ပြည်ပကုန်သွယ်မှုသတင်းများ

           စိုက်ပျိုးရေး၊ သစ်တောနှင့် ရေလုပ်ငန်းဝန်ကြီးဌာန(MAFF)၊ ဝန်ကြီး Dith Tina မှ ကမ္ဘောဒီးယားပီလောပီနံအသင်းချုပ် (CFC) အား ဈေးကွက်တည်ငြိမ်မှုကို ထိန်းသိမ်းရန်၊ ဈေးနှုန်းကျဆင်းမှုကာကွယ်ရန်၊ ပီလောပီနံခြောက်တင်ပိုရန်နှင့် လက်ဆက်သောပီလောပီနံတို့ကို ရောင်းဝယ်ဖောက်ကားခြင်းတို့ကို ဦးစားပေးလုပ်ဆောင်ရန်အတွက် မဟာဗျူဟာအစီအစဉ် တစ်ခုကိုချမှတ်ရန်အတွက် ၆-၁-၂၀၂၅ ရက်နေ့က တောင်းဆိုခဲ့သည်။ (CFC) ဥက္ကဋ္ဌ Chary Son နှင့် ဝန်ကြီးဌာနမှတာဝန်ရှိသူများနှင့်တွေ့ဆုံစဉ် လုပ်ငန်းတိုးတက်မှုဆိုင်ရာ အချက်အလက် များကိုပြောကြားခဲ့သည်။ Dith Tina က  ဈေးကွက်အရွယ်အစားကိုရှင်းလင်းစွာနားလည်စေရန် ပူးပေါင်းဆောင်ရွက်ခြင်းနှင့် စီးပွားရေးထိရောက်မှုအတွက် ခိုင်မာသောရပ်တည်ချက်ထားရှိနိုင် ရေးတို့ကို အလေးထားဆောင်ရွက်သွားရန်တိုက်တွန်းခဲ့သည်။ CFC အနေဖြင့် လက်ဆက်သော ပီလောပီနံရောင်းဝယ်မှုနှင့်  ပီလောပီနံအခြောက်များကို စိုက်ပျိုးထုတ်လုပ်ရာတွင် တောင်သူများ နှင့်ယှဉ်ပြိုင်ခြင်းထက် ပြည်ပသို့တင်ပို့ရန်အတွက် ဦးစားပေးလုပ်ဆောင်သင့်ကြောင်း Dith Tina ကထပ်မံပြောကြားခဲ့သည်။ ပီလောပီနံဈေးနှုန်းနှင့်ပတ်သက်၍  ပီလောပီနံစိုက်ပျိုးရေးအသင်း ဥက္ကဋ္ဌ El Chhinh  က ပီလောပီနံဈေးနှုန်းများသည် ဒေသအလိုက်ကွဲပြားသော်လည်း ကမ္ဘောဒီးယားတွင် ဈေးနှုန်းကွဲပြားမှုနည်းပါးကြောင်းနှင့် ပြည်တွင်းပီလောပီနံထုတ်လုပ်မှု၏ ၂၀/၃၀ ရာခိုင်နှုန်းခန့်ကို ပြည်တွင်း၌အသုံးပြုပြီး ကျန်ရှိသောထုတ်ကုန်များကို ထိုင်းနှင့် ဗီယက်နမ်နိုင်ငံများသို့ အဓိကတင်ပို့လျက်ရှိကြောင်းပြောကြားခဲ့ကြောင်းသိရှိရပါသည်။

Source: Khmer Times

DOCA(ရန်ကုန်)

