ပြည်ပကုန်သွယ်မှုသတင်းများ

            ပင်လယ်စာ၊ အရည်အသွေးမြင့်သောဆန်၊ သစ်သီးများနှင့် အဝတ်အထည်များအစရှိသည့် အဓိကထုတ်ကုန်များအား ပြုပြင်ထုတ်လုပ်မှုအရှိန်မြှင့်တင်ခြင်းအားဖြင့် ဗီယက်နမ်၏ Soc Trang ပြည်နယ်သည် ၂၀၂၅ ခုနှစ်တွင် အမေရိကန်ဒေါ်လာ ၁.၉ ဘီလီယံတန်ဖိုးတင်ပို့ရန် ရည်ရွယ် ထားကြောင်း သိရပါသည်။ ထိုရည်မှန်းချက်ပြည့်မီရန် ပြည်နယ်သည် ထုတ်ကုန်အရည်အသွေး မြှင့်တင်ခြင်း၊ ဒီဇိုင်းကွဲပြားခြင်းနှင့် ဈေးကွက်တိုးချဲ့ရန် အာရုံစိုက်ထားကြောင်း သိရပါသည်။ အချို့သောစီးပွားရေးလုပ်ငန်းများအတွက် နာလံထူမှုနှေးကွေးခြင်းပါဝင်သည့် စိန်ခေါ်မှုများ ၂၀၂၄ ခုနှစ်တွင်ရှိခဲ့သော်လည်း ပြည်နယ်သည် တင်ပို့မှုမှတစ်ဆင့် အမေရိကန် ၁.၈ ဘီလီယံရရှိခဲ့ ကြောင်း သိရပါသည်။ အဓိကဝင်ငွေရရှိခဲ့သည့် ပို့ကုန်များတွင် ပင်လယ်စာ(အမေရိကန်ဒေါ်လာ ၉၁၀ သန်း)နှင့် ဆန်(အမေရိကန်ဒေါ်လာ၇၉၈ သန်း)တို့ဖြစ်ကြောင်းသိရပါသည်။ ဆန်တင်ပို့မှု သိသာစွာကြီးထွားလာရခြင်းသည် တန်ချိန် ၁.၃ သန်းနီးပါးဖြင့် များပြားစွာထုတ်လုပ်နိုင်ခြင်းနှင့် အရည်အသွေးမြင့်တက်ခဲ့ခြင်းကြောင့် ဖြစ်ကြောင်းသိရပါသည်။ ပြည်နယ်၏ဆန်သည် အားကောင်းသော ဂုဏ်သတင်းရရှိနေပြီး ဗီယက်နမ်ဆန်အမှတ်တံဆိပ်ကို ကမ္ဘာ့အဆင့်တွင် ပိုမိုကျယ်ပြန့်စေခဲ့ကြောင်းသိရပါသည်။ လာမည့်အချိန်တွင် ပြည်နယ်သည် ၎င်းတို့၏အထူးဆန်မျိုးကွဲများကိုမြှင့်တင်ရန်၊ ဆန်အမှတ်တံဆိပ်ခိုင်မာစေရေးတည်ဆောက်ရန်နှင့် ပို့ကုန်မြှင့်တင်ရန်အတွက် သိပ္ပံနည်းကျဈေးကွက်ရှာဖွေရန် စီစဉ်နေကြောင်းသိရပါသည်။ သင့်လျော်သောဈေးကွက် အခြေအနေများနှင့် ယှဉ်ပြိုင်နိုင်စွမ်းရှိသောဈေးနှုန်းများနှင့်အတူ Soc Trang ၏ ဆန်တင်ပို့မှုသည် လာမည့်နှစ်များတွင် ဆက်လက်အားကောင်းနေရန် မျှော်လင့်ရကြောင်း သိရှိရပါသည်။

Vietnam Plus

DOCA(ရန်ကုန်)                  

