ပြည်ပကုန်သွယ်မှုသတင်းများ

Powered by Drupal

အမေရိကန်နိုင်ငံမှ ရေနံစိမ်းများ ဝယ်ယူတော့မည့် အင်ဒိုနီးရှားနိုင်ငံ

ပြည်ပကုန်သွယ်မှုသတင်းများ

          အင်ဒိုနီးရှားနိုင်ငံသည် စစ်မီးတောက်လောင်နေသည့် အရှေ့အလယ်ပိုင်းဒေသမှ ရေနံတင်သွင်းမှုကို အစားထိုးရန်အတွက် အမေရိကန်ပြည်ထောင်စုထံမှ ရေနံစိမ်းများ ပိုမိုတင်သွင်းသွားမည်ဖြစ်ကြောင်း မတ်လ ၂ ရက်နေ့တွင် အင်ဒိုနီးရှားနိုင်ငံ စွမ်းအင်ဝန်ကြီးမှ ပြောကြားသော ပြောကြားချက်များအရ သိရပါသည်။

          အမေရိကန်နှင့် အစ္စရေးတို့က အစ္စလာမ္မစ်သမ္မတနိုင်ငံ (အီရန်) အပေါ် တိုက်ခိုက်မှုများနှင့် ဒေသတွင်း၌ အီရန်၏ လက်တုံ့ပြန်တိုက်ခိုက်မှုများသည် ရေနံစိမ်းစီးဆင်းမှုကို အနှောင့်အယှက်ဖြစ်စေခဲ့ပြီး ကမ္ဘာ့ရေနံငါးပုံတစ်ပုံခန့် ဖြတ်သန်းရာ အရေးပါသည့် ဟော်မုဇ်ရေလက်ကြားမှာလည်း ပိတ်ဆို့သွားခဲ့ပါသည်။

         အင်ဒိုနီးရှားနိုင်ငံ၏ စုစုပေါင်းရေနံစိမ်းတင်သွင်းမှု၏ ၂၀ မှ ၂၅ ရာခိုင်နှုန်းခန့်သည် အရှေ့အလယ်ပိုင်းမှလာပြီး ဟော်မုဇ်ရေလက်ကြားကို ဖြတ်သန်းရခြင်းဖြစ်ကြောင်း စွမ်းအင်နှင့် သဘာဝသယံဇာတဝန်ကြီး Bahlil Lahadalia က ပြောကြားခဲ့ပါသည်။

       "လတ်တလော အရှေ့အလယ်ပိုင်းကနေ တင်သွင်းနေတဲ့ ရေနံစိမ်းတွေကို ၎င်းတို့၏ ရေနံစိမ်းဖူလုံမှု သေချာစေဖို့အတွက် အမေရိကန်ပြည်ထောင်စုကနေဝယ်ယူဖို့ တစ်စိတ်တစ်ပိုင်း လွှဲပြောင်းဆောင်ရွက်နေပါကြောင်း" Bahlil က သတင်းထောက်များကို ပြောကြားခဲ့ပါသည်။

         အင်ဒိုနီးရှားနိုင်ငံသည် ၎င်းတို့အသုံးပြုသည့် ရေနံအများစုကို တင်သွင်းနေရခြင်းဖြစ်ပြီး အများစုမှာ နိုင်ဂျီးရီးယားနိုင်ငံမှဖြစ်ကြောင်း သိရပါသည်။ ထို့အပြင် အင်ဒိုနီးရှားနိုင်ငံ၏ အရည်ပျော်ရေနံဓာတ်ငွေ့ (LPG) တင်သွင်းမှု၏ ၃၀ ရာခိုင်နှုန်းသည်လည်း အရှေ့အလယ်ပိုင်းမှ လာခြင်းဖြစ်သောကြောင့် အစိုးရအနေဖြင့် အခြားအစားထိုးတင်သွင်းနိုင်မည့်နိုင်ငံများကို ရှာဖွေသွားမည်ဖြစ်ကြောင်း Bahlil က ထပ်ပေါင်းပြောကြားခဲ့ပါသည်။

         အင်ဒိုနီးရှားနိုင်ငံတွင် သုံးပတ်စာအတွက် လုံလောက်သော ရေနံစိမ်းလက်ကျန်ရှိသော်လည်း နိုင်ငံအတွင်း သိုလှောင်ရုံ အဆောက်အအုံများ မလုံလောက်ခြင်းကြောင့် ယခုထက်ပို၍ တင်သွင်းနိုင်ခြင်းမရှိကြောင်း ၎င်းက ရှင်းပြခဲ့ပါသည်။

        အင်ဒိုနီးရှားနိုင်ငံသည် အမေရိကန်နှင့် အသစ်လက်မှတ်ရေးထိုးထားသည့် ကုန်သွယ်ရေးသဘောတူညီချက်အရ အမေရိကန်စွမ်းအင်ကဏ္ဍမှ ဒေါ်လာ ၁၅ ဘီလီယံဖိုး ဝယ်ယူရန် ကတိပြုထားကြောင်း သိရပါသည်။ အင်ဒိုနီးရှားနိုင်ငံသမ္မတ Prabowo Subianto သည် အင်ဒိုနီးရှားနိုင်ငံအားလာမည့် ၅ နှစ်မှ ၇ နှစ်အတွင်း စွမ်းအင်ကဏ္ဍတွင် ဖူလုံမှုရရှိစေရန် ရည်မှန်းချက် ချမှတ်ထားကြောင်း ပြောကြားခဲ့သည်ဟု သိရှိရပါသည်။

Source: Brecorder                                                               

DOCA (ရန်ကုန်)

ပြည်သူများအတွက် အမေရိကန်ဒေါ်လာ ၂၆၃ သန်းဖိုး နို့ထွက်ပစ္စည်းနှင့် စိုက်ပျိုးရေးထွက်ကုန်များ ဝယ်ယူတော့မည့် အမေရိကန်အစိုးရ

ပြည်ပကုန်သွယ်မှုသတင်းများ

       အမေရိကန် စိုက်ပျိုးရေးဌာန (USDA) သည် အမေရိကန် လယ်သမားများနှင့် ထုတ်လုပ်သူများထံမှ နို့ထွက်ပစ္စည်းနှင့် စိုက်ပျိုးရေးထွက်ကုန်များကို အမေရိကန်ဒေါ်လာ ၂၆၃ သန်းဖိုးအထိ ဝယ်ယူရန် ရည်ရွယ်ထားကြောင်း သိရပါသည်။

       အဆိုပါ ထွက်ကုန်ပစ္စည်းများကို အမေရိကန်တစ်ဝန်းရှိ စားနပ်ရိက္ခာဘဏ် (Food Banks) များနှင့် အာဟာရဆိုင်ရာ အကူအညီပေးရေး အစီအစဉ်များသို့ ဖြန့်ဝေပေးသွားမည်ဖြစ်ကြောင်း သိရပါသည်။ အမေရိကန် စိုက်ပျိုးရေးဝန်ကြီး Brooke L. Rollins ၏ ပြောကြားချက်အ အဆိုပါဝယ်ယူမှုများကို ၁၉၃၅ ခုနှစ် စိုက်ပျိုးရေးအက်ဥပဒေ ပုဒ်မ ၃၂ အရ USDA ၏ လုပ်ပိုင်ခွင့်ဖြင့် ဆောင်ရွက်ခြင်းဖြစ်ပြီး ထုတ်လုပ်သူများနှင့် အကူအညီလိုအပ်နေသည့် လူမှုအသိုက်အဝန်းများကို ပံ့ပိုးပေးသွားမည်ဖြစ်ကြောင်း သိရပါသည်။

         အဆိုပါလုပ်ဆောင်ချက်နှင့် ပတ်သက်၍ ထရမ့်အစိုးရအဖွဲ့က "အမေရိကန် စိုက်ပျိုးရေးကဏ္ဍ၊ ကျေးလက်ဒေသများနှင့် အာဟာရဆိုင်ရာ အကူအညီလိုအပ်နေသူများကို ပံ့ပိုးပေးခြင်းဖြင့် အမေရိကန်၏ သာယာဝပြောမှုကို မြှင့်တင်ပေးနေခြင်းဖြစ်သည်" ဟု ပြောကြားခဲ့ပါသည်။

       ဝန်ကြီး Rollins က "နို့နှင့် နို့ထွက်ပစ္စည်းများမှသည် သစ်သီးဝလံများ၊ ပဲမျိုးစုံနှင့် သစ်မာသီးများအထိ အဆိုပါ အခြေခံစားသောက်ကုန်များသည် မိသားစုများကို ကျွေးမွေးရန်နှင့် အမေရိကန်၏ စိုက်ပျိုးရေးစီးပွားရေးကို ထိန်းကျောင်းရန်အတွက် မရှိမဖြစ်လိုအပ်ပါသည်" ဟု ပြောကြားခဲ့ပါသည်။

      အဆိုပါ USDA Foods ပစ္စည်းများကို အရေးပေါ် စားနပ်ရိက္ခာအကူအညီပေးရေး အစီအစဉ် (TEFAP) ကို ဆောင်ရွက်နေသည့် စားနပ်ရိက္ခာဘဏ်များအပါအဝင် USDA ၏ အစားအစာနှင့် အာဟာရဝန်ဆောင်မှုဌာန (FNS) ၏ အစီအစဉ်များသို့ ပံ့ပိုးပေးမည်ဖြစ်ကြောင်း သိရှိရပါသည်။

Source: Agriland                                                                       

DOCA (ရန်ကုန်)

ပြောင်းတန်ချိန် ၆၈၀၀၀ တန်ခန့်ဝယ်ယူခဲ့သည့် တောင်ကိုရီးယားနိုင်ငံမှ MFG

ပြည်ပကုန်သွယ်မှုသတင်းများ

        မတ်လ ၂ ရက်နေ့တွင် ဥရောပကုန်သည်များမှ ထုတ်ပြန်သော ထုတ်ပြန်ချက်အရ တောင်ကိုရီးယား‌နိုင်ငံ၏ အဓိက တိရစ္ဆာန်အစာထုတ်လုပ်ရေးလုပ်ငန်းစုဖြစ်သော Major Feedmill Group (MFG) သည် ပြီးခဲ့သည့် သောကြာနေ့နှောင်းပိုင်းတွင် သီးသန့်အရောင်းအဝယ် ပြုလုပ်မှု (Private Deal) မှတစ်ဆင့် တိရစ္ဆာန်အစာသုံး ပြောင်းတန်ချိန် ၆၈,၀၀၀ ခန့်ကို ဝယ်ယူခဲ့ကြောင်း သိရပါသည်။ ၎င်းမှာ အဆိုပါနေ့အစောပိုင်းက နိုင်ငံတကာ တင်ဒါခေါ်ယူမှုမှတစ်ဆင့် ဝယ်ယူခဲ့သည့် တန်ချိန် ၁၃၅,၀၀၀ အပြင် ထပ်မံဝယ်ယူလိုက်ခြင်းဖြစ်ကြောင်း သိရပါသည်။

        အဆိုပါ ပြောင်းတန်ချိန် ၆၈,၀၀၀ ကို အမေရိကန်၊ တောင်အမေရိက သို့မဟုတ် တောင်အာဖရိကနိုင်ငံတို့မှ ရွေးချယ်တင်သွင်းရန် မျှော်မှန်းထားကြကြောင်း သိရပါသည်။ ဝယ်ယူသည့်ဈေးနှုန်းမှာ ကုန်ပစ္စည်းနှင့် သယ်ယူပို့ဆောင်ခအပါအဝင် တစ်တန်လျှင် ခန့်မှန်းခြေ အမေရိကန်ဒေါ်လာ ၂၅၀.၅၀ ကျသင့်မည်ဖြစ်ပြီး၊ ဆိပ်ကမ်းတွင် ထပ်ဆောင်းကုန်ချခအတွက် တစ်တန်လျှင် ၁.၅၀ ဒေါ်လာ ထပ်ဆောင်းပေးဆောင်ရမည်ဖြစ်ကြောင်း သိရပါသည်။

       အဆိုပါပြောင်းများကို CHS ကုန်သွယ်ရေးကုမ္ပဏီထံမှ ဝယ်ယူခဲ့ခြင်းဖြစ်ပြီး ဇူလိုင်လ ၁၅ ရက်ဝန်းကျင်တွင် တောင်ကိုရီးယားသို့ ဆိုက်ရောက်မည်ဟု သိရှိရပါသည်။

Source: Brecorder                                                                     

DOCA (ရန်ကုန်)

ဇူလိုင်လမှ ဖေဖော်ဝါရီလအတွင်း ပါကစ္စတန်နိုင်ငံ၏ ကုန်သွယ်ရေးလိုငွေပြမှု ၂၅ ရာခိုင်နှုန်းခန့် မြင့်တက်

ပြည်ပကုန်သွယ်မှုသတင်းများ

       ပါကစ္စတန်ဗဟိုစာရင်းအင်းဗျူရို (PBS) မှ မတ်လ ၂ ရက်နေ့တွင် ထုတ်ပြန်သည့် အချက်အလက်များအရ ၂၀၂၆ဘဏ္ဍာနှစ် ဇူလိုင်လမှ ဖေဖော်ဝါရီလအတွင်း ပါကစ္စတန်နိုင်ငံ၏ ကုန်သွယ်ရေးလိုငွေပြမှုသည် ၂၀၂၅ ဘဏ္ဍာနှစ် အလားတူကာလနှင့် နှိုင်းယှဉ်ပါက ၂၅ ရာခိုင်နှုန်း သိသိသာသာ မြင့်တက်လာပြီး အမေရိကန်ဒေါ်လာ ၂၅.၀၄ ဘီလီယံအထိ ရှိလာကြောင်း သိရပါသည်။

       ၂၀၂၅ဘဏ္ဍာနှစ်၏ ဇူလိုင်လမှ ဖေဖော်ဝါရီလကာလအတွင်း ပို့ကုန်နှင့် သွင်းကုန်ကြား ကွာဟချက်ဖြစ်သော နိုင်ငံ၏ ကုန်သွယ်ရေးလိုငွေမှာ ဒေါ်လာ ၂၀.၀၄ ဘီလီယံခန့်ရှိခဲ့ပါသည်။ အဆိုပါကာလအတွင်း ပို့ကုန်များလျော့ကျသွားခြင်းနှင့် သွင်းကုန်များ ပိုမိုမြင့်တက်လာခြင်းတို့ကြောင့် နှစ်အလိုက် ကုန်သွယ်ရေးလိုငွေ ပိုမိုကျယ်ပြန့်လာခြင်းဖြစ်ကြောင်း သိရပါသည်။ ၂၀၂၆ ဘဏ္ဍ ဇူလိုင်လမှ ဖေဖော်ဝါရီလကာလအတွင်း ပို့ကုန်တန်ဖိုးမှာ ဒေါ်လာ ၂၀.၄၆ ဘီလီယံရှိပြီး ၂၀၂၅ ဘဏ္ဍာနှစ်အလားတူကာတွင် ပို့ကုန်တန်ဖိုးမှရရှိခဲ့သော ဒေါ်လာ ၂၂.၀၇ ဘီလီယံနှင့် နှိုင်းယှဉ်ပါက ၇.၃ ရာခိုင်နှုန်း ကျဆင်းသွားခဲ့ကြောင်း သိရပါသည်။ သွင်းကုန်တန်ဖိုးမှာမူ ဒေါ်လာ ၄၅.၅၀ ဘီလီယံရှိခဲ့ပြီး၊ ၂၀၂၅ဘဏ္ဍာနှစ် အလားတူကာလ၏ ဒေါ်လာ ၄၂.၁၁ ဘီလီယံထက် ၈.၁ ရာခိုင်နှုန်း မြင့်တက်လာခဲ့ကြောင်း သိရပါသည်။

       တစ်ဖက်တွင်လည်း ၂၀၂၆ ခုနှစ် ဖေဖော်ဝါရီလအတွင်း ပါကစ္စတန်နိုင်ငံ၏ ပို့ကုန်တန်ဖိုးမှာ ဒေါ်လာ ၂.၂၇ ဘီလီယံရှိရာ၊ ၂၀၂၅ ခုနှစ် ဖေဖော်ဝါရီလတွင် ပို့ကုန်မှရရှိခဲ့သော ဒေါ်လာ ၂.၄၉ ဘီလီယံနှင့် နှိုင်းယှဉ်ပါက ၈.၈ ရာခိုင်နှုန်းလျော့ကျခဲ့ကြောင်း သိရပါသည်။ အလားတူ ၂၀၂၆ ခုနှစ် ဖေဖော်ဝါရီလ၏ သွင်းကုန်တန်ဖိုးမှာ ဒေါ်လာ ၅.၂၅ ဘီလီယံရှိပြီး၊ ၂၀၂၅ ဘဏ္ဍာနှစ်အလားတူကာလတွင် သွင်းကုန်မှရရှိခဲ့သော ဒေါ်လာ ၅.၃၄ ဘီလီယံထက် ၁.၆ ရာခိုင်နှုန်း လျော့နည်းခဲ့ကြောင်း သိရပါသည်။

