ပြည်ပကုန်သွယ်မှုသတင်းများ

          ၂-၁၂-၂၀၂၅ ရက်နေ့က ကမ္ဘောဒီးယား ကုန်သည်ကြီးများအသင်း (CCC) နှင့် ကမ္ဘောဒီးယားနိုင်ငံဆိုင်ရာ ဇင်ဘာဘွေ(Zimbabwe)သံရုံးတို့သည် နှစ်နိုင်ငံအကြား ကုန်သွယ်ရေးနှင့် ရင်းနှီးမြှုပ်နှံမှု ပူးပေါင်းဆောင်ရွက်မှုမြှင့်တင်ရန် နည်းလမ်းများကို ဆွေးနွေးခဲ့ကြသည်။ CCC ဒုတိယဥက္ကဋ္ဌ Lim Heng နှင့် ကမ္ဘောဒီးယားနိုင်ငံဆိုင်ရာ ပြည်ပသံအမတ်ကြီး Constance Chemwayi တို့၏ တွေ့ဆုံမှုအတွင်း ကတိကဝတ်ကို ပြုလုပ်ခဲ့ခြင်းဖြစ်သည်။ နှစ်နိုင်ငံအကြား စီးပွားရေး၊ ကုန်သွယ်ရေးနှင့် ရင်းနှီးမြှုပ်နှံမှု ကဏ္ဍများတွင် ပူးပေါင်းဆောင်ရွက်မှုကို ခိုင်မာစေရန်နှင့် မြှင့်တင်ရန် ရည်ရွယ်ချက်ဖြင့် အစည်းအဝေးကို ကျင်းပခဲ့ခြင်းဖြစ်သည်။ သံအမတ်ကြီး Chemwayi သည် နှစ်နိုင်ငံကုန်သွယ်ရေးလုပ်ငန်းများကို ခိုင်မာစေရန်နှင့် နှစ်နိုင်ငံကုန်သည်ကြီးများအသင်းအကြား နားလည်မှုစာချွန်လွှာ လက်မှတ်ရေးထိုးခြင်းဖြင့် နှစ်နိုင်ငံအကြား စီးပွားရေးလုပ်ငန်းများကို မြှင့်တင်ရန် အလေးပေးပြောကြားခဲ့သည်။ ကမ္ဘောဒီးယားနှင့် ဇင်ဘာဘွေနိုင်ငံတို့သည် စီးပွားရေးလုပ်ငန်းများ၊ ဖွံ့ဖြိုးတိုးတက်မှုအဆင့်နှင့် လူဦးရေအရ တူညီမှုများစွာရှိကြောင်းနှင့် CCC ကိုယ်စားလှယ်အဖွဲ့အား ၂၀၂၆ ခုနှစ်၊ ဧပြီလတွင် ကျင်းပရန် စီစဉ်ထားသည့် ဇင်ဘာဘွေနိုင်ငံရှိ နိုင်ငံတကာကုန်သွယ်ရေးပြပွဲသို့ သွားရောက်လည်ပတ်ရန်နှင့် တက်ရောက်ရန် Chemwayi က ဖိတ်ကြားခဲ့သည်။ CCC ဒုတိယဥက္ကဋ္ဌ Lim Heng Heng က နှစ်နိုင်ငံအကြား ကုန်သွယ်ရေးနှင့် ရင်းနှီးမြှုပ်နှံမှု မြှင့်တင်ရန်ကြိုးပမ်းမှုကို အပြည့်အဝထောက်ခံကြောင်းနှင့် ကမ္ဘောဒီးယား ကုန်သည်ကြီးများအသင်းသည် မကြာမီအနာဂတ်တွင် နားလည်မှုစာချွန်လွှာ လက်မှတ်ရေးထိုးနိုင်ခြေကို စစ်ဆေးရန်အတွက် ဇင်ဘာဘွေ ကုန်သည်ကြီးများအသင်းနှင့် ပူးပေါင်းဆောင်ရွက်သွားမည်ဖြစ်ကြောင်း ပြောကြားခဲ့သည်။

Source: Khmer Times                                                         

DOCA(ရန်ကုန်)