          တရုတ်နိုင်ငံ၏ ကျော်ကြားသော မော်တော်ကားထုတ်လုပ်သူ Great Wall Motors သည် ၎င်း၏ စွမ်းအင်သုံး SUV ကားအသစ်အား ဘရူးနိုင်းတွင် မိတ်ဆက်ပွဲအခမ်းအနားကျင်းပခဲ့ပြီး ပြည်တွင်းဈေးကွက်မှ နွေးထွေးစွာ ကြိုဆိုမှုကို ခံယူခဲ့သည်။ ဘရူးနိုင်းနိုင်ငံမြို့တော် Bandar Seri Begawan ရှိ GWM Experience Center အသစ်တွင် သောကြာနေ့က မိတ်ဆက်ပွဲအခမ်းအနားသို့ ဧည့်သည်များနှင့် ဒေသခံသုံးစွဲသူ ၂၀၀ နီးပါး တက်ရောက်ခဲ့သည်။ အခမ်းအနားတွင် ဘရူးနိုင်းနိုင်ငံဆိုင်ရာတရုတ်သံအမတ်ကြီး Xiao Jianguo နှင့် ဘရူနိုင်းနိုင်ငံမှ ဧည့်သည်တော်များသည် ကားအသစ်ကို မိတ်ဆက်ပြသခဲ့သည်။ ဘရူးနိုင်းနိုင်ငံ၏ အထင်ကရမော်တော်ကား ရောင်းဝယ်ရေး Berjaya Sdn Bhd ၏ မန်နေဂျင်းဒါရိုက်တာ Pengiran Erwan Ab Rahanan က GWM Tank 500 ကို မိတ်ဆက်ခြင်းသည် ဘရူးနိုင်းနိုင်ငံသို့ တရုတ်မော်တော်ယာဉ်ဆန်းသစ်တီထွင်မှုနည်းပညာများကို ယူဆောင်လာရန် ကုမ္ပဏီ၏ ကတိကဝတ်ကို သက်သေပြလျက်ရှိကြောင်း ပြောကြားခဲ့သည်။ တရုတ်မော်တော်ကား အမှတ်တံဆိပ်များသည် မကြာသေးမီနှစ်များအတွင်း ဘရူးနိုင်းဈေးကွက် တွင် ပိုမိုရေပန်းစား လာခဲ့သည်။ Great Wall Motor သည် ၂၀၂၁ ခုနှစ်တွင် ဈေးကွက်သို့ တရားဝင် ဝင်ရောက် လာချိန်မှစ၍ မော်တော်ကားအမျိုးမျိုး အစီးရေ ၁၀၀၀ နီးပါးကို ရောင်းချနိုင်ခဲ့ပြီး ရောင်းအား အရှိန်အဟုန်ဖြင့် တိုးလာခဲ့ကြောင်း Great Wall Motor ၏ ဒေသတွင်းဈေးကွက် ရှာဖွေရေး ဒါရိုက်တာ Zhao Meng မှပြောကြားခဲ့ကြောင်းသိရှိရပါသည်။

DOCA(ရန်ကုန်)

