ကို ပိုင်ဆိုင်ထားသည့် Da Nang သည် ဆွစ်ဇာလန်နှင့် ဗီယက်နမ်မိတ်ဖက်များကို ချိတ်ဆက်ရန်နှင့် ဥရောပ-အာဆီယံ စင်္ကြန်တစ်လျှောက် ပူးပေါင်းဆောင်ရွက်မှုများတိုးချဲ့ရန် စင်မြင့်တစ်ခုအနေဖြင့် ပံ့ပိုးပေးနိုင်ကြောင်း သိရှိရပါသည်။
Vietnam Plus
DOCA (ရန်ကုန်)