        ကမ္ဘောဒီးယားနိုင်ငံ၊ အနောက်မြောက်ပိုင်းပြည်နယ်များရှိ စီးပွားရေးလုပ်ငန်းများကို ချိတ်ဆက်ရန် ရင်းနှီးမြှုပ်နှံမှုနှင့် ကုန်သွယ်ရေးကွန်ရက်တိုးချဲ့မှုကို မြှင့်တင်ရန်အတွက် ဗီယက်နမ်နိုင်ငံ၊ Battambang ပြည်နယ်ရှိ ဗီယက်နမ်ကောင်စစ်ဝန်ရုံးချုပ်သည် Siem Rea ပြည်နယ်တွင် ကမ္ဘောဒီးယား-ဗီယက်နမ် စီးပွားရေးဖိုရမ် ၂၀၂၅ ကို ၂-၁၂-၂၀၂၅ ရက်နေ့က ကျင်းပခဲ့သည်။ ဖိုရမ်သို့ Battambang ပြည်နယ်ရှိ ဗီယက်နမ်ကောင်စစ်ဝန်ချုပ် Tran Tuan Anh၊ ဆီယမ်ရိပြည်နယ်၏ ဒုတိယအုပ်ချုပ်ရေးမှူး Yun Linn၊ အနောက်မြောက်ပိုင်း ပြည်နယ်များမှ စီးပွားရေးလုပ်ငန်းများ၊ ဗီယက်နမ်စီးပွားရေးလုပ်ငန်းရှင်များနှင့် ရင်းနှီးမြှုပ်နှံသူများ တက်ရောက်ခဲ့ကြသည်။ ဖိုရမ်၌ မိန့်ခွန်းပြောကြားရာတွင် Tran Tuan Anh က ကမ္ဘောဒီးယား-ဗီယက်နမ် စီးပွားရေးဖိုရမ် ၂၀၂၅ သည် အကျိုးတူပါဝင်သူများအတွက် ဆွေးနွေးမှုများပြုလုပ်နိုင်ရန် အချက်အလက်များကို တိကျစွာ အဆင့်မြှင့်တင်နိုင်ရန်နှင့် ပူးပေါင်းဆောင်ရွက်မှုကို ပူးတွဲမြှင့်တင်နိုင်ရန် အခွင့်အရေးတစ်ခုဖြစ်ကြောင်း ပြောကြားခဲ့သည်။ ယခုဖိုရမ်သည် ကမ္ဘောဒီးယားနိုင်ငံ အနောက်မြောက်ပိုင်းမှ ပြည်နယ်များအတွက် စိုက်ပျိုးရေး၊ ခရီးသွားလုပ်ငန်း၊ ဝန်ဆောင်မှုနှင့် ပြည်တွင်းကုန်သွယ်ရေးတို့တွင် အလားအလာကောင်းများရှိပြီး ကမ္ဘောဒီးယား၏ စီးပွားရေးကွန်ရက်တွင်လည်း အရေးပါသော အခန်းကဏ္ဍမှ ပါဝင်နေကြောင်း Tran Tuan Anh က ထပ်‌လောင်းပြောကြားခဲ့သည်။ Yun Linn က Siem Rea ပြည်နယ်သည် ခရီးသွားလုပ်ငန်းကဏ္ဍတွင် အလားအလာအရှိဆုံးဖြစ်ကြောင်း ဖော်ပြခဲ့ပြီး ၎င်းသည် ကမ္ဘောဒီးယား၏ စီးပွားရေးတိုးတက်မှုအတွက် အရေးကြီးသော မောင်းနှင်အားတစ်ခုဖြစ်ကြောင်း ပြောကြားခဲ့သည်။ ဗီယက်နမ်နိုင်ငံသည် ကမ္ဘောဒီးယား၏ အရေးကြီးသော ကုန်သွယ်ဖက်နိုင်ငံတစ်ခုဖြစ်ပြီး ရင်းနှီးမြှုပ်နှံမှုဥပဒေ အသစ်နှင့် ကောင်းမွန်သော စီးပွားရေးပတ်ဝန်းကျင်အောက်တွင် ကမ္ဘောဒီးယားနိုင်ငံ၏ ရင်းနှီးမြှုပ်နှံမှုအခွင့်အလမ်းများလည်း အားကောင်းလာ နေကြောင်း ပြောကြားခဲ့သည်။ Yun Linn က စီးပွားရေးလုပ်ငန်းရှင်များနှင့် ရင်းနှီးမြှုပ်နှံသူအား လုံးအနေဖြင့် စီးပွားရေးကွန်ရက်များတိုးချဲ့ရန်၊ အတွေ့အကြုံများဖလှယ်ရန်နှင့် မိတ်ဖက်အသစ်များရရှိရန် ဤရှားပါးသော အခွင့်အရေးကို ဆုပ်ကိုင်ကြရန် တိုက်တွန်းခဲ့ကြောင်း သိရှိရပါသည်။