             ကမ္ဘောဒီးယားနိုင်ငံ၊ Siem Reap ပြည်နယ်အခြေစိုက် ငါးလုပ်ငန်းလုပ်ကိုင်သည့် Home Taste Food Enterprise သည် ၎င်းတို့၏ ပြုပြင်ထားသောငါးထွက်ကုန်များကို ဩစတြေးလျ နိုင်ငံသို့တင်ပို့ခဲ့ပြီး ပြည်ပဈေးကွက်တွင် ဝယ်လိုအားတိုးပွားလာမှုကိုဖြည့်ဆည်းပေးခဲ့သည်။ တင်ပို့ရောင်းချသူများသည် ကုမ္ပဏီ၏နိုင်ငံတကာလက်လှမ်းမီမှုကိုချဲ့ထွင်ရန်နှင့် ဩစတြေးလျ တွင် အရည်အသွေးမြင့်ငါးထွက်ကုန်များဝယ်လိုအားကို ဖြည့်ဆည်းရန်ကုမ္ပဏီ၏ ကတိကဝတ် ကိုပြသခဲ့ပြီး လုပ်ငန်းအတွက်သိသာထင်ရှားသောလှုပ်ရှားမှုတစ်ရပ်ဖြစ်ကြောင်း Home Taste Food Enterprise တည်ထောင်သူ Sim Sereirath ကပြောကြားခဲ့သည်။ ပို့ကုန်ကုမ္ပဏီ Polycell (Cambodia) Co.,Ltd နှင့်ပူးပေါင်း၍ ပြုပြင်ပြီးငါးတန်ချိန် ၃ တန်ကျော်ကို ၂၀၂၄ ခုနှစ်၊ ဒီဇင်ဘာလ ၂၄ ရက်နေ့တွင်တင်ပို့ခဲ့ပြီးလာမည့်အပတ်တွင် ဈေးကွက်သို့ရောက်ရှိရန်စီစဉ်ထား ကြောင်း Sim Sereirath ကပြောကြားခဲ့သည်။ ၂၀၂၄ ခုနှစ်၊ ဧပြီလအတွင်း အဆိုပါ Home Taste Food Enterprise သည်၎င်း၏ ပထမအသုတ်ငါးထွက်ကုန်များ ၄.၇ တန်ကို ဩစတြေးလျ နိုင်ငံသို့တင်ပို့ခဲ့ပြီး နိုင်ငံခြားဈေးကွက်သို့ငါးထွက်ကုန်တင်ပို့သည့် ပထမဆုံးသောကမ္ဘောဒီးယား ကုမ္ပဏီဖြစ်လာခဲ့သည်။ စိုက်ပျိုးရေး၊ သစ်တောနှင့် ရေလုပ်ငန်းဝန်ကြီးဌာန (MAFF) သည် အဓိကလုပ်ဖော်ကိုင်ဖက်များနှင့်ပူးပေါင်းကာ ငါးလုပ်ငန်းလုပ်ကိုင်သူများ၏ အရည်အသွေးနှင့် တစ်ကိုယ်ရေသန့်ရှင်းမှု စစ်ဆေးခြင်းများကိုသေချာစေရန်အတွက် ပြည်တွင်းငါးလုပ်ငန်းကို ဆက်လက်ပံ့ပိုးပေးနေကြောင်း (MAFF) မှ ပြောရေးဆိုခွင့်ရှိသူ Im Rachna က ပြောကြားခဲ့သည်။ ကမ္ဘောဒီးယားနိုင်ငံစီးပွားရေးနှင့်ကူးသန်းရောင်းဝယ်ရေးဝန်ကြီးဌာန (MoC) ၏ ကိန်း ကဏန်းများအရ နိုင်ငံတော်သည် ၂၀၂၄ ခုနှစ်အတွင်း ပြည်ပနိုင်ငံများသို့ အမေရိကန်ဒေါ်လာ ၉၃၀,၀၀၀ သန်းခန့် ငါးထွက်ကုန်များတင်ပို့ခဲ့ပြီး ၂၀၂၃ ခုနှစ်ထက် ၈၆ ရာခိုင်နှုန်းမြင့်တက်လာခဲ့ကြောင်းသိရှိရပါသည်။

Source: Khmer Times

DOCA(ရန်ကုန်)

