ပြည်ပကုန်သွယ်မှုသတင်းများ

          ဗီယက်နမ်နိုင်ငံ ဒုတိယဝန်ကြီးချုပ်ဖြစ်သူ Ho Duc Phoc က တောင်ကိုရီးယားနိုင်ငံ Charmvit Group အား လာမည့်အချိန်တွင် တောင်ကိုရီးယားရင်းနှီးမြှုပ်နှံသူများအား ဗီယက်နမ် သို့ဆွဲဆောင်ရာတွင် ပေါင်းကူးတံတားသဖွယ် ဆောင်ရွက်ပေးရန် ဇန်နဝါရီလ ၁၀ ရက်နေ့က ‌တောင်းဆိုခဲ့ကြောင်းသိရပါသည်။ ဗီယက်နမ်သည် ၂၀၂၄ ခုနှစ်တွင် အမေရိကန်ဒေါ်လာ ၃၈ ဘီလီယံတန်ဖိုးရှိသော ပြည်ပတိုက်ရိုက်ရင်းနှီးမြှုပ်နှံမှုများကို ဆွဲဆောင်နိုင်ခဲ့ပြီး GDP ကြီးထွားနှုန်း ၇.၀၉ ရာခိုင်နှုန်းရှိခဲ့ကာ စုစုပေါင်း ပို့ကုန်-သွင်းကုန်တန်ဖိုး အမေရိကန်ဒေါ်လာ ၈၀၀ ဘီလီယံကျော် ရှိခဲ့ကြောင်းသိရပါသည်။ ထိုအချက်များသည် ပြည်ပရင်းနှီးမြှုပ်နှံသူများအတွက် ဗီယက်နမ်နိုင်ငံတွင် ရင်းနှီးမြှုပ်နှံရန် အလွန်သင့်လျော်သော ဝန်းကျင်ကို ဖန်တီးနိုင် ခဲ့ကြောင်း သိရပါသည်။ Phoc က ဗီယက်နမ်သည်နှစ်ဦးနှစ်ဖက် အကျိုးအမြတ်ရှိသည့် အရည်အသွေးမြင့်ကာ ထိရောက်မှုမြင့်မားသော စီမံကိန်းများကို ဆွဲဆောင်ရန်စိတ်ဝင်စားကြောင်း၊  Hoa Binh ပြည်နယ်ရှိ Grand Plaza ကြယ်ငါးပွင့်ဟိုတယ်နှင့် Phoenix ဂေါ့ဖ်ကွင်း အစရှိသည့် Charmvit ၏ ထိရောက်မှုရှိသော စီမံကိန်းများကို ကျေနပ်အားရမှုရှိကြောင်းနှင့် ထိုစီမံကိန်းများသည် ဗီယက်နမ်၏ လူမှုစီးပွားဖွံ့ဖြိုး တိုးတက်ရေးအတွက် အပေါင်းလက္ခဏာဆောင်ခဲ့ကြောင်း ပြောကြားခဲ့ပါသည်။ Group ၏ ရင်းနှီးမြှုပ်နှံမှုတိုးချဲ့ခြင်းနှင့် ဗီယက်နမ်သို့နေရာပြောင်းရွှေ့ခြင်း ကို ကြိုဆိုခြင်းနှင့်အတူ Phoc က ဗီယက်နမ်အစိုးရသည် တောင်ကိုရီးယားစီးပွားရေးလုပ်ငန်းများ အတွက် အခြေအနေ ကောင်းများ ဖန်တီးပေးရန်အဆင်သင့်ဖြစ်နေကြောင်းနှင့် တောင်ကိုရီးယား လုပ်ငန်းများအား ခွင့်ပြုထားသည့်စီမံကိန်းများအကောင်အထည်ဖော်ရာတွင် သက်ဆိုင်ရာ ဗီယက်နမ်အေဂျင်စီ များနှင့် အနီးကပ်ညှိနှိုင်းဆောင်ရွက်ရန် ပြောကြားခဲ့ကြောင်းသိရပါသည်။ တစ်ချိန်တည်းမှာပင် Phoc၊ Charmvit Group ၏ ဥက္ကဌဖြစ်သူ Lee Ho Woong၊ ဘဏ္ဍာရေးဝန်ကြီးဌာနမှ တာဝန်ရှိသူများ၊ သဘာဝပတ်ဝန်းကျင်နှင့် သယံဇာတအရင်းအမြစ်မှ တာဝန်ရှိသူများနှင့် စီမံကိန်းနှင့် ဘဏ္ဍာရေးဝန်ကြီးဌာနမှတာဝန်ရှိသူများသည် ဟနွိုင်းမြို့တွင် ဘက်စုံဖျော်ဖြေရေးရုံ နှင့် မြင်းပြိုင်ကွင်း တည်ဆောက်ရန်စီမံကိန်းအတွက် ဆွေးနွေးခဲ့ကြကြောင်း သိရပါသည်။ Lee ကလည်း ဗီယက်နမ်ရှိ Charmvit Group ၏ စီမံကိန်းများနှင့် ဟနွိုင်း ၏ Soc Son စီရင်စုရှိစီမံကိန်းတွင်ကြုံတွေ့ရသည့် အခက်အခဲအတားအဆီးအချို့ကို ပြောကြားခဲ့ကြောင်း သိရပါသည်။ ထိုအမေရိကန်ဒေါ်လာ သန်း ၄၂၀ တန်ဖိုးရှိသည့် စီမံကိန်းအတွက် ၂၀၁၉ ခုနှစ် စက်တင်ဘာလ ၁၂ ရက်နေ့တွင် ဝန်ကြီးချုပ်ဖြစ်သူထံမှ မူအားဖြင့်ခွင့်ပြုချက်ရရှိပြီးဖြစ်ကြောင်း သိရပါသည်။ ၎င်း၏ရင်းနှီးမြှုပ်နှံသူများမှာ ဟနွိုင်းခရီးသွားကော်ပိုရေးရှင်းနှင့် တောင်ကိုရီးယား နိုင်ငံ၏ Global Consultant Network Co.ltd တို့ဖြစ်ကြောင်း သိရပါသည်။

DOCA(ရန်ကုန်)

          ထိုင်းနိုင်ငံနှင့်အိန္ဒိယနိုင်ငံတို့သည် နှစ်နိုင်ငံကြား ကုန်သွယ်ရေးအတားအဆီးများကို လျှော့ပါးစေရန်နှင့် ရင်းနှီးမြှုပ်နှံမှုမြှင့်တင်ရန် ပူးတွဲကုန်သွယ်ရေးကော်မတီ (JTC) ထူထောင်ရန် စီစဉ်ထားကြောင်း ထိုင်းနိုင်ငံစီးပွားကူးသန်းဝန်ကြီးဌာနက ပြောကြားခဲ့ပါသည်။ ထိုင်းနိုင်ငံ ဆိုင်ရာ အိန္ဒိယသံအမတ်ဖြစ်သူနှင့် ဇန်နဝါရီလ ၈ ရက်နေ့က ပြုလုပ်ခဲ့သည့် အစည်းအဝေး အပြီးတွင် ထိုင်းစီးပွား ကူးသန်းဝန်ကြီးဖြစ်သူ Pichai Naripthaphan က JTC ထူထောင်ရန်ဆွေးနွေးမှုများ သည်လာမည့်နှစ်လအတွင်း စတင်ရန်မျှော်လင့်ရကြောင်း ပြောကြားခဲ့ပါသည်။ Mr Pichai က JTC