Source: Khmer Times                                                         

DOCA(ရန်ကုန်)

          ကမ္ဘာ့ဘဏ်သည် ကမ္ဘောဒီးယားနိုင်ငံ၏ စီးပွားရေးတိုးတက်မှုနှင့် ဆင်းရဲမွဲတေမှု လျှော့ချရေးအတွက် အရေးပါသောကဏ္ဍတစ်ခုအဖြစ် ခရီးသွားလုပ်ငန်းကဏ္ဍကို အသိအမှတ်ပြုခဲ့ပြီး နိုင်ငံ၏ ခရီးသွားလုပ်ငန်းအလားအလာကို ပိုမိုဖွံ့ဖြိုးတိုးတက်စေရန်အတွက် ခရီးသွားလုပ်ငန်းဝန်ကြီးဌာနနှင့် မိတ်ဖက်အသစ်တစ်ရပ် ဖွဲ့စည်းခဲ့သည်။ ခရီးသွားလုပ်ငန်းဝန်ကြီး Huot Hak သည် ၂.၁၂.၂၀၂၅ ရက်နေ့က ဝန်ကြီးဌာနတွင် ကမ္ဘာ့ဘဏ်၏ ကမ္ဘောဒီးယားနိုင်ငံဆိုင်ရာ မန်နေဂျာ Tania Meyer နှင့် သူမ၏အဖွဲ့အား အလုပ်သဘောလက်ခံတွေ့ဆုံခဲ့သည်။ တွေ့ဆုံမှုအတွင်း Tania Meyer နှင့်အဖွဲ့တို့သည် ယခင်အစီအစဉ်များကို ပြန်လည်သုံးသပ်ခဲ့ပြီး ရပ်ရွာအခြေပြုခရီးသွားလုပ်ငန်း၊ ဂေဟစနစ် ခရီးသွားလုပ်ငန်းနှင့် ဒေသခံအသက်မွေးဝမ်း ကျောင်းလုပ်ငန်းများတွင် ပူးပေါင်းဆောင်ရွက်မှုအတွက် အခွင့်အလမ်းအသစ်များကို ရှာဖွေခဲ့ကြသည်။ Meyer က ကမ္ဘောဒီးယားအစိုးရအား စဉ်ဆက်မပြတ်ပံ့ပိုးမှုအတွက် ကျေးဇူးတင်ရှိကြောင်း ပြောကြားခဲ့ပြီး စီးပွားရေးဖွံ့ဖြိုးတိုးတက်မှု၊ အလုပ်အကိုင်ဖန်တီးမှုနှင့် ဒေသခံစီးပွားရေး မြှင့်တင်ရေးအပေါ် ခရီးသွားလုပ်ငန်းကဏ္ဍ၏ သက်ရောက်မှုဆိုင်ရာ လေ့လာမှုများအပါအဝင် အဓိကစီမံကိန်းများကို ပြီးမြောက်အောင်မြင်စွာ ပူးပေါင်းဆောင်ရွက်မှုများကို အလေးပေးပြောကြားခဲ့သည်။ ယခင် စီမံကိန်းများ၏ အောင်မြင်သောရလဒ်များ၊ အစိုးရ၏ ကောင်းမွန်သော ပူးပေါင်းဆောင်ရွက်မှုနှင့် နိုင်ငံသားများနှင့် ရပ်ရွာများ၏ အသက်မွေးဝမ်းကျောင်းမှုအတွက် ခရီးသွားလုပ်ငန်းကဏ္ဍ၏ သိသာထင်ရှားသော ပံ့ပိုးကူညီမှုများကိုအခြေခံ၍ ကမ္ဘာ့ဘဏ် (WB) သည် ခရီးသွားလုပ်ငန်းကဏ္ဍကို ပံ့ပိုးပေးနိုင်ပြီး ဖွံ့ဖြိုးတိုးတက်စေနိုင်သည့် လာမည့်စီမံကိန်းများအပြင် ကမ္ဘာ့ဘဏ်နှင့် ခရီးသွားလုပ်ငန်းဝန်ကြီးဌာနအကြား မိတ်ဖက်အဖွဲ့အစည်းတစ်ခု တည်ထောင်ခြင်းကို Meyer က ဆက်လက်ပြောကြားခဲ့သည်။ ဝန်ကြီး Hak က ကမ္ဘာ့ဘဏ်အား စဉ်ဆက်မပြတ်ပံ့ပိုးမှုနှင့် မိတ်ဖက်အဖြစ် ဆောင်ရွက်ပေးခဲ့မှုအတွက် ကျေးဇူးတင်ရှိကြောင်း၊ အမျိုးသားခရီးသွားလုပ်ငန်းကဏ္ဍ၏ ရေရှည်တည်တံ့သော တိုးတက်မှုကို အထောက်အကူပြုသည့်အပြင် ကမ္ဘောဒီးယားနိုင်ငံသားများအတွက် လက်တွေ့ကျသော စီးပွားရေးအကျိုးကျေးဇူးများနှင့် အခွင့်အလမ်းများကို ပေးစွမ်းသည့် ဂေဟစနစ်ခရီးသွားလုပ်ငန်း အသိုက်အဝန်းများ ဖွံ့ဖြိုးတိုးတက်ရေးတွင် စဉ်ဆက်မပြတ် ပူးပေါင်းဆောင်ရွက်မှု၏ အရေးပါမှုကို ပြောကြားခဲ့ကြောင်း သိရှိရပါသည်။

