ပြည်ပကုန်သွယ်မှုသတင်းများ

          ကမ္ဘာ့ဘဏ်သည် ကမ္ဘောဒီးယားနိုင်ငံ၏ စီးပွားရေးတိုးတက်မှုနှင့် ဆင်းရဲမွဲတေမှု လျှော့ချရေးအတွက် အရေးပါသောကဏ္ဍတစ်ခုအဖြစ် ခရီးသွားလုပ်ငန်းကဏ္ဍကို အသိအမှတ်ပြုခဲ့ပြီး နိုင်ငံ၏ ခရီးသွားလုပ်ငန်းအလားအလာကို ပိုမိုဖွံ့ဖြိုးတိုးတက်စေရန်အတွက် ခရီးသွားလုပ်ငန်းဝန်ကြီးဌာနနှင့် မိတ်ဖက်အသစ်တစ်ရပ် ဖွဲ့စည်းခဲ့သည်။ ခရီးသွားလုပ်ငန်းဝန်ကြီး Huot Hak သည် ၂.၁၂.၂၀၂၅ ရက်နေ့က ဝန်ကြီးဌာနတွင် ကမ္ဘာ့ဘဏ်၏ ကမ္ဘောဒီးယားနိုင်ငံဆိုင်ရာ မန်နေဂျာ Tania Meyer နှင့် သူမ၏အဖွဲ့အား အလုပ်သဘောလက်ခံတွေ့ဆုံခဲ့သည်။ တွေ့ဆုံမှုအတွင်း Tania Meyer နှင့်အဖွဲ့တို့သည် ယခင်အစီအစဉ်များကို ပြန်လည်သုံးသပ်ခဲ့ပြီး ရပ်ရွာအခြေပြုခရီးသွားလုပ်ငန်း၊ ဂေဟစနစ် ခရီးသွားလုပ်ငန်းနှင့် ဒေသခံအသက်မွေးဝမ်း ကျောင်းလုပ်ငန်းများတွင် ပူးပေါင်းဆောင်ရွက်မှုအတွက် အခွင့်အလမ်းအသစ်များကို ရှာဖွေခဲ့ကြသည်။ Meyer က ကမ္ဘောဒီးယားအစိုးရအား စဉ်ဆက်မပြတ်ပံ့ပိုးမှုအတွက် ကျေးဇူးတင်ရှိကြောင်း ပြောကြားခဲ့ပြီး စီးပွားရေးဖွံ့ဖြိုးတိုးတက်မှု၊ အလုပ်အကိုင်ဖန်တီးမှုနှင့် ဒေသခံစီးပွားရေး မြှင့်တင်ရေးအပေါ် ခရီးသွားလုပ်ငန်းကဏ္ဍ၏ သက်ရောက်မှုဆိုင်ရာ လေ့လာမှုများအပါအဝင် အဓိကစီမံကိန်းများကို ပြီးမြောက်အောင်မြင်စွာ ပူးပေါင်းဆောင်ရွက်မှုများကို အလေးပေးပြောကြားခဲ့သည်။ ယခင် စီမံကိန်းများ၏ အောင်မြင်သောရလဒ်များ၊ အစိုးရ၏ ကောင်းမွန်သော ပူးပေါင်းဆောင်ရွက်မှုနှင့် နိုင်ငံသားများနှင့် ရပ်ရွာများ၏ အသက်မွေးဝမ်းကျောင်းမှုအတွက် ခရီးသွားလုပ်ငန်းကဏ္ဍ၏ သိသာထင်ရှားသော ပံ့ပိုးကူညီမှုများကိုအခြေခံ၍ ကမ္ဘာ့ဘဏ် (WB) သည် ခရီးသွားလုပ်ငန်းကဏ္ဍကို ပံ့ပိုးပေးနိုင်ပြီး ဖွံ့ဖြိုးတိုးတက်စေနိုင်သည့် လာမည့်စီမံကိန်းများအပြင် ကမ္ဘာ့ဘဏ်နှင့် ခရီးသွားလုပ်ငန်းဝန်ကြီးဌာနအကြား မိတ်ဖက်အဖွဲ့အစည်းတစ်ခု တည်ထောင်ခြင်းကို Meyer က ဆက်လက်ပြောကြားခဲ့သည်။ ဝန်ကြီး Hak က ကမ္ဘာ့ဘဏ်အား စဉ်ဆက်မပြတ်ပံ့ပိုးမှုနှင့် မိတ်ဖက်အဖြစ် ဆောင်ရွက်ပေးခဲ့မှုအတွက် ကျေးဇူးတင်ရှိကြောင်း၊ အမျိုးသားခရီးသွားလုပ်ငန်းကဏ္ဍ၏ ရေရှည်တည်တံ့သော တိုးတက်မှုကို အထောက်အကူပြုသည့်အပြင် ကမ္ဘောဒီးယားနိုင်ငံသားများအတွက် လက်တွေ့ကျသော စီးပွားရေးအကျိုးကျေးဇူးများနှင့် အခွင့်အလမ်းများကို ပေးစွမ်းသည့် ဂေဟစနစ်ခရီးသွားလုပ်ငန်း အသိုက်အဝန်းများ ဖွံ့ဖြိုးတိုးတက်ရေးတွင် စဉ်ဆက်မပြတ် ပူးပေါင်းဆောင်ရွက်မှု၏ အရေးပါမှုကို ပြောကြားခဲ့ကြောင်း သိရှိရပါသည်။