              ကမ္ဘောဒီးယားနိုင်ငံမှ ဩစတြေးလျနိုင်ငံသို တင်ပို့မှုတန်ဖိုးမှာ ၂၀၂၄ ခုနှစ်၊ ပထမ (၁၁) လ အတွင်း အမေရိကန်ဒေါ်လာသန်း ၄၅၀ နီးပါးရှိပြီး ၂၀၂၃ ခုနှစ်၊ အလားတူကာလနှင့်နှိုင်းယှဉ်ပါက ၃၆ ရာခိုင်နှုန်းတိုးလာကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန (MoC) မှ ထုတ်ပြန်ခဲ့သောအစီရင်ခံစာအရ သိရသည်။ ကမ္ဘောဒီးယားနှင့်ဩစတြေးလျနှစ်နိုင်ငံအကြား ကုန်သွယ်မှုပမာဏသည် ၂၀၂၄ ခုနှစ်အတွင်း ကန်ဒေါ်လာ ၅၄၇ သန်းအထိရောက်ရှိခဲ့ပြီး တစ်နှစ်ထက်တစ်နှစ် ၂၀.၉၅ ရာခိုင်နှုန်းတိုးလာကြောင်း အစီရင်ခံစာတွင်ဖော်ပြထားသည်။ စုစုပေါင်းကုန်သွယ်မှုပမာဏတွင် ကမ္ဘောဒီးယားနိုင်ငံ၏ ပို့ကုန်တန်ဖိုးသည် အမေရိကန်ဒေါ်လာ ၄၄၄ သန်းရှိခဲ့ပြီး ဩစတြေးလျမှ သွင်းကုန်တန်ဖိုးသည် အမေရိကန်ဒေါ်လာ ၁၀၂ သန်းရှိခဲ့သည်။ ကမ္ဘောဒီးယားနိုင်ငံနှင့် ဩစတြေးလျတို့အကြား ဒေသတွင်းဘက်စုံစီးပွားရေးသဘောတူညီချက် (RCEP) သည် ကမ္ဘောဒီးယားနိုင်ငံ၏ ပို့ကုန်နှင့်ပြည်တွင်းရင်းနှီးမြှုပ်နှံမှုများကို သိသိသာသာ မြှင့်တင်နိုင်ခဲ့ပြီး နိုင်ငံအတွက်ပို့ကုန်အခွင့်အလမ်းများကို ဖန်တီးပေးနိုင်ရန်အတွက် ထောက်ပံ့ ပေးနေကြောင်း ကမ္ဘောဒီးယားကုန်သည်ကြီးများအသင်း (CCC) မှ ထုတ်ပြန်ထားသည်။ ကမ္ဘောဒီးယားနိုင်ငံ၊ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန (MoC) သည် ကုန်သွယ်မှု မိတ်ဖက်နိုင်ငံများနှင့် ဆက်ဆံရေးခိုင်မာစေရန်နှင့် ကမ္ဘောဒီးယား၏ပို့ကုန်အလားအလာကို မြှင့်တင်ရန်အတွက် ကြိုးပမ်းနေကြောင်း အစီရင်ခံစာတွင်ထုတ်ပြန်ထားခဲ့ကြောင်းသိရှိရပါသည်။

Source: Khmer Times

DOCA(ရန်ကုန်)