Source: Khmer Times

DOCA(ရန်ကုန်)  

          စဉ်ဆက်မပြတ်ဖွံ့ဖြိုးတိုးတက်‌ရေးရည်မှန်းချက်နှင့်အတူ ဗီယက်နမ်နှင့် တရုတ်တို့သည် ဒစ်ဂျစ်တယ်စီးပွားရေးနှင့် အစိမ်းရောင်အသွင်ကူးပြောင်းမှုတွင် ပူးပေါင်းဆောင်ရွက်မှုမြှင့်တင်ရန် ကျယ်ပြန့်သောအခန်းကဏ္ဍကို ပိုင်ဆိုင်ထားကြောင်း ၂၀၂၅ ခုနှစ် ဆောင်းဦးရာသီစီးပွားရေးဖိုရမ် ၏တစ်စိတ်တစ်ပိုင်းအနေဖြင့် ဟိုချီမင်းမြို့တော်တွင် နိုဝင်ဘာလ ၂၇ ရက်နေ့ကကျင်းပခဲ့သည့် ဗီယက်နမ်-တရုတ်စီးပွားရေးအလုပ်ရုံဆွေးနွေးပွဲတွင် ပြောကြားခဲ့ပါသည်။ ဗီယက်နမ်နိုင်ငံ မြူနီ စပယ်ပြည်သူ့ကော်မတီ ဒုတိယဥက္ကဌဖြစ်သူ Nguyen Loc Ha က ဗီယက်နမ်-တရုတ်ပူးပေါင်း ဆောင်ရွက်မှုသည် အထင်ကြီးဖွယ်ဖွံ့ဖြိုးတိုးတက်ခဲ့ကြောင်း ပြောကြားခဲ့ပါသည်။ သီးခြားအနေဖြင့် ထောက်ပံ့ပို့ဆောင်‌ရေးနယ်ပယ်တွင် ပူးပေါင်းဆောင်ရွက်မှုအားကောင်းခဲ့ပြီး ကုန်စည်ထုတ်လုပ်ခြင်းနှင့် အပြန်အလှန်ကုန်သွယ်ရေးကို အရှိန်မြှင့်တင်ပေးနိုင်ခဲ့ကြောင်း သိရပါသည်။ နိုင်ငံခြားတိုက်ရိုက်ရင်းနှီးမြှုပ်နှံမှုက စက်မှုအသွင်ကူးပြောင်းခြင်းနှင့် တင်ပို့မှုစွမ်းရည်မြှင့်တင်ခြင်းတွင် အရေးပါသောအခန်းကဏ္ဍကရပ်တည်နေခြင်းနှင့်အတူ ဗီယက်နမ်သည်စိုက်ပျိုးမွေးမြူရေး စီးပွားရေးမှ ကမ္ဘာလုံးဆိုင်ရာကုန်သွယ်ရေးကွင်းဆက်တွင် အရေးကြီးသောနိုင်ငံအဖြစ်သို့ အသွင်ကူးပြောင်းခဲ့ကြောင်း သိရပါသည်။ ဟိုချီမင်းမြို့တော်သည် တရုတ်ထံမှရင်းနှီးမြှုပ်နှံမှုများကို ထိပ်တန်းဆွဲဆောင်သူအဖြစ်ရပ်တည်နေကြောင်း သိရပါသည်။ လတ်တလောတွင် ၎င်း၌ သတင်းအချက်အလက်နည်းပညာနှင့် ဒစ်ဂျစ်တယ်အသွင်ကူးပြောင်းခြင်း၊ စမတ်ကုန်ထုတ်လုပ်ခြင်း၊ ထောက်ပံ့ပို့ဆောင်ရေး၊ e-commerce ၊ ပြည့်ဖြိုးမြဲစွမ်းအင်နှင့် အစိမ်းရောင်နည်းပညာများအစရှိ သည့်ကဏ္ဍများတွင် အမေရိကန်ဒေါ်လာ ၃ ဘီလီယံနီးပါးရှိသော တရုတ်ရင်းနှီးမြှုပ်နှံသည့် စီမံကိန်း ၈၀၀ ကျော်ပိုင်ဆိုင်ထားကြောင်း သိရပါသည်။ Ha ၏အဆိုအရ ဟိုချီမင်းမြို့တော်နှင့် တရုတ်တို့တွင် ဒစ်ဂျစ်တယ်အသွင်ကူးပြောင်းခြင်းနှင့် AI၊ စမတ်ကြီးမားသောမြို့တော် တည်‌ထောင်ခြင်းနှင့် ဘဏ္ဍာရေးရင်းနှီးမြှုပ်နှံမှုချိတ်ဆက်ခြင်းတို့တွင် ပူးပေါင်းဆောင်ရွက်ရန် အတွက် များစွာသောအခွင့်အလမ်းများကို ပိုင်ဆိုင်ထားကြောင်း သိရပါသည်။ ဟိုချီမင်းမြို့တော်ရှိ တရုတ်ကောင်စစ်ဝန်ချုပ် Tang Li က တရုတ်သည် ချိတ်ဆက်ခြင်း၊ ထုတ်လုပ်မှုတွင်ပူးပေါင်း ဆောင်ရွက်ခြင်းနှင့် ဒစ်ဂျစ်တယ်စီးပွားရေးအစရှိသည့် ဧရိယာများတွင် ဗီယက်နမ်နှင့်အတူမူဝါဒ ညှိနှိုင်းဆွေးနွေးမှုဆက်လက်မြှင့်တင်သွားမည်ဖြစ်ပြီး ကုန်သွယ်ရေးနှင့် ရင်းနှီးမြှုပ်နှံမှုအတွက် သင့်လျော်သောဝန်းကျင်တစ်ရပ်ကိုဖန်တီးရန်လုပ်ကိုင်သွားမည်ဖြစ်ကြောင်း ပြောကြားခဲ့ပါသည်။ တစ်ချိန်တည်းမှာပင် ဟိုချီမင်းမြို့တော်နှင့် တရုတ်တို့သည် အခြေခံအရင်းအမြစ်များဝေမျှမှု မြင့်တက်ရန်၊ စီးပွားရေးဖိုရမ်များအကြားချိတ်ဆက်မှုများအားကောင်းရန်နှင့် ထိရောက်မှုရှိသော အပြန်အလှန်ပံ့ပိုးမှုယန္တယားတည်ထောင်ရန်အတွက် ကုန်စည်ပြပွဲများကျင်းပရန် သဘောတူညီခဲ့ကြကြောင်း သိရပါသည်။

