ပြည်ပကုန်သွယ်မှုသတင်းများ

       တောင်ကိုရီးယားနိုင်ငံ၏ အမေရိကန်သို့တင်ပို့မှုသည် ယခုနှစ်တွင် ၂၂နှစ်အတွင်း ပထမဆုံးအနေဖြင့် တရုတ်နိုင်ငံကိုကျော်ဖြတ်နိုင်ကြောင်း၊ တောင်ကိုရီးယားနိုင်ငံ၏ ကုန်သွယ်ရေးဝန်ကြီးဌာနနှင့် အသေးစား၊ အလတ်စားလုပ်ငန်းများနှင့် စွန့်ဦးတီထွင်သူများဝန်ကြီးဌာန၏ ထုတ်ပြန်ချက်အရသိရပါသည်။ ဇန်နဝါရီလမှ မေလအတွင်း အမေရိကန်သို့ တင်ပို့မှုပမာဏမှာ အမေရိကန်ဒေါ်လာ ၅၃.၃ဘီလီယံရှိခဲ့ပြီး တရုတ်နိုင်ငံသို့တင်ပို့မှုမှာ အမေရိကန်ဒေါ်လာ ၅၂.၆၉ဘီလီယံရှိကြောင်းသိရပါသည်။ ကုမ္ပဏီကြီးများသည် ၎င်းတို့၏ တင်ပို့မှုဦးတည်ရာကို လွန်ခဲ့သည့်နှစ်ကတည်းက ပြောင်းလဲခဲ့ခြင်းဖြစ်ပြီး အသေးစားနှင့် အလတ်စားလုပ်ငန်းများမှာ ၎င်းတို့၏ တင်ပို့မှုပုံစံကို နှစ်၂၀အတွင်း ပထမဆုံးအနေဖြင့် ပြောင်းလဲခဲ့ခြင်းဖြစ်ကြောင်းသိရပါသည်။ ဤပမာဏအတိုင်း ရှေ့ဆက်သွားမည်ဆိုပါက ၂၀၀၂ခုနှစ်နောက်ပိုင်း ပထမဆုံးအနေဖြင့် အမေရိကန်နိုင်ငံက တရုတ်နိုင်ငံကို ကျော်ဖြတ်နိုင်မည်ဖြစ်ကြောင်းသိရပါသည်။ ၂၀၂၃ခုနှစ်တွင် တောင်ကိုရီးယားနိုင်ငံမှ အမေရိကန်နိုင်ငံသို့တင်ပို့မှုပမာဏမှာ အမေရိကန်ဒေါ်လာ ၁၁၅.၇၁ဘီလီယံရှိခဲ့ပြီး တရုတ်နိုင်ငံသို့တင်ပို့မှုမှာ အမေရိကန်ဒေါ်လာ ၁၂၄.၈၁ဘီလီယံရှိခဲ့သည့်အတွက် တရုတ်နိုင်ငံက အမေရိကန်ဒေါ်လာ ၉.၁ဘီလီယံပိုမိုရရှိခဲ့ကြောင်းသိရပါသည်။

