ပြည်ပကုန်သွယ်မှုသတင်းများ

      ထိုင်းနိုင်ငံခြားကုန်သွယ်ရေး ဦးစီးဌာန ညွှန်ကြားရေးမှူးချုပ် Arada Fuengthong က ၂၀၂၆ ခုနှစ်တွင် ဌာနအနေဖြင့် ထိုင်းအော်ဂဲနစ်ဆန်ကို မြှင့်တင်ရန်နှင့် လူသိများစေရန် စီစဉ်ထား ကြောင်း၊ ယင်းသို့ ဆောင်ရွက်ရာတွင် အဆင့်မြင့်စျေးကွက်၌ ခေတ်သစ်စားသုံးသူများ၏ လိုအပ် ချက်များကို ဖြည့်ဆည်းပေးနိုင်သည့် ပတ်ဝန်းကျင်နှင့် သဟဇာတဖြစ်သော အရည်အသွေးမြင့် ထုတ်ကုန်တစ်ခုအဖြစ် အဆင့်မြှင့်တင်ရန် ရည်ရွယ်ထားကြောင်း ထုတ်ဖော်ပြောကြားခဲ့သည်။ ကုန်သွယ်ရေးကိုယ်စားလှယ်အဖွဲ့တစ်ဖွဲ့သည် ဖေဖော်ဝါရီလတွင် ဆွစ်ပြည်ထောင်စုနှင့် ဂျာမနီ ဖက် ဒရယ် သမ္မတနိုင်ငံတို့သို့ သွားရောက်မည်ဖြစ်ပြီး အော်ဂဲနစ်ဆန်နှင့် သက်ဆိုင်သည့် အေဂျင်စီများ၊ အဖွဲ့အစည်းများနှင့် အဓိကဆန်တင်သွင်းသူများကို တွေ့ဆုံကာ စျေးကွက်ချဲ့ထွင်ရေးကို ညှိနှိုင်း ဆွေးနွေးခြင်းနှင့် ကုန်သွယ်မှုဆက်ဆံရေးများကို ခိုင်မာစေရေး ဆောင်ရွက်သွားမည် ဖြစ်သည်။

     ဆောင်ရွက်မည့်လုပ်ငန်းများ၏ အဓိကအချက်မှာ ထိုင်းအော်ဂဲနစ်ဆန်စားသုံးမှုကို မြှင့်တင် မည့်ကမ်ပိန်းတစ်ရပ်ဖြစ်သည်။ ထိုင်းနိုင်ငံခြားကုန်သွယ်ရေး ဦးစီးဌာနအနေဖြင့် Thai SELECT အသိ အမှတ်ပြု လက်မှတ်ရရှိထားသည့် ထိုင်းစားသောက်ဆိုင်များနှင့်ပူးပေါင်း၍ ဆွစ်ဇာလန်နိုင်ငံ ဇူးရစ်ချ် မြို့နှင့် ဂျာမနီနိုင်ငံ ဖရန့်ဖွတ်မြို့ရှိ စားသောက်ဆိုင်ပေါင်း(၁၀) ခုတို့တွင် တစ်ပတ်ကြာ ပရိုမိုးရှင်း ကမ်ပိန်း ပြုလုပ်သွားမည်ဖြစ်ကြောင်း၊ အဆိုပါကမ်ပိန်းအတွင်း ထိုင်းအော်ဂဲနစ်ဆန်၏ ကျန်းမာ ရေး အကျိုးကျေးဇူးများ၊ အရသာ၊ ဂရုတစိုက် ထိန်းသိမ်းထားသော အရည်အသွေး စံနှုန်းများမှ သည် ထုတ်လုပ်မှုဖြစ်စဉ်အထိ ဂရုတစိုက် ဆောင်ရွက်မှုဖြစ်စဉ်အကြောင်းကို အရည်အသွေးမြင့် ထိုင်းဟင်းလျာများမှတစ်ဆင့် ဝေမျှသွားမည်ဖြစ်ကြောင်း သိရှိရသည်။