Vietnam Plus                                                                            

DOCA (ရန်ကုန်)

          Nigera နိုင်ငံ၏ စီးပွားရေးအခြေအနေများသည် ငွေကြေးဖောင်းပွမှုနှင့် ငွေကြေးမူဝါဒတင်းကျပ်စွာ လုပ်ဆောင်မှုအပေါ် ဖိအားပေးခံရမှုကြောင့် တတိယ သုံးလပတ်ကာလတွင် တစ်နှစ်ထက် တစ်နှစ် ၃.၉၈ ရာခိုင်နှုန်းခန့် မြင့်တက်လာကြောင်း ဒီဇင်ဘာလ ၁ ရက်နေ့တွင် ထုတ်ပြန်သော အချက်အလက်များအရ သိရပါသည်။ ၎င်းနိုင်ငံ၏ စီးပွားရေးချဲ့ထွင်မှုများသည် ပြည်တွင်းအသား တင်ကုန်ထုတ်လုပ်မှုအပေါ် စာရင်းတွက်ချက်မှုများ ပြုလုပ်အပြီးတွင် ၃.၁၃ ရာခိုင်နှုန်းခန့် ချဲ့ထွင်ခဲ့ ကြောင်း သိရပါသည်။ တတိယ သုံးလပတ်ကာလတွင် Nigeria နိုင်ငံ၏ လောင်စာဆီကဏ္ဍသည် တစ်နှစ်ထက်တစ်နှစ် ၅.၈၄ ရာခိုင်နှုန်းခန့်မြင့်တက်ခဲ့ကြောင်းနှင့် အဆိုပါမြင့်တက်မှုသည် တစ်နေ့ လျှင် ရေနံစိမ်းစည်ပေါင်း ၁.၆၄ သန်းခန့် ထုတ်လုပ်နိုင်မှုကြောင့်ဖြစ်ကြောင်း သိရပါသည်။ သို့ရာတွင် အဆိုပါကဏ္ဍ၏ ရှယ်ယာများသည် ၃.၄၄ ရာခိုင်နှုန်းခန့်ကျဆင်းခဲ့ပြီး ၎င်းသည် Nigeria နိုင်ငံ၏ ဆီမဟုတ်သောကဏ္ဍများအပေါ် မှီခိုနေရခြင်းကိုဖော်ပြနေကြောင်း သိရပါသည်။ Nigeria နိုင်ငံ အမျိုးသားစာရင်းအင်းဗျူရိုက ဆီမဟုတ်သောကဏ္ဍတွင် ၃.၉၁ ရာခိုင်နှုန်းခန့်ချဲ့ထွင်ခဲ့ကြောင်း၊ ဝန်ဆောင်မှုနှင့် စက်မှုလုပ်ငန်းတွင် စီးပွားရေးဖွံ့ဖြိုးတိုးတက်မှု ၄.၁၅ ရာခိုင်နှုန်းခန့်ရှိလာကြောင်းနှင့် စိုက်ပျိုးရေးကဏ္ဍတွင် ၃.၇၇ ရာခိုင်နှုန်းဖွံ့ဖြိုးတိုးတက်မှုရှိလာကြောင်း ပြောကြားခဲ့ပါသည်။ ကမ္ဘာ့ဘဏ်က Nigeria နိုင်ငံသည်၎င်း၏ စီးပွားရေးကို မူဝါဒပြန်လည်တည်ဆောက်ခြင်းမှတစ်ဆင့် တည်ငြိမ်အောင်လုပ်ဆောင်နေကြောင်းပြောကြားခဲ့ပါသည်။ ထို့အပြင်၎င်းဘဏ်က Nigeria နိုင်ငံအား အစားအသောက်ဈေးနှုန်းများထိန်းချုပ်ရန်နှင့် လူနေမှုအဆင့်အတန်းများမြှင့်တင်ရန် တိုက်တွန်းလျက်ရှိကြောင်း သိရှိရပါသည်။

Source: Reuters                                                                        

DOCA (ရန်ကုန်)