       ၂၀၂၆ ခုနှစ် ဖေဖော်ဝါရီလအတွင်း နိုင်ငံ၏ ကုန်သွယ်ရေးလိုငွေမှာ ဒေါ်လာ ၂.၉၈ ဘီလီယံရှိခဲ့ပြီး၊ ၂၀၂၅ ခုနှစ် ဖေဖော်ဝါရီလ၏ ကုန်သွယ်ရေးလိုငွေ ဒေါ်လာ ၂.၈၅ ဘီလီယံထက် ၄.၆ ရာခိုင်နှုန်း မြင့်တက်လာခဲ့ကြောင်း သိရပါသည်။ လအလိုက် နှိုင်းယှဉ်မှုအရ ပါကစ္စတန်နိုင်ငံ၏ ကုန်သွယ်ရေးလိုငွေသည် ၂၀၂၆ ခုနှစ် ဇန်နဝါရီလတွင်ရှိခဲ့သည့် ဒေါ်လာ ၂.၇၅ ဘီလီယံထက် ၈.၄ ရာခိုင်နှုန်း တိုးလာကြောင်း သိရှိရပါပါသည်။

Source: Brecorder                                                                     

DOCA (ရန်ကုန်)

ရေထွက်ကုန်များအတွက် ဈေးကွက်ဆက်လက်ဖွင့်လှစ်ပေးရန် EAEU ကို တောင်းဆိုခဲ့သည့် ဗီယက်နမ်

ပြည်ပကုန်သွယ်မှုသတင်းများ

       စက်မှုနှင့် ကုန်သွယ်ရေးဝန်ကြီးဌာန ခေတ္တဝန်ကြီး Le Manh Hung သည်ရုရှားနှင့် ယူရေးရှား စီးပွားရေးအဖွဲ့ချုပ် (EAEU) အား ဗီယက်နမ်၏ ရေထွက်ကုန်ပစ္စည်းများအတွက် ဈေးကွက်ပိုမိုဖွင့်လှစ်ပေးရန် တောင်းဆိုခဲ့ကြောင်း သိရပါသည်။ Le Manh Hung သည် မတ်လ ၂ ရက်နေ့တွင် ဟနွိုင်းမြို့၌ ယူရေးရှား စီးပွားရေးကော်မရှင် (EEC) ဘုတ်အဖွဲ့ဥက္ကဋ္ဌ Bakytzhan Sagintayev နှင့်တွေ့ဆုံဆွေးနွေးစဉ် ယင်းတောင်းဆိုချက်ကို ပြုလုပ်ခဲ့ခြင်းဖြစ်ကြောင်း သိရပါသည်။ ၎င်းက EAEU သည် ဗီယက်နမ်၏အစဉ်အလာယုံကြည်စိတ်ချရပြီး အရေးပါသော ကုန်သွယ်ဖက်နိုင်ငံအဖွဲ့ဖြစ်ကြောင်း အတည်ပြုပြောကြားခဲ့ပြီး ဥရောပဒေသတွင် ဗီယက်နမ်နှင့် လွတ်လပ်သောကုန်သွယ်ရေးသဘောတူစာချုပ် (FTA) ကို ပထမဆုံး လက်မှတ်ရေးထိုးခဲ့သည့် စီးပွားရေးအဖွဲ့ချုပ်ဖြစ်ကြောင်းလည်း ပြောကြားခဲ့ပါသည်။ သဘောတူစာချုပ် အကောင်အထည်ဖော်ခဲ့သည်မှာ ဆယ်နှစ်ခန့် ရှိလာပြီဖြစ်ပြီး အပြုသဘောဆောင်သော ရလဒ်များရရှိခဲ့ကြောင်း သိရပါသည်။ ၂၀၁၆ ခုနှစ်တွင် စတင်အသက်ဝင်ချိန်မှစ၍ အခွန်အမျိုးအစား ၆၀ ရာခိုင်နှုန်းခန့်ကို သုညရာခိုင်နှုန်းသို့ လျှော့ချခဲ့ပြီး ကျန်ရှိသည့်အခွန်အမျိုးအစားများကို ၁၀ နှစ်တာ အစီအစဉ်အရ တဖြည်းဖြည်း လျှော့ချလာခဲ့ရာ ၂၀၂၅ ခုနှစ်တွင် အများစု ပြီးမြောက်ပြီဖြစ်ကြောင်း သိရပါသည်။ နှစ်ဖက်ကုန်သွယ်မှုပမာဏသည် ၂၀၁၆ ခုနှစ်တွင် အမေရိကန်ဒေါ်လာ ၃.၀၄ ဘီလီယံမှ ၂၀၂၅ ခုနှစ်တွင် အမေရိကန်ဒေါ်လာ ၅.၉၄ ဘီလီယံအထိ တိုးတက်လာခဲ့ကြောင်း သိရပါသည်။ နှစ်ဖက်အကြား ကုန်သွယ်ရေးဖွဲ့စည်းပုံသည် အပြန်အလှန်လိုက်ဖက်မှုပြီး စီးပွားရေးလုပ်ငန်းများအနေဖြင့် အခွန်လျှော့ချသည့်အခွင့်အရေးများကို အသုံးချနိုင်ကာ ယှဉ်ပြိုင်နိုင်စွမ်း တိုးမြှင့်နိုင်ခဲ့ကြောင်း သိရပါသည်။ FTA အောက်ရှိ အခွန်အခွင့်အရေးများကြောင့် EAEU ဈေးကွက်သို့ ဗီယက်နမ်၏ အဓိကပို့ကုန်များဖြစ်သည့် ရေထွက်ကုန်၊ ကော်ဖီ၊ ငရုတ်ကောင်း၊ သီဟိုဠ်စေ့နှင့် အဝတ်အထည်-ချည်ထည်များတင်ပို့မှုမှာ ကြီးထွားမှုအားကောင်းခဲ့ကြောင်း သိရပါသည်။ သို့ရာတွင် Le Manh Hung က ဖြေရှင်းရန် လိုအပ်နေသည့် ပြဿနာအချို့လည်းရှိနေကြောင်းနှင့် EAEU အနေဖြင့် ဗီယက်နမ် အဝတ်အထည်-ချည်ထည်များအပေါ် “trigger safeguard” စနစ်ကို ဆက်လက်အသုံးပြုခြင်းကို ရပ်ဆိုင်းရန် တောင်းဆိုထားပြီး ယင်းအစီအစဉ်သည် လက်ရှိဈေးကွက်အခြေအနေများနှင့် အပြည်ပြည်ဆိုင်ရာ လုပ်ထုံးလုပ်နည်းများနှင့် မကိုက်ညီတော့ကြောင်း ပြောကြားခဲ့ပါသည်။ ထို့အပြင် ရုရှားနှင့် EAEU အဖွဲ့ဝင်နိုင်ငံများအနေဖြင့် ဗီယက်နမ် ရေထွက်ကုန်ပစ္စည်းများအတွက် ဈေးကွက်ဝင်ရောက်ခွင့်ကို တိုးချဲ့ပေးရန်၊ ယာယီရပ်ဆိုင်းထားမှုများကို ပြန်လည် ရုပ်သိမ်းရန်နှင့် ထပ်တိုးလုပ်ငန်းများကို တင်ပို့ခွင့်ပြုရန် အဆိုပြုခဲ့ကြောင်း သိရပါသည်။ Bakytzhan Sagintayev ကလည်း သဘောတူစာချုပ်သည် နှစ်ဖက်ကုန်သွယ်ရေးတိုးတက်မှုအတွက် အပြုသဘောဆောင်သော ပံ့ပိုးကူညီမှုများ ပြုလုပ်ပေးခဲ့ကြောင်းနှင့် နှစ်ဖက်ကုန်သွယ် ရေးပမာဏ တဖြည်းဖြည်း တိုးတက်လာမှုကိုကြိုဆိုပြီး အနာဂတ်တွင် ပူးပေါင်းဆောင်ရွက်မှုများ ပိုမိုတိုးချဲ့သွားနိုင်မည်ဟု ယုံကြည်ကြောင်း ပြောကြားခဲ့ပါသည်။ နှစ်ဖက်စလုံးသည် ဈေးကွက်ဝင်ရောက်ခွင့် အဆင်ပြေချောမွေ့စေရန်၊ ကုန်သွယ်ရေးအတားအဆီးများကို အချိန်မီဖယ်ရှားရန်နှင့် ရင်ဆိုင်နေရသော အခက်အခဲများကို ဖြေရှင်းသွားရန် သဘောတူညီခဲ့ကြကြောင်း သိရပါသည်။ ထို့အပြင် ထောက်ပံ့သည့်အရင်းအမြစ်များကွဲပြားရန်နှင့် ဈေးကွက်များတိုးချဲ့ရန် ကတိပြုခဲ့ကြပြီး ယှဉ်ပြိုင်နိုင်စွမ်း မြှင့်တင်ကာ ပထဝီနိုင်ငံရေးဆိုင်ရာ အန္တရာယ်များကြောင့် ထောက်ပံ့ရေးကွင်းဆက်များ ထိခိုက်မှုကို လျှော့ချနိုင်ရန် ရည်ရွယ်ထားကြောင်း သိရှိရပါသည်။