အစည်းအဝေးများသည် မူဝါဒအဆင့် စီးပွားရေး၊ ကုန်သွယ်ရေးနှင့်ကုန်စည်၊ ဝန်ဆောင်မှုနှင့် ရင်းနှီးမြှုပ်နှံမှုများပါဝင်သော ဘက်ပေါင်းစုံ ရင်းနှီးမြှုပ်နှံမှုအခြေအနေများကို နှစ်ဖက်စလုံးမှ ဖြေရှင်းစေနိုင်မည်ဟု ပြောကြားခဲ့ပါသည်။ JTC အပြင် ထိုင်းနိုင်ငံသည် လေအေးပေးစက်များ၊ ပလတ်စတစ်ကော်စေ့များ၊ ပိုးတုမျှင်များ၊ MDF သစ်သား အစရှိသည့် အဓိကထိုင်းပို့ကုန်များ အတွက် ထောက်ခံချက်လုပ်ငန်းစဉ်များကို အမြန်ပြီးမြောက်စေရန် အိန္ဒိယနိုင်ငံအား တိုက်တွန်း ခဲ့ကြောင်းသိရပါသည်။ ထို့ပြင် ထိုင်းနိုင်ငံသည် ရာဘာတာယာများနှင့် ကာလာတီဗီ များအတွက် သွင်းကုန်လိုင်စင်များအား လျှင်မြန်စွာခွင့်ပြုပေးရန် တောင်းဆိုခဲ့ကြောင်း သိရပါသည်။ Mr Pichai က ထိုင်းနိုင်ငံသည်၂၀၂၅ တွင်ရည်ရွယ်ထားသည့် အာဆီယံ-အိန္ဒိယ ကုန်စည်ကုန်သွယ်ရေး သဘောတူညီချက်ကို အဆင့်မြှင့်တင်ရေး ပြီးမြောက်စေရန် အပြည့်အဝပံ့ပိုးကာ ပူးပေါင်းဆောင် ရွက်သွားရန် အဆင်သင့်ဖြစ်နေကြောင်းပြောကြားခဲ့ပါသည်။ နှစ်ဖက်စလုံးသည် ကုန်သွယ်မှုနှင့် ရင်းနှီးမြှုပ်နှံမှု မောင်းနှင်ရန်အတွက် ထိုင်း-အိန္ဒိယ လွတ်လပ်သောကုန်သွယ်ရေး သ‌ဘောတူညီ ချက်အပေါ် အရင်းအနှီးပြုရန် သုံးသပ်လျှက်ရှိကြောင်း သိရပါသည်။ ထိုင်းတာဝန်ရှိသူများသည် အိန္ဒိယရင်းနှီးမြှုပ်နှံသူများအား အရှေ့ပိုင်းစီးပွားရေးစင်္ကြန်တွင် ရင်းနှီးမြှုပ်နှံမှုအခွင့်အလမ်းများ အထူးသဖြင့် ‌ဒေတာစင်တာများထူထောင်ရာတွင် အခွင့်အလမ်းများရှာဖွေရန် ဖိတ်ခေါ်ခဲ့ကြောင်း သိရပါသည်။ နှစ်နိုင်ငံစလုံးသည် ပလတ်စတစ်ကော်စေ့များ၊ ဓာတုပစ္စည်းများ၊ ကျောက်မြတ် ရတနာများ၊ စက်ပစ္စည်းများ၊ ကားအစိတ်အပိုင်းများ၊ ရာဘာထုတ်ကုန်များ၊ ပီလောပီနံအခြေပြု ကုန်ပစ္စည်းများ၊ အထည်အလိပ်များ၊ ပြုပြင်ထားသောသစ်သားများ ပါဝင်သော တန်ဖိုးမြှင့်ထုတ် ကုန်များကို