Source: Khmer Times

DOCA(ရန်ကုန်)  

          စဉ်ဆက်မပြတ်ဖွံ့ဖြိုးတိုးတက်‌ရေးရည်မှန်းချက်နှင့်အတူ ဗီယက်နမ်နှင့် တရုတ်တို့သည် ဒစ်ဂျစ်တယ်စီးပွားရေးနှင့် အစိမ်းရောင်အသွင်ကူးပြောင်းမှုတွင် ပူးပေါင်းဆောင်ရွက်မှုမြှင့်တင်ရန် ကျယ်ပြန့်သောအခန်းကဏ္ဍကို ပိုင်ဆိုင်ထားကြောင်း ၂၀၂၅ ခုနှစ် ဆောင်းဦးရာသီစီးပွားရေးဖိုရမ် ၏တစ်စိတ်တစ်ပိုင်းအနေဖြင့် ဟိုချီမင်းမြို့တော်တွင် နိုဝင်ဘာလ ၂၇ ရက်နေ့ကကျင်းပခဲ့သည့် ဗီယက်နမ်-တရုတ်စီးပွားရေးအလုပ်ရုံဆွေးနွေးပွဲတွင် ပြောကြားခဲ့ပါသည်။ ဗီယက်နမ်နိုင်ငံ မြူနီ စပယ်ပြည်သူ့ကော်မတီ ဒုတိယဥက္ကဌဖြစ်သူ Nguyen Loc Ha က ဗီယက်နမ်-တရုတ်ပူးပေါင်း ဆောင်ရွက်မှုသည် အထင်ကြီးဖွယ်ဖွံ့ဖြိုးတိုးတက်ခဲ့ကြောင်း ပြောကြားခဲ့ပါသည်။ သီးခြားအနေဖြင့် ထောက်ပံ့ပို့ဆောင်‌ရေးနယ်ပယ်တွင် ပူးပေါင်းဆောင်ရွက်မှုအားကောင်းခဲ့ပြီး ကုန်စည်ထုတ်လုပ်ခြင်းနှင့် အပြန်အလှန်ကုန်သွယ်ရေးကို အရှိန်မြှင့်တင်ပေးနိုင်ခဲ့ကြောင်း သိရပါသည်။ နိုင်ငံခြားတိုက်ရိုက်ရင်းနှီးမြှုပ်နှံမှုက စက်မှုအသွင်ကူးပြောင်းခြင်းနှင့် တင်ပို့မှုစွမ်းရည်မြှင့်တင်ခြင်းတွင် အရေးပါသောအခန်းကဏ္ဍကရပ်တည်နေခြင်းနှင့်အတူ ဗီယက်နမ်သည်စိုက်ပျိုးမွေးမြူရေး စီးပွားရေးမှ ကမ္ဘာလုံးဆိုင်ရာကုန်သွယ်ရေးကွင်းဆက်တွင် အရေးကြီးသောနိုင်ငံအဖြစ်သို့ အသွင်ကူးပြောင်းခဲ့ကြောင်း သိရပါသည်။ ဟိုချီမင်းမြို့တော်သည် တရုတ်ထံမှရင်းနှီးမြှုပ်နှံမှုများကို ထိပ်တန်းဆွဲဆောင်သူအဖြစ်ရပ်တည်နေကြောင်း သိရပါသည်။ လတ်တလောတွင် ၎င်း၌ သတင်းအချက်အလက်နည်းပညာနှင့် ဒစ်ဂျစ်တယ်အသွင်ကူးပြောင်းခြင်း၊ စမတ်ကုန်ထုတ်လုပ်ခြင်း၊ ထောက်ပံ့ပို့ဆောင်ရေး၊ e-commerce ၊ ပြည့်ဖြိုးမြဲစွမ်းအင်နှင့် အစိမ်းရောင်နည်းပညာများအစရှိ သည့်ကဏ္ဍများတွင် အမေရိကန်ဒေါ်လာ ၃ ဘီလီယံနီးပါးရှိသော တရုတ်ရင်းနှီးမြှုပ်နှံသည့် စီမံကိန်း ၈၀၀ ကျော်ပိုင်ဆိုင်ထားကြောင်း သိရပါသည်။ Ha ၏အဆိုအရ ဟိုချီမင်းမြို့တော်နှင့် တရုတ်တို့တွင် ဒစ်ဂျစ်တယ်အသွင်ကူးပြောင်းခြင်းနှင့် AI၊ စမတ်ကြီးမားသောမြို့တော် တည်‌ထောင်ခြင်းနှင့် ဘဏ္ဍာရေးရင်းနှီးမြှုပ်နှံမှုချိတ်ဆက်ခြင်းတို့တွင် ပူးပေါင်းဆောင်ရွက်ရန် အတွက် များစွာသောအခွင့်အလမ်းများကို ပိုင်ဆိုင်ထားကြောင်း သိရပါသည်။ ဟိုချီမင်းမြို့တော်ရှိ တရုတ်ကောင်စစ်ဝန်ချုပ် Tang Li က တရုတ်သည် ချိတ်ဆက်ခြင်း၊ ထုတ်လုပ်မှုတွင်ပူးပေါင်း ဆောင်ရွက်ခြင်းနှင့် ဒစ်ဂျစ်တယ်စီးပွားရေးအစရှိသည့် ဧရိယာများတွင် ဗီယက်နမ်နှင့်အတူမူဝါဒ ညှိနှိုင်းဆွေးနွေးမှုဆက်လက်မြှင့်တင်သွားမည်ဖြစ်ပြီး ကုန်သွယ်ရေးနှင့် ရင်းနှီးမြှုပ်နှံမှုအတွက် သင့်လျော်သောဝန်းကျင်တစ်ရပ်ကိုဖန်တီးရန်လုပ်ကိုင်သွားမည်ဖြစ်ကြောင်း ပြောကြားခဲ့ပါသည်။ တစ်ချိန်တည်းမှာပင် ဟိုချီမင်းမြို့တော်နှင့် တရုတ်တို့သည် အခြေခံအရင်းအမြစ်များဝေမျှမှု မြင့်တက်ရန်၊ စီးပွားရေးဖိုရမ်များအကြားချိတ်ဆက်မှုများအားကောင်းရန်နှင့် ထိရောက်မှုရှိသော အပြန်အလှန်ပံ့ပိုးမှုယန္တယားတည်ထောင်ရန်အတွက် ကုန်စည်ပြပွဲများကျင်းပရန် သဘောတူညီခဲ့ကြကြောင်း သိရပါသည်။

Vietnam Plus                                                                            

DOCA (ရန်ကုန်)