Vietnam Plus                                                                            

DOCA (ရန်ကုန်)

စင်ကာပူ၊ ဂျပန်နှင့် တီ‌မောလတ်စ်တေသို့ ကြက်သားနှင့် ဆက်စပ်ထုတ်ကုန် ၅၄၅ တန်တင်ပို့ခဲ့သည့် အင်ဒိုနီးရှား

ပြည်ပကုန်သွယ်မှုသတင်းများ

        အင်ဒိုနီးရှားနိုင်ငံ စိုက်ပျိုးမွေးမြူရေးဝန်ကြီး Andi Amran Sulaiman သည် ရူပီး ၁၈.၂ ဘီလီယံ (အမေရိကန်ဒေါ်လာ ၁.၂ သန်းခန့်) တန်ဖိုးရှိသော ကြက်သားနှင့် ဆက်စပ်ထုတ်ကုန် ၅၄၅ တန်ကို စင်ကာပူ၊ ဂျပန်နှင့် တီမောလတ်စ်တေသို့ တင်ပို့ခဲ့ကြောင်း မတ်လ ၃ ရက်နေ့က ပြောကြားခဲ့ပါသည်။ ဂျကာတာရှိစိုက်ပျိုးမွေးမြူရေးဝန်ကြီးဌာနရုံးတွင် ပြုလုပ်သော အခမ်းအနားတွင် ဝန်ကြီး Sulaiman က အဆိုပါ တင်ပို့မှုသည် အင်ဒိုနီးရှားနိုင်ငံ၏ ကြက်မွေးမြူရေးလုပ်ငန်း ကဏ္ဍမှာ ကြက်သားနှင့် ကြက်ဥ ထုတ်လုပ်မှုတွင် ကိုယ်ပိုင်လုံလောက်မှု ရရှိထားရုံသာမက နိုင်ငံတကာဈေးကွက်များသို့လည်း တိုးချဲ့ဝင်ရောက်လာနိုင်ပြီဖြစ်ကြောင်း၊ အခြားနိုင်ငံများသို့ တင်ပို့မှုများကို ဆက်လက်တိုးမြှင့်နေကြောင်း၊ လက်ရှိတွင် ပုံမှန်တင်ပို့နေသည့် နိုင်ငံ ၁၀ နိုင်ငံ ရှိပြီး ယနေ့တွင် နိုင်ငံ ၃ နိုင်ငံသို့ ပို့ဆောင်သွားမည်ဖြစ်ကြောင်း၊ ထိုသို့အောင်မြင်သော တင်ပို့မှုများကြောင့် အင်ဒိုနီးရှားနိုင်ငံသည် ယခင်ကကဲ့သို့ ကြက်သား တင်သွင်းမှုအပေါ် မူတည်နေရခြင်းမရှိတော့ကြောင်း ပြောကြားခဲ့ပါသည်။ ထုတ်လုပ်မှုတိုးတက်လာခြင်းကြောင့် မွေးမြူရေးသမားများအတွက် ဈေးနှုန်းကျဆင်းမှု မဖြစ်ပေါ်စေကြောင်း သိရပါသည်။ အစိုးရသည် အခမဲ့ အာဟာရရှိသောအစားအစာအစီအစဉ် (Free Nutritious Meal program) ပါဝင်သည့် ပြည်တွင်းစားသုံးခြင်းနှင့် ပို့ကုန်ဈေးကွက်များ တိုးချဲ့ခြင်းတို့တစ်ဆင့် ပိုလျှံမှုကို စီမံခန့်ခွဲနေကြောင်း သိရပါသည်။ တင်ပို့မှုများကို ပြည်တွင်းကုမ္ပဏီ ၄ ခုဖြစ်သည့် PT Charoen Pokphand Indonesia Tbk၊ PT Japfa Comfeed Indonesia Tbk၊ PT Taat Indah Bersinar နှင့် PT Malindo Food Delight တို့ကတာဝန်ယူဆောင်ရွက်နေပြီး ကုမ္ပဏီတိုင်း၏တင်ပို့သည့်ပမာဏနှင့် တန်ဖိုးမှာ ကွဲပြားကြောင်း သိရပါသည်။ မွေးမြူရေးနှင့် တိရိစ္ဆာန်ကျန်းမာရေးဦးစီးဌာန၏ ညွှန်ကြားရေးမှူးချုပ် Agung Suganda က တင်ပို့မှုအောင်မြင်ခြင်းသည် တိရစ္ဆာန်ကျန်းမာရေးစနစ်များ အားကောင်းမှု၊ အစားအစာလုံခြုံရေးအာမခံချက်များနှင့် နိုင်ငံတကာစံချိန်စံညွှန်းအရ စောင့်ကြည့်ထိန်းသိမ်းမှုများပေါ်မူတည်ကြောင်း၊ တင်ပို့သည့် ထုတ်ကုန်တိုင်းသည် ဝယ်ယူသောနိုင်ငံများ၏ စည်းမျဉ်းစည်းကမ်းများနှင့် ကိုက်ညီစေရန် တိရစ္ဆာန်ဆေးဘက်ဆိုင်ရာ အတည်ပြုလက်မှတ်များ ရယူ ထားပြီး တင်းကြပ်သော စောင့်ကြည့်ထိန်းသိမ်းမှုများ ဆောင်ရွက်ကြောင်းနှင့် ခြေရာခံလိုက်နိုင်မှု (traceability)၊ ဇီဝလုံခြုံရေး (biosecurity) နှင့် အစားအစာလုံခြုံစိတ်ချရေးတို့ကို အာမခံထားကြောင်း ပြောကြားခဲ့ပါသည်။ ထို့အပြင် မိတ်ဖက်နိုင်ငံများနှင့် တိရစ္ဆာန်ဆေးဘက်ဆိုင်ရာ သံတမန်ရေးရာနှင့် နည်းပညာဆိုင်ရာ ဆက်သွယ်ဆောင်ရွက်မှုများကို အားကောင်းစွာ ဆောင်ရွက်ခြင်းအားဖြင့် ဈေးကွက်ဝင်ရောက်ခွင့်ကို ထိန်းသိမ်းထားကြောင်းလည်း သိရပါသည်။ ထုတ်လုပ်မှုလုံလောက်မှုရှိခြင်းနှင့် တင်ပို့သည့်ဈေးကွက်များ တိုးချဲ့လာခြင်းတို့ကြောင့် အင်ဒိုနီးရှား၏ ကြက်မွေးမြူရေးကဏ္ဍသည် ပိုမိုအားကောင်းလာကြောင်း သိရပါသည်။ စိုက်ပျိုးမွေးမြူရေးဝန်ကြီးဌာနသည်လည်း လုပ်ငန်းနယ်ပယ်၏ယှဉ်ပြိုင်နိုင်စွမ်းကို အရှိန်မြှင့်တင်ရန် ထုတ်လုပ်မှုပိုလျှံခြင်းကို ဆက်လက်စီမံခန့်ခွဲခြင်း၊ မွေးမြူရေးအဆင့် ဈေးနှုန်းတည်ငြိမ်ရေးနှင့် နိုင်ငံတကာဈေးကွက်တိုးချဲ့ရေးတို့ကို ဆက်လက်လုပ်ဆောင်သွားမည်ဖြစ်ကြောင်း သိရှိရပါသည်။

Antara News                                                                             

DOCA (ရန်ကုန်)