             ၂၀၂၄ ခုနှစ်အတွင်း အာဖဂန်နစ္စတန်၏ စုစုပေါင်း ကုန်သွယ်မှုပမာဏသည် အမေရိကန် ဒေါ်လာ ၁၂ ဘီလီယံကျော်ရှိပြီး တစ်နှစ်ထက်တစ်နှစ် သွင်းကုန် ၃၈% တိုးလာပြီး ပို့ကုန် ၄% လျော့ကျသွားကြောင်း အာဖဂန်နစ္စတန်နိုင်ငံ၏ ကူးသန်းရောင်းဝယ်ရေးနှင့် စက်မှုလက်မှု လုပ်ငန်းဝန်ကြီးဌာန၏ ပြောကြာချက်အရသိရသည်။ အာဖဂန်နစ္စတန်၏ ကုန်ပစ္စည်း စုစုပေါင်း ကုန်သွယ်မှုပမာဏသည် ၂၀၂၄ ခုနစ်တွင် ဒေါ်လာ ၁၂.၄၂ ဘီလီယံရှိပြီး နိုင်ငံ၏ပို့ကုန်ပမာမှာ ဒေါ်လာ ၁.၈ ဘီလီယံခန့်ရှိပြီး သွင်းကုန်ပမာဏမှာ ဒေါ်လာ ၁၀.၆ ဘီလီယံခန့်ရှိကြောင်း ဝန်ကြီးဌာန၏ ပြောရေးဆိုခွင့်ရှိသူ Akundzada Abdul Salam Jawad တနင်္ဂနွေနေ့က ပြောကြားချက်ကိုကိုးကား၍ Tolonews က ဖော်ပြခဲ့သည်။ အာဖဂန်နစ္စတန်မှ အီရန်၊ ကာဇက်စတန်၊ ဥဇဘက်ကစ္စတန်နှင့် အာရပ်စော်ဘွားများ ပြည်ထောင်စုသို့ တင်ပို့မှုသည် ၂၀၂၄ ခုနှစ်အတွင်း နှစ်ဆတိုးလာကြောင်းသိရသည်။ စိုက်ပျိုးရေးထွက်ကုန်များ၊ ပြုပြင်ပြီး စားသောက်ကုန်များ၊ အထည်အလိပ်များ၊ သားရေ၊ လျှပ်စစ်အစိတ်အပိုင်းများနှင့် ဆောက်လုပ်ရေးပစ္စည်းများသည် အာဖဂန်နစ္စတန်နိုင်ငံတွင်းသို့ တင်သွင်းသူများအကြား ရေပန်းစားသော ကုန်ပစ္စည်းများဖြစ်သည်။ ၂၀၂၄ ခုနှစ်အတွင်း အာဖဂန်နစ္စတန်မှ အဓိကတင်ပို့သောပို့ကုန်များမှာ ကျောက်မီးသွေး၊ သစ်သီးခြောက်များ၊ လက်ယက်ကော်ဇောများ၊ အဖိုးတန်ကျောက်မျက်ရတနာများပါဝင်ကြောင်း သိရှိရပါသည်။

Source : Xinhua

DOCA(ရန်ကုန်)

  ကမ္ဘောဒီးယားနိုင်ငံတွင် စပါးစတင်ရိတ်သိမ်းချိန်ကာလ၌ ဗီယက်နမ်ကုန်သည်များဘက်မှ ကုန်အဝယ် အမှာစာများ လျှော့ချမှုကြောင့် စပါးဈေးနှုန်းများကျဆင်းပြီး စိုက်ပျိုးသူများအတွက် ငွေကြေးဆုံးရှုံးမှုများ ဖြစ်ရသည်ဟု ကမ္ဘောဒီးယား လယ်သမားများက အပြစ်တင်ပြောဆိုလျက်ရှိ ကြောင်း Cambodianess အင်တာနက်သတင်းစာမျက်နှာက ဖော်ပြပါသည်။

  ကမ္ဘောဒီးယား ဆန်စပါးအသင်းချုပ်၏ မူဝါဒရေးရာကောင်စီ ဥက္ကဋ္ဌ Hun Lak က ဗီယက်နမ်နိုင်ငံ၌ နှစ်သစ်ကူးပွဲတော်ကာလ မတိုင်မီတွင် ကုန်သည်များသည် အလုပ်အားလပ်ရက် အနားယူလေ့ရှိသဖြင့် ပုံမှန်အားဖြင့် အမှာစာများ ကျဆင်းလေ့ရှိကြောင်း၊ ဗီယက်နမ်၏ စပါး ဝယ်ယူမှုသည် ယခင်နှစ်ကာလနှင့် နှိုင်းယှဉ်ပါက လျော့နည်းလျက်ရှိကြောင်း၊ ၎င်းတို့အနေဖြင့် ဈေးကွက်အခြေအနေကို အခြေပြုလျက် ဝယ်ယူသည့်ပမာဏကို အတိုးအလျော့ လုပ်ကိုင်နေခြင်း ဖြစ်ကြောင်း ပြောကြားခဲ့သည်။