         အမေရိကန်နိုင်ငံသို့တင်ပို့မှုမှာ လွန်ခဲ့သည့်နှစ်ထက် ၅.၄ရာခိုင်နှုန်းမြင့်တက်လာခဲ့ပြီး အဓိကအားဖြင့် မော်တော်ယာဉ်များနှင့် ဘတ္ထရီအိုးများတင်ပို့ခဲ့ခြင်းဖြစ်ကြောင်းသိရပါသည်။ အမေရိကန်နိုင်ငံသို့ တင်ပို့မှုပမာဏမှာ ၂၀၂၀ပြည့်နှစ်တွင် အမေရိကန်ဒေါ်လာ ၇၄.၁၁ဘီလီယံမှ ၂၀၂၁ခုနှစ်တွင် အမေရိကန်ဒေါ်လာ ၉၅.၉ဘီလီယံရောက်ရှိခဲ့ပြီး ၂၀၂၂ခုနှစ်တွင် ပထမဆုံးအနေဖြင့် အမေရိကန်ဒေါ်လာ ၁၀၀ကျော်သွားကြောင်းသိရှိရပါသည်။ သို့သော် တရုတ်နိုင်ငံသို့ တင်ပို့မှုမှာ ၂၀၂၁ခုနှစ်တွင် စံချိန်တင် အမေရိကန်ဒေါ်လာ ၁၆၂.၉၁ဘီလီယံရှိခဲ့ရာမှ ၂၀၂၂ခုနှစ်တွင် အမေရိကန်ဒေါ်လာ ၁၅၅.၇၉ဘီလီယံနှင့် ၂၀၂၃ခုနှစ်‌တွင် အမေရိကန်ဒေါ်လာ ၁၂၄.၈၁ဘီလီယံအထိကျဆင်းခဲ့ကြောင်းသိရပါသည်။ သို့သော် တင်ပို့မှုဦးတည်ရာအလားအလာမှာ တရုတ်နိုင်ငံ၏စီးပွားရေးနလန်ထူလာမှုကြောင့် ပြောင်းလဲနိုင်ကြောင်းသိရပါသည်။ တရုတ်နိုင်ငံသည် ယခုနှစ်၏ ပထမလေးလတာကာလတွင် စီးပွားရေးတိုးတက်မှု ၅.၃ရာခိုင်နှုန်းရှိခဲ့ပြီး  ခန့်မှန်းမှုများကိုကျော်ဖြတ်နိုင်ခဲ့ကာ မေလတစ်လတည်းတွင်ပင် ပြည်ပသို့ အမေရိကန်ဒေါ်လာ ၃၀၂.၃၅ဘီလီယံထိတင်ပို့နိုင်ခဲ့ပြီး ၂၀၂၃ခုနှစ်၊ မေလထက် ၇.၆ရာခိုင်နှုန်းတင်ပို့မှုမြင့်တက်ခဲ့ကြောင်းသိရပါသည်။ တရုတ်နိုင်ငံစီးပွားရေးနှင့် ဘဏ္ဍာရေးသုတေသနအသင်း၏ အကြီးအကဲဖြစ်သူ Jean Byung Seo က အကယ်၍  တစ်ပိုင်းလျှပ်ကူးပစ္စည်းနှင့် Display ဖန်သားပြင်ကဲ့သို့သော အလယ်အလတ်ကုန်ပစ္စည်းများတင်ပို့မှုမြင့်တက်လာပါက တရုတ်နိုင်ငံသည် နှစ်ကုန်တွင် ကိုရီးယား၏ အကြီးမားဆုံးတင်ပို့သည့်နိုင်ငံအဖြစ် ဆက်လက်ရပ်တည်နိုင်မည်ဖြစ်ကြောင်း၊ အမေရိကန်နိုင်ငံ၏ ဘဏ္ဍာရေးအခြေအနေမှာ တည်ငြိမ်နေသော်လည်း အလုံးစုံစီးပွားရေးမှာကျဆင်းလျက်ရှိကြောင်းနှင့် အကျိုးဆက်များကိုအနီးကပ်စောင့်ကြည့်ရန်လိုအပ်ကြောင်းပြောကြားခဲ့ပါသည်။

Source: Indina Shipping News

DOCA(ရန်ကုန်)

      ဇမ်ဘီယာနိုင်ငံအစိုးရသည် နိုင်ငံ၏အလယ်ပိုင်း Chisamba ခရိုင်တွင် ၁၀၀မဂ္ဂါဝပ်ရှိသော နေရောင်ခြည်စွမ်းအင်သုံး Photovoltaic ပရောဂျက်ကိုတည်ဆောက်ရန် တရုတ်ကုမ္ပဏီ Power China International Group ကို ရွေးချယ်ခဲ့သည်။

         Kariba North Bank Extension Power Corporation မှဆောင်ရွက်သော အဆိုပါ စီမံကိန်းသည် ဇမ်ဘီယာနိုင်ငံ၏ လျှပ်စစ်ဓာတ်အားထုတ်လုပ်မှုစွမ်းရည်ကိုမြှင့်တင်ရန်နှင့် ဒေသတွင်းစီးပွားရေးအခွင့်အလမ်းများကို ဖွင့်လှစ်ပေးနိုင်ရန်ရည်ရွယ်၍ လုပ်ဆောင်ခြင်းဖြစ်သည်။

       ဇမ်ဘီယာ သဘာဝပတ်ဝန်းကျင်စီမံခန့်ခွဲမှုအေဂျင်စီသည် ပတ်ဝန်းကျင်ဆိုင်ရာ အကဲဖြတ်မှုများပြုလုပ်ပြီးနောက် တရုတ်ကုမ္ပဏီမှာ လုပ်ငန်းခွင်တွင် လုပ်ငန်းများစတင်နေပြီဖြစ်သည်။ မြေနေရာ ၁၀၆ဟက်တာအား ရှင်းလင်းခြင်း ပြီးမြောက်ခဲ့ပြီး လက်ရှိတွင် စက်ယန္တရားများအသုံးပြု၍ ဆင့်ပွားရှင်းလင်းခြင်းနှင့် မြေညှိခြင်းလုပ်ငန်းများဆောင်ရွက်လျက်ရှိသည်။ ပရောဂျက်ဒီဇိုင်းများအားအပြီးသတ်ပြီး စာရွက်စာတမ်းအတည်ပြုချက်ကို စောင့်ဆိုင်းနေကြောင်း သိရသည်။

         စွမ်းအင်ဝန်ကြီး Peter Kapala က ဇမ်ဘီယာအစိုးရသည် နိုင်ငံအတွင်း ကြုံတွေ့နေရသော လျှပ်စစ်လိုငွေပြမှု၏ ဆိုးကျိုးများကိုလျော့ပါးစေရန် ရေတိုရေရှည်အစီအမံများကို အကောင်အထည်ဖော်နေကြောင်း မကြာသေးမီက ကြေညာခဲ့သည်။ ယင်းအစီအမံများတွင် နိုင်ငံအလယ်ပိုင်းရှိ အဆိုပါ ဆိုလာစီမံကိန်းအား ယခုနှစ် ဒီဇင်ဘာလတွင် အပြီးသတ်လုပ်ဆောင်နိုင်ရန် မျှော်မှန်းထားကြသည်။

          မိုးခေါင်မှုကြောင့် ဇမ်ဘီယာ ရေအားလျှပ်စစ်စက်ရုံများရှိ ရေပမာဏကိုထိခိုက်စေကာ လျှပ်စစ်ဓာတ်အားပြတ်တောက်မှုများနှင့်ကြုံတွေ့နေရသည်။ နိုင်ငံ၏လျှပ်စစ်ဓာတ်အား ၈၀ရာခိုင်နှုန်းခန့်သည် ရေအားလျှပ်စစ်မှ ရရှိနေခြင်းဖြစ်ပြီး လက်ရှိရရှိနိုင်သော ပျမ်းမျှထုတ်လုပ်နိုင်မှုမှာ ၉၀၀မဂ္ဂါဝပ်ခန့်ရှိပြီး ပျမ်းမျှလိုအပ်ချက်မှာ ၂၄၀၀မဂ္ဂါဝပ်ဖြစ်ကြောင်းသိရှိရပါသည်။

Source : Xinhua

DOCA(ရန်ကုန်)

       တရုတ်နိုင်ငံကားထုတ်လုပ်သူ Cherry သည် ၎င်း၏ကားမော်ဒယ်အသစ် Cherry TIGGO 5X ကို အင်ဒိုနီးရှားနိုင်ငံ၏ မြို့တော်ဂျာကာတာတွင် ကြာသပတေးနေ့က တရားဝင်မိတ်ဆက်ပေးခဲ့သည်။

       “To be Young” ဟူသော ဆောင်ပုဒ်ဖြင့် TIGGO 5X မော်တော်ယာဉ်မော်ဒယ်သစ်သည် လုပ်ဆောင်နိုင်စွမ်းနှင့် တင့်တယ်မှုနှစ်မျိုးလုံးကိုရှာဖွေသော လူငယ်ပညာရှင်များနှင့် မိသားစုများ၏ မျှော်မှန်းချက်များကိုဖြည့်ဆည်းပေးနိုင်ရန် စီစဉ်ထားကြောင်းသိရသည်။

        TIGGO 5X ကို ဂန္တဝင်ဗားရှင်းအတွက် ၂၃၉,၀၀၀,၀၀၀ရူပီယာ (ခန့်မှန်းအားဖြင့် အမေရိကန်ဒေါ်လာ၁၄,၇၀၀) မှစတင်ကာ ပထမဦးဆုံးဝယ်ယူသူအယောက် ၁၀၀၀အတွက် အထူးကမ်းလှမ်းချက်ဖြင့် မိတ်ဆက်ခဲ့သည်။

         Cherry သည် ဝယ်ယူသူများစိတ်ကျေနပ်မှုရရှိစေရန် သက်တမ်းတိုးအာမခံချက်နှင့် ပြန်လည်ရောင်းချသည့် ဈေးနှုန်းအာမခံချက်တို့အပါအဝင် အကျိုးခံစားခွင့်များစွာကိုလည်းကြေညာခဲ့သည်။

        PT Cherry Sales Indonesia (CSI) မှ အမှတ်တံဆိပ်ဌာန၊ အကြီးအကဲ Rifkic Setiawan က Cherry TIGGO 5X သည် ၎င်း၏ပြီးပြည့်စုံသော အင်္ဂါရပ်များနှင့် အရည်အသွေးမြင့်မားမှုတို့ကြောင့် နိုင်ငံအသီးသီးတွင် ကောင်းမွန်သောသက်သေအထောက်အထားများရရှိကာ အကောင်းဆုံးသောဈေးနှုန်းဖြင့် Compact SUV ကားအမျိုးအစားတွင် အင်ဒိုနီးရှားသုံးစွဲသူများ၏ စိတ်ကြိုက်ရွေးချယ်မှုဖြစ်လာမည်ဟု မိတ်ဆက်ပွဲ၌ ပြောကြားခဲ့သည်။

         ဖွင့်ပွဲအခမ်းအနားသို့ CSI အမှုဆောင်အရာရှိများ၊ အစိုးရအရာရှိများနှင့် အဓိကလုပ်ငန်းနယ်ပယ်မှ ကျွမ်းကျင်သူများတက်ရောက်ခဲ့ကြသည်။

Source : Xinhua

DOCA(ရန်ကုန်)

    ဗီယမ်နမ်ကားထုတ်လုပ်သူများအသင်း (VAMA) ၏အဆိုအရ မေလအတွင်းပြည်တွင်း၌ ကား‌ရောင်းချမှုသည် ယခင်လနှင့်နှိုင်းယှဥ်လျှင် ၆ ရာခိုင်နှုန်းတိုးလာ၍ ကားအစီးရေ ၂၅၇၉၄ စီး ရောင်းချနိုင်ခဲ့ကြောင်းသိရသည်။

    ထိုအထဲမှ ခရီးသည်တင်ယာဥ်ရောင်းချမှုသည် ဧပြီလနှင့်နှိုင်းယှဥ်ပါက ၆ ရာခိုင်နှုန်း တိုးလာကာအစီးရေ ၁၈၂၃၅ စီးရောင်းချနိုင်ခဲ့သည် စီးပွားဖြစ်ယာဥ်များရောင်းချမှုမှာ ၇ ရာခိုင်နှုန်း တိုး၍ အစီးရေ ၇၂၉၂ စီး ရောင်းချနိုင်ခဲ့သည်။ တစ်ချိန်တည်းတွင်အထူးရည်ရွယ် ထုတ်လုပ်သော ကားများမှာ အစီးရေ ၂၆၇ စီး ရောင်းချနိုင်ခဲ့ပြီး ၄ ရာခိုင်နှုန်းခန့်ကျဆင်းသွားခဲ့သည်။

   VAMA အဖွဲ့ဝင်များ၏ပြောကြားချက်အရ ယခုနှစ်၏ငါးလတာကာလအတွင်း စုစုပေါင်း ကား အစီးရေ ၁၀၈၃၀၉ စီး ‌ရောင်းချနိုင်ခဲ့ပြီး ပြည်တွင်း၌ ထုတ်လုပ်သည့်ကားအစီးရေမှာ ၁၄ ရာခိုင်နှုန်း ကျဆင်းကာ တင်သွင်းသည့်မော်တော်ယာဥ်များမှာ တစ်နှစ်ထက်တစ်နှစ် ၈ ရာခိုင်နှုန်းတိုးလာ ခဲ့ကြောင်းသိရသည်။

   Audi, Jaguar Land Rover, Mercedes, Volvo, Haval နှင့် အခြားသောကားကုမ္ပဏီ များစွာတို့သည် ၎င်းတို့၏ အရောင်းအဝယ်ကိန်းဂဏန်းများကို ထုတ်ဖော်ပြောဆိုရန် ငြင်းဆိုခဲ့ကြသည်။

   VAMA နှင့် TC Group တို့မှ အစီအရင်ခံစာများအပေါ်အခြေခံ၍ ဇန်နဝါရီလမှ မေလအတွင်း သုံးစွဲသူများထံမော်တော်ကား ၁၂၇၆၄၃ စီးအားပေးပို့နိုင်ခဲ့ကြောင်းသိရသည်။

    ကျွမ်းကျင်သူများက လုံးဝတည်ဆောက်ထားသောယူနစ်များ (CBUs) ရောင်းချမှုသည် ပြည်တွင်း၌ တင်သွင်းသည့်နှုန်းထက် ၄၀ ရာခိုင်နှုန်း သို့မဟုတ် ထို့ထက်ပိုသောမော်တော်ယာဥ် များကို အခွန်မဲ့ဖြင့်တင်သွင်းခွင့်ရှိသောကြောင့် CBUs များ‌ရောင်းချ မှုသည် ပြည်တွင်း၌ပိုမို ကောင်းမွန်တိုးတက်မှုဖြစ်ကြောင်း ပြောကြားခဲ့သည်။

    ထို့အပြင် ဗီယက်နမ်ကုန်သည်များသည် လျှော့စျေးပေးခြင်း၊ မှတ်ပုံတင်ကြေးများပံ့ပိုးပေးခြင်းနှင့် လက်ဆောင်ထုပ်များပေးခြင်း အပါအဝင် အမျိုးမျိုးသောပရိုမိုးရှင်းလှုပ်ရှားမှုများကို လုပ်ဆောင်၍ နိုင်ငံတွင်းသို့ တင်သွင်းလာသောကားများအား ပြည်တွင်၌ ဝယ်လိုအားမြင့်တက်အောင် ဆွဲဆောင်နိုင်ခဲ့ကြသည်။

      အစိုးရအနေဖြင့် ပြည်တွင်း၌တပ်ဆင်ထားသော မော်တော်ယာဥ်များအတွက်ရေရှည်ယှဥ် ပြိုင်နိုင်စွမ်းရှိစေရန် ကျိုးကြောင်းဆီလျှော်သော အစီအမံများချမှတ်သင့်သည်ဟု ကျွမ်းကျင်သူများက ပြောကြားခဲ့သည်။

Source : Vietnamnews

DOCA(ရန်ကုန်)

      ၂၀၂၄ ခုနှစ်၏ ပထမ(၅)လတာကာလတွင် ဗီယက်နမ်နိုင်ငံ၏ ပြည်ပမှအဓိကဈေးကွက်များသို့ တင်ပို့မှုမှာ လွန်ခဲ့သည့်နှစ် ပထမ(၅)လတာကာလထက် ၁၅ ရာခိုင်နှုန်းတိုးတက်လာခဲ့ပြီး ဖက်ရှင်အသုံးအဆောင်၊ ပရိဘောဂပစ္စည်းနှင့် အိမ်သုံးပစ္စည်းများတင်ပို့မှုမှာ နာလန်ထူလာမှုကို ဦးဆောင်ခဲ့ကြောင်း သိရပါသည်။ ဗီယက်နမ်နိုင်ငံစက်မှုနှင့်ကုန်သွယ်ရေးဝန်ကြီးဌာန လက်‌အောက်ရှိ ဥရောပ-အမေရိကန်ဈေးကွက်ဦးစီးဌာန၏ ညွှန်ကြားရေးမှူး Ta Hoang Linh က ယခုနှစ်၏အစကပင် ဗီယက်နမ်နိုင်ငံ၏ အထည်အလိပ်နှင့် အဝတ်အထည်ကဏ္ဍတင်ပို့မှုမှ အမေရိကန်ဒေါ်လာ ၁၂.၈ ဘီလီယံရရှိခဲ့ပြီး လွန်ခဲ့သည့်နှစ် တူညီသည့်ကာလထက် ၁၂.၈ ရာခိုင်နှုန်း၊ ခြေအိတ်နှင့်လက်ကိုင်အိတ်ကဏ္ဍမှ အမေရိကန်ဒေါ်လာ ၇.၉ ဘီလီယံဖြင့် ၇.၃ ရာခိုင်နှုန်း၊ သစ်/ပရိဘောဂနှင့်အိမ်သုံးပစ္စည်းကဏ္ဍမှ အမေရိကန်ဒေါ်လာ ၄.၉ ဘီလီယံဖြင့် ၂၅ ရာခိုင်နှုန်း တိုးတက်လာကြောင်း ပြောကြားခဲ့ပါသည်။

       ဗီယက်နမ်နိုင်ငံ လက်မှုပညာနှင့်ပရိဘောဂနယ်ပယ်အသင်းမှ အဖွဲ့ဝင်တစ်ဦးဖြစ်သူ  Daung Thi  Minh Tue က အမေရိကန်နိုင်ငံအနေဖြင့် ပြည်တွင်းမှတင်သွင်းလိုအားနှင့် စားသုံးသူ များ၏ ဝယ်လိုအားကို လှုံ့ဆော်ရန်အတွက် အတိုးနှုန်းများကို ဖြတ်တောက်သင့်ကြောင်း၊ ဥရောပ ဈေးကွက်မှာလည်း စီးပွားပျက်ကပ်ကို ကျော်လွှားနိုင်ခဲ့ပြီဖြစ်သောကြောင့် ဝယ်လိုအား တစ်ဖန် ပြန်လည်မြင့်တက်လာနိုင်မည်ဖြစ်ကြောင်းနှင့် များစွာသော ဗီယက်နမ် ပရိဘောဂ လုပ်ငန်းများ မှာလည်း ၂၀၂၄ ခုနှစ်ထိ မှာယူမှုများ ရရှိထားကြောင်း ပြောကြားခဲ့ပါသည်။ အထည် အလိပ်ကဏ္ဍ တွင်လည်း ဗီယက်နမ်နိုင်ငံ အထည်အလိပ်နှင့်အဝတ်အစားအသင်း ဒုတိယဥက္ကဌ Tran Nhu Tung က ၂၀၂၄ ခုနှစ််အတွက် အထည်အလိပ်နှင့်အဝတ်အထည်ကဏ္ဍတင်ပို့မှုမှ အမေရိကန် ဒေါ်လာ ၄၄ ဘီလီယံ ရရှိရန် ရည်မှန်းထားကြောင်း ပြောကြားခဲ့ပါသည်။