ထိုင်းနိုင်ငံအားဗျူဟာမြောက် အခြေစိုက်အဖြစ်ယုံကြည်ကြောင်း အတည်ပြုခဲ့သည့် Panosonic Energy (Thailand) Co Ltd

ပြည်ပကုန်သွယ်မှုသတင်းများ

         Panasonic Energy (Thailand) Co Ltd သည် ထိုင်းနိုင်ငံကို အဖွဲ့၏ ကမ္ဘာလုံးဆိုင်ရာ dry battery လုပ်ငန်းအတွက် မဟာဗျူဟာအရေးပါသောအခြေစိုက်စခန်းတစ်ခုအဖြစ် ပြောကြားခဲ့ပါသည်။ Panasonic Energy Co Ltd ၏ Managing Executive Officer ဖြစ်သူ Hidefumi Fujii က ကုမ္ပဏီ၏အားသာချက်မှာ ကမ္ဘာလုံးဆိုင်ရာ ထုတ်လုပ်မှုအခြေစိုက်စခန်းများကို ပိုင်ဆိုင်ထားခြင်းဖြစ်ကြောင်း၊ ကမ္ဘာလုံးဆိုင်ရာ မတည်ငြိမ်မှုများကြားတွင်လည်း ထုတ်လုပ်ရေး အခြေစိုက်နေရာများကို စားသုံးသူဝယ်လိုအားနှင့် ချိန်ညှိ၍ မဟာဗျူဟာကျကျ တည်နေရာချထားကြောင်း၊ ထိုင်းနိုင်ငံသည် ကမ္ဘာလုံးဆိုင်ရာ တင်ပို့မှုများကို ပံ့ပိုးပေးနေသည့် မဟာဗျူဟာ အချက်အချာတစ်ခုဖြစ်ကြောင်းနှင့် ရင်းနှီးမြှုပ်နှံမှုများ၊ ထုတ်လုပ်မှုစွမ်းရည်တိုးချဲ့မှုများနှင့် နည်းပညာအဆင့်မြှင့်တင်မှုများကို ဆက်လက်ဆောင်ရွက်လျက်ရှိကြောင်း ပြောကြားခဲ့ပါသည်။ ကုမ္ပဏီသည် in-vehicle လုပ်ငန်းနှင့် industrial/consumer လုပ်ငန်းဟူ၍ “two-pillar management” ဖွဲ့စည်းပုံအောက်တွင် လည်ပတ်နေကြောင်း သိရပါသည်။ ၂၀၂၄ ခုနှစ်တွင် ကမ္ဘာလုံးဆိုင်ရာ ဝင်ငွေစုစုပေါင်း ဘတ် ၁၇၈ ဘီလီယံ ရရှိခဲ့ပြီး ၎င်းအနက် ၅၅ ရာခိုင်နှုန်းကို in-vehicle လုပ်ငန်းမှရရှိခဲ့ကာ ကျန် ၄၅ ရာခိုင်နှုန်းကို industrial နှင့် consumer ထုတ်ကုန်များမှ ရရှိခဲ့ကြောင်း သိရပါသည်။ ကုမ္ပဏီသည် ကမ္ဘာတစ်ဝှမ်းတွင် ထုတ်လုပ်ရေးစက်ရုံ ၂၁ ခုဖြင့် လည်ပတ်လျက်ရှိပြီး ထိုင်းနိုင်ငံကို dry battery ထုတ်လုပ်ရေးအတွက် အရေးပါဆုံး အခြေစိုက် နေရာများထဲမှတစ်ခုအဖြစ် သတ်မှတ်ထားကြောင်း သိရပါသည်။ Mr Fujii က လူဦးရေတိုးတက်မှုအပါအဝင် အခြားအချက်များ၏ ထောက်ပံ့မှုကြောင့် လုပ်ငန်းတိုးတက်နိုင်မည်ဟု ယုံကြည်ကြောင်း၊ APAC ဒေသတွင် နှစ်စဉ် ဘက်ထရီလိုအပ်ချက်အရေအတွက် ခန့်မှန်းခြေအားဖြင့် ၃ ဘီလီယံခန့် ရှိနေပြီး လုပ်ငန်းဆောင်ရွက်မှုများအားကောင်းစေရန်နှင့် ကြီးထွားမှုအခွင့်အလမ်းများကို ရယူနိုင်ရန် ရင်းနှီးမြှုပ်နှံမှုများ တိုးမြှင့်သွားမည်ဟု ပြောကြားခဲ့ပါသည်။ Panasonic Energy (Thailand) Co Ltd ၏ Managing Director ဖြစ်သူ Atsushi Anzai က ထိုင်းနိုင်ငံသည် ကုမ္ပဏီအတွက် မဟာဗျူဟာအရေးပါသောထုတ်လုပ်ရေး အခြေစိုက်စခန်းဖြစ်ကြောင်း ပြောကြားခဲ့ပါသည်။ ကုမ္ပဏီအနေဖြင့် dry battery စုစုပေါင်း ၂၀ ဘီလီယံကျော် ထုတ်လုပ်ပြီး နိုင်ငံပေါင်း ၄၀ ကျော်သို့ တင်ပို့ထားကြောင်း သိရပါသည်။ Shinya Yoshida၊ Sales and Marketing Director က ထိုင်းနိုင်ငံ၏ dry battery စျေးကွက်တွင် အကြီးဆုံး စျေးကွက်ဝေစုကို ဆက်လက်ထိန်းသိမ်းထားနိုင်ကြောင်း၊ ၎င်းသည် နိုင်ငံတစ်ဝှမ်း ဖြန့်ချိရေးကွန်ယက်နှင့် အဓိကအရောင်း ကိုယ်စားလှယ်များ၊ modern trade ချန်နယ်များ၏ ပံ့ပိုးမှုကြောင့်ဖြစ်ကြောင်း၊ အရှေ့တောင် အာရှဒေသတွင် ဝယ်လိုအားကြီးထွားနိုင်သည့် အလားအလာများကို မြင်တွေ့နေရကြောင်းနှင့် ထိုင်းနိုင်ငံသည် အသက်ကြီးသူများ ပိုမိုများပြားလာသည့် လူမှုအသိုင်းအဝိုင်းတစ်ခု ဖြစ်လာနေသဖြင့် ဆေးဘက်ဆိုင်ရာ ကိရိယာများအား ဝယ်လိုအားမြင့်တက်လာမည်ဟု ခန့်မှန်းရပြီး ၎င်း အချက်က dry battery ဝယ်လိုအားကြီးထွားမှုကို ပံ့ပိုးပေးမည်ဖြစ်ကြောင်း ပြောကြားခဲ့ပါသည်။ ထိုင်းနှင့် အရှေ့တောင်အာရှဒေသအတွင်း ရောင်းအားကြီးထွားမှု၏ မောင်းနှင်အားကြောင့် ကုမ္ပဏီသည် ၂၀၃၀ ခုနှစ်အထိ ကမ္ဘာလုံးဆိုင်ရာ compound annual growth rate (CAGR) ကို ၅ ရာခိုင်နှုန်းရရှိရန် ရည်မှန်းထားကြောင်း သိရပါသည်။ ကုန်ကြမ်းစျေးနှုန်းများနှင့် ပတ်သက်၍ manganese နှင့် potassium စျေးနှုန်းများသည် မကြာသေးမီက မြင့်တက်ခဲ့သော်လည်း မကြီးမားကြောင်း သိရပါသည်။ ထိုင်းနိုင်ငံအတွင်း ထောက်ပံ့မှုကွင်းဆက်စီမံခန့်ခွဲမှုကို ကောင်းမွန်စွာပြုလုပ်ခြင်းနှင့် သင့်လျော်သော ရောင်းချသူများထံမှ ဝယ်ယူခြင်းတို့ဖြင့် ထုတ်လုပ်မှုကုန်ကျစရိတ်များ မထိခိုက်စေရန် ထိန်းချုပ်ထားကြောင်းလည်း သိရပါသည်။ သို့သော် dry battery ပြန်လည်အားသွင်းနိုင်သောထုတ်ကုန်များ ထွက်ရှိလာခြင်းနှင့် စမတ်ဖုန်းနည်းပညာတိုးတက်လာခြင်းတို့ကြောင့် ဘက်ထရီဝယ်လိုအားအပေါ် ဖိအားရှိနေသော်လည်း လူဦးရေတိုးတက်မှု၊ remote control နှင့် digital door lock အသုံးပြုမှု တိုးမြင့်လာခြင်း၊ ဟိုတယ်ဆောက်လုပ်ရေးများ တိုးချဲ့လာခြင်းတို့ကြောင့် စျေးကွက်အလားအလာမှာ မျှတနေကြောင်း သိရှိရပါသည်။