            အင်ဒိုနီးရှားနိုင်ငံသည် ၂၀၂၆ ခုနှစ်တွင် ၅၀ ရာခိုင်နှုန်းဘိုင်အိုဒီဇယ် (B50) ပရိုဂရမ်ကို အကောင်အထည်ဖော်ပြီး ဒီဇယ်တင်သွင်းမှုကိုရပ်တန့်ရန်စီစဉ်နေကြောင်း စွမ်းအင်နှင့်သယံ ဇာတအရင်းအမြစ်ဝန်ကြီးဖြစ်သူ Bahlil Lahadalia ၏အဆိုအရသိရပါသည်။ စွမ်းအင်အသွင် ကူးပြောင်းမှုပရိုဂရမ်၏ အစိတ်အပိုင်းတစ်ခုအနေနှင့် အစိုးရသည် ၂၀၂၆ ခုနှစ်တွင် B50 ပရိုဂရမ်ကို အကောင်အထည်ဖော်ရန် ၂၀၂၅ ခုနှစ်တွင် B40 ကို ကနဦးအကောင်အထည်ဖော်ရမည် ဟုသိရပါသည်။ အကယ်၍ အောင်မြင်အောင်ဆောင်ရွက်နိုင်ပါက ၂၀၂၆ ခုနှစ်တွင် ဒီဇယ်တင်သွင်းရန် မလိုအပ်တော့ကြောင်း သိရပါသည်။ ထို B50 ပရိုဂရမ်သည်သမ္မတ Prabowo Subianto ၏ စွမ်းအင်ဖူလုံမှုရှိရေးညွှန်ကြားမှုနှင့်အညီ စတင်ခြင်းဖြစ်ကြောင်း သိရပါသည်။ Lahadalia က B50 အကောင်အထည်ဖော်ခြင်းသည် နိုင်ငံ၏အရံစွမ်းအင်မြင့်တက်စေမည်ဖြစ်ပြီး ပြည်တွင်းစွမ်းအင်လိုအပ်ချက် ပြည့်မီနိုင်စွမ်းမြင့်တက်ရန်ရည်မှန်းချက်ကို ပံ့ပိုးပေးနိုင်မည်ဟု သိရပါသည်။ တစ်ချိန်တည်းမှာပင် ဒုတိယဝန်ကြီး Yuliot Tanjung က B40 ဘိုင်အိုဒီဇယ် အသုံးပြုမှုမူဝါဒကို ယခုနှစ်ဖေဖော်ဝါရီလတွင် အပြည့်အဝအကောင်အထည်ဖော်မည်ဟု ပြောကြားခဲ့ပါသည်။ B40 သည် ဒီဇယ်ဆီ ၆၀ ရာခိုင်နှုန်းနှင့် စားအုန်းဆီမှပြုလုပ်သည့် ဘိုင်အိုလောင်စာ ၄၀ ရာခိုင်နှုန်းအရောဖြစ်ကြောင်းသိရပါသည်။ B40 ပရိုဂရမ်ပထမအဆင့်သည် ဘိုင်အိုဒီဇယ် ၁၅.၆ သန်းကီလိုလီတာထုတ်လုပ်နိုင်ရန် မျှော်လင့်ရကြောင်းသိရပါသည်။ စွမ်းအင်နှင့် သယံဇာတအရင်းအမြစ်ဝန်ကြီးဌာနကလည်း B40 ဘိုင်အိုဒီဇယ်ပရိုဂရမ်အတွက် စည်းမျဉ်းများကို ဇန်နဝါရီ ၁၂ ရက်နေ့နောက်ဆုံးထား၍ အပြီးသတ်ရန်ရည်ရွယ်ထားကြောင်း သိရှိရပါသည်။

Antara News

DOCA(ရန်ကုန်)                           