      ထူးခြားချက်မှာ ထိုင်းအော်ဂဲနစ်ဆန်ဖြင့် ပြုလုပ်ထားသော အထူးဟင်းလျာများကို မှာယူ သည့် ဖောက်သည်များအနေဖြင့် ထိုင်းနိုင်ငံသို့ အသွားအပြန် လေယာဥ်လက်မှတ်များ၊ ထိုင်း အစားအစာ ချက်ပြုတ်နည်းသင်တန်းများနှင့် Thai SELECT အသိအမှတ်ပြု စားသောက်ဆိုင်များ ရှိ စားသောက်ဆိုင်လက်ဆောင်ကူပွန်များကဲ့သို့ အထူးဆုများ ရယူနိုင်ရန် အခွင့်အလမ်းများ စု ဆောင်းရန် မှတ်ပုံတင်နိုင်မည်ဖြစ်ကြောင်း၊ အဓိက ဆန်တင်သွင်းသူများ၊ ဒေသတွင်းဩဇာရှိသူ များနှင့် မီဒီယာများကို အသိပညာဖြန့်ဝေရန် ဖွင့်ပွဲအခမ်းအနားနှင့် လှုပ်ရှားမှုများသို့ ဖိတ်ကြား သွားမည်ဖြစ်ကြောင်း၊ ထို့အပြင် ထိုင်းနိုင်ငံခြား ကုန်သွယ်ရေး ဦးစီးဌာနအနေဖြင့်  ၂၀၂၆ ဘဏ္ဍာ ရေးနှစ် တတိယသုံးလပတ်နှင့် စတုတ္ထသုံးလပတ်များအတွင်း အမေရိကန်၊ တရုတ်နှင့် ဥရောပ သမဂ္ဂကဲ့သို့သော အခြားသောအဓိက ဈေးကွက်များရှိ ထိပ်တန်းဩဇာရှိသူများနှင့် ပူးပေါင်း၍ လူ မှုမီဒီယာများမှတစ်ဆင့် ထိုင်းအော်ဂဲနစ်ဆန်ကို အားပေးမြှင့်တင်သွားမည်ဖြစ်ကြောင်း သိရှိရ သည်။

      တစ်ချိန်တည်းတွင် ထိုင်းနိုင်ငံခြား ကုန်သွယ်ရေး ဦးစီးဌာနသည် ကမ္ဘာ့ထိပ်တန်း အော်ဂဲ နစ် စိုက်ပျိုးရေး ကုန်စည်ပြပွဲကြီးများကို ဖေဖော်ဝါရီလ ၁၀ ရက်နေ့မှ ၁၃ ရက်နေ့အတွင်း ကျင်းပ မည့် ဂျာမနီနိုင်ငံ၊ Nuremberg မြို့ရှိ BIOFACH (၂၀၂၆) ကုန်စည်ပြပွဲနှင့် မတ်လ ၃ရက်နေ့မှ ၆ ရက် နေ့အတွင်း ကျင်းပမည့် အမေရိကန်ပြည်ထောင်စုရှိ Natural Products Expo West ကုန်စည်ပြပွဲ တို့သို့ ဒေသအခြေပြုစီးပွားရေးလုပ်ငန်းနှင့် အသေးငယ်နှင့်အလတ်စားလုပ်ငန်း (SME) လုပ်ကိုင် သူ စုစုပေါင်း ၁၂ ဦးကို ခေါ်ဆောင်သွားရန် စီစဉ်ထားသည်။ အဆိုပါ ကုန်စည်ပြပွဲများသည် ထိုင်း ဆန်၏ အပြုသဘောဆောင်သော ပုံရိပ်ကို မြှင့်တင်ရန်နှင့် ကမ္ဘာတစ်ဝှမ်းရှိ မိတ်ဖက်များနှင့် ကုန် သွယ်ရေးကွန်ရက်များ ချိတ်ဆက်ရန် ရည်ရွယ်သည်။ အဆိုပါ လုပ်ဆောင်မှုများသည် ထိုင်း အော်ဂဲ နစ်ဆန်နှင့် ဆက်စပ်ထုတ်ကုန်များ၏ တင်ပို့မှုကို တိုးမြှင့်ပေးပြီး တန်ဖိုးမြင့်စေကာ ထိုင်းလယ် သမားများ၊ စီးပွားရေးလုပ်ငန်းရှင်များနှင့် SMEများအတွက် တည်ငြိမ်သော ဝင်ငွေရရှိစေရန် အထောက်အကူပြုလိမ့်မည်ဟု ယုံကြည်ထားကြောင်း သိရှိရသည်။