Bangkok Post                                                                           

DOCA (ရန်ကုန်)

ကမ္ဘောဒီးယား၏ လျှပ်စစ်မော်တော်ယာဉ်ထုတ်လုပ်မှုကဏ္ဍတွင် ရင်းနှီးမြှုပ်နှံရန် ကိုရီးယား လုပ်ငန်းရှင်များ စိတ်ဝင်စား

ပြည်ပကုန်သွယ်မှုသတင်းများ

    ကမ္ဘောဒီးယားတွင် လျှပ်စစ်မော်တော်ယာဉ်များ အသုံးပြုမောင်းနှင်မှုစဉ်ဆက်မပြတ် များ ပြားလာရာ အထူးသဖြင့် ကမ္ဘာတစ်ဝန်း ဓါတ်ဆီဈေးနှုန်းများမြင့်တက်လျက်ရှိသော အချိန်အခါ တွင် တောင်ကိုရီးယားရင်းနှီးမြှုပ်နှံမှု ကိုယ်စားလှယ်အဖွဲ့အနေဖြင့် ကမ္ဘောဒီးယားတွင် လျှပ်စစ် မော်တော်ဆိုင်ကယ် ထုတ်လုပ်သည့် စက်ရုံတစ်ခုတည်ဆောက်ရန် စိတ်ဝင်စားလျက်ရှိကြောင်း သိရှိရသည်။

    ကိုယ်စားလှယ်အဖွဲ့သည် ကမ္ဘောဒီးယား၏ လမ်းများတွင်အများဆုံးမြင်တွေ့ရသည့်   Verywords အမျိုးအစား လျှပ်စစ်မော်တော်ဆိုင်ကယ်အပါအဝင် တောင်ကိုးရီးယားနိုင်ငံ၏ လျှပ်စစ် မော်တော်ဆိုင်ကယ် တပ်ဆင်ထုတ်လုပ်သူအများအပြားကို ချိတ်ဆက်ပေးသွားမည်ဖြစ် ကြောင်း သိရှိရသည်။

    ကမ္ဘောဒီးယား ရင်းနှီးမြှုပ်နှံမှုအဖွဲ့၏ ဒုတိယအမြဲတမ်းအတွင်းဝန်ဖြစ်သူ Youn Heng သည် တောင်ကိုရီးယားရင်းနှီးမြှုပ်နှံမှုကိုယ်စားလှယ်အဖွဲ့ကို မတ်လ ၆ရက်နေ့တွင် ကမ္ဘောဒီးယား ဖွံ့ဖြိုးတိုးတက်မှုကောင်စီရုံးချုပ်တွင်တွေ့ဆုံခဲ့ပါသည်။ ကိုယ်စားလှယ်အဖွဲ့အနေဖြင့် ကမ္ဘောဒီးယား ပြည်သူများ၏အကြား လျှပ်စစ်မော်တော်ယာဉ်အသုံးပြုမှု ကြီးထွားလာမှုအပေါ် စိတ်ဝင်စားပါ ကြောင်း၊ ထို့ကြောင့် မော်တော်ဆိုင်ကယ်တပ်ဆင်ထုတ်လုပ်သည့် စက်ရုံကို တည်ဆောက်ခြင်း ဖြင့် ကမ္ဘောဒီးယားနိုင်ငံတွင် ရင်းနှီးမြှုပ်နှံမှုအခွင့်အလမ်းများနှင့် အလားအလာများကို လေ့လာလို ပါကြောင်း ရှင်းလင်းပြောကြားခဲ့ပါသည်။

    Heng က ကိုယ်စားလှယ်အဖွဲ့အား ကမ္ဘောဒီးယားနိုင်ငံ၏ ရင်းနှီးမြှုပ်နှံမှုအခြေအနေနှင့် စပ်လျဉ်း၍ ရှင်းလင်းတင်ပြရာတွင် အစိုးရအနေဖြင့် ပြည်တွင်းရင်းနှီးမြှုပ်နှံမှုနှင့် ပြည်ပမှနိုင်ငံခြား ငွေစီးဝင်မှုတို့ကို ဖိတ်ခေါ်၍ တိုးမြှင့်လာစေရေး အလေးထားဆောင်ရွက်နေကြောင်း ပြောကြားခဲ့ပါ သည်။

    အများပိုင်ယာဉ်နှင့် ပို့ဆောင်ရေးဝန်ကြီးဌာန၏ ပြောခွင့်ရပုဂ္ဂိုလ် Phon Rim က ကမ္ဘာ တစ်ဝန်းတွင် လျှပ်စစ်မော်တော်ယာဉ် အသုံးပြုမှုများပြားလျက်ရှိရာ ထိုသို့အသုံးပြုခြင်းဖြင့် ဒေသ တွင်းနှင့် ကမ္ဘာတစ်ဝန်း ဖြစ်ပေါ်တိုးတက်နေမှုများနှင့်လျော်ညီစွာ ပတ်ဝန်းကျင်ကာကွယ် ထိန်း သိမ်းခြင်း၊ စီးပွားရေးဖွံ့ဖြိုးတိုးတက်ခြင်း၊ စွမ်းရည်လုံခြုံစိတ်ချရခြင်းနှင့် နည်းပညာအသစ်များ အား အသုံးပြုနိုင်ခြင်းစသည့် ကိစ္စရပ်များတွင် အကျိုးကျေးဇူးများရရှိစေနိုင်ကြောင်း ပြောကြား ထားပါသည်။

    အစိုးရအနေဖြင့် ကုန်စည်နှင့် အခြားဝန်ဆောင်မှုများ ပို့ဆောင်ခြင်းနှင့် ခရီးသွားလာခြင်း တို့တွင် လွယ်ကူချောမွေ့စေရန်အတွက် မော်တော်ယာဉ်အသုံးပြုမှုကို လွတ်လပ်ခွင့်ပေးထား ကြောင်း၊ လျှပ်စစ်မော်တော်ယာဉ် အသုံးပြုမှုပမာဏ (အထူးသဖြင့် မော်တော်ဆိုင်ကယ်နှင့် မော် တော်ယာဉ်များ) သည်သိသာစွာ တိုးတက်များပြားလျက်ရှိကြောင်း၊ ကမ္ဘောဒီးယား လျှပ်စစ်ဓါတ် အား ထုတ်လွှတ်သည့်အာဏာပိုင်အဖွဲ့အနေဖြင့် လျှပ်စစ်မော်တော်ယာဉ် အသုံးပြုမှု ကြီးထွားလာ သည်နှင့်အမျှ လျှပ်စစ်ဓါတ်အား ဖြန့်ဖြူးခွင့်လိုင်စင်များ ရယူထားသည့် ရင်းနှီးမြှုပ်နှံသူများအား လျှပ်စစ် မော်တော်ယာဉ်ဓါတ်အားဖြည့်သွင်းရုံများတွင် ရင်းနှီးမြှုပ်နှံနိုင်ခြေရှိမှုကို လေ့လာရန် မကြာသေးမီက တိုက်တွန်းထားကြောင်းသိရှိရသည်။

     ကမ္ဘောဒီးယားအနေဖြင့် ကိုရီးယားနိုင်ငံနှင့် ပူးပေါင်း၍ Verywords နှင့် Onion ကဲ့သို့သော လျှပ်စစ်မော်တော်ဆိုင်ကယ်အပါအဝင် လျှပ်စစ်သုံးဘီးဆိုင်ကယ် တပ်ဆင်ထုတ်လုပ်သည့် စက်ရုံ အများအပြားတည်ဆောက်ထားကြောင်း သိရှိရသည်။ ထို့အပြင် ကမ္ဘောဒီးယားတွင် BYD ၊ ZO MOTORS (CAMBODIA) CO.,LTD စသည့်လျှပ်စစ်မော်တော်ယာဉ်တပ်ဆင်ထုတ်လုပ်သည့် စက်ရုံ အများအပြားရှိကြောင်းသိရှိရသည်။ ၂၀၂၅ ခုနှစ်အကုန်အထိ ကမ္ဘောဒီးယားတွင် မှတ်ပုံတင်ထား သည့် လျှပ်စစ်မော်တော်ယာဉ် ၁၂၉၆၈ စီး (မော်တော်ကား ၉၀၆၅၊ မော်တော်ဆိုင်ကယ် ၃၂၀၃ နှင့် သုံးဘီးယာဉ် ၇၀၀) ရှိကြောင်း ပို့ဆောင်ရေးဝန်ကြီးဌာနက ထုတ်ပြန်ထားပါသည်။