ကုန်သွယ်မှုမြှင့်တင်ရန် သဘောတူခဲ့ကြကြောင်း သိရပါသည်။ ထိုကနဦး စတင်မှုသည် ထောက်ပံ့မှုကွင်းဆက် ကြံ့ကြံ့ခံနိုင်စွမ်း အားကောင်းရန်နှင့် နှစ်နိုင်ငံစလုံးအား ဒေသတွင်း စည်းလုံးသော ကုန်ထုတ်လုပ်ရာအခြေစိုက်ဖြစ်စေရန် ရည်ရွယ်ကြောင်းသိရပါသည်။ ၎င်းတို့သည် စီးပွားရေးကွန်ယက်များ မြှင့်တင်ရန်နှင့် ကုန်သွယ်မှုအခွင့်အလမ်းများတိုးချဲ့ရန် နှစ်နိုင်ငံစလုံးရှိ ကုန်သွယ်မှုမြှင့်တင်ရေး ဆောင်ရွက်မှုများ၌ ပါဝင်ဆင်နွှဲမှု အရှိန်မြှင့်တင်ရန် သဘောတူခဲ့ကြ ကြောင်းသိရပါသည်။ အိန္ဒိယနိုင်ငံသည် အရှေ့တောင်အာရှတွင် ထိုင်းနိုင်ငံ၏ ထိပ်တန်းကုန်သွယ် ရေးမိတ်ဖက်ဖြစ်ကြောင်း သိရပါသည်။ ၂၀၂၄ ခုနှစ်၏ ပထမ ၁၁ လတွင် အပြန်အလှန်ကုန်သွယ်မှု တန်ဖိုးမှာ အမေရိကန်ဒေါ်လာ ၁၅.၈ ဘီလီယံ ရှိခဲ့ပြီး ၂၀၂၃ တူညီသည့်ကာလထက် ၆.၀၆ ရာခိုင်နှုန်းမြင့်တက်ခဲ့ကြောင်း သိရပါသည်။ ထိုင်းနိုင်ငံမှ အိန္ဒိယနိုင်ငံသို့ တင်ပို့မှုမှာ အမေရိကန် ‌ဒေါ်လာ ၁၀.၅ ဘီလီယံရှိပြီး အဓိကပို့ကုန်များတွင် ပလတ်စတစ်ကော်စေ့များ၊ ဓာတုပစ္စည်းများ၊ ဟင်းသီးဟင်းရွက်နှင့် တိရိစ္ဆာန်အဆီများ၊ ကျောက်မြတ်ရတနာများနှင့် စတီးလ်ထုတ်ကုန်များ ပါဝင်ကြောင်းသိရပါသည်။ အိန္ဒိယနိုင်ငံထံမှ ပြန်လည်တင်သွင်းမှုမှာ အမေရိကန်‌ဒေါ်လာ ၅.၃  ဘီလီယံတန်ဖိုးရှိပြီး အဓိကသွင်းကုန်များတွင် ကျောက်မြတ်ရတနာများ၊ စက်ပစ္စည်းများနှင့်စက် အစိတ်အပိုင်းများ၊ ဓာတုပစ္စည်းများ၊ အပင်များနှင့် သတ္ထုတွင်းထွက်ပစ္စည်းများ ပါဝင်ကြောင်း သိရပါသည်။

DOCA(ရန်ကုန်)

၂၀၂၄-၂၅ ဘဏ္ဍာနှစ်ပထမကိုးလအတွင်း မြန်မာနိုင်ငံသည် ဆန်နှင့်ဆန်ကွဲတန်ချိန် ၂ သန်း ကျော် တင်ပို့နိုင်ခဲ့ကြောင်းမြန်မာနိုင်ငံဆန်စပါးအသင်းချုပ် (MRF) မှ ၉.၁.