          Nigera နိုင်ငံ၏ စီးပွားရေးအခြေအနေများသည် ငွေကြေးဖောင်းပွမှုနှင့် ငွေကြေးမူဝါဒတင်းကျပ်စွာ လုပ်ဆောင်မှုအပေါ် ဖိအားပေးခံရမှုကြောင့် တတိယ သုံးလပတ်ကာလတွင် တစ်နှစ်ထက် တစ်နှစ် ၃.၉၈ ရာခိုင်နှုန်းခန့် မြင့်တက်လာကြောင်း ဒီဇင်ဘာလ ၁ ရက်နေ့တွင် ထုတ်ပြန်သော အချက်အလက်များအရ သိရပါသည်။ ၎င်းနိုင်ငံ၏ စီးပွားရေးချဲ့ထွင်မှုများသည် ပြည်တွင်းအသား တင်ကုန်ထုတ်လုပ်မှုအပေါ် စာရင်းတွက်ချက်မှုများ ပြုလုပ်အပြီးတွင် ၃.၁၃ ရာခိုင်နှုန်းခန့် ချဲ့ထွင်ခဲ့ ကြောင်း သိရပါသည်။ တတိယ သုံးလပတ်ကာလတွင် Nigeria နိုင်ငံ၏ လောင်စာဆီကဏ္ဍသည် တစ်နှစ်ထက်တစ်နှစ် ၅.၈၄ ရာခိုင်နှုန်းခန့်မြင့်တက်ခဲ့ကြောင်းနှင့် အဆိုပါမြင့်တက်မှုသည် တစ်နေ့ လျှင် ရေနံစိမ်းစည်ပေါင်း ၁.၆၄ သန်းခန့် ထုတ်လုပ်နိုင်မှုကြောင့်ဖြစ်ကြောင်း သိရပါသည်။ သို့ရာတွင် အဆိုပါကဏ္ဍ၏ ရှယ်ယာများသည် ၃.၄၄ ရာခိုင်နှုန်းခန့်ကျဆင်းခဲ့ပြီး ၎င်းသည် Nigeria နိုင်ငံ၏ ဆီမဟုတ်သောကဏ္ဍများအပေါ် မှီခိုနေရခြင်းကိုဖော်ပြနေကြောင်း သိရပါသည်။ Nigeria နိုင်ငံ အမျိုးသားစာရင်းအင်းဗျူရိုက ဆီမဟုတ်သောကဏ္ဍတွင် ၃.၉၁ ရာခိုင်နှုန်းခန့်ချဲ့ထွင်ခဲ့ကြောင်း၊ ဝန်ဆောင်မှုနှင့် စက်မှုလုပ်ငန်းတွင် စီးပွားရေးဖွံ့ဖြိုးတိုးတက်မှု ၄.၁၅ ရာခိုင်နှုန်းခန့်ရှိလာကြောင်းနှင့် စိုက်ပျိုးရေးကဏ္ဍတွင် ၃.၇၇ ရာခိုင်နှုန်းဖွံ့ဖြိုးတိုးတက်မှုရှိလာကြောင်း ပြောကြားခဲ့ပါသည်။ ကမ္ဘာ့ဘဏ်က Nigeria နိုင်ငံသည်၎င်း၏ စီးပွားရေးကို မူဝါဒပြန်လည်တည်ဆောက်ခြင်းမှတစ်ဆင့် တည်ငြိမ်အောင်လုပ်ဆောင်နေကြောင်းပြောကြားခဲ့ပါသည်။ ထို့အပြင်၎င်းဘဏ်က Nigeria နိုင်ငံအား အစားအသောက်ဈေးနှုန်းများထိန်းချုပ်ရန်နှင့် လူနေမှုအဆင့်အတန်းများမြှင့်တင်ရန် တိုက်တွန်းလျက်ရှိကြောင်း သိရှိရပါသည်။

Source: Reuters                                                                        

DOCA (ရန်ကုန်)