Source: The Phnom Penh Post, 9 March 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

 

၂၀၂၆ ခုနှစ်၏ ပထမနှစ်လအတွင်း ဆန်တင်ပို့မှုပမာဏ ၅ ရာခိုင်နှုန်း မြင့်တက်လာ

ပြည်ပကုန်သွယ်မှုသတင်းများ

     ဗီယက်နမ်နိုင်ငံသည် ဖေဖော်ဝါရီလအတွင်း အမေရိကန်ဒေါ်လာ ၂၈၉.၄ သန်း တန်ဖိုးရှိ သော ဆန်တန်ချိန် ၆၄၀,၀၀၀ ခန့် တင်ပို့နိုင်ခဲ့ကြောင်း စိုက်ပျိုးရေးနှင့် ပတ်ဝန်းကျင် ထိန်းသိမ်း ရေး ဝန်ကြီးဌာန၏ ထုတ်ပြန်ချက်အရ သိရပါသည်။ ယခုနှစ် ဇန်နဝါရီလနှင့် ဖေဖော်ဝါရီလ အတွင်း ဆန်တန်ချိန် ၁.၃ သန်း အထိ တင်ပို့နိုင်ခဲ့သဖြင့် ပမာဏပိုင်းတွင် ယခင်နှစ်ထက် ၅ ရာ ခိုင်နှုန်း မြင့်တက်လာသော်လည်း ပို့ကုန်တန်ဖိုးမှာမူ အမေရိကန်ဒေါ်လာ ၅၉၉.၃ သန်းသာ ရရှိခဲ့ သဖြင့် ၁၁.၂ ရာခိုင်နှုန်း ကျဆင်းသွားခဲ့သည်။

    ယင်းကဲ့သို့ ဝင်ငွေလျော့နည်းသွားရခြင်းမှာ ပျမ်းမျှပို့ကုန်ဈေးနှုန်းသည် တစ်တန်လျှင် ၄၆၄.၁ ဒေါ်လာ ရရှိနိုင်မည်ဟု ခန့်မှန်းထားသော်လည်း ယခင်နှစ် ကာလတူနှင့် နှိုင်းယှဉ်ပါက ၁၅.၄ ရာခိုင်နှုန်းအထိ သိသိသာသာ ဈေးနှုန်းကျဆင်းသွားခြင်းကြောင့်ဖြစ်ကြောင်း၊ ဖိလစ်ပိုင် နိုင်ငံသည် ဗီယက်နမ်ဆန်၏ အကြီးမားဆုံးသော ဈေးကွက်အဖြစ် ဆက်လက်တည်ရှိနေပြီး စုစု ပေါင်းတင်ပို့မှု၏ ၄၇.၆ ရာခိုင်နှုန်းရှိကြောင်း၊ ၎င်း၏နောက်တွင် တရုတ်နိုင်ငံက ၁၈.၃ ရာခိုင်နှုန်း နှင့် ဂါနာနိုင်ငံက ၈.၉ ရာခိုင်နှုန်းဖြင့် အသီးသီး ရပ်တည်နေကြကြောင်း၊ ယခင်နှစ် ကာလတူနှင့် နှိုင်းယှဉ်ပါက ဖိလစ်ပိုင်နိုင်ငံသို့ တင်ပို့မှုတန်ဖိုးမှာ ၁၇.၆ ရာခိုင်နှုန်း မြင့်တက်လာပြီး တရုတ်နိုင်ငံ သို့ တင်ပို့မှုမှာမူ ၅.၈ ဆ အထိ ထိုးတက်သွားကြောင်း၊ ဆန့်ကျင်ဘက်အနေဖြင့် ဂါနာနိုင်ငံသို့ တင်ပို့မှုမှာ ၃၁ ရာခိုင်နှုန်း လျော့ကျသွားခဲ့ကြောင်း သိရသည်။

    ထိပ်တန်းဆန်တင်ပို့မှုဈေးကွက် ၁၅ ခုအနက် တရုတ်နိုင်ငံသို့ ဆန်တင်ပို့မှုမှာ ၅.၈ ဆ အထိ မြင့်တက်လာပြီး အားအကောင်းဆုံး တိုးတက်မှုအဖြစ် မှတ်တမ်းတင်နိုင်ခဲ့သော်လည်း Côte d’Ivoire နိုင်ငံသို့ တင်ပို့မှုမှာမူ ၉၀.၉ ရာခိုင်နှုန်းအထိ ကျဆင်းသွားကာ အဆိုးရွားဆုံး ကျဆင်းမှု ကို ကြုံတွေ့ခဲ့ရသည်။ တင်ပို့သူများ၏ ပြောကြားချက်အရ ဗီယက်နမ်၏ ဆန်ကွဲ ၅ ရာခိုင်နှုန်းပါ ဆန်ဈေးနှုန်းမှာ လက်ရှိတွင် တစ်တန်လျှင် ၃၆၅ အမေရိကန်ဒေါ်လာအထိ ရှိနေပြီး ယခင်အပတ် က ဈေးနှုန်းအတိုင်း ပြောင်းလဲမှုမရှိဘဲ တည်ငြိမ်နေသည်။ ဝယ်ယူသူများဘက်မှ ဈေးနှုန်းများ ထပ်မံကျဆင်းလာမည်ဟု မျှော်လင့်နေကြခြင်းကြောင့် အရောင်းအဝယ်ပြုလုပ်မှုများမှာ နှေးကွေး လျက်ရှိသည်။ တစ်ဖက်တွင်လည်း နွေဦးရာသီ စပါးရိတ်သိမ်းချိန်သို့ ရောက်ရှိနေသဖြင့် ပြည်တွင်း ဆန်ထောက်ပံ့မှုမှာ မြင့်တက်လာလျက်ရှိသည်။

    ကနဦးရရှိထားသော အချက်အလက်များအရ ဖေဖော်ဝါရီလအတွင်း တောင်ပိုင်းဆိပ်ကမ်း များမှ ဆန်တန်ချိန် ၃၈၂,၀၀၀ ကျော်ကို ကိုင်တွယ်ဆောင်ရွက်ခဲ့ပြီး ၎င်းတို့အနက် အများစုကို ဖိလစ်ပိုင်နှင့် အာဖရိကဈေးကွက်များသို့ တင်ပို့ခဲ့ခြင်းဖြစ်သည်။ အရှေ့အလယ်ပိုင်းဒေသတွင် ဖြစ်ပွားလျက်ရှိသော ပဋိပက္ခများသည် ဗီယက်နမ်၏ အာဖရိကသို့ ဆန်တင်ပို့မှုအပေါ် တိုက်ရိုက် သက်ရောက်မှု မရှိသော်လည်း အာမခံကြေးနှင့် လောင်စာဆီဈေးနှုန်းများ မြင့်တက်လာခြင်း ကြောင့် ရေကြောင်းသယ်ယူပို့ဆောင်ရေး စရိတ်များ သိသိသာသာ မြင့်တက်လာကြောင်း ကုန်သည်များက ပြောကြားခဲ့ကြောင်း သိရှိရပါသည်။

Source: Vietnamnet global, 9 March 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

ကြက်သွန်နီဈေး မကျဆင်းစေရေး FTI မှ ဝယ်ယူ

ပြည်ပကုန်သွယ်မှုသတင်းများ

     ကြက်သွန်နီ ရိတ်သိမ်းချိန် အများဆုံးကာလတွင် Occidental Mindoro ပြည်နယ်၌ ဈေး နှုန်းများကျဆင်းခြင်းမှ ကာကွယ်ရန်အတွက် နိုင်ငံပိုင်စားသုံးမှုရေးရာ ပူးပေါင်းထိန်းချုပ်ရေးအဖွဲ့ (FTI)သည် ထိုပြည်နယ်ရှိ တောင်သူများထံမှ ကြက်သွန်နီများ တိုက်ရိုက်ဝယ်ယူသွားမည် ဖြစ်  ကြောင်း ဖိလစ်ပိုင်စိုက်ပျိုးရေးဌာနက ၉-၃-၂၀၂၆ ရက်နေ့တွင် ပြောကြားခဲ့သည်။