    ၂၀၂၅ ခုနှစ်တွင် ထိုင်းနိုင်ငံသည် ဘတ် ၁.၂၁ ဘီလီယံတန်ဖိုးရှိသော အော်ဂဲနစ် ဆန်တန် ချိန် ၂၆,၁၁၀ ကို တင်ပို့ခဲ့သည်။ ၂၀၂၄ခုနှစ်တွင် ဘတ် ၁.၀၈၈ ဘီလီယံတန်ဖိုးရှိသော အော်ဂဲနစ် ဆန်တန်ချိန် ၂၂,၂၉၃ တင်ပို့နိုင်ခဲ့ခြင်းနှင့် နှိုင်းယှဉ်ပါက ပမာဏအားဖြင့် ၁၇.၁၂%နှင့် တန်ဖိုးအား ဖြင့် ၁၁.၂၁% အသီးသီး တိုးမြင့်လာခြင်းဖြစ်သည်။ အဓိကတင်ပို့သည့် ဈေးကွက်များမှာ ဝင်ငွေ မြင့် မားသော နိုင်ငံများဖြစ်သည့်  အမေရိကန်ပြည်ထောင်စု၊ တရုတ်၊ အီတလီ၊ ဘယ်လ်ဂျီယံနှင့် ဆွစ် ဇာလန်နိုင်ငံတို့ရှိ စားသုံးသူများသည် ကျန်းမာရေးနှင့် သဘာပတ်ဝန်းကျင်အပေါ် သက်ရောက်မှု ကို အလေးထားကြကြောင်း သိရှိရသည်။

Source: Thai Rath Online,  4 Feb 2026(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

         ကာဇက်စတန်နိုင်ငံသည် ၂၀၂၅ ခုနှစ် စက်တင်ဘာလတွင် လက်ရှိစျေးကွက်ရှာဖွေရေး နှစ်စတင်ချိန်မှစ၍ ကောက်ပဲသီးနှံတန်ချိန် ၅.၈ သန်း တင်ပို့ခဲ့ပြီး ယခင်နှစ်အလားတူကာထက် တန်ချိန် ၁ သန်း သို့မဟုတ် ၂၁ ရာခိုင်နှုန်း မြင့်တက်လာခဲ့ကြောင်း စိုက်ပျိုးရေးဝန်ကြီးဌာနက ဖေဖော်ဝါရီလ ၃ ရက်နေ့တွင် သတင်းထုတ်ပြန်ခဲ့သည်။

            ဝန်ကြီးဌာန၏ အဆိုအရ အဓိက ဒေသဆိုင်ရာဈေးကွက်များစွာသို့ တင်ပို့မှုများ သိသိသာသာ မြင့်တက်လာခဲ့သည်။

          ဥဇဘက်ကစ္စတန်သို့ တင်ပို့မှုမှာ တန်ချိန် ၁.၈၁၃ သန်းမှ ၂.၇၀၂ သန်းအထိ ၄၉ ရာခိုင်နှုန်း မြင့်တက်လာခဲ့သည်။ ကာဂျစ္စတန်သို့ တင်ပို့မှုမှာ တန်ချိန် ၉၅,၀၀၀ မှ ၁၆၃,၀၀၀ တန်အထိ ၇၂ ရာခိုင်နှုန်း မြင့်တက်လာခဲ့ပြီး အာဖဂန်နစ္စတန်သို့ တင်ပို့မှုမှာ တန်ချိန် ၂၁၆,၀၀၀ မှ ၄၁၆,၀၀၀ တန်အထိ ၉၃ ရာခိုင်နှုန်း မြင့်တက်လာခဲ့ကြောင်း ၎င်းက ပြောကြားခဲ့သည်။

          ဝန်ကြီးဌာနသည် လက်ရှိစျေးကွက်ရှာဖွေရေးနှစ်အတွင်း ကောက်ပဲသီးနှံတန်ချိန် ၁၃ သန်း တင်ပို့ရန် ၎င်း၏ပစ်မှတ်ကို ဆက်လက်ထိန်းသိမ်းထားကြောင်း သိရှိရပါသည်။

Source : Xinhua                                                                                 

DOCA (ရန်ကုန်)