          အမေရိကန်နိုင်ငံ၏ ဖိလစ်ပိုင်နိုင်ငံသို့တင်ပို့မှုများကျဆင်းသော်လည်း ဖိလစ်ပိုင်နိုင်ငံသို့ သစ်သီးတင်သွင်းမှုများသည် ၂၀၂၅ ခုနှစ်တွင် ၂၅ ရာခိုင်နှုန်းခန့်မြင့်တက်ရန်မျှော်မှန်းလျက်ရှိကြောင်း အမေရိကန်နိုင်ငံ စိုက်ပျိုးရေးဌာန (USDA) မှ ထုတ်ပြန်သော ထုတ်ပြန်ချက်များအရ သိရ ပါသည်။ နိုဝင်ဘာလ ၂၅ ရက်နေ့တွင် USDA က ဖိလစ်ပိုင်နိုင်ငံသို့ ကမ္ဘာ့သစ်သီးတင်ပို့မှုများသည် ၂၀၂၄ ခုနှစ် အမေရိကန်ဒေါ်လာ ၃၂၁ သန်း ၃ ရာခိုင်နှုန်းတိုးတက်မှုအပြီးတွင် ၂၅ ရာခိုင်နှုန်းခန့် တစ်နှစ်ထက်တစ်နှစ်တိုးတက်လာနိုင်ကြောင်း ပြောကြားခဲ့ပါသည်။ ၎င်းဌာနကဖိလစ်ပိုင်နိုင်ငံ၏ လူဦးရေသည် ၂၀၂၅ ခုနှစ်အဆုံးတွင် ၁၆၄ သန်းခန့်ရောက်ရှိလာနိုင်ကြောင်းနှင့် နှစ်စဉ် လူဦးရေ ၁ သန်းခန့်တိုးပွားလာနိုင်ပြီး အစားအ သောက်ထုတ်ကုန်များအတွက် လိုအပ်ချက်များမြင့်တက်လာနိုင်ကြောင်း ပြောကြားခဲ့ပါသည်။ အဆိုပါမြင့်တက်မှုများရှိသော်လည်း ၂၀၂၄ ခုနှစ်တွင် အမေရိကန်နိုင်ငံမှ ဖိလစ်ပိုင်နိုင်ငံသို့ သစ်သီးများတင်ပို့မှုသည် ၁၀ ရာခိုင်နှုန်းခန့် အမေရိကန် ဒေါ်လာ ၁၄ သန်းခန့်လျော့နည်းခဲ့ပြီး ယခုနှစ်တွင်လည်း အနည်းဆုံး ၇ ရာခိုင်နှုန်းခန့် လျော့နည်းလာမည်ဟု ‌မျှော်မှန်းကြောင်း သိရပါသည်။ ဆယ်စုနှစ်အပြီးတွင် အမေရိကန်နိုင်ငံမှ ဖိလစ်ပိုင်နိုင်ငံ သို့ တင်ပို့မှုသည် ၇၃ ရာခိုင်နှုန်းခန့် ကျဆင်းလာနိုင်ကြောင်း သိရပါသည်။ သစ်သီးတင်ပို့မှုများသည် ၂၀၂၅ ခုနှစ်တွင် ကျဆင်းလာနိုင်သည်ဟု ခန့်မှန်းခဲ့သော်လည်း အမေရိကန်နိုင်ငံမှ ကုန်သည်များက ပန်းသီးတင်ပို့မှုများမြင့်တက်လာနိုင်ကြောင်း ပြောကြားခဲ့ပါသည်။ ဖိလစ်ပိုင်အစိုးရမှ ထုတ်ပြန်သောထုတ်ပြန်ချက်များအရ တရုတ်နိုင်ငံသည် ဖိလစ်ပိုင်နိုင်ငံ၏ အဓိက သစ်သီးတင်သွင်းသည့် နိုင်ငံဖြစ်ပြီး ၂၀၂၄ ခုနှစ်တွင် တင်သွင်းခဲ့သော တင်သွင်းမှု၏ ၇၂ ရာခိုင်နှုန်း ခန့်သည် တရုတ်နိုင်ငံမှဖြစ်ကြောင်း သိရပါသည်။ ဖိလစ်ပိုင်နိုင်ငံသည် တရုတ်နိုင်ငံမှ တင်သွင်း လျက်ရှိသော သစ်သီးများမှာ ပန်းသီး၊ စပျစ်သီး၊ ဆန်းကစ်သီး၊ သစ်တော်သီး၊ သံပယိုသီး၊ သံပုရာသီး၊ လိမ္မော်သီးနှင့် တစ်ခြားသော လိမ္မော်သီးမျိုးစပ်များဖြစ်ကြောင်း သိရပါသည်။ ဖိလစ်ပိုင်နိုင်ငံသည် တရုတ်နိုင်ငံသာမက တောင်အာဖရိကနှင့် ဩစတျေးလျနိုင်ငံတို့မှလည်း ဆန်းကစ်သီး၊ စပျစ်သီးနှင့် လိမ္မော်သီးများကို ၉ ရာခိုင်နှုန်းနှင့် ၈ ရာခိုင်နှုန်းခန့် အသီးသီးတင်သွင်းလျက်ရှိကြောင်း သိရှိရပါသည်။

Source: Business World                                                             

DOCA (ရန်ကုန်)