    ဖိလစ်ပိုင်စိုက်ပျိုးရေးဦးစီးဌာန၏ လက်အောက်ခံအေဂျင်စီတစ်ခုဖြစ်သော FTI သည် ယခင်က Nueva Ecija ပြည်နယ်၌ ကြက်သွန်နီအိတ်အလုံး ၁၀,၀၀၀ ကို ဝယ်ယူခဲ့ပြီး မတ်လ ၆ ရက်နေ့မှစတင်၍ အဆိုပါပြည်နယ်တွင် တစ်ရက်လျှင် ကြက်သွန်နီအိတ်အလုံး ၃,၀၀၀နှုန်း ဝယ်ယူလျက်ရှိကြောင်း ပြောကြားခဲ့သည်။

   ဈေးကွက်တွင် ရောင်းလိုအားသည် ဝယ်လိုအားထက် ကျော်လွန်သွားသောအခါ ဈေးနှုန်း ပြိုလဲမှု (သို့မဟုတ်) ကြက်သွန်နီ၏ ဈေးကွက်တန်ဖိုး သိသိသာသာကျဆင်းခြင်း ဖြစ်ပေါ်တတ် ကြောင်း၊ ယင်းသို့ဖြစ်ပေါ်ပါက တောင်သူစိုက်ကွင်းဈေး (farm-gate prices) ကို အလွန်နိမ့်ကျ သောအဆင့်သို့ ကျဆင်းစေလေ့ရှိပြီး တောင်သူများအတွက် သီးနှံရိတ်သိမ်းခြင်းကို အကျိုးအမြတ် ရှိစေတော့မည် မဟုတ်ကြောင်း သိရှိရသည်။

   ယခုလမှ ဧပြီလအထိ ကြက်သွန်နီ ရိတ်သိမ်းချိန် အများဆုံးကာလဖြစ်သောကြောင့် ကြက် သွန်နီပမာဏ သိသိသာသာမြင့်တက်လာရန် မျှော်လင့်ရကြောင်း၊ ကြက်သွန်နီ၏တောင်သူ စိုက် ကွင်းဈေး ပြိုလဲကျဆင်းခြင်းပြဿနာသည် ကန့်သတ်ထားသော သိုလှောင်မှုစွမ်းရည်ကြောင့် ပိုမိုဆိုးရွားလာကြောင်း သိရှိရသည်။

   တောင်သူများထံမှ ကောက်ပဲသီးနှံများ တိုက်ရိုက်ဝယ်ယူခြင်းသည် ရိတ်သိမ်းထွက်ရှိမှု ပမာဏ၏ တစ်စိတ်တစ်ဒေသကို သိုလှောင်ထားနိုင်မည်ဖြစ်ပြီး တောင်သူစိုက်ကွင်းဈေးနှုန်းများ တည်ငြိမ်စေရန် အထောက်အကူပြုမည်ဖြစ်ကြောင်း ဖိလစ်ပိုင်စိုက်ပျိုးရေးဦးစီးဌာနက ပြောကြား ခဲ့သည်။

    ယခုကဲ့သို့ FTI မှ တိုက်ရိုက်ဝယ်ယူခြင်း အစီအစဉ်သည် ပွဲစားအလွှာများ၏ အခန်းကဏ္ဍ ကို ကန့်သတ်နိုင်ပြီး တောင်သူများအနေဖြင့် ၎င်းတို့၏ ထုတ်ကုန်များအတွက် ပိုမိုကောင်းမွန် သည့် ဈေးနှုန်းများရရှိအောင် ကူညီပေးနိုင်မည်ဟု မျှော်လင့်ရကြောင်း စိုက်ပျိုးရေးဦးစီးဌာနမှ အတွင်းဝန် Agriculture Secretary Francisco Tiu Laurel, Jr. က ပြောကြားခဲ့သည်။

   FTI ဥက္ကဋ္ဌ Joseph Lo၊ Occidental Mindoro ပြည်နယ်မှ စိုက်ပျိုးရေးပညာရှင် Alrizza Zubiriနှင့် San Jose မြို့နယ်မှ စိုက်ပျိုးရေးပညာရှင် Romel Calisangan တို့သည် Occidental Mindoro ပြည်နယ် San Jose မြို့ရှိ WBI ကြက်သွန်နီအအေးခန်း သိုလှောင်ရုံအား စစ်ဆေးခဲ့ ကြပြီး အဆိုပါသိုလှောင်ရုံသည် ကြက်သွန်နီအိတ် အလုံး ၃၈၀,၀၀၀ ဆံ့ပြီး ၁၀-၃-၂၀၂၆ ရက်နေ့ တွင် စတင်လည်ပတ်မည်ဖြစ်ကာ FTI သည် မတ်လ တတိယပတ်တွင် ကြက်သွန်နီများ စတင် ဝယ်ယူမည်ဖြစ်ကြောင်း သိရှိရသည်။

    FTI ဥက္ကဋ္ဌနှင့် စိုက်ပျိုးရေးဦးစီးဌာန၊ အတွင်းဝန်တို့၏ ညွှန်ကြားချက်သည် နိုင်ငံတွင်း စား နပ်ရိက္ခာဖူလုံရေး မြှင့်တင်ရန်နှင့် ဖိလစ်ပိုင်နိုင်ငံသားအားလုံးအတွက် ဈေးနှုန်းသင့်တင့်ကာ လက်လှမ်းမီမှုရှိစေရန် သေချာစေရန်ဖြစ်ကြောင်း Joseph Lo က ပြောကြားခဲ့သည်။ FTI ၏ အခန်းကဏ္ဍမှာ တောင်သူများမှ စားသုံးသူများအထိ စားနပ်ရိက္ခာ တန်ဖိုးကွင်းဆက်တစ်လျှောက် ဈေးကွက်ချိတ်ဆက်မှုများ အားကောင်းစေရန်ဖြစ်ကြောင်း သိရှိရသည်။

   Occidental Mindoro ပြည်နယ်မှအရာရှိများသည် ပြည်နယ်အတွင်း ပိုမိုပွင့်လင်း မြင်သာသော ကြက်သွန်နီကုန်သွယ်မှုစနစ်တစ်ရပ် ဖြစ်ပေါ်လာစေမည့် မူဝါဒများနှင့် လမ်းညွှန် ချက်များ ချမှတ်နိုင်ရေးအတွက် ကြက်သွန်နီတောင်သူများနှင့် ကုန်သည်များ ပါဝင်သော ညှိနှိုင်း အစည်းအဝေးတစ်ရပ်ကို ကျင်းပပြုလုပ်ခဲ့သည်။ အဆိုပါအစည်းအဝေးသို့ စိုက်ပျိုးရေးဦးစီးဌာန နှင့် ၎င်း၏ တန်ဖိုးမြင့် ကောက်ပဲသီးနှံများ ဖွံ့ဖြိုးတိုးတက်ရေးအစီအစဉ်၊ စိုက်ပျိုးရေးလုပ်ငန်းနှင့် စျေးကွက်ချိတ်ဆက်ရေးဌာနခွဲနှင့် အပင်လုပ်ငန်းဌာနအပြင် ကုန်သွယ်ရေးနှင့်စက်မှုလုပ်ငန်းဌာန တို့မှ ကိုယ်စားလှယ်များလည်း တက်ရောက်ခဲ့သည်။

    ထို့အပြင် အစည်းအဝေး၌ Occidental Mindoro ပြည်နယ်၏ ကြက်သွန်နီ လုပ်ငန်း ဆိုင်ရာ အခြေအနေများနှင့် ပြည်နယ်အတွင်းရှိ အအေးခန်းသိုလှောင်ရုံများ၏ အခြေအနေနှင့် စွမ်းဆောင်ရည်တို့ကိုလည်းကောင်း၊ ဈေးကွက်အတွင်း မတရားသော လုပ်ရပ်များကို ကာကွယ် ရန်အတွက် ပြည်နယ်အတွင်းရှိ ကြက်သွန်နီကုန်သည်များအား မှတ်ပုံတင်ရန် လိုအပ်ကြောင်း အကြံပြုချက်တို့ကို ဆွေးနွေးခဲ့သည်။ ဖိလစ်ပိုင်နိုင်ငံ၏ ထိပ်တန်းကြက်သွန်နီ အထွက်ဆုံး ပြည် နယ်များမှာ Nueva Ecija၊ Occidental Mindoro၊ Pangasinanနှင့် Ilocos Sur တို့ဖြစ်ကြောင်း သိရှိရသည်။

Source: The Manila Times, 10 March 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

Pages

Subscribe to RSS - ပြည်ပကုန်သွယ်မှုသတင်းများ