          ၂၀၂၅ ခုနှစ်သည် အင်ဒိုနီးရှားနိုင်ငံ၏ စားအုန်းဆီလုပ်ငန်းအတွက် အောင်မြင်မှုများရရှိသည့် နှစ်တစ်နှစ်ဖြစ်ခဲ့ပြီးဝယ်လိုအားများသည်လည်း သိသိသာသာမြင့်တက်ခဲ့ကြောင်း သိရပါသည်။ အင်ဒိုနီးရှားနိုင်ငံ ဗဟိုစာရင်းအင်းဌာန (BPS) ၏ ထုတ်ပြန်ချက်များအရ ၂၀၂၅ ခုနှစ်အတွင်း အင်ဒိုနီးရှားနိုင်ငံ စားအုန်းဆီတင်ပို့မှုမှ စုစုပေါင်းဝင်ငွေ အမေရိကန်ဒေါ်လာ ၂၄.၄၂ ဘီလီယံခန့် ရရှိခဲ့ကြောင်း သိရပါသည်။ အဆိုပါတင်ပို့မှုမှ ရရှိခဲသော  ဝင်ငွေပမာဏ သည် ၂၀၂၄ ခုနှစ်တွင်ရရှိခဲ့သောပမာဏထက် ၂၁.၈၃ ရာခိုင်နှုန်းခန့် မြင့်တက်ခဲ့ကြောင်း သိရပါသည်။ ၂၀၂၅ ခုနှစ်တွင် အင်ဒိုနီးရှားနိုင်ငံသည် စားအုန်းဆီတန်ချိန် ၂၃.၆၁ သန်းတန်ခန့်ကို ပြည်ပသို့တင်ပို့ခဲ့ပြီး တင်ပို့မှုပမာဏမှာ ၂၀၂၄ ခုနှစ်တွင် တင်ပို့ခဲ့သော တန်ချိန် ၂၁.၆၄ သန်းတန်ထက် ၉.၀၉ ရာခိုင်နှုန်းမြင့်တက်ခဲ့ကြောင်း သိရပါသည်။ BPS အနေဖြင့် အင်ဒိုနီးရှားနိုင်ငံမှ တင်ပို့သည့် စားအုန်းဆီစျေးကွက်များကို ထုတ်ဖော်ပြသထားခြင်းမရှိသော်လည်း အိန္ဒိယနိုင်ငံသည် ပြည်ပမှ ထောက်ပံ့မှုအပေါ်များစွာမှီခိုနေရသဖြင့် စားအုန်းဆီသည် အင်ဒိုနီးရှားနိုင်ငံအတွက် အိန္ဒိယနိုင်ငံနှင့် ကုန်သွယ်မှုပိုငွေရရှိစေခြင်း၏ အဓိကအကြောင်းအရင်း တစ်ခုဖြစ်ကြောင်း သိရပါသည်။ ၂၀၂၅ ခုနှစ်တွင် အိန္ဒိယနိုင်ငံသို့ တင်ပို့ခဲ့သည့် ဟင်းသီးဟင်းရွက်ဆီမှ ကုန်သွယ်မှုပို ငွေ အမေရိကန်ဒေါ်လာ ၃.၅၆ ဘီလီယံခန့် ရရှိခဲ့ကြောင်း သိရပါသည်။ ၂၀၂၅ ခုနှစ်၊ ဒီဇင်ဘာလအတွင်းတွင် စားအုန်းဆီတင်ပို့မှုမှ​ ဝင်ငွေ အမေရိကန်ဒေါ်လာ ၂.၈ ဘီလီယံခန့်ရရှိခဲ့ပြီး တင်ပို့မှုတန်ချိန်ပေါင်း ၂.၇၅ သန်းတန်ခန့်ရှိခဲ့ကြောင်း သိရပါသည်။ စားအုန်းဆီဝယ်မှုများမြင့်တက်နေသော်လည်း ကမ္ဘာ့စားအုန်းဆီပျမ်းမျှ စျေးနှုန်းမှာ ၁ တန်လျှင် အမေရိကန်ဒေါ်လာ ၉၈၀.၅၁ အထိသာရှိခဲ့ကြောင်းနှင့် ၂၀၂၄ ခုနှစ်နှင့်နှိုင်းယှဥ်လျှင် ၁၇.၅၉ ရာခိုင်နှုန်းကျဆင်းခဲ့ကြောင်း သိရပါသည်။ ထို့အပြင် အဆိုပါစျေးနှုန်းသည် လအလိုက်နှိုင်းယှဥ်မှုတွင်းလည်း ၀.၂၉ ရာခိုင်နှုန်းခန့်ကျဆင်းခဲ့ကြောင်း သိရပါသည်။ အင်ဒိုနီးရှားနိုင်ငံ၏ စားအုန်းဆီတင်ပို့မှု တိုးတက်လာခြင်းသည် ၂၀၂၀ ခုနှစ်မှစတင်၍ အရှိန်အဟုန်မြင့်မားလာခဲ့ကာ အင်ဒိုနီးရှားနိုင်ငံအား ကုန်သွယ်မှုပိုငွေရရှိစေရန်အတွက် အထောက်အကူပြုခဲ့ကြောင်းသိရပါသည်။ အင်ဒိုနီးရှားနိုင်ငံသမ္မတသည် ဒေသဆိုင်ရာ အုပ်ချုပ်ရေးမှူးများအား အင်ဒိုနီးရှားနိုင်ငံမှထွက်ရှိသော စားအုန်းဆီများကို ဝယ်လိုအားကောင်းလာကြောင်းနှင့် စားအုန်းဆီကို ဆပ်ပြာထုတ်လုပ်ခြင်းမှစ၍ မုန့်ဖုတ်လုပ်ငန်းသုံးပစ္စည်းများအထိ နယ်ပယ်အသီးသီးတွင် အသုံးပြုနိုင်ကြောင်း ပြောကြားခဲ့ပါသည်။ ထို့အပြင် ၎င်းက အင်ဒိုနီးရှားနိုင်ငံအနေဖြင့် စားအုန်းဆီအနည်များနှင့် အသုံးပြုပြီးသား ဟောင်းနွမ်းဆီ များကို ပြည်ပတင်ပို့မှုကန့်သတ်ရန် ဆုံးဖြတ်ခြင်းသည် ဘိုင်အိုဒီဇယ် ထောက်ပံ့မှုကို ကာကွယ်ရန်နှင့် လေယာဥ်ဆီထုတ်လုပ်မှုကို မြှင့်တင်ရန်အတွက်ဖြစ်ကြောင်း ကာကွယ်ပြောဆိုခဲ့ပါသည်။