   ဗီယက်နမ်ကုန်သည်များလက်ဝယ်၌ စပါးသိုလှောင်ထားရှိမှုပိုလျှံနေခြင်းက ကမ္ဘောဒီးယား လယ်သမားများအတွက် ဈေးနှုန်းကျဆင်းမှုကို ဖြစ်ပေါ်စေလျက်ရှိသည်။ Phka Rumduol နှင့် Sen Kro Ob (SKO) တို့ ကဲ့သို့သော ကမ္ဘောဒီးယား၏ မဟာဗျူဟာမြောက် စပါးမျိုးများ၏ ဈေးနှုန်းများ မှာမူ တည်ငြိမ်လျက်ရှိသည်။ သို့သော် ဗီယက်နမ်သို့ အဓိကတင်ပို့ရောင်းချသည့် OM နှင့် ER ကဲ့သို့ သော နိုင်ငံခြားစပါးမျိုးများ၏ ဈေးနှုန်းများမှာ ဗီယက်နမ်ကုန်သည်များ၏ ဈေးနှုန်းများကို အဆုံး အဖြတ်ပေးမှုအရ သိသာစွာ ကျဆင်းမှုဖြစ်ပေါ်နေခြင်းဖြစ်သည်။

    ကမ္ဘောဒီးယား စိုက်ပျိုးရေးဝန်ကြီးဌာနနှင့် ဆန်စပါးအသင်းချုပ်တို့က တောင်သူများ အနေ ဖြင့် ဆန်စက်များသို့ မြင့်မားသောဈေးနှုန်းဖြင့် စပါးဝယ်ယူရောင်းချမှု သဘောတူစာချုပ်များ ချုပ်ဆိုနိုင်ရန်နှင့် အထောက်အပံ့များကို ရယူနိုင်ရန်အတွက် နိုင်ငံ၏ မဟာဗျူဟာ၌ ပါဝင်လျက်ရှိ သော စပါးမျိုးများအား စိုက်ပျိုးကြရန် ထပ်တလဲလဲ တိုက်တွန်းပြောဆိုလျက်ရှိခဲ့သည်။

    ဗီယက်နမ်မှ OM စပါးမျိုးကို ရယူစိုက်ပျိုးလုပ်ကိုင်သည့် Svay Rieng ပြည်နယ်မှ တောင်သူ တစ်ဦးဖြစ်သူ Lanh Tha ကမူ အစိုးရကတွန်းအားပေးလျက်ရှိသော စပါးမျိုးများအား စိုက်ပျိုးရန်မှာ ၎င်းတို့အတွက် အခက်အခဲရှိကြောင်း၊ ထိုကဲ့သို့သော တန်ဖိုးကြီး စပါးမျိုးများအား စိုက်ပျိုးမှုမှာ ရိတ်သိမ်းရရှိရန် အချိန်ကြာမြင့်မှုရှိပြီး OM စပါးမျိုးကဲ့သို့ အထွက်နှုန်း မြင့်မားမှု မရှိကြောင်း၊ Phka Rumduol စပါးမျိုးအား တစ်နှစ်လျှင်တစ်ကြိမ်သာ စိုက်ပျိုးနိုင်မှုရှိပြီး OM စပါးမျိုးမှာမူ တစ်နှစ်တာ ကာလအတွင်း နှစ်ကြိမ်မှသုံးကြိမ်အထိ စိုက်ပျိုးနိုင်ကြောင်း၊ ယခင်နှစ်၌ Phka Rumduol စပါး ၁ ကီလိုဂရမ်လျှင် ရီယယ်ငွေ ၁၀၂၀ မှ ၁၀၅၀ အတွင်းသာ ဈေးရရှိချိန်တွင် OM စပါး ၁ ကီလိုဂရမ်၏ ဈေးနှုန်းမှာ ၁၁၂၀ ရီယယ်ရရှိခဲ့ကြောင်း၊ သို့ဖြစ်ရာ လယ်သမားများ အနေဖြင့် OM စပါးမျိုးကို ပြောင်းလဲ စိုက်ပျိုးခဲ့ကြခြင်းဖြစ်ကြောင်းဖြင့် ပြောဆိုခဲ့သည်။

  Takeo ပြည်နယ်မှ အမည်မဖော်လိုသော အခြားလယ်သမားတစ်ဦးကလည်း OM နှင့် ER စပါးမျိုးများသည် အထွက်နှုန်းမြင့်မားမှုရှိပြီး ဗီယက်နမ်ဘက်မှ ဈေးကွက်ဝယ်လိုအားရှိမှုအရ ၎င်း တို့အနေဖြင့် စိုက်ပျိုးခြင်းဖြစ်သည်ဟု ပြောကြားခဲ့သည်။