၂၀၂၅ ရက်နေ့က အဆိုအရ သိရသည်။ မြန်မာ နိုင်ငံသည် ယမန်နှစ် ဧပြီလမှ ဒီဇင်ဘာလအတွင်း ပို့ကုန်တင်ပို့မှုမှ ကန်ဒေါ်လာ ၉၄၈ သန်းရရှိခဲ့ကြောင်း MRF ကဆိုသည်။ စုစုပေါင်း ဆန်နှင့်ဆန်ကွဲတန်ချိန် ၃၃၇၄၉၀ ကိုယမန်နှစ် ဒီဇင်ဘာလတွင်တင်ပို့ခဲ့ပြီး ဝင်ငွေကန်‌ဒေါ်လာ ၁၄၅ သန်းရရှိခဲ့ကြောင်း အဆိုပါအဖွဲ့ချုပ်၏ အဆိုအရသိရသည်။ ကိုးလတာကာလအတွင်း မြန်မာနိုင်ငံသည် အင်ဒိုနီးရှား၊ တရုတ်၊ ဖိလစ်ပိုင်၊ နယ်သာလန် နှင့် ဘယ်လ်ဂျီယံအပါအဝင်နိုင်ငံပေါင်း ၃၀ ကျော်သို့ ပင်လယ်ရေကြောင်းလမ်းမှ ဆန်နှင့်ဆန်ကွဲများတင်ပို့ခဲ့ကြောင်းသိရသည်။ ၂၀၂၃-၂၀၂၄ ဘဏ္ဍာနှစ်တွင်မြန်မာနိုင်ငံသည် ဆန်နှင့်ဆန်ကွဲတန်ချိန် ၁.၆ သန်းကျော်တင်ပို့ခဲ့ပြီး ကန်ဒေါ်လာ ၈၄၅ သန်းကျော် ရရှိခဲ့ကြောင်း MRF ၏ အဆိုအရသိရသည်။

DOCA(ရန်ကုန်)

အင်ဒိုနီးရှားနိုင်ငံသည် ၂၀၂၄ ခုနှစ်တွင် ကျောက်မီးသွေး တန်ချိန် ၈၃၀.၉၆ သန်း ထုတ်လုပ်ခဲ့ပြီး ယခင်နှစ် ထုတ်လုပ်မှု တန်ချိန် ၇၇၀.၉ သန်းကို ကျော်လွန်ခဲ့ကြောင်း စွမ်းအင်နှင့်သတ္တု အရင်းအမြစ် ဝန်ကြီးဌာန၏ အချက်အလက်များအရ သိရသည်။ ၂၀၂၄ ခုနှစ် တွင် ကျောက်မီးသွေး ရောင်းအားသည် တန်ချိန် ၈၁၁.၀၁ သန်းရှိခဲ့ပြီး နိုင်ငံအသီးသီးသို့ တန်ချိန် ၄၃၃.၁၇ သန်း တင်ပို့ခဲ့ပြီး ပြည်တွင်းဈေးကွက်တွင် တန်ချိန် ၃၇၇.၈၅ သန်း ရောင်းချ ခဲ့သည်။ ပြည်တွင်းရောင်းချရမှု စုစုပေါင်း၏ တန်ချိန် ၂၀၉.၉၃ သန်းကို ပြည်တွင်းဈေးကွက် လိုအပ် ချက်ပြည့်မီစေရန် ခွဲဝေပေးခဲ့ပါသည်။ယမန်နှစ်က ကျောက်မီးသွေး ထုတ်လုပ်မှုသည် အစိုးရ၏ လျာထားချက် တန်ချိန် ၇၁၀ သန်းထက် ၁၇ ရာခိုင်နှုန်း ကျော်လွန်ခဲ့သည်။ ၂၀၁၈ ခုနှစ်တွင် သြစတြေးလျကိုကျော်ကာ ကမ္ဘာ့အကြီးဆုံးကျောက်မီးသွေးတင်ပို့သည့်နိုင်ငံ ဖြစ်လာသည့် အင်ဒိုနီးရှားသည် အိန္ဒိယ၊ ဂျပန်နှင့် အခြားနိုင်ငံများအပါအဝင် အခြားသောအဓိကတင်ပို့သည့် နေရာများနှင့်အတူ ကမ္ဘာ့ကျောက်မီးသွေးကုန်သွယ်မှုတွင် အဓိကအခန်းကဏ္ဍမှ ဆက်လက်ပါဝင် လျှက်ရှိသည်။