Source: JakartaGlobe                                                      

DOCA (ရန်ကုန်)

            ထိုင်းနိုင်ငံ၏ ဒူးရင်းသီးတင်ပို့မှုသည် ရိတ်သိမ်းရာသီအတွင်း အလုပ်သမားရှားပါးမှုနှင့် စုဆောင်းရေးဌာနများ မရှိခြင်းကြောင့် အခက်အခဲများနှင့် ရင်ဆိုင်ရဖွယ်ရှိပါသည်။ ၂၀၂၆ ခုနှစ်တွင် ဒူးရင်းသီး ထုတ်လုပ်မှုကို တန်ချိန် ၁.၇၈ သန်းအထိ ရောက်ရှိရန် ခန့်မှန်းထားပြီး အရှေ့ပိုင်းဒေသ သည် တန်ချိန် ၁.၀၆ သန်း သို့မဟုတ် စုစုပေါင်းထုတ်လုပ်မှု၏ ၅၉.၅% ရှိကြောင်း ပြည်တွင်း  ကုန်သွယ်ရေးဌာန (DIT) ၏ ညွှန်ကြားရေးမှူးချုပ် Wittayakorn Maneenetr က ပြောကြားခဲ့သည်။

          ဧပြီလတွင် စတင်မည့် ရိတ်သိမ်းရာသီတွင် ရာသီဥတု ဆိုးကျိုးသက်ရောက်မှုမရှိလျှင် ဒူးရင်းသီးထုတ်လုပ်မှုသည်  နှစ်အလိုက် ၁၀% တိုးတက်မည်ဟု ပြည်တွင်း  ကုန်သွယ်ရေးဌာန (DIT) ၏ ညွှန်ကြားရေးမှူးချုပ် Wittayakorn Maneenetr က ပြောကြားခဲ့သည်။