   အဆိုပါလယ်သမားများ၏ ပြောဆိုမှုအရ OM နှင့် ER စပါးနှစ်မျိုး၏ ဈေးနှုန်းများသည် ယခင်နှစ်၌ အတက်အကျ သိသာစွာပြောင်းလဲခြင်း မရှိခဲ့ကြောင်း၊ လက်ရှိကာလတွင်မူ ၁ ကီလို ဂရမ်လျှင် ၇၀၀ ရီယယ် (၀.၁၇၅ ဒေါ်လာ) မှ ၇၅၀ ရီယယ် (၀.၁၈ ဒေါ်လာ) အကြား ဈေးနှုန်းဖြစ် ပေါ်လျက်ရှိကြောင်း သိရှိရသည်။

  စပါးဈေးနှုန်း နိမ့်ကျမှုကြောင့် စိတ်အနှောင့်အယှက်ဖြစ်ပေါ်လျက်ရှိသည့် လယ်သမားများ သည် ဈေးနှုန်းများ ထပ်မံ၍ ကျဆင်းမှုမရှိအောင် စိုက်ပျိုးရေးဝန်ကြီးဌာနနှင့် သက်ဆိုင်ရာဌာနများ က ကြားဝင်ဆောင်ရွက်ပေးရန် တောင်းဆိုလျက်ရှိကြသည်။

ကမ္ဘောဒီးယား စိုက်ပျိုးရေးဝန်ကြီးဌာနမှ ပြောရေးဆိုခွင့်ရှိသူ Im Rachna က ဝန်ကြီးဌာန အနေဖြင့် ဈေးနှုန်းများ ကျဆင်းလျက်ရှိသည်ကို သိရှိနားလည်ပါကြောင်း၊ သို့သော် တစ်နှစ်တာ ကာလအတွင်း အကြိမ်ကြိမ် စိုက်ပျိုးရိတ်သိမ်းရရှိနိုင်သည့် SKO စပါးမျိုးအား ရွေးချယ်စိုက်ပျိုးရန် တောင်သူများသို့ ဆက်လက်အကြံပြုလိုကြောင်း၊ အစိုးရက ထောက်ခံအကြံပြုထားသည့် စပါးမျိုး များအား နည်းစနစ်တကျစိုက်ပျိုးပါက ထုတ်လုပ်မှုကုန်ကျစရိတ် လျှော့ချနိုင်မည်ဖြစ်ပြီး မြင့်မား သော အထွက်နှုန်းနှင့် ဈေးနှုန်းများကို ရရှိနိုင်မည်ဖြစ်ကြောင်း၊ ထို့အပြင် နိုင်ငံ၏ ဆန်စပါးမျိုးများ အား နိုင်ငံတကာ၌ အမည်ကောင်းရရှိမှု ဂုဏ်သတင်းကိုလည်း မြှင့်တင်နိုင်မည်ဖြစ်ကြောင်း ပြော ကြားခဲ့သည်။

  ကမ္ဘောဒီးယား၏ Sen Kro Ob 01 စပါးသည် ခြောက်သွေ့ရာသီ၌ စိုက်ပျိုးနိုင်သော ဆန်မွှေး အမျိုးအစားဖြစ်ပြီး ဆန်လုံးသွယ်လျက် နူးညံ့၍ရနံ့မွှေးသော ပရီမီယံဆန်မွှေးနှင့် အလားသဏ္ဌာန် တူကြောင်း၊ ၂၀၂၃ ခုနှစ် နှောင်းပိုင်း၊ တရုတ်နိုင်ငံ၌ ကျင်းပခဲ့သော ပထမအကြိမ် တရုတ်-အာဆီယံ အရည်အသွေးမြင့် အင်ဒီကာဆန်မျိုးများ၏ အရသာအရည်အသွေး သုံးသပ်အကဲဖြတ်ပြိုင်ပွဲတွင် SKO 01 ဆန်သည် ရွှေတံဆိပ်ရရှိခဲ့ပြီး ကမ္ဘောဒီးယား ပြည်တွင်းနှင့် နိုင်ငံတကာ ဈေးကွက်နှစ်ရပ် လုံး၌ ကျော်ကြားမှုရှိကြောင်း သိရှိရသည်။

Source: Canbodianess, 10 Jan 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)