               ဗီယက်နမ်နိုင်ငံ၏ ၂၀၂၄ ခုနှစ်တွင် စုစုပေါင်းကုန်သွယ်မှုတန်ဖိုးမှာ အမေရိကန်ဒေါ်လာ ၇၈၆.၂၉ ဘီလီယံထိ ရောက်ရှိခဲ့ပြီး ၂၀၂၃ ခုနှစ်ကထက် ၁၅.၄ ရာခိုင်နှုန်းမြင့်တက်ခဲ့ကာ ကုန်သွယ်ရေးပိုငွေ အမေရိကန်ဒေါ်လာ ၂၄.၇၇ ဘီလီယံ ရရှိခဲ့ကြောင်း အထွေထွေစာရင်းအင်းရုံး က ဇန်နဝါရီလ ၆ ရက်နေ့ကကျင်းပခဲ့သည့် သတင်းစာရှင်းလင်းပွဲတွင်ပြောကြားခဲ့ပါသည်။ ၂၀၂၄ ခုနှစ်တွင် နိုင်ငံသည် အမေရိကန်ဒေါ်လာ ၄၀၅.၅၃ ဘီလီယံတန်ဖိုးတင်ပို့ခဲ့ပြီး အမေရိကန် ဒေါ်လာ ၃၈၀.၇၆ ဘီလီယံတန်ဖိုး ပြန်လည်တင်သွင်းခဲ့ကြောင်းသိရပါသည်။ ထိုတင်ပို့သည့် စုစုပေါင်းတန်ဖိုးတွင် ပြည်တွင်းကဏ္ဍမှာ အမေရိကန်‌ဒေါ်လာ ၁၁၄.၅၉ ဘီလီယံရှိပြီး ရေနံစိမ်း ပါဝင်သော နိုင်ငံခြားတိုက်ရိုက်ရင်းနှီးမြှုပ်နှံမှုကဏ္ဍမှာ အမေရိကန်‌ဒေါ်လာ ၂၉၀.၉၄ ဘီလီယံ ရှိကြောင်းသိရပါသည်။ ကုန်ပစ္စည်းအမျိုးအစား ၃၇ ခုတင်ပို့မှုမှ ဝင်ငွေ အမေရိကန်ဒေါ်လာ ၁ ဘီလီယံကျော် အသီးသီးရရှိခဲ့ကြောင်းသိရပါသည်။ တင်သွင်းမှုတွင် ပြည်တွင်းကဏ္ဍမှ အမေရိကန်ဒေါ်လာ ၁၄၀.၁၁ ဘီလီယံနှင့် နိုင်ငံခြားတိုက်ရိုက်ရင်းနှီးမြှုပ်နှံမှုကဏ္ဍမှ အမေရိကန်ဒေါ်လာ၂၄၀.၆၅ ဘီလီယံသုံးစွဲခဲ့ကြောင်းသိရသည်။ ၂၀၂၅ ခုနှစ်တွင် တင်ပို့မှု ဆက်လက်မြှင့်တင်ရန် ဗီယက်နမ်သည် လက်ရှိတည်ရှိသော လွတ်လပ်သော ကုန်သွယ်ရေး သဘောတူညီချက်(FTA)များမှ အကောင်းဆုံးအခြေအနေများကို ရှာဖွေသွားမည်ဖြစ်ကာ ပို့ကုန်သွင်းကုန်ဈေးကွက်များကိုတိုးချဲ့ရန်နှင့် ကွဲပြားရန် FTA အသစ်များ လက်မှတ်ထိုးနိုင်ရန် ကြိုးပမ်းသွားမည်ဟုသိရပါသည်။ စိုက်ပျိုးရေးနှင့်ကျေးလက်ဒေသဖွံ့ဖြိုးတိုးတက်ရေးဝန်ကြီးဌာန ၏ ဒုတိယဝန်ကြီးဖြစ်သူ Vo Van Hung က ဌာနသည် ပြည်တွင်းစိုက်ပျိုးမွေးမြူရေးထုတ်ကုန် များကို စားသုံးမှုနှင့် ကုန်ထုတ်လုပ်မှုမြှင့်တင်ရန်နှင့် ၂၀၂၅ မှစ၍ လာမည့်နှစ်များအတွင်း စိုက်ပျိုးမွေးမြူရေးထုတ်ကုန်များအတွက် တင်ပို့ရာဈေးကွက်များတိုးမြှင့်ရန်စက်မှုနှင့် ကုန်သွယ်ရေးဝန်ကြီးဌာန၊ သက်ဆိုင်ရာအဖွဲ့အစည်းများနှင့် အနီးကပ်ညှိနှိုင်းဆွေးနွေးသွားမည်ဟု ပြောကြားခဲ့ကြောင်းသိရှိရပါသည်။

Vietnam Plus

DOCA(ရန်ကုန်)