           ဗီယက်နမ်၏ ဒူးရင်းထုတ်လုပ်မှုသည် ၂၀၂၆ ခုနှစ်တွင် တန်ချိန် ၂ သန်းအထိ ရောက်ရှိလိမ့်မည်ဟု ဌာနက ခန့်မှန်းထားသည်။ ကျွမ်းကျင်သော ကမ္ဘောဒီးယား လုပ်သား အရေအတွက် ကျဆင်းလာသည်နှင့်အမျှ လယ်ယာလုပ်သားများနှင့် သစ်သီးထုပ်ပိုးသူများ ရှားပါးမှုများသည် ဒူးရင်းကဏ္ဍအတွက် စိန်ခေါ်မှုများကို ပြသလျက်ရှိသည်။

         မြန်မာနိုင်ငံမှ အလုပ်သမားများ ကဏ္ဍသို့ ဝင်ရောက်လာသော်လည်း၊ ၎င်းတို့သည် ကဏ္ဍ၏ သီးခြားလိုအပ်ချက်များကို ဖြည့်ဆည်းရန် လေ့ကျင့်မှုလိုအပ်ကြောင်း ညွှန်ကြားရေးမှူးချုပ် Wittayakorn Maneenetr က ပြောကြားခဲ့သည်။

          အရှေ့ပိုင်းဒေသတွင် ဒူးရင်းသီးထုတ်လုပ်မှုများသည် မတ်လမှ ဇွန်လအထိ အမြင့်ဆုံးရောက်ရှိမည်ဟု ဌာနက ခန့်မှန်းထားသည်။ တောင်ပိုင်းနှင့် အခြားဒေသများရှိ ထုတ်လုပ်မှုသည် ဇွန်လနှင့် သြဂုတ်လကြားတွင် စတင်ဖွယ်ရှိကြောင်း သိရသည်။ အမြင့်ဆုံးရိတ်သိမ်းရာသီတွင် ကွန်တိန်နာပြတ်လပ်မှုခန့်မှန်းချက်သည် နောက်ထပ် အတားအဆီးတစ်ခုဖြစ်ကြောင်း ပြည်တွင်းကုန်သွယ်ရေးဌာနက မှတ်ချက်ပြုခဲ့ကြောင်း သိရှိရပါသည်။

Source : Bangkok Post                                                                      

DOCA (ရန်ကုန်)