DOCA(ရန်ကုန်)

          အင်ဒိုနီးရှားနိုင်ငံ၏ BRICS သို့ဝင်ရောက်နိုင်မှုသည် ရေနံနှင့်ဂတ်စ်တို့တွင် ရင်းနှီးမြှုပ်နှံမှု ဝင်‌ရောက်မှု အရှိန်မြှင့်တင်နိုင်ရန် ကူညီပေးနိုင်မည်ဟု Special Task Force For Upstream Oil and Gas Business Activities (SKK Migas ) ၏အဆိုအရသိရပါသည်။ SKK Migas ၏ အကြီး အကဲဖြစ်သူ Djoko Siswanto က အင်ဒိုနီးရှား BRICS သို့ဝင်ရောက်မှုနှင့်အတူ ၎င်းတို့သည် ရင်းနှီးမြှုပ်နှံမှုများတွင် အပြန်အလှန်ကူညီခြင်းနှင့် ပူးပေါင်းဆောင်ရွက်ခြင်းတို့ ပြုလုပ်နိုင်မည် ဖြစ်ကြောင်းနှင့် လူသားအရင်းအမြစ်နှင့် နည်းပညာကဏ္ဍတို့တွင် ဖလှယ်ရန် အခွင့်အလမ်း သစ်များ ဖွင့်လှစ်ပေးနိုင်မည်ဟု သိရပါသည်။ BRICS ကို ဘရာဇီး၊ ရုရှား၊ အိန္ဒိယ၊ တရုတ်နှင့် တောင်အာဖရိကနိုင်ငံတို့ဖြင့် မူလပထမဖွဲ့စည်းထားပြီး ယခုအခါ ကမ္ဘာ့လူဦးရေ၏ ၄၀ ရာခိုင်နှုန်း ရှိသော နိုင်ငံ ၁၀ နိုင်ငံနှင့်ဖွဲ့စည်းထားကြောင်း သိရပါသည်။ ရေနံနှင့်ဓာတ်ငွေ့တင်ပို့မှုနှင့် ပတ်သတ်၍ Siswanto က အင်ဒိုနီးရှား၏ လတ်တလောဦးစားပေးသည် ပြည်တွင်းလိုအပ်ချက် ပြည့်မီရန်ဖြစ်ကြောင်း သို့သော်ဂတ်စ်ကိုတင်ပို့မည်ဖြစ်ကြောင်း ပြောကြားခဲ့ပါသည်။ ၂၀၂၅ ခုနှစ် အတွက် BRICS ၏ဥက္ကဌအဖြစ် တာဝန်ယူသည့်ဘရာဇီးနိုင်ငံက အင်ဒိုနီးရှား၏ဝင်‌ရောက်မှုကို အသိအမှတ်ပြုခဲ့ခြင်းဖြစ်ကြောင်း သိရပါသည်။ ထိုသို့ဝင်ရောက်လာမှုသည် အင်ဒိုနီးရှားအား ရုရှား၏ရေနံကို နည်းပါးသောဈေးနှုန်းဖြင့် ရရှိနိုင်ရန် အခွင့်အလမ်းသစ်များကို ဖွင့်လှစ်ပေးနိုင် မည်ဟု သိရပါသည်။ အင်ဒိုနီးရှားအမျိုးသားစီးပွားရေးကောင်စီ၏ ဥက္ကဌဖြစ်သူ Luhut Binsar Pandjaitan ကလည်း ၎င်း၏အဖွဲ့သည် ရုရှားထံမှရေနံတင်သွင်းမှု၏ ကောင်းကျိုးနှင့်ဆိုးကျိုး များကို တွက်ဆနေကြောင်းပြောကြားခဲ့ပါသည်။

DOCA(ရန်ကုန်)