          အင်ဒိုနီးရှားနိုင်ငံကုန်သွယ်ရေးဝန်ကြီး Budi Santoso က အင်ဒိုနီးရှား-ဥရောပသမဂ္ဂ ဘက်ပေါင်းစုံစီးပွားရေးမိတ်ဖက်သဘောတူညီချက် (IEU-CEPA) ကို ၂၀၂၆ ခုနှစ် ဇန်နဝါရီလတွင် လက်မှတ်ရေးထိုးရန် ရည်မှန်းထားကြောင်း အင်ဒိုနီးရှားနိုင်ငံစက်မှုနှင့်ကုန်သည်များအသင်းချုပ် တွင် ဒီဇင်ဘာလ ၁ ရက်နေ့က ပြောကြားခဲ့ပါသည်။ Santoso က IEU-CEPA သည် လတ်တလော တွင် ဥပဒေမူကြမ်းရေးဆွဲသည့်လုပ်ငန်းစဉ်တွင်တည်ရှိနေပြီး များစွာသောဘာသာစကားများဖြင့် ဘာသာပြန်ပြီးဖြစ်ကြောင်း၊ အကယ်၍ဇန်နဝါရီလတွင်လက်မှတ်ရေးထိုးနိုင်ပါက အထက် လွှတ်တော်သို့ဆက်လက်တင်ပြသွားမည်ဖြစ်ကြောင်းနှင့် ထိုအဆင့်သည် ၂၀၂၆ ခုနှစ် နှစ်လယ်တွင် ပြီးမြောက်မည်ဖြစ်ကြောင်း ပြောကြားခဲ့ပါသည်။ ဝန်ကြီးက သဘောတူညီချက်အသစ် အောက်တွင် ဥရောပဈေးကွက်သို့ဝင်ရောက်ရန်အတွက် အင်ဒိုနီးရှားစီးပွားရေးလုပ်ငန်းများက ပြင်ဆင်ထားခြင်း၏ အရေးပါမှုကို အသားပေးပြောကြားခဲ့ကြောင်း သိရပါသည်။ ယခင်ကလည်း အင်ဒိုနီးရှားနိုင်ငံစီးပွားရေးရာညှိနှိုင်းဆွေးနွေးရေးဝန်ကြီးက IEU-CEPA သည် ၂၀၂၉ ခုနှစ်တွင် နိုင်ငံ၏စီးပွားရေးကြီးထွားမှု ၈ ရာခိုင်နှုန်းတိုးတက်ရန်ကူညီပေးနိုင်မည်ဟု ပြောကြားခဲ့ပါသည်။ နိုင်ငံပိုင်လုပ်ငန်းစီမံခန့်ခွဲရေးနှင့် ဖွံ့ဖြိုးတိုးတက်ရေးအေဂျင်စီ ဒုတိယအကြီးအကဲ Ferry Irawan က သဘောတူညီချက်သည် ဥရောပသမဂ္ဂတွင် အင်ဒိုနီးရှားထုတ်ကုန်များအတွက် ကျယ်ပြန့်သော ဈေးကွက်လမ်းကြောင်းကို တံခါးဖွင့်လှစ်ပေးနိုင်မည်ဖြစ်ပြီး ဥ‌ရောပသို့ အင်ဒိုနီးရှား၏တင်ပို့မှု အများစုအတွက် အကောက်ခွန်လျော့ချခြင်းအစရှိသည့် များစွာသောအကျိုးကျေးဇူးများကို ပံ့ပိုးပေးမည်ဖြစ်ကြောင်း သိရပါသည်။ သဘောတူညီချက်အောက်တွင် စားအုန်းဆီ၊ ကော်ဖီ၊ ကိုကိုးနှင့် ရာဘာအစရှိသည့်စိုက်ပျိုးရေးထုတ်ကုန်များ၊ ငါး၊ကျောက်ပုဇွန်နှင့် ပုဇွန်တို့ပါဝင်သည့် ရေထွက်ကုန်များ၊ သစ်၊ ပြုပြင်ထားသောသစ်နှင့် သစ်သားပြားများပါဝင်သည့် သစ်တောထွက်ကုန်များနှင့် အဝတ်အထည်နှင့် အီလတ်ထရောနစ်ပစ္စည်းများပါဝင်သည့် များစွာသောအင်ဒိုနီးရှား ပို့ကုန်ပစ္စည်းများမှာ အကောက်ခွန်လုံးဝကျခံရမည်မဟုတ်ကြောင်း သိရှိရပါသည်။

Antara News                                                                             

DOCA (ရန်ကုန်)