             ယခင်နှစ်များက ကြုံတွေ့ခဲ့ရသော ထုတ်လုပ်မှုကျဆင်းမှုများမှ ပြန်လည်နာလန်ထူလာ နိုင်ခဲ့ပြီးနောက် ဖိလစ်ပိုင်နိုင်ငံသည် ၂၀၂၅ ခုနှစ်တွင် ကမ္ဘာ့ဒုတိယအကြီးဆုံး ငှက်ပျောသီး တင်ပို့ သည့်နိုင်ငံအဖြစ် ပြန်လည်ရောက်ရှိလာကာ ကမ္ဘာ့ဈေးကွက်တွင် ခြေကုပ်ပြန်ယူနိုင်ခဲ့ပြီဖြစ်သည်။ ကုလသမဂ္ဂ စားနပ်ရိက္ခာနှင့် စိုက်ပျိုးရေးအဖွဲ့ (FAO) ၏ အစီရင်ခံစာအရ ဖိလစ်ပိုင်သည် အီကွေဒေါနိုင်ငံ၏ နောက်တွင် ကမ္ဘာ့ဒုတိယအဆင့်သို့ တက်လှမ်းနိုင်ခဲ့ပြီး အာရှဒေသတွင် အကြီးဆုံး ငှက်ပျောသီးတင်ပို့သူဖြစ်လာကြောင်း ဖော်ပြထားသည်။ ကိုလံဘီယာ၊ ဂွါတီမာလာနှင့် ကော့စတာရီကာ နိုင်ငံတို့မှာမူ (ကမ္ဘာ့ငှက်ပျောသီးတင်ပို့မှုတွင်) တတိယ၊ စတုတ္ထနှင့် ပဥ္စမအဆင့် နေရာများကို အသီးသီးရရှိခဲ့ကြသည်။ ပြီးခဲ့သော ၂၀၂၄ ခုနှစ်တွင် ဖိလစ်ပိုင်နိုင်ငံသည် ကမ္ဘာ့အဆင့် (၃) နေရာ၌သာရှိခဲ့ခြင်းဖြစ်သည်။ လက်ဝယ်ရှိ ကနဦးတင်ပို့မှု အချက်အလက်များကို ကိုးကား၍ FAO အစီရင်ခံစာက ဖော်ပြရာတွင် — ဖိလစ်ပိုင်ကျွန်းစုမှ ငှက်ပျောသီးတင်ပို့မှုသည် ၂၀၂၄ ခုနှစ်က မက်ထရစ်တန် ၂.၃၃ သန်းသာရှိခဲ့ရာမှ ၂၀၂၅ ခုနှစ်တွင် ၂၆ ရာခိုင်နှုန်းခန့်အထိ မြင့်တက်လာခဲ့ပြီး မက်ထရစ်တန် ၂.၉၃ သန်းအထိ ရှိလာခဲ့ကြောင်း သိရသည်။ ပြည်တွင်းထုတ်လုပ်မှုသည် မကြာသေးမီနှစ်များအတွင်းက ကြုံတွေ့ခဲ့ရသော ထိခိုက်ပျက်စီးမှုများမှ ပြန်လည်နာလန်ထူလာခြင်းကြောင့် ဖိလစ်ပိုင်နိုင်ငံအနေဖြင့် ငှက်ပျောသီးတင်ပို့မှုကို ယခုကဲ့သို့ တိုးမြှင့်နိုင်ခဲ့ခြင်းဖြစ်ကြောင်း အစီရင်ခံစာတွင် ဖော်ပြထားသည်။ ထို့အပြင် ဖိလစ်ပိုင်နိုင်ငံ၊ ကာဂါယန်တောင်ကြားဒေသ (Cagayan Valley) သို့မဟုတ် ဒေသ-၂ (Region 2) တွင် ငှက်ပျော သီးထုတ်လုပ်မှု မြှင့်တင်ရန်အတွက် ရင်းနှီးမြှုပ်နှံမှု အများအပြားပြုလုပ်ခဲ့ကြောင်း လုပ်ငန်းရှင်များထံမှ သိရသည်ဟု အစီရင်ခံစာက ဆက်လက်ဖော်ပြသည်။ ယင်း  ရင်းနှီးမြှုပ်နှံမှုများတွင် စိုက်ပျိုးရေးဝန်ကြီးဌာနမှ သဘာဝမြေ သြဇာများနှင့် အခြားသော စိုက်ပျိုးရေးသွင်းအားစုများကို ပံ့ပိုးပေးခြင်းများလည်း ပါဝင်သည်။ ဂျပန်နှင့် တရုတ်နိုင်ငံတို့သည် ပြည်တွင်းဖြစ် ငှက်ပျောသီး များအတွက် အဓိကကျသော ဈေးကွက်များဖြစ်သည်။ အထူးသဖြင့် ဂျပန်နိုင်ငံသည် ၎င်း၏ ငှက်ပျောသီးလိုအပ်ချက် စုစုပေါင်း၏ ၇၅ ရာခိုင်နှုန်းမှ ၈၀ ရာခိုင်နှုန်းခန့်ကို ဖိလစ်ပိုင်နိုင်ငံ တစ်နိုင်ငံတည်းမှပင် တင်သွင်းနေခြင်းဖြစ်သည်။ ၂၀၂၅ ခုနှစ်တွင် ဖိလစ်ပိုင်နှင့် ကိုလံဘီယာ နိုင်ငံတို့မှ ထုတ်လုပ်မှုတိုးတက်လာခြင်းက ကမ္ဘာ့ငှက်ပျောသီး ကုန်သွယ်မှုကို အားကောင်းစေခဲ့ ပြီး၊ ထိုနှစ်နိုင်ငံပေါင်းမှ တင်ပို့မှုပမာဏ မက်ထရစ်တန် ၉၀၀,၀၀၀ ခန့် ပိုမို ဖြည့် ဆည်းပေးနိုင်ခဲ့မည်ဟု ခန့်မှန်းထားကြောင်း သိရှိရပါသည်။

Source : Inquirer.com                                                                   

DOCA(ရန်ကုန်)