      ၂၀၂၄ ခုနှစ်၏ ပထမ(၅)လတာကာလတွင် အထည်အလိပ်နှင့် အဝတ်အထည်လုပ်ငန်း များ၏ မှာယူမှုများမှာ တိုးတက်လျက်ရှိကြောင်း သိရပါသည်။ ဗီယက်နမ်နိုင်ငံ၏ ဖက်ရှင်ထုတ်ကုန်များမှာ ထုတ်ကုန်အရည်အသွေး၊ စည်းစနစ်ရှိသည့် လုပ်သားထုရရှိနိုင်စွမ်းနှင့် ပတ်ဝန်းကျင်လိုအပ်ချက်များကြောင့် ယှဉ်ပြိုင်နိုင်စွမ်းရှိကြောင်း သိရပါသည်။ ထို့ပြင် ဗီယက်နမ် ဖက်ရှင်ထုတ်ကုန်များမှာ ဒေသတွင်းလွတ်လပ်စွာ ကုန်သွယ်ရေးသဘောတူညီချက်ကြောင့် အားသာချက်များ ရရှိထားကြောင်း သိရပါသည်။

     သို့သော် အဓိကတင်ပို့မှုဈေးကွက်များဖြစ်သည့် အမေရိကန်၊ ဥရောပသမဂ္ဂ၊ အရှေ့မြောက် အာရှနိုင်ငံများသည် သဘာဝပတ်ဝန်းကျင်မထိခိုက်ရေး၊ ဖွံ့ဖြိုးတိုးတက်မှုစံနှုန်းကို ထိန်းထားနိုင်ရေးနှင့် ထုတ်လုပ်မှုပုံမှန်လည်ပတ်ရေး စသည်တို့တွင် တင်းကျပ်သော စည်းမျဉ်းသစ်များ ပိုမိုတိုးမြှင့်လာမှုကြောင့် စီးပွားရေးလုပ်ငန်းများစွာတို့မှာ အခက်အခဲများနှင့် ရင်ဆိုင်နေရကြောင်း သိရပါသည်။ တင်ပို့သည့် ထုတ်ကုန်များမှာ ကုန်ပစ္စည်း၏ဇစ်မြစ်၊ လုံခြုံရေးထောက်ခံချက်၊ စီးပွား ‌ရေးအစီရင်ခံခြင်း၊ သစ်တောစီမံခန့်ခွဲမှုစည်းမျဉ်းနှင့် ဓာတုပစ္စည်းအသုံးပြုမှုတို့တွင် လိုအပ်ချက်များ ပိုမိုမြင့်မားလာမှုတို့ကို ရင်ဆိုင်နိုင်စွမ်းရှိရန် လိုအပ်လာကြောင်း သိရပါသည်။ ထို့ကြောင့် ဈေးကွက်လိုအပ်ချက်များကို ရင်ဆိုင်ရန် ဗီယက်နမ်စီးပွားရေးလုပ်ငန်းများသည် ခေတ်မီသည့် ထုတ်လုပ်ရေးပုံသဏ္ဍာန်နှင့် ပုံမှန်လည်ပတ်သည့် စီးပွား‌ရေးမော်ဒယ်တို့ကို ကျင့်သုံးရန်လိုအပ်ကြောင်း သိရပါသည်။ ထို့ပြင် တဖြည်းဖြည်းမြင့်တက်လာသော တင်းကြပ်သည့်လိုအပ်ချက်များ ကို ရင်ဆိုင်ရန် ဗီယက်နမ်စီးပွားရေးလုပ်ငန်းများသည် သဘာဝပတ်ဝန်းကျင်မထိခိုက်သည့် ထုတ်လုပ်မှုပုံစံပြောင်းလဲရန်၊ ကတိကဝတ်ပြုရန်နှင့် သန့်ရှင်းသောစွမ်းအင်ကိုအသုံးပြုရန် လိုအပ်ကြောင်း သိရှိရပါသည်။

Source: Vietnam Plus

DOCA(ရန်ကုန်)