                ဗီယက်နမ်နိုင်ငံစက်မှုနှင့် ကုန်သွယ်ရေးဝန်ကြီးဌာန(MoIT) နှင့် ဗီယက်နမ်နိုင်ငံဆိုင်ရာ လာအိုသံရုံးတို့သည် နှစ်နိုင်ငံကြားကုန်သွယ်ရေး၊ စက်မှုနှင့် စွမ်းအင်ပူးပေါင်းဆောင်ရွက်မှု မြှင့်တင်ရန် အနီးကပ်ညှိနှိုင်းဆွေးနွေးခဲ့ကြကြောင်းသိရပါသည်။ ဗီယက်နမ်စက်မှုနှင့် ကုန်သွယ် ရေးဝန်ကြီးဖြစ်သူ Nguyen Hong Dien နှင့် လာအိုသံအမတ် Khamphao Ernthavanh တို့သည် ၎င်တို့၏အလုပ်သဘောဆွေးနွေးမှုအတည်ပြုခြင်းကို ဇန်နဝါရီလ ၃ ရက်နေ့က ဟနွိုင်းမြို့တွင်ကျင်းပခဲ့ပါသည်။ ၂၀၂၄ တွင် နှစ်နိုင်ငံကြားကုန်သွယ်မှုသည် ကောင်းမွန်သော ရလဒ်ရရှိခဲ့ပြီး အပြန်အလှန်ကုန်သွယ်မှုတန်ဖိုးအမေရိကန်ဒေါ်လာ ၂.၂ ဘီလီယံ ခန့်မှန်းရရှိခဲ့ပြီး ၂၀၂၃ ခုနှစ်ကထက် ၃၄ ရာခိုင်နှုန်းနီးပါးမြင့်တက်ခဲ့ကြောင်းသိရပါသည်။ ထိုပမာဏသည် အပြန်အလှန်ကုန်သွယ်မှုတန်ဖိုးအမေရိကန်ဒေါ်လာ ၂ ဘီလီယံကျော်သည့် ပထမဆုံး အကြိမ် ဖြစ်ပြီး အစိုးရနှစ်ဖက်စလုံး၏ သတ်မှတ်ရည်မှန်းချက်ကို ကျော်လွန်ခဲ့ခြင်းဖြစ်ကြောင်း သိရပါသည်။ Dien က ထိုအောင်မြင်မှုသည် နှစ်နိုင်ငံလုံးမှစီးပွားရေးလုပ်ငန်းများ၊ အာဏာပိုင်များနှင့် အစိုးရ များ၏ ကြိုးပမ်းအားထုတ်မှုများ၏ ရှင်းလင်းသောရလဒ်ဖြစ်ကြောင်း ပြောကြားခဲ့ပါသည်။ ဗီယက်နမ်-လာအိုကုန်သွယ်ရေးသဘောတူညီချက်နှင့်ပတ်သတ်၍ Dien က ဗီယက်နမ်နှင့် လာအိုစက်မှုနှင့်ကုန်သွယ်ရေးဝန်ကြီးဌာနများသည် ၂၀၂၄ ခုနှစ် ဧပြီလ ၈ရက်နေ့က လက်မှတ်ရေးထိုးခဲ့သည့် သဘောတူညီချက်အသစ်အား အစိုးရနှစ်ဖက်စလုံးမှခွင့်ပြုရန်အတွက် လိုအပ်သောလုပ်ငန်းစဉ်များကို ပြီးမြောက်ခဲ့ပြီဖြစ်ပြီး အကောင်အထည်ဖော်ရန်အဆင်သင့် ဖြစ်နေကြောင်းပြောကြားခဲ့ပါသည်။ ဝန်ကြီးသည် သံအမတ်ကြီးကို လာအိုအာဏာပိုင်များနှင့် အတူ အတွင်းပိုင်းလုပ်ငန်းစဉ်များ အကောင်အထည်ဖော်ရာတွင် ပံ့ပိုးပေးရန်တောင်းဆို ခဲ့ကြောင်းသိရပါသည်။ စွမ်းအင်နှင့်သတ္တုကဏ္ဍများတွင် ပူးပေါင်းဆောင်ရွက်မှုနှင့်ပတ်သတ်၍ Dien က၂ ၀၂၄ ခုနှစ်တွင် နှစ်နိုင်ငံကြားကျောက်မီးသွေးနှင့် လျှပ်စစ်ဝယ်ယူခြင်းနှင့် ရောင်းချ ခြင်းသည် အလွန်အပေါင်းလက္ခဏာဆောင်ခဲ့ကြောင်းပြောကြားခဲ့ပါသည်။ Khamphao က လတ်တလောနှစ်များအတွင်း နှစ်နိုင်ငံ၏အထင်ကြီးဖွယ်အောင်မြင်မှုများအပေါ် အမြင်ကိုဝေမျှ ခဲ့ပြီး ဗီယက်နမ်၏ပို့ကုန်သွင်းကုန်ကဏ္ဍနှင့် စက်မှုကဏ္ဍကြီးထွားမှုကို ချီးမွမ်းပြောကြား ခဲ့ပါသည်။ ထို့ပြင်ဗီယက်နမ်အား လာအိုဈေးကွက်သို့ ရေနံနှင့် Gasoline များရောင်းချပေးပြီး ပြည်တွင်းလောင်စာဈေးကွက်တည်ငြိမ်စေရန် ကူညီပေးခဲ့သည့်အတွက် ကျေးဇူးတင်ကြောင်း သံအမတ်ကပြောကြားခဲ့ကြောင်းသိရှိရပါသည်။

Vietnam Plus

DOCA(